Inai Sivarai Namona do Idia Harorolaia Guna
“Sivarai Namo bese ibounai dekenai be do idia haroro henia guna.”—MAREKO 13:10.
1, 2. Witness taudia edia toa korikorina be dahaka, bona dahaka dainai?
DAHAKA dainai Iehova ena Witness taudia idia haroro hanaihanai? Momokani, tanobada ibounai lalonai, taunimanima be ita idia diba, badina be ruma ta ruma ta ai, o dala ai, o gabu idaudia ai, ita haroro dainai. Nega maorodia iboudiai, ita hahedinaraia ita be Witness taudia, bona ita laloa bada sivaraina namona be ita gwauraia hedinarai toho mai eda hemataurai ida. Momokani, unai gaukara be iseda toa korikorina!—Kolose 4:6.
2 Mani inai oi laloa—taunimanima ese tatau bona hahine mai natudia ida, dabua namodia idia hahedokilaidia taudia mai edia haroro baegedia, be edia ruma kahirakahira dekenai idia itadia neganai, dahaka idia gwau? Idia gwau lasi “Katolik taudia idia mai lou inai” o “Pentekostal taudia idia mai lou inai.” Lasi. Idia diba unai bamona tomadiho oreadia taudia, tatau mai adavadia bona natudia danu, be ruma ta ruma ta ai idia haroro lasi. Tomadiho oreadia haida ese “misinari taudia” haida idia siaidia lao, lagani rua lalodiai idau gabudia ai do idia haroro, to edia orea taudia oredia be unai bamona gaukarana idia karaia lasi. Tanobada ibounai lalonai taunimanima idia diba Iehova ena Witness taudia mo sibodia be nega maorodia iboudiai idia haroro mai edia goada ida. Bona edia magasin, Gima Kohorona bona Noga!, dainai idia diba idia.—Isaia 43:10-12; Kara 1:8.
Kerisendom Ena Haroro Taudia Hegeregeredia Lasi
3 To niusi ai idia hahedinaraia loulou vadaeni, tano haida lalodiai haroro taudia momo be matabodaga taudia bona koikoi taudia. Edia lebulebu karadia bona edia noho daladia, dava bada gaudia moalelaidia daladia, be idia hedinarai goevagoeva. Ane toredia tauna ta ese edia kerere be ena ane ta ai ia gwauraidia goevagoeva. Unai ane ladana be “Iesu ese Rolex [dava bada herea dina gauna] be Iena Televisen Sou ai Do Ia Karaia, A?” Ia henanadai, ia gwau: “Bema Iesu be Tanobada ai do Ia giroa mai, politikol karadia do Ia karaia, a? Iena ruma iharuana be Palms Springs [taga gabuna] ai do Ia abia bona Iena taga do Ia hunia toho, a?” Iakobo ena hereva be idia dekenai ia momokani: “Tanobada dekenai umui noho neganai umui ura henidia karadia bona gaudia umui moalelaia mai lebulebu danu.”—Iakobo 5:5; Galatia 5:19-21.
3, 4. Nega momo niusi ai Kerisendom ena haroro taudia edena bamona idia gwauraidia?
4 Haroro taudia be politik taudia ida idia hetura heheni bona elekseni ai politikol dagidia idia tahudia; unai ese ia hahedinaraia idia be taravatu hadibaia taudia bona Farisea taudia hegeregeredia. Bona United States bona Canada ai tomadiho oreadia edia moni be kota ai idia haorea, badina be haroro taudia edia matabodaga karadia dainai idia samanidia dainai.—Mataio 23:1-3.
5. Dahaka dainai Kerisendom ena haroro taudia be “hesiai tauna mai ena kamonai bona mai ena kara maoromaoro” lasi?
5 Gunaguna Iesu ese tomadiho gunalaia taudia ia hereva henidia, ia gwau: “Taravatu hadibaia taudia bona Farisea taudia, kara koikoi taudia, dika do umui davaria momokani! Badina umui be mase guria gabuna peni amo idia hakurokuroa bamona, edia murimuri kahana itaia neganai be idia namo, to edia lalonai be mase edia turiana bona miro ibounai idia honu momokani. Unai bamona danu taunimanima ese umui idia itaia be kara maoromaoro taudia bamona, to emui lalona be koikoi bona kerere idia honu momokani vadaeni.” Unai hegeregerena, Dirava ese Kerisendom ena haroro taudia, Katolik, Protestan bona orea idaudia taudia unai, ia duanaidia lasi sivarai namona do idia harorolaia. Idia be iena “hesiai tauna mai ena kamonai bona mai ena kara maoromaoro” lasi.—Mataio 23:27, 28; 24:45-47.
Dahaka Dainai Sivarai Namona Idia Harorolaia Guna?
6 Mareko ese Iesu ena hahegani, sivarai namona be bese iboudiai do idia harorolai henidia haheganina, ia torea neganai, ia mo sibona ese inai hereva “guna” ia torea. (Mareko 13:10; ma danu Mataio 24:14 itaia.) Inai hereva “guna” ia torea ese ia hahedinaraia sivarai namona be tanobada ibounai lalonai do idia harorolaia murinai ma gau haida do idia vara; anina be hisihisi bada hereana do ia vara bena Keriso ese tanobada matamatana do ia lohiaia mai ena kara maoromaoro ida.—Mataio 24:21-31; Apokalupo 16:14-16; 21:1-4.
7. Dahaka dainai Dirava ia ura sivarai namona do idia harorolaia guna?
7 Dahaka dainai Dirava ia ura sivarai namona do idia harorolaia guna? Badina ta be ia be lalokau, hahemaoro goevagoeva, aonega, bona siahu Diravana. Iesu ena hereva Mataio 24:14 bona Mareko 13:10 ai edia anina ia vara neganai, unai Iehova ena kara idia hahedinaraidia goevagoeva. Iena kara ta ta edia anina sivarai namona harorolaia gaukarana dekenai be mani ita tahua.
Sivarai Namona Bona Iehova Ena Lalokau
8 Sivarai namona harorolaia gaukarana ese Dirava ena lalokau edena bamona ia hahedinaraia? Bese tamona o orea tamona hadibadia totona ia halasia lasi. Ia be sivarai namona ‘bese iboudiai’ dekediai. Dirava ese taunimanima ia ura henidia bada dainai, ena Natuna ia siaia tanobada dekenai, bese tamona edia dika mo lasi to taunimanima iboudiai edia dika abia oho totona. Aposetolo Ioane ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia. . . . Tanobada ia kota henia totona ia mai lasi, to tanobada be ia dainai mauri do ia abia.” (Ioane 3:16, 17) Momokani, tanobada matamatana, ia lalonai maino, lalo-tamona, bona kara maoromaoro do idia noho tanobadana, ena sivarai namona ese Dirava ena lalokau ia hahedinaraia.—2 Petero 3:13.
Sivarai Namona Bona Iehova Ena Siahu
9 Iehova ena siahu be sivarai namona harorolaia gaukarana ese edena bamona ia hahedinaraia? Mani oi laloa, daidia ia hagaukaradia, unai gaukara do idia karaia totona? Kerisendom ena tomadiho oreadia mai siahudia, Roman Katolik Tomadiho Oreana eiava Protestan tomadiho oreadia badadia be ia ese ia gaukaralaidia a? Lasi. Politik ai idia vareai dainai idia be hegeregere lasi. (Ioane 15:19; 17:14; Iakobo 4:4) Idia be mai edia taga, bona lohia taudia idia bamodia bona edia lalodia idia anidia. Unai edia kara bona edia hahediba herevadia kereredia danu be Iehova Dirava ese ia moalelaidia lasi. Dirava ese taunimanima edia siahu ia gaukaralaia lasi, iena ura hagugurua totona.—Sekaria 4:6.
10. Dirava ese daidia ia abidia hidi do idia haroro totona?
10 Unai be aposetolo Paulo ena hereva hegeregerena; Korinto ena kongregesen taudia ia tore henidia, ia gwau: “Dirava ese umui ia boiria dalana mani umui laloa. Unai neganai umui momo lasi be mai aonega, inai tanobada ena aonega bamona. Bona umui momo lasi be mai siahu, inai tanobada ena siahu bamona. Umui momo lasi danu be lohia taudia. To tanobada ena kavakava gaudia be Dirava ese ia abia hidi, aonega taudia do ia hahemaraia totona. Bona tanobada ena manoka gaudia danu Dirava ese ia abia hidi, goada taudia do ia hahemaraia totona. . . . Tanobada taudia idia laloa be anina lasi gaudia Dirava ese ia abia hidi, tanobada ena gau badadia do ia haorea totona. Inai anina be, tau ta Dirava vairanai ia hekokoroku diba lasi.”—1 Korinto 1:26-29.
11. Dahaka dainai Witness taudia be idau vaitani?
11 Iehova ena Witness taudia edia orea lalonai, moni momo taudia be momo lasi, bona mai edia politikol siahuna taudia be lasi, lasi vaitani, badina be politik amo idia gini siri momokani dainai. To nega momo dagedage idia hisihisilaia, tomadiho gunalaia taudia bona politik gunalaia taudia ese idia havaraia dagedagena unai. To, ena be Nazi taudia, Fasisi taudia, Komiunisi taudia, sibodia edia bese ladadia abidia isi taudia, bona tomadiho koikoi taudia danu ese idia dagedage henidia bada, to Witness taudia ese sivarai namona tanobada ibounai lalonai idia harorolaia noho, bona hoa dalanai idia momo daekau danu.—Isaia 60:22.
12. Dahaka dainai Witness taudia idia kwalimu?
12 Witness taudia idia laloa idia be dahaka dainai idia kwalimu? Iesu ese ena hahediba taudia ia gwauhamata henidia, ia gwau: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai . . . do ia lao bona tanobada ena kahana ibounai.” Dahaka dainai do idia kwalimu? Iesu ia gwau: “Dohore siahu umui abia, Lauma Helaga umui dekenai ia diho neganai.” Unai hegeregerena, hari inai negai danu, tanobada hegegemadai Witness taudia be edia haroro gaukarana ai idia kwalimu, Dirava ena amo ia mai siahuna dainai, taunimanima edia diba dainai lasi. Toana be idia manoka momokani, to Dirava ese ia hagaukaradia, hahediba gaukarana bada hereana karaia totona.—Kara 1:8; Isaia 54:13.
Sivarai Namona Bona Iehova Ena Aonega
13 Sivarai Namona be volantia taudia ese idia harorolaia. Iesu ia gwau: “Gau momo umui abia vadaeni, davana lasi. Unai dainai gau momo do umui henia, davana lasi.” (Mataio 10:8) Unai dainai, Iehova ena Witness taudia ese pei idia abia lasi, Dirava ena hesiai idia lao henia davana, bona idia tahua lasi. Edia hebou ai moni idia gogoa lasi. Sibodia edia namo idia tahua lasi, to edia hesiai gaukarana idia karaia mai edia moale ida, badina be unai edia gaukara dainai Dirava ese Satana Diabolo ia haere henia diba. Gunaguna Satana ese ia gwau dika henia; ena hereva ena anina be, bema taunimanima ese Dirava ena hesiai lao henia karana amo sibodia edia namo do idia havaraia diba lasi, ena hesiai do idia lao henia lasi. Iena aonega ai Iehova ese Satana ena hereva haerelaia gauna ia havaraia; gauna be Keristen Witness taudia milion milion, sivarai namona idia harorolaia, ruma ta ruma ta ai, dala ai, bona gabu idaudia ai danu.—Iobu 1:8-11; 2:3-5; Hereva Lada-isidia 27:11.
14. ‘Aonega hehunina,’ Paulo ese ia gwauraia gauna, be dahaka?
14 Dirava ena aonega be sivarai namona harorolaia gaukarana ai ia hedinarai dalana ma ta be inai: Ena aonega be Basileia gwauhamatana lalonai ia hedinarai. Aposetolo Paulo ia gwau: “Lauma Helaga ena diba gaudia dekenai idia goada vadaeni taudia, be lau ese aonega hereva dekena amo lau haroro henidia. . . . Lau harorolaia aonega be Dirava ena. Inai aonega be hunia gauna, tanobada taudia idia diba lasi gauna. Tanobada ia do karaia lasi neganai Dirava ese inai aonega dalana ia karaia hegaegae, ita ese hairai momokani dohore ita abia totona.” Unai ‘aonega hehunina’ ena anina be, Dirava ese Eden ai ia matama gwau-edeedena do ia haorea mai ena aonega ida dalana. Unai aonega be Iesu Keriso lalonai ia hahedinaraia; Dirava ena Basileia sivaraina namona lalonai ia be mai anina bada.—1 Korinto 2:6, 7; Kolose 1:26-28.
Sivarai Namona Bona Dirava Ena Hahemaoro Goevagoeva
15. Edena bamona ita diba Iehova be hahemaoro goevagoeva Diravana? (Deuteronomi 32:4; Salamo 33:5)
15 Hahemaoro goevagoeva ai, inai hereva “guna” Mareko 13:10 ai be mai anina bada. Iehova be hahemaoro goevagoeva Diravana mai ena hebogahisi. Ena peroveta tauna Ieremia ena amo ia gwau: “Lau be Iehova, hebogahisi karadia bona hahemaoro goevagoeva bona kara maoromaorodia lau karaia tanobada ai; badina be unai gau lau moalelaidia.”—Ieremia 9:24.
16. Haheitalai ta amo oi hahedinaraia hahemaoro goevagoeva anina be hadibadia guna?
16 Iehova ena hahemaoro goevagoeva be sivarai namona harorolaia gaukarana ai edena bamona ia hedinarai? Inai amo mani ita haheitalaia: Hahine ta ese keike namona ia karaia, gabeai vadivadi taudia do idia mai neganai do idia ania. Bema aniani patana latanai ia rakatania to ania negana korikorina be ena natuna ia hamaorolaidia lasi, do idia ura do idia mamia toho, ani? Bema ia taravatudia guna lasi, gabeai panisidia karana ena maoro do ia hamomokania be auka. To bema ia hadibadia goevagoeva do idia ania diba lasi badina be ia be vadivadi taudia edia, bena bema idia kamonai henia lasi, do ia panisidia be maoro.—Hereva Lada-isidia 29:15.
17. Lagani 1919 amo ema, Iehova ese hahemaoro goevagoeva be edena dala idauna ai ia hahedinaraia?
17 Ena hahemaoro goevagoeva ai, Iehova ese inai tanobada dikana taudia do ia panisidia lasi, ela bona do ia hadibadia guna. Unai dainai ia ese ena Witness taudia ia siaidia, sivarai namona be tanobada ibounai lalonai do idia harorolaia goadagoada totona. Tanobada ibounai tuarina ginigunana ese “hisihisi” ia havaraia murinai, lagani 1919 amo ema bona hari, idia harorolaia badabada. (Mataio 24:7, 8, 14) Tanobada besedia be idia gwau diba lasi inai hadibaia herevana idau hereana be idia diba lasi.
Tanobada Ena Kahana Hida ai Idia Haroro Vadaeni?
18 Buka ta ladana Last Places—A Journey in the North ese ia hahedinaraia hari hahediba gaukarana tanobada hegegemadai idia karaia ese anina ia havaraia. Torea tauna ia gwau, Shetland Islands, Scotland ena not kahana motumotudia, ta ladana Foula ena davara mapudia be ia sekedia neganai, idia hahedinaraia idia mutu vadaeni sisimadia, bona davara nadidia, bona moemoe ese unai motumotu idia gegea ahu. Ia gwau: ‘Unai gau dainai, bouti haheaua taudia, bona holide taudia, bona gavamani ena gaukara taudia be unai motumotu idia lao henia be auka, to dina momo lasi murinai lau davaria Iehova ena Witness taudia be unuseni idia lao vadaeni.’ Ma ia gwau: “Siti badadia edia kahadia dikadia ai bona ogogami tanodia ai idia ese edia tomadiho dalana do idia abia dae taudia idia tahudia; unai hegeregerena, motumotu daudauna Foula ai idia haroro.” Ia gwau hua haida idia lao vadaeni Gima Kohorona ta be unai motumotu tauna ta, Andrew, ena iduara ai idia rakatania. Ma ia gwau: “Pura ta murinai lau ese [Noga! Danish gado ai] be Faeroes [North Sea motumotudia] ai lau itaia bona hua rua murinai [Gima Kohorona Danish gado ai] be Nuuq ai lau itaia, Greenland ai.” Unai ese ia hahedinaraia goevagoeva Iehova ena Witness taudia be unai not kahana gabudia ai idia haroro goadagoada!
Dahaka Dainai Witness Taudia ese Edia Haroro Idia Hadokoa Lasi?
19 Momokani, herevana ta be lagani hida Witness tauna ai ia lao vadaeni, to ruma ta ruma ta ai idau taudia ia haroro henidia be auka. Vadaeni, dahaka dainai hari Keristen taudia idia haroro noho? Edia Keristen gwauhamatana bona edia maduna idia laloa dainai. Paulo ia gwau: “Sivarai Namona lau harorolaia dainai lau heagi diba lasi. Badina unai bamona do lau karaia be Dirava ese ia oda vadaeni. Bema Sivarai Namona lau harorolaia lasi neganai, madi, lau be dika momokani!” Keristen momokani taudia ese hahemauri sivaraina idia dogoatao sibodia edia be maoro lasi, ani? Sivarai namona idia harorolaia, badina be idia diba bema dika neganai taunimanima idia hadibadia lasi, edia rara dainai do idia kerere.—1 Korinto 9:16; Esekiel 3:17-21.
19, 20. (a) Dahaka dainai Witness taudia ese edia haroro idia hadokoa lasi? (b) Dahaka henanadai be hereva gabena ese do ia haerelaidia?
20 Vadaeni, Witness taudia ese sivarai namona edena bamona idia harorolaia? Badina be dahaka idia kwalimu? Edia gaukara bona edia orea lalodiai dahaka dahaka ese idia hahedinaraia idia be tomadiho momokani taudia? Hereva gabena ese unai henanadai do ia haerelaidia.
Oi Laloatao A?
◻ Dahaka ese ia hahedinaraia Iehova ena Witness taudia be Kerisendom ena haroro taudia hegeregeredia lasi?
◻ Haroro gaukarana ese Dirava ena lalokau, siahu, bona aonega edena bamona ia hahedinaraidia?
◻ Sivarai namona harorolaia gaukarana ese Dirava ena hahemaoro goevagoeva edena bamona ia hahedinaraia?
◻ Dahaka dainai Iehova ena Witness taudia idia gaukara noho?
6. Nega daudau lasi dahaka dahaka do idia vara?
8. Sivarai namona harorolaia gaukarana ese Dirava ena lalokau edena bamona ia hahedinaraia? (1 Ioane 4:7-16)
9. Dahaka dainai Iehova ese Kerisendom ena tomadiho oreadia mai siahudia ia gaukaralaidia lasi, sivarai namona do idia harorolaia totona?
13. (a) Dahaka dainai Witness taudia be sibodia edia ura hegeregerena idia gaukara bona pei idia abia lasi? (b) Iehova ese Satana ena hereva dikana edena bamona ia haerelaia?
18. (a) Dahaka ese ia hahedinaraia Witness taudia be gabu daudaudia ai idia haroro? (b) Dahaka sivarai unai bamodia ma haida be oi diba?
[Picture on page 15]
Herevana taunimanima edia noho gabuna be ede daudauna, to Iehova ena Witness taudia idia ura do idia lao henidia