Iehova Lalonai Oi Moale!

“Nega ibounai do umui moale, Lohiabada lalonai umui noho dainai. Ma lau gwau lou: do umui moale.”​—FILIPI 4:4.

1. Paulo ia gwau namona be nega ibounai Keristen taudia do idia moale; dahaka dainai ena hereva ita daradaralaia reana?

HARI inai negai, moale ena badina be momo lasi. Tano kahuna amo idia vara taudia, Keristen korikori taudia danu, ese inai lalohisihisi havaraia gaudia idia davaridia: gaukara lasi, gorere, edia lalokau taudia edia mase, sibodia edia manoka, eiava edia varavara o edia turadia gunadia edia badu. Unai dainai Paulo ena sisiba, “Nega ibounai do umui moale,” be edena bamona ita laloa be namo? Ena be hari inai negai gau dikadia bona hetoho idauidau idia vara, to ita moale diba a? Paulo ena hereva ma haida bema ita tahudia, unai ese ita do ia durua, unai ena hereva ena anina do ita diba totona.

Oi Moale—Dahaka Dainai Bona Edena Bamona?

² “Nega ibounai do umui moale, Lohiabada lalonai umui noho dainai. Ma lau gwau lou: do umui moale.” Inai hereva dainai reana Nehemia ena hereva ita laloa; lagani 2,400 gunanai Israel taudia ia hamaorodia, ia gwau: “Iehova moalelaia karana be emui goada gauna.” (Nehemia 8:10) Moale ese goada ia havaraia, bona ia be gabu aukana ta bamona, ia lalonai ta ia vareai bena ia mauri bona ena lalona ia namo. Moale ese tau goevadaena Iesu danu ia durua dainai, ia haheauka diba. “Satauro dainai ia hesiku lasi. Lasi momokani. Ia diba guba ena moale be ia vairanai ia noho dainai ia ese satauro ena hemarai bona ena mase ia laloa lasi.” (Heberu 12:2) Momokani, hekwarahi negadiai ita moale diba be gau badana, hahemauri do ita abia totona.

2, 3. Iesu bona idaunegai Israel taudia ese idia hahedinaraia hegeregerena, moale ena namo be dahaka?

³ Gwauhamata Tanona ai idia do vareai lasi neganai, Mose ese Israel taudia ia haganidia, ia gwau: “Iehova, emu Dirava, ese oi bona emu ruma taudia ia henia vadaeni gaudia namodia be oi moalelaidia, oi bona Levi tauna bona oi dekenai ia noho idau bese tauna danu.” Bema Iehova ena hesiai idia lao henia lasi mai edia moale ida, dika bada do idia davaria. “Inai hadikaia herevadia iboudiai be oi latanai do idia diho, oi do idia gavaia bona oi dekenai do idia kau, ela bona do oi mase ore, . . . badina be Iehova emu Dirava ena hesiai lao henia karana oi moalelaia lasi bona gau momo oi dekenai idia noho dainai oi moale henia lasi.”​—Deuteronomi 26:11; 28:​45-47.

4. Reana dahaka dainai ita moale lasi?

⁴ Unai dainai, gau badana be horoa taudia oredia hari inai negai bona edia bamodia, “mamoe idaudia,” idia moale! (Ioane 10:16) Paulo ese ena sisiba ia gwauraia lou; unai amo ia hahedinaraia Iehova ese ita ia kara namo henia karadia iboudiai ita moalelaidia be gau badana. Ita moalelaidia a? Eiava dina dina iboudiai ita karaia karadia ita lalodia momo dainai, ita moalelaidia diba gaudia momo be nega haida ita lalodiaboio a? Hekwakwanai idia momo daekau dainai, Basileia bona ena hahenamo ita lalodia lasi a? Inai kara​—Dirava ena taravatu utua, Dirava ena hahegani laloa nege, eiava Keristen gaukaradia karaia lasi​—ese iseda moale idia kokia a?

5. Dahaka dainai manau lasi tauna do ia moale be auka?

⁵ “Emui manau bona manada kara taunimanima ibounai edia vairanai do umui hedinaraia. Lohiabada be kahirakahira ia ginidae.” (Filipi 4:5) Manau lasi tauna ia laloa maoromaoro lasi. Unai dainai, reana ena tauanina ia naria namonamo lasi bona ena lalo-hekwarahi amo ia hametaua kava. Reana ia abia dae lasi ia be mai ena manoka, bona ena manoka hegeregeredia ai ia noho lasi. Reana ia hegeregere lasi ia tahudia gaudia do ia abidia, to ia tahudia toho, herevana dika do ia vara. Eiava reana ena manoka be ekskiusi ena badina ai ia halaodia, ia gwau idia dainai ia gaukara goada lasi. Unai bamona tauna do ia moale be auka.

6. (a) Namona be iseda Keristen bamodia idia itaia ita be edena bamona taudia, bona unai be edena bamona do idia itaia diba? (b) Paulo ena hereva 2 Korinto 1:24 bona Roma 14:4 ai ese ita edena bamona idia durua, do ita manau totona?

⁶ Ena be iseda inai taudia idia gwau ita kavakava, to namona be nega ibounai iseda Keristen bamodia be eda lalo-manau do idia itaia diba. Bema kerere maragidia, idia edia bona iseda danu, be ita lalodia momo lasi, unai do idia diba. Gau badana be, maduna ma haida, Baibel ese ia gwauraidia lasi gaudia, be idia latadiai ita atodia lasi be namo. Aposetolo Paulo ia gwau: “Ai ese umui emui abidadama ai biagua lasi. . . . Unai dainai ai be umui danu ita gaukara hebou, emui moale do ai havaraia totona.” (2 Korinto 1:24) Guna Paulo be Farisea tauna, unai dainai ia diba siahu taudia ese idia haganilaia taravatudia aukadia ese moale idia koua, to ta ena bamona edia heduru herevadia ese idia habadaia. “Lohiabada be kahirakahira ia ginidae” dainai, namona be lalo-manau tauna ia laloatao, ‘tau ta ena hesiai tauna do ita gwauraia kerere’ be maoro lasi. “Iena Biaguna sibona ese do ia gwauraia ia be maoro o kerere.”​—Roma 14:4.

⁷ “Gau ta totona do umui laloa hekwarahi lasi. To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia.” (Filipi 4:6) Ita Keristen taudia be ‘metau dikadia momo idia vara’ negana lalonai ita noho dainai, ita diba hekwakwanai do ita davaridia. (2 Timoteo 3:​1-5) Ena be Paulo ia gwau “nega ibounai do umui moale,” to reana nega ta ta Keristen tauna mai ena kamonai ena lalona ia metau. Paulo ia gwau: “Kahana ibounai dekena amo hisihisi bona metau ai idia henia noho, to ai idia hadikaia momokani lasi. Nega haida ai laloa daradara, to gaukara dekena amo ai doko lasi. Taunimanima momo ese ai idia dagedage henia, to Dirava ese ai ia rakatania lasi. Ai idia botaia, ai moru, to ai mase lasi.” (2 Korinto 4:​8, 9) Keristen tauna be nega ta ta ia davaria lalo-hekwarahina bona lalohisihisina be ena moale ese ia hamaragia bona gabeai ia kokia. Goada ia henia, do ia goada karaia bona ia moalelaidia diba gaudia do ia lalodia noho totona.

7, 8. Dahaka dainai Keristen taudia idia diba hekwakwanai do idia davaridia, to edena bamona idia moale noho diba?

⁸ Hekwakwanai idia vara negadiai, Keristen tauna mai ena moale ese guriguri amo Iehova ena heduru ia noia mai ena manau ida. Ia dara doko lasi. Hekwakwanai ta be sibona ena diba hegeregerena ia hanaia toho murinai, inai hereva hegeregerena Iehova dekenai ia rakatania: “Emu maduna be Iehova latanai oi tahoa kau, ia ese oi do ia abia isi.” Unai nega lalonai, Iehova ia tanikiu henia noho, Iena hahenamo iboudiai dainai.​—Salamo 55:22; ma danu Mataio 6:​25-34 itaia.

9. Keristen tauna be hereva momokani ia diba; unai ese ena lalona edena bamona ia hamainoa, bona unai lalo-maino ese edena bamona ia durua?

⁹ “Dirava ena maino, eda diba ibounai ia hereaia mainona, ese emui lalona bona emui darana do ia gimadia, Keriso Iesu lalonai.” (Filipi 4:7, NW) Keristen tauna be Baibel ena hereva momokani ia diba; unai diba ese hereva koikoidia amo ia ruhaia, bona ia durua ia laloa namonamo totona. (2 Timoteo 1:13) Unai dainai, kara kereredia o aonega lasi karadia, hebamo namona idia hadikaia diba karadia, be ia dadaraidia. Kara gagevagageva bona kara dika dainai ena lalona ia hekwarahi lasi, to Iehova ia abidadama henia, ia laloa Ia ese Basileia amo do ia haoredia. Unai lalo-maino ese ena lalona ia naria namonamo, bona ena lalohadai ia hagoevadia bona ia hamaoromaorodia. Ena lalo-goevagoeva bona ena lalo-maoromaoro dainai gau momo ia moalelaidia diba, herevana inai heiriheiri tanobadana ese hekwakwanai bona hekwarahi ia havaradia.

10. Dahaka ita herevalaia eiava ita laloa mo neganai, moale korikorina ita davaria diba?

¹⁰ “Lauegu varavara taudia e, lauegu hereva orena be inai. Inai bamona karadia sibona do umui laloa: kara namodia, taunimanima edia ladana idia hanamoa karadia, momokani karadia, bogahisihisi henia karadia, kara maoromaoro, kara goevagoeva, lalokau karadia, mai mataurai karadia.” (Filipi 4:8) Keristen tauna ese gau dikadia herevalaidia eiava lalolaidia karana ia moalelaia lasi, unai dainai tanobada ena moale karadia momo amo ia siri. Bema ta ese sibona ena darana bona ena lalona be hereva koikoidia bona hevaseha herevadia kavakavadia amo ia hahonudia, bona bema kara kerere, kara bodaga, kara miro, bona kara dika rohoroho ia lalodia loulou, moale korikori ia davaria diba lasi. Ita ia hagoadaia gauna be inai: Ena be Satana ena tanobada dikana ai ita noho, to ita diba Keristen taudia ese gau namodia momo idia lalodia diba bona idia herevalaidia diba!

Moale Ena Badina Idauidau

¹¹ Ita moalelaia diba gauna ta be iseda tadikaka bese iboudiai lalodiai edia hetura. (1 Petero 2:17) Tanobada ena bese idauidau bona kopi idauidau taudia be idia heinai heheni, to Dirava ena orea taudia be lalokau ai idia hetura heheni. Edia lalo-tamona be intenesenel hebouheboudia ai ia hedinarai goevagoeva. Lagani 1993 ai, United States tauna ta be unai hebouhebou ta ia lao, Kiev, Ukraine ai; bena gabeai ia gwau: “Idia moale dainai idia tai, edia matadia idia diaridiari, idia rosia heheni, bona steidiam ena kahana kahana taudia be edia tamaru bona edia mukou idia davedia heheni; unai ibounai ese ia hahedinaraia goevagoeva, Dirava ena siahu henunai idia noho mai edia lalo-tamona ida. Iehova ese hoa dalanai ena orea tanobada hegegemadai lalonai ia havaradia gaudia be ai heagilaidia. Inai ese lau bona egu adavana emai lalona ia hamarerea bona emai abidadama ena anina ia habadaia.”

12. Isaia 60:22 ena anina be edena bamona ia vara, hari inai negai?

¹² Baibel ena peroveta herevadia edia anina be hari inai negai idia vara be Keristen taudia ese idia itaia neganai, unai ese edia abidadama ia hagoadaia! Isaia 60:22 mani oi laloa; ia gwau: “Maragina be daha ta ai do ia lao, bona maragimaragina be bese badana ai do ia lao. Lau, Iehova, be ena nega korikorina ai do lau haharagaia.” Basileia be lagani 1914 ai ia vara neganai, taunimanima 5,100 mo​—magarina unai​—be idia haroro. To idia hanai laganidia ima lalodiai, iseda orea tanobada hegegemadai lalonai, pura ta ta iboudiai taunimanima 5,628 ese bapatiso idia abia! Lagani 1993 ai taunimanima 4,709,889 idia haroro. Anina be lagani 1914 ai ia noho “maragina” be kahirakahira nega “daha ta” amo ia bada ia lao!

13 (a) Lagani 1914 amo dahaka ia vara noho? (b) Iehova ena Witness taudia ese Paulo ena hereva 2 Korinto 9:7 ai edena bamona idia badinaia?

¹³ Lagani 1914 ai Mesia Pavapavana be ena inai taudia bogaragidiai ia lohia matama. Ena lohia siahuna idia abia dae taudia ese ena lohia dalana idia durua; edia nega, edia goada, bona edia moni idia henia, tanobada hegegemadai haroro gaukarana karaia totona, bona tano idauidau ai ruma haginidia totona. (Salamo 110:​2, 3) Iehova ena Witness taudia idia moale, badina be ena be edia hebou lalodiai moni be nega ta ta mo idia herevalaia, to sibodia edia ura hegeregerena moni idia henia, unai gaukara idauidau karaia guguru totona.a (1 Sisiga 29:9 itaia.) Keristen taudia ese harihari monina idia henia be oda dainai lasi, to idia laloa edia diba hegeregerena edia Pavapava idia durua be hahenamo ta idia dekediai. ‘Ta ta edia laloa, edia laloa hegeregerena idia henia, mai maumau danu henia lasi, bona oda dainai lasi.’​—2 Korinto 9:7.

14. Lagani 1919 amo Dirava ena orea taudia bogaragidiai dahaka ia hedinarai, unai dainai dahaka idia moalelaia?

¹⁴ Baibel ena peroveta herevana hegeregerena, Dirava ese tomadiho momokani be ena orea taudia bogaragidiai ia haginia lou, bona unai ese lauma paradaisona ia havaraia. Lagani 1919 amo ena hetoana be ia habadaia lao. (Salamo 14:7; Isaia 52:​9, 10) Unai dainai Keristen taudia korikoridia ese “moale bona lalo-namo idia abia.” (Isaia 51:11) Unai dainai idia vara huahuadia namodia ese idia hahedinaraia, Dirava ena lauma helaga ese goevadae lasi taudia edia amo dahaka dahaka ia havaraia diba. Hahenamo ibounai be Iehova ita henia, to Dirava ida ita gaukara hebou be hahenamo badana ita dekenai, ani? (1 Korinto 3:9) Iehova ia hegeregere, nadi do ia hasiahudia, hereva momokani sivaraina do idia harorolaia totona. To, unai dala ia gaukaralaia lasi, to tano kahuna amo ia karadia taudia mai edia ura namona be ia hasiahudia, iena ura do idia karaia totona.​—Luka 19:40.

15. (a) Dahaka kara hari inai negai idia vara be ita lalodia? (b) Dahaka ita naria mai eda moale ida?

¹⁵ Hari inai negai, Baibel ena peroveta herevadia hegeregeredia idia vara gaudia be idia itadia neganai, Iehova ena hesiai taudia ese idia hoalaidia. Tanobada besedia idia hekwarahi maino korikori havaraia totona, to idia hegeregere lasi. Idia vara gaudia ese idia doridia dainai, United Nations oreana idia noia, gabu dikadia ai kara do ia karaia. (Apokalupo 13:​15-17) To Dirava ena orea taudia ese nega daudau lasi murinai do ia vara gauna, moale bada gauna, be idia naria mai edia ura bada ida. “Do ita moale, do ita moale bada! Ia sibona do ita hanamoa! Badina be Mamoe ena Natuna ena headava negana ia ginidae vadaeni. Bona iena adavana be headava totona ia hegaegae vadaeni.”​—Apokalupo 19:7.

Haroro Gaukarana​—Maduna o Moale Gauna?

¹⁶ “Lau dekena amo umui davaria gaudia, lauegu hadibaia hereva bona lauegu kara danu, inai sibona do umui karaia. Bona maino ia henia Diravana be umui danu do ia noho.” (Filipi 4:9) Keristen taudia be idia dibaia karadia bema idia karaia, Dirava ena hahenamo do idia abia. Idia dibaia gauna ta mai anina bada be inai: Sivarai namona be ma haida dekediai idia harorolaia be namo. Momokani, bema ta ese lalo-namo taudia hamauridia herevana ia diba to ia hadibalaidia lasi, ena lalona do ia namo lasi bona do ia moale diba lasi, ani?​—Esekiel 3:​17-21; 1 Korinto 9:16; 1 Timoteo 4:16.

17. Dahaka dainai iseda haroro gaukarana amo nega ibounai moale ita davaria be namo?

¹⁷ Mamoe bamona taudia, idia ura Iehova do idia dibaia taudia, ita davaridia negadiai, ita moale bada, ani? Momokani, mai edia lalohadai maorona ida idia gaukara taudia ese nega ibounai Basileia gaukarana amo moale do idia davaria. Badina be, ta be Iehova ena Witness tauna ai ia lao ena badina badana be, Iena ladana do ia hanamoa bona Iena dagi, Siahu Ibounai Pavapavana dagina, do ia abia isi. (1 Sisiga 16:31) Unai ia diba tauna do ia moale, herevana haida ese ia mailaia sivaraina namona idia dadaraia. Ia diba kamonai lasi taudia haroro henidia gaukarana be do ia doko, to Iehova ena ladana do ia hanamoa ela bona hanaihanai.

18. Dahaka ese Keristen tauna ia hasiahua, Iehova ena ura do ia karaia totona?

¹⁸ Tomadiho momokani ese idia badinaia taudia ia hasiahudia, Iehova ena ura do idia karaia, hahegani dainai lasi, to idia ura dainai. (Salamo 40:8; Ioane 4:34) Taunimanima momo ese unai idia lalo-pararalaia be auka. Hahine ta ese Witness hahinena ta ia hamaoroa, ia gwau: “Oi lau hanamoa. Lau be ruma ta ruma ta lau lao diba lasi lauegu tomadiho harorolaia totona, oi karaia bamona.” Witness hahinena ia gwau: “Emu hemami lau diba. Lau be Iehova ena Witness hahinena ai lau do lao lasi neganai, ta ese lau ia doria diba lasi, taunimanima dekediai do lau lao tomadiho herevalaia totona. To hari lau ura.” Hahine ia helalo sisina, bena ia gwau: “Ia hedinarai emu tomadiho be mai ena gau ta, lauegu tomadiho ai ia noho lasi gauna. Reana unai do lau tahua be namo.”

19. Dahaka dainai hari inai negai ita moale bada be namo?

¹⁹ Lagani 1994 ena siri badana, iseda Kingdom Hall lalodiai ia hedinarai gauna, ese ita ia hamaoroa loulou, ia gwau: “Iehova oi abidadama henia mai emu lalona ibounai ida.” (Hereva Lada-isidia 3:5) Moale gauna hereadaena be inai: Iehova, iseda gabu aukana, ia dekenai ita roho mauri Diravana, be ita abidadama henia diba, ani? Salamo 64:10 ia gwau: “Kara maoromaoro tauna ese Iehova do ia moalelaia, ia dekenai do ia roho mauri.” Hari inai negai ita manoka o ita hesiku be namo lasi. Hua ta ia ore bena ma ta ia ore, anina be Abel ena nega amo Iehova ena hesiai taudia idia ura do idia itaia gauna ena ginidae negana be ia hure mai kahirakahira. Namona be hari inai negai Iehova ita abidadama henia mai eda lalona ibounai ida. Ita diba, gau momo dainai hari ita moale diba, to guna be inai bamona lasi!

[Footnotes]

Edena Bamona Do Oi Haere?

◻ Nehemia 8:10 ena hereva hegeregerena, dahaka dainai ita moale ba namo?

◻ Deuteronomi 26:11 bona 28:​45-47 ese edena bamona idia hahedinaraia moale be gau badana?

◻ Filipi 4:​4-9 ese ita edena bamona ia durua, nega ibounai do ita moale totona?

◻ Lagani 1994 ena siri badana hegeregerena, dahaka ita moalelaia diba?

11. (a) Dahaka ita laloa maragi be namo lasi, bona dahaka dainai? (b) Tau ta mai adavana ida idia lao intenesenel hebouhebouna ta neganai, unai hebouhebou dainai edia hemami be edena bamona?

16. Keristen tauna ese ia dibaia vadaeni karana bema ia karaia lasi, unai ese ena moale edena bamona ia koua diba?

[Picture on page 16]

Russia bona Germany edia Witness taudia idia moale, badina be bese idauidau taudia edia orea lalonai idia noho

[Picture on page 17]

Hereva momokani be ma haida hamaorolaidia karana ese moale ia havaraia