Iseda Hadibaia Tauna Hereadaena amo Diba Oi Abia, A?

JULIO ia gwau: ‘Lagani ima lalodiai lau ese Spain ena iunivesiti namona ta dekenai tanobada ena taravatu lau stadilaia. To Baibel lau stadilaia neganai unai ese tanobada ena taravatu stadilaia karana ia hereaia. Iunivesiti ese stadi dalana lau ia hadibaia; Baibel ese mauri dalana lau ia hadibaia.’

Baibel dekena amo Dirava ena lalohadai, ia gwauraia dala maorodia, bona iena hahegani herevadia ita diba. Revareva Helagadia ese Iehova idia gwauraia “Hadibaia Tauna Hereadaena” badina guba bona tanobada ibounai lalonai ia be hadibaia tauna hereadaena. (Isaia 30:​20) Oibe, Heberu revareva lalonai Ia idia gwauraia “hadibaia taudia”​—tau tamona lasi to taunimanima momo idia gwauraia ena hereadae karana idia hahedinaraia totona. Unai dainai, namona be ita laloatao, hadibaia taudia iboudiai amo Iehova ese ita ia hadibaia be hereadae momokani.

Iehova Ena amo Ia Mai Bona Ita Badinaia Diba Aonegana

Dahaka dainai Dirava ese ita ia hadibaia neganai namo bada ita davaria? Gau ginigunana be ena hereva ese ita idia durua bada. Iehova ena hadibaia herevadia amo “aonega korikori” ita abia. Danu, Dirava dekena amo ia mai aonegana idia badinaia taudia “ia hamauridia.”​—Hereva Lada-isidia 3:​21, 22; Kohelete 7:12.

Salamo karoa 119 ia torea tauna ia diba ena mauri ibounai lalonai Iehova dekena amo ia mai aonegana ese ia naria. Hegeregere, ane dekenai ia gwau: “Oiemu uduna amo ia mai taravatuna be namo herea lau dekenai, golo bona siliva monidia tausen momo ia hereadia. Bema oiemu taravatu lau moalelaia lasi, egu hisihisi dainai lau mase diba. Lauegu aonega ese lauegu inai taudia edia aonega ia hereaia, emu hahegani ese lau ia ha-aonegaia dainai; badina ia be lauegu du ela bona hanaihanai. Lauegu lalo-parara be lau idia hadibaia taudia iboudiai edia lalo-parara ia hanaia, badina be oiemu hahediba herevadia be lau laloa momo dainai.”​—Salamo 119:72, 92, 98, 99.

Salamo torea tauna sibona lasi, to ma haida danu be ‘hisihisi dainai idia mase diba,’ to Iehova ena taravatu ese ia hamauridia. Rosa be Spain hahinena ta, bona ia gwau Dirava ese ia gwauraia mauri taravatudia ia badinaia dainai, ia mase lasi. Ia gwau: “Lauegu mauri laganidia be 26 neganai, nega rua sibogu egu mauri lau hadokoa toho vadaeni.”

Rosa be ariara hahine ena gaukara ia karaia, ia inuinu kekero bona drag dikadia ia ania. Ia gwau: ‘Dina ta dekenai, lau lalo-metau bada neganai, Witness taudia rua ese lau idia hereva henia, lau idia hadibaia Baibel ese ita ia durua diba iseda hekwakwanai ita hanaidia totona. Vadaeni, Dirava ena Hereva lau stadilaia hamatamaia, bona unai hereva ese egu lalona ia veria bada. Hua ta ia ore murinai goada lau abia egu mauri dalana lau hagoevaia, bona mauri dala matamatana lau badinaia totona. Unai neganai, egu mauri be mai ena badina dainai, inuinu bona drag ania karadia lau rakatania diba. Bona lau ura dikadika Iehova ena turana ai lau lao, unai dainai egu lalona lau hadaia ia gwauraia mauri taravatudia do lau badinadia totona. Bema Dirava ena Hereva amo idia mai aonega herevadia lau badinaia lasi, lau diba egu mauri lau hadokoa vadaeni.’

Momokani, Iehova dekena amo ia mai aonegana ese ita ia hamauria. Unai dainai, Dirava ena hadibaia hereva amo namo bada ita davaria diba, to danu, Iehova ese iena hesiai taudia ia hadibaia dalana amo namo ita davaria. Dirava ena Natuna, Iesu Keriso, ese ita ia hagania hadibaia taudia ai do ita lao bona taunimanima be hahediba taudia ai do ita halaodia totona, unai dainai, taunimanima hadibadia dala namodia ita ura diba.​—Mataio 28:​19, 20.

Iehova ese Haheitalai Hereva Ia Gaukaralaidia

Mareko ena Evanelia lalonai ia gwau “[Iesu] ia hadibaia parabole dekena amo.” (Mareko 4:34) Iesu be hanaihanai unai dala amo taunimanima ia hadibaia be hoa gauna ta lasi. Iehova ese Israel besena dekenai peroveta hereva ia herevalaia dalana ta ia tohotohoa. Unai peroveta hereva momo be haheitalai herevadia.​—Isaia 5:​1-7; Ieremia 18:​1-11; Esekiel 15:​2-7; Hosea 11:​1-4.

Hegeregere, Iehova ese haheitalai herevana amo ita ia hadibaia kaivakuku be gau ta idia karaia diba lasi. Isaia 44:​14-17 ia gwau: “Tau ta ese sida audia ia utudia; bona ma au ta ia abia hidi, au badana danu . . . Ia ese laurel auna ia hadoa, bona . . . lahi auna ai ia halaoa; kahana ta ia araia sibona ena tauanina ia hasiahua totona, bona kahana ta ia araia paraoa ia gabua totona. Bena ena dirava ta ia karaia, ia tomadiho henia totona; laulau ta ia koroa, ia vairanai ia igo diho. Kahana ta be lahi ai ia araia; ma kahana ta latanai ena vamu ia gabua; ia gabua gauna ia ania, ena bogana ia kunu. . . . To au orena amo dirava ta ia karaia, ena kaivakuku; bena ia vairanai ia igo diho, ia tomadiho henia; ia guriguri henia, ia gwau: ‘Lau oi hamauria, badina be oi be lauegu dirava.’ ” Unai bamona haheitalai herevadia be mai edia siahu kudou-namo taudia durudia totona, bena idia lalo-parara kaivakuku tomadiho henia karana bona hahediba hereva koikoidia idia dadaraidia be gau badana.

Lalona Tahua Henanadaidia

Danu, Baibel lalonai Iehova ese lalona tahua henanadaidia amo ena hesiai taudia edia lalohadai kerere ia hamaoromaoroa sivaraidia idia noho. Idaunegai, bese kwarana tauna Iobu ena sivarai be unai ta. Mai ena haheauka ida Iehova ese ia durua bena Iobu ia lalo-parara Dirava be bada to ia be maragi. Dirava ese ia henia henanadai haida amo ia hedinarai Iobu be ia hegeregere lasi momokani unai henanadai do ia haerelaidia totona.

Iehova be Iobu dekenai ia gwau: “Lau ese tanobada lau havaraia neganai oi be edeseniai, a?” Ma ia gwau: “Daika ese davara iduara ia koudia? . . . Kima iguilaidia be oi diba, eiava Kesili do oi ruhaia diba, a? . . . Oiemu imana be Dirava momokanina ena imana hegeregerena, a?” Unai hamanaua henanadaidia amo mai anina bada henanadai ta be inai: “Lau [Iehova] do oi gwauraia kerere, oi sibomu emu maoro do oi gwauraia totona, a?”​—Iobu 38:​4, 8, 31; 40:​8, 9.

Unai lalona tahua henanadaidia dainai Iobu ia diba lalo-parara lasi amo ia hereva. Unai dainai, sibona ena hereva ia dadaraia bona ia helalo-kerehai. (Iobu 42:6) Unai sivarai dekenai ia vara gauna hegeregerena, iseda natudia eiava iseda Baibel stadi taudia edia lalohadai idia kerere neganai, henanadai namodia amo ita durudia diba edia lalohadai idia hamaoromaoroa totona.

Ita Hagoadadia Dalana

Bema ta ia laloa ia hegeregere lasi eiava ia laloa gau ta ia karaia namonamo diba lasi, edena bamona do ita durua diba? Iehova bona iena peroveta tauna Mose idia herevahereva hebou karana ese ita ia durua diba. Dirava ese Mose ia abia hidi iena hereva Farao bona Israel taudia dekenai do ia gwauraia hedinarai totona, to unai peroveta tauna ia laloa ia hegeregere lasi unai gaukara do ia karaia namonamo totona. Ia gwau: “Lau be hereva goada lasi tauna, egu malana danu ia haraga lasi, hereva dekenai danu lau daradara.” To, Dirava ia haere henia, ia gwau: “Taunimanima edia uduna daika ese ia karaia? . . . Lau inai Iehova, ani? Unai dainai, oi lao. Lau be oiemu hereva do lau durua. Do oi gwauraia herevadia dohore lau henia oi dekenai.”​—Esodo 4:10-12.

Iehova ese Mose ena kakana Arona ia abia hidi ena gwaukau tauna totona, bona edia gaukara Aigupito dekenai idia hagugurua. (Esodo 4:​14-16) Mose bamona, Iehova ena Witness taudia momo be ruma-ta-ruma-ta gaukara eiava dala dekenai haroro gaukara idia karaia hamatamaia neganai, idia laloa idia hegeregere lasi unai gaukara idia karaia totona. Mose bamona, bema ita diba Iehova ese ita do ia durua, bona bema ia manada haroro tauna ese ita do ia bamoa, vadaeni ita laloa daradara lasi. Mose ese ena abidadama ia habadaia bona gabeai ia be mai goada danu ia hereva diba, iena hereva momo be Baibel buka Deuteronomi dekenai idia noho, ita danu be Iehova ena heduru amo iseda hereva dalana ita hanamoa diba.

Haheitalai amo Ia Hadibaia

Bema oi ura dikadika kudou-namo taudia oi durudia unai be kara namona. Peroveta tauna Iona be unai kara dekenai ia dabu sisina. Iehova ese Iona ia siaia Nineve dekenai unai siti do ia haorea sivaraina do ia harorolaia totona. Bona hoa gauna be inai, Nineve taudia idia helalo-kerehai. (Iona 3:5) Unai dainai, Iehova ese unai nega lalonai idia dekenai dika ia mailaia lasi. Ena haroro gaukara amo ia vara gauna ia moalelaia diba, to Iona be ia badu badina ia perovetalaia gauna do ia guguru lasi dainai. Iehova be edena bamona ia durua lalohadai maorona do ia abia totona?

Iehova ese bottle-gourd auna ta ia gaukaralaia Iona ia hadibaia totona, bena unai amo ia lalo-parara taunimanima edia namo ia tahua be gau badana. Unai au be hoa dalana amo hanuaboi tamona lalonai ia tubu bada bona Iona ese kerukeruna ia moalelaia, badina Nineve ena hanua murimuri ai ena kalaga rumana ia haginia. Iona be unai au dikana dainai ia “moale bada.” To, Iehova ese biluga ia siaia bona unai au ia hadikaia dainai ia marai. Dina bona lai mai ena siahu ese Iona ia botaia dainai, ia badu bona ia gwau: “Do lau mase be namo; do lau mauri be dika.” (Iona 4:5-8) Unai sivarai amo dahaka ita diba?

Iehova be Iona dekenai ia gwau: “Oi hebogahisi bottle-gourd auna dekenai, gau tamona oi hekwarahilaia lasi bona oi havaraia lasi; ia be hanuaboi ta ai ia tubu bona hanuaboi ta ai ia mase. Unai dainai, lau ese hanua badana Nineve, lalonai edia imadia idibana bona edia imana laurina idia diba lasi taudia 120,000 bona boromakau hutuma danu idia noho hanuana, do lau hebogahisi henia lasi, a?”​—Iona 4:​9-11.

Unai be mai anina bada haheitalai herevana! Iona be unai bottle-gourd auna ia laloa bada, to taunimanima tausen momo edia namo ia laloa maragi. Ena be Dirava ia havaraia gaudia iboudiai ita laloa be namo, to taunimanima ita durudia do idia mase lasi totona, unai gaukarana ita laloa bada herea.

Mai Iseda Haheauka Danu Taunimanima Ita Hadibadia

Iona ia davaria hegeregerena, nega haida iseda haroro gaukara ita hagugurua be ia auka. (2 Timoteo 4:5) To, ita ia durua gauna be taunimanima dekenai haheauka karana ita hahedinaraia.

Bema oiemu Baibel stadi tauna ta be diba ia abia haraga lasi eiava ia laloa maoromaoro lasi neganai, dahaka oi karaia? Iseda Hadibaia Tauna Hereadaena ese unai hekwakwanai hanaia dalana ita dekenai ia hadibaia. Sodoma bona Gomora do ia hadikaia ore ia diba neganai, Abraham ese Dirava dekenai henanadai momo ia henia neganai, Dirava ia haheauka bada. Abraham ia gwau: “Momokani, oi ese kara maoromaoro bona kara dika taudia danu nega tamona do oi alaia ore?” Abraham ia noinoi, ia gwau: “Bema kara maoromaoro taudia 50 hanua dekenai idia noho, be hanua ibounai do oi hadikaia ore, a? Ia dekenai do oi [hebogahisi] diba, unai 50 hamauria totona?” Iehova ia gwau do ia hebogahisi henidia, unai dainai Abraham ia noinoi loulou ela bona unai namba ia diho lao taunimanima 10 dekenai. Iehova ia diba Lota mai ena ruma bese taudia sibodia idia roho mauri be namo, bona dala ia hegaegaelaia ia hamauridia totona. To Dirava ese Abraham ia koua lasi, ena henanadai ia haheaukalaia ela bona Abraham ia lalo-parara Iehova ena hebogahisi be bada herea momokani.​—Genese 18:​20-32.

Iehova ia diba Abraham ese iena kara haida ia diba lasi, bona ia diba Abraham ese taunimanima edia namo ia tahua. Bema ita lalo-parara lauma dalanai ita hadibaia taudia haida edia tubu be idauidau, unai ese ita do ia durua, bena stadi taudia bema idia hekwarahi hahediba hereva ta ena anina idia diba totona, eiava idia manadalaia kara dikana ta idia hanaia toho neganai, do ita haheauka henidia diba.

Iehova amo Diba Oi Abia Noho

Momokani, Iehova Dirava be Hadibaia Tauna Hereadaena. Mai ena haheauka ida ia ese parabole, henanadai, bona haheitalai herevadia amo ita ia hadibaia. Bema iena hadibaia daladia ita tohotohoa, hadibaia taudia namodia ai do ita lao.

Taunimanima ma haida idia hadibaia taudia be sibodia idia hadibaia danu be gau badana, unai dainai hanaihanai ‘Iehova ese ita ia hadibaia’ noho be gau badana. (Isaia 54:13) Isaia ia toretore, ia gwau: “Emui matadia ese emui Hadibaia Tauna Hereadaena do idia itaia. Bona idibana kahana ai eiava laurina kahana ai do umui raka siri negana ai, emui taiana be hereva ta murimuri kahana amo do umui kamonai, do ia gwau: ‘Dala be inai, ia lalonai do umui raka.’ ” (Isaia 30:​20, 21) Bema Iehova ena dala dekenai ita raka noho bona taunimanima ma haida ita durudia unai do idia karaia totona, ita abia moale gauna badana be iseda Hadibaia Tauna Hereadaena amo diba do ita abia ela bona hanaihanai.

[Pictures on page 28]

Iehova be Iobu dekenai ia gwau: “Oiemu hahegani dainai ugava be ia roho lao bona atai gabudia dekenai ena ruma ia karaia, a?”

“Bottle-gourd” auna amo, Iehova ese Iona ia hadibaia ena hebogahisi taunimanima dekenai do ia habadaia totona