Namona be Do Umui Hebogahisi
“Inai bamona karadia, dabua bamona do umui atoa: bogahisihisi, durua.”—KOLOSE 3:12.
1. Dahaka dainai hari inai negai momo be haida ese do idia hebogahisi henidia be namo?
HARI inai negai taunimanima milion momo be haida ese do idia durudia mai edia hebogahisi ida be namo, badina be idia gorere, eiava idia hitolo, eiava moni gaukarana idia davaria diba lasi, eiava raskol karadia o tuari o heiriheiri o abata ese idia hadikadia. To unai ibounai ia hereaia hekwakwanaina be inai: Taunimanima be lauma dalanai idia dika. Satana ia diba ena nega be kwadogi, bona “ia be tanobada taudia ibounai ia koia noho.” (Apokalupo 12:9, 12) Unai dainai, Keristen oreana momokanina murimurinai idia noho taudia ese edia mauri be reana do idia haboiodia, bona Baibel ese ia hahedinaraia Dirava ese ena hahemaoro dinana ai do ia hamasedia taudia be do idia toreisi lou lasi.—Mataio 25:31-33, 41, 46; 2 Tesalonika 1:6-9.
2. Dahaka dainai Iehova ese kara dika taudia ia haoredia haraga lasi?
2 To Iehova Dirava ese ia idia tanikiu henia lasi taudia bona kara dika taudia ia haheauka henidia noho mai ena hebogahisi ida, ema bona hari. (Mataio 5:45; Luka 6:35, 36) Inai hegeregerena, guna ia ese Israel besena dikana ia panisia haraga lasi. Unai neganai ia ese ena kara ena badina ia gwauraia, ia gwau: “Lau mauri hegeregerena, lau ese dika tauna ena mase lau moalelaia lasi, to dika tauna be ena dala amo do ia raka siri bena do ia mauri, unai be lau moalelaia. Umui giroa, emui kara dikadia amo umui giroa. Israel besena e, anina be dahaka do umui mase?”—Esekiel 33:11.
3. Iehova ese edena idau besena ia hebogahisi henia, bona unai sivarai dainai dahaka ita diba?
3 Iehova ese Nineve taudia dikadia danu ia hebogahisi henidia. Ena peroveta tauna Iona ia siaia, do ia hadibadia ia hamasedia ore gwauraia. Iona ena hereva idia abia dae bona idia helalo kerehai. Unai dainai hebogahisi Diravana Iehova ese unai hanua be unai neganai ia hadikaia ore lasi. (Iona 3:10; 4:11) Unai Nineve taudia, do idia toreisi lou diba taudia, bema ia hebogahisi henidia, hari inai nega taudia, mase hanaihanai do idia davaria diba taudia, ia hebogahisi henidia bada, ani?—Luka 11:32.
Hebogahisi Gaukarana Badana
4 Iena hebogahisi hegeregerena, Iehova ese ena Witness taudia ia haganidia Basileia ena Sivarai Namona be edia dekena taudia do idia harorolai henidia loulou. (Mataio 24:14) Bona haida ese inai hahemauri gaukarana idia abia dae neganai, Iehova ese edia lalodia ia hapararadia, Basileia sivaraina do idia lalo-pararalaia totona. (Mataio 11:25; Kara 16:14) Edia Dirava hegeregerena, Keristen taudia momokanidia ese unai kamonai taudia idia hebogahisi henidia, unai dainai idia lou henidia, bona bema mai dalana, Baibel stadi amo idia durudia. Lagani 1993 lalonai, tano 231 ai, Iehova ena Witness taudia milion hani mai kahana ese hora bilion ta mai kahana be ruma ta ruma ta ai haroro gaukarana bona edia dekena taudia stadi henidia karana ai idia haoredia. Unai kamonai matamata taudia be mai edia dala, edia mauri be Iehova do idia gwauhamata henia bona iena bapatiso Witness taudia ai do idia lao. Inai dala amo idia danu ese inai hebogahisi gaukarana badana do idia karaia, Satana ese ena tanobada ai ia tarapudia taudia haida hamauridia totona.—Mataio 28:19, 20; Ioane 14:12.
5. Dirava ena hebogahisi do ia ore neganai, dahaka do ia vara, Dirava idia gwauraia kerere tomadiho oreadia dekediai?
5 Nega daudau lasi Iehova be “tuari tauna” ta bamona do ia kara. (Esodo 15:3) Sibona ena ladana bona ena orea taudia ia hebogahisi henidia dainai, kara dika do ia haorea bona kara maoromaoro tanobadana do ia haginia. (2 Petero 3:13) Dirava ena badu dinana ai Kerisendom ena dubu oreadia do ia panisidia guna. Sibona ena dubu Ierusalem ai be Babulono pavapavana ena imana amo ia hadikaia hegeregerena, ia ese tomadiho oreadia, ia idia gwauraia kerere oreadia, do ia panisidia. United Nations besedia edia lalodia do ia ha-uradia, Kerisendom bona tomadiho koikoi oreadia idaudia iboudiai do idia hadikadia totona. (Apokalupo 17:16, 17) Iehova ia gwau: “Egu matana ese do ia hebogahisi henidia lasi, bona do lau hebogahisi henidia lasi. Edia kara ena davana be edia kwaradia latadiai do lau karaia.”—Esekiel 9:5, 10.
6. Edena dala amo Iehova ena Witness taudia ese edia hebogahisi idia hahedinaraia?
6 Nega ia do ore lasi neganai, Iehova ena Witness taudia ese Dirava ena hahemauri sivaraina idia harorolaia goadagoada noho; unai amo idia hahedinaraia edia dekena taudia idia hebogahisi henidia. Bona, bema mai dalana, ogogami taudia idia durudia danu. To, sibodia edia famili taudia bona edia orea taudia be tauanina dalanai idia durudia guna be namo. (Galatia 6:10; 1 Timoteo 5:4, 8) Hisihisi badadia idauidau lalodiai Iehova ena Witness taudia ese edia orea taudia idia durudia momo, unai amo hebogahisi idia hahedinaraia badabada. To Keristen taudia ese dina dina iboudiai hebogahisi idia hahedinaraia, nega namodia ai bona nega dikadia ai danu; idia naria lasi ela bona hisihisi badana ta ia vara.
Mauri Matamata Ena Toana
7 Momokani, ita be mai eda kara dika bona Satana ena tanobada ese ita ia hakererea dainai, ita hebogahisi be auka. Unai dainai Baibel ia gwau namona be ‘badu, dagedage, laloa dikadika, hereva dika bona hereva mirodia’ do ita negedia, bona “mauri matamata” dabua bamona do ita atoa, Dirava ena toana hegeregerena. Baibel ia gwau “bogahisihisi, durua, manau, manada bona haheauka” be dabua bamona do ita atodia be namo. Bena unai kara namodia hahedinaraidia dalana namona ia gwauraia, ia gwau: “Bema tau ta ese ena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu.” Iseda tadikaka hebogahisi henidia karana bema ita manadalaia vadaeni, edia dika ita gwauatao be haraga.—Kolose 3:8-13.
8. Dahaka dainai dika ita gwauatao be gau badana?
8 To bema edia dika ita gwauatao lasi mai eda hebogahisi ida, Dirava ese ita do ia lalo namo henia lasi. Iesu ese inai ia hahedinaraia ena parabole ta lalonai. Hesiai tauna ta ia herevalaia, ena biaguna ese dibura ai ia atoa vareai, “do idia panisia ela bona ena abitorehai davana do ia haorea.” Unai panisi ia abia be maoro, badina be ia ese ena bamona ta, ia noia do ia hebogahisi henia tauna, be ia hebogahisi henia lasi bona ena abitorehai ia gwauatao lasi. Ena parabole ena dokona ai Iesu ia gwau: “Egu Tamana guba dekenai ia noho be unai bamona do ia karaia umui dekenai, umui ta ta emui lalona dekenai emui tadikakana edia dika do umui gwauatao lasi neganai.”—Mataio 18:34, 35.
9. Hebogahisi ena anina be dahaka, mauri matamata ena toana badana dekenai?
9 Hebogahisi be lalokau ena toana badana ta. Bona lalokau be Keristen tomadihona momokanina ena toana korikorina. (Ioane 13:35) Unai dainai Baibel ese mauri matamata inai bamona ma ia gwauraia: “Umui lalokau henia, vadaeni, do umui noho hebou namo herea, mai laloa tamona danu.”—Kolose 3:14.
Mama—Hebogahisi Koua Gauna Ta
10 Ita be mai eda dika dainai, mama be iseda lalona ai ia vara haraga diba. Reana tadikaka ta o taihu ta be mai ena diba o mai ena kohu, to ita be mai eda lasi. Eiava ta ese lauma hahenamona ta ia abia o iseda orea lalonai dagi ia abia. Bema unai bamona taudia ita mama henidia, do ita kara henidia diba mai eda hebogahisi ida, a? Reana lasi. Ita mama henidia dainai, reana do ita gwauraidia dika, o do ita kara auka henidia, badina be Iesu ia gwau: “Taunimanima edia lalona dekenai idia honu gaudia be do idia gwauraia edia uduna dekenai.” (Luka 6:45) Reana haida ese iseda maumau herevadia do idia durudia, bena famili ta o Dirava ena orea taudia edia kongregesen ta ena maino do ia ore.
11. Dahaka dainai Iosepa ena kakana idia hebogahisi lasi, bona unai dainai dahaka ia vara?
11 Ruma besena badana ta lalonai ia vara gauna mani oi laloa. Iakobo ena natuna badadia 10 ese edia tadina Iosepa idia mama henia, badina be edia tamana ese ia ura henia bada. Unai dainai, “hereva namona ta idia gwauraia lasi ia dekenai.” Gabeai, Dirava ese ia hanihia, unai amo ia hamomokania ia lalo namo henia. Unai dainai ena kakana “idia badu dikadika mai mama danu.” Edia mama be edia lalodia amo idia negea lasi dainai, idia hebogahisi lasi bona kara dikana badana idia karaia.—Genese 37:4, 5, 11.
12, 13. Iseda lalona ai mama ena mamina do ita abia neganai, dahaka do ita karaia be namo?
12 Mai edia dagedage ida Iosepa idia hoia, igui hesiai tauna ai do ia lao. Edia kerere hunia totona, edia tamana idia koia, do ia laloa uda boromana ta ese ia alaia mase. Lagani haida murinai edia kerere ia hedinarai; unai neganai doe ia vara dainai, Aigupito idia lao, aniani hoia totona. Idia diba lasi aniani hariharilaia gaukarana biaguna be Iosepa. Ia samanidia, ia gwau idia be spai taudia, ma ia hamaorodia bema edia tadina Beniamina do idia hakaua mai lasi, iena heduru do idia tahua lou lasi be namo. Unai neganai edia tamana ese Beniamina ia ura henia bada, bona idia diba do ia ura lasi do ia kahua nege.
13 Unai dainai, Iosepa vairanai idia gini neganai, edia lalodia ese idia samanidia dainai idia gwau: “Momokani, ita kerere vadaeni iseda tadina [Iosepa] dainai. Badina be ena lalohisihisi bada ita itaia, to ia ena noinoi ita abia dae lasi, unai dainai hari kerere ia mai ita dekenai.” (Genese 42:21) Iosepa ese ia kara henidia mai ena lalo-goada bona mai ena hebogahisi ida; unai amo ia durudia edia helalo-kerehai do idia hamomokania totona. Bena ia hamaorodia ia be daika, bona edia dika ia gwauatao mai ena hariharibada ida. Unai famili taudia idia lalo tamona lou unai. (Genese 45:4-8) Namona be ita Keristen taudia ese unai sivarai do ita laloa namonamo. Mama ena anina dikana ita diba dainai, namona be Iehova do ita noia ita do ia durua, mama do ita negea bena ena gabunai hebogahisi do ita atoa.
Hebogahisi Koua Gaudia Ma Haida
14 Bema dagedage karadia ita raraidia loulou, unai danu ese iseda hebogahisi ia koua diba. Gadara-helulu bona televisen program bona video, idia lalodiai dagedage karadia idia hedinarai gaudia, ese dagedage ura henia lalohadaina idia havaraia. Gunaguna, Roma Basileiana taudia ese edia steidiam ai heatu-helulu bona taunimanima hahisidia karadia idaudia idia raraidia loulou. Edia sivarai ia torea tauna ta ia gwau, unai ese “hemami varovarona, hisi-ania taudia hebogahisi henidia gauna, ia hadikaia ore.” Hari inai negai taunimanima hamoaledia karadia momo be unai hegeregerena. Keristen taudia, hebogahisi dalana idia tahua taudia, ese buka, vidio, bona TV program idia abidia hidi namonamo be namo. Idia aonega dainai, Salamo 11:5 ena hereva idia laloatao: “[Iehova] ese dagedage karadia ia ura henidia tauna be ia inai henia.”
15. (a) Reana ta be edena bamona ia hahedinaraia ia be mai ena hebogahisi lasi? (b) Keristen taudia momokanidia edia orea taudia bona edia dekena taudia idia dabu negadiai, edena bona idia kara henidia?
15 Sibodia edia namo idia tahua taudia momo be mai edia hebogahisi lasi. Aposetolo Ioane ese edia kerere ia gwauraia, ia gwau: “Bema tau ta be mai ena kohu momo, bona iena tadikakana ia itaia mai ena ogogami, to ia bogahisihisi henia lasi, edena bamona ia hereva, ‘Lau ese Dirava lau lalokau henia’?” (1 Ioane 3:17) Unai hegeregerena, Samaria tauna parabolena lalonai, Iesu ia gwau hahelaga tauna ta, sibona ena namo ia abidadama henia tauna, bona Levi tauna ta, ese edia bese tauna ta kahirakahira ia mase be idia itaia neganai, idia raka hanai sibona. (Luka 10:31, 32) To Keristen taudia mai edia hebogahisi be idau; idia ese edia tadikaka be tauanina dalanai bona lauma dalanai idia durudia haraga, bona Iesu ese ia herevalaia Samaria tauna hegeregerena, idia ese idau taudia durudia dalana idia tahua danu. Unai dainai idia ese edia nega, edia goada, bona edia moni idia henia mai edia moale ida, taunimanima be hahediba taudia ai halaodia gaukarana do idia durua totona. Inai dala amo idia ese taunimanima milion haida hamauridia gaukarana idia durua.—1 Timoteo 4:16.
Gorere Taudia Hebogahisi Henidia
16 Taunimanima iboudiai idia goevadae lasi bona mase idia lao henia noho, unai dainai gorere idia davaria. Keristen taudia danu be unai bamona; idia momo be doketa lasi, bona hoa karadia idia karaia diba lasi, idaunegai Keristen taudia haida, siahu be Keriso bona ena aposetolo edia amo idia abia taudia, idia karaia hegeregerena. Aposetolo bona edia bamodia idia mase ore neganai, unai siahu ia ore. Unai dainai, ita ese gorere taudia bona gorere ia hakavadia taudia ita durudia guguru diba lasi.—Kara 8:13, 18; 1 Korinto 13:8.
17. Ia gorere bona mase ia lalohisihisilaia tauna Iobu idia kara henia dalana sivaraina amo dahaka ita diba?
17 Nega momo gorere ese lalo-metau ia havaraia. Dirava gari henia tauna Iobu ena lalona ia metau momokani, badina be ia gorere bada bona Satana ese ia hahisia bada dainai. (Iobu 1:18, 19; 2:7; 3:3, 11-13) Unai neganai namona be ena turana ese idia kara henia mai edia hebogahisi ida bona edia hereva amo idia “hagoadaia” be namo. (1 Tesalonika 5:14) To ena turana toi ese ena lalona hagoadaia totona idia vadivadi henia neganai, lalohadai kererena idia abia haraga, idia gwau ena hisihisi idia vara badina be sibona ena kerere dainai; unai amo iena lalo-metau idia habadaia. To Keristen taudia be mai edia lalokau dainai, edia orea taudia idia gorere eiava edia lalodia idia metau negadiai, unai bamona do idia lalodia kerere lasi. Nega haida, unai bamona taudia durudia namonamo dalana be, elda taudia o Keristen taudia goadadia ma haida ese do idia vadivadi henidia, edia hereva do idia kamonaidia mai edia hebogahisi ida, bona Baibel amo do idia sisiba henidia mai edia lalokau ida.—Roma 12:15; Iakobo 1:19.
Manoka Taudia Hebogahisi Henidia
18 Namona be elda taudia do idia hebogahisi. (Kara 20:29, 35) Baibel ia gwau: “Ita abidadama goada taudia be namo manoka taudia ita durudia.” (Roma 15:1) Ita goevadae lasi dainai, ita ibounai ita kara kerere. (Iakobo 3:2) “Bema tau ta ia kerere neganai,” namona be elda taudia ese do idia kara henia mai edia hebogahisi ida. (Galatia 6:1) Namo lasi idia be Farisea taudia hegeregeredia Dirava ena Taravatu do idia ha-aukaia kava.
18, 19. (a) Elda taudia ese manoka taudia bona kerere taudia edena bamona idia kara henidia be namo? (b) Hahemaoro komitina idia karaia neganai danu, dahaka dainai gau badana be kerere tauna idia kara henia mai edia hebogahisi ida?
19 Elda taudia be idau; Iehova Dirava bona Iesu Keriso edia hebogahisi idia tohotohoa. Edia gaukara badana be, Dirava ena mamoe idia ubudia bona idia hagoadadia. (Isaia 32:1, 2) Taravatu momo amo idia biagudia toho lasi, to Baibel ena hakaua herevadia namodia amo idia sisiba henidia. Unai dainai elda taudia edia gaukara be, edia tadikaka edia lalodia idia hagoadadia bona idia hamoaledia, bona Iehova ena kara namo laloa bada lalohadaina be idia lalodiai idia havaraia. Bema tadikaka ta be kerere maragina ia karaia, elda ese haida badinai o vairanai do ia sisiba henia lasi, do idia kamonai garina. Bema ia hereva henia be namo, hebogahisi dainai do ia hakaua siri bena do ia hereva henia hehuni. (Mataio 18:15 itaia.) Ena be elda ese ta ia moale henia be auka, to namona be ia kara henia mai ena haheauka ida bona ia durua toho be namo. Kongregesen amo do idia atoa siri dalana do ia tahua lasi be namo. Elda taudia ese hahemaoro komitina bema idia karaia be namo, kerere badana ia karaia tauna do idia kara henia mai edia hebogahisi ida be namo. Edia kara manau dainai reana do ia helalo kerehai.—2 Timoteo 2:24-26.
20. Edena negai hebogahisi hahedinaraia be kerere, bona dahaka dainai?
20 To nega haida Iehova ena hesiai tauna ese hebogahisi ia hahedinaraia lasi be maoro. (Deuteronomi 13:6-9 itaia.) Ia ese ena turana korikorina ta o ena varavarana ta, orea murimurinai idia atoa vadaeni tauna, ‘danu do idia turana karaia lasi’ be hetoho badana ia dekenai. Namona be hebogahisi ese do ia halusia lasi. (1 Korinto 5:11-13) Ena lalona be unai bamona do ia ha-aukaia neganai, reana unai ese kerere tauna do ia hagoadaia, do ia helalo kerehai totona. Inai danu, namona be Keristen taudia do idia naria namonamo, tau ta ena hebogahisi hahine ta dekenai eiava hahine ta ena hebogahisi tau ta dekenai be dala kererena amo do idia hahedinaraia, bena unai amo matabodaga lalohadaina do idia havaraia.
21. Namona be daidia danu do ita kara henidia mai eda hebogahisi ida, bona unai ese dahaka namo do ia havaraia?
21 Namona be inai taudia danu be do ita kara henidia mai eda hebogahisi ida: taunimanima burukadia, bona mase idia lalohisihisilaia taudia, bona edia adavadia murimuri taudia ese idia dagedage henidia taudia. Unai hegeregerena, namona be elda taudia, idia gaukara goadgoada taudia, do ita kara henidia mai eda hebogahisi ida, do ita matauraidia, bona do ita durudia. (1 Timoteo 5:17; Heberu 13:7, 17) Aposetolo Petero ia gwau: “Umui ibounai . . . ta ta dekenai do umui bogahisihisi henia.” (1 Petero 3:8) Inai dala amo ita ese lalo-tamona bona moale be kongregesen lalonai ita havaraia, bona murimuri taudia be hereva momokani dekenai ita veridia mai. Gau badana be inai: Inai dala amo iseda Tamana mai hebogahisina, Iehova, ita hanamoa.
Riviu Henanadaidia
◻ Iehova ese edena bamona ia hahedinaraia kara dika taudia ia hebogahisi henidia?
◻ Dahaka dainai ita hebogahisi be gau badana?
◻ Dahaka dahaka ese iseda hebogahisi idia koua diba?
◻ Gorere taudia bona lalo-metau taudia edena bamona do ita kara henidia be namo?
◻ Daidia idia hebogahisi be mai anina bada, bona dahaka dainai?
4. Hari inai negai Iehova ese ena hebogahisi edena bamona ia hahedinaraia?
7. (a) Kolose 3:8-13 ai, Baibel ese edena bamona ia hahedinaraia hebogahisi be mauri matamata ena toana ta? (b) Hebogahisi dainai Keristen taudia be dahaka idia karaia be haraga?
10. (a) Reana dahaka dainai mama be iseda lalona ai ia vara? (b) Mama ese dahaka dika ia havaraia diba?
14. Dahaka dainai dagedage karadia do ita raraidia lasi be namo?
16. Dahaka dainai gorere taudia ita durudia guguru diba lasi?
[Box on page 19]
FARISEA TAUDIA MAI EDIA HEBOGAHISI LASI
DIRAVA ese Sabati dinana ena laga-ani be ena bese taudia ia henidia, lauma ai bona tauanina ai do ia hanamodia totona. To, Iuda tomadiho gunalaia taudia ese taravatu momo idia atodia, unai amo Dirava ena Sabati taravatuna idia hadikaia bona taunimanima idia hahekwarahidia. Hegeregere, bema ta be bero ia davaria eiava ia gorere bona unai be mase gauna lasi, Sabati dinana ai heduru ia abia diba lasi.
Farisea oreana ta be idia auka herea, idia gwau: “Sabati ai, ta ese mase idia taitailaia taudia edia lalodia do ia hanamodia lasi bona gorere taudia do ia vadivadi henidia lasi.”
Unai dainai Iesu ese Iuda tomadiho gunalaia taudia ia gwau henidia be maoro, badina be Taravatu ena hereva badadia, hahemaoro, lalokau, bona hebogahisi, idia readia. Farisea taudia ia hereva henidia, ia gwau: “Emui taravatu dekenai Dirava ena hereva umui hadikaia”!—Mareko 7:8, 13; Mataio 23:23; Luka 11:42.
[Picture on page 17]
Tano 231 lalodiai Iehova ena Witness taudia ese hebogahisi gaukarana badana idia karaia noho, taunimanima edia ruma lalodiai, ariara ai, bona dibura rumadia lalodiai danu
[Picture on page 18]
Dagedage karadia TV ai raraia karana ese hebogahisi ia haorea