Basileia Haroro Ripoti

Nega Dikadia ai Idia Haroro

APOSETOLO Paulo ia gwau: “Nega ena dokona dekenai, metau dikadia momo do idia vara.” (2 Timoteo 3:1) Ena hereva be momokani! Central America tanona ta ladana El Salvador lalonai idia noho taudia be nega daudau lalonai metau dikadia idia davaria. Lagani 12 lalonai, unai tano taudia idia tuari heheni dainai, idia tausen momo ese hisihisi idia ania bona idia mase. Unai tuari ia doko vadaeni, to hisihisi idia ore lasi. Tuari murinai kara dika ia bada ia lao momokani. Unuseniai tau ta be vanegai televisen dekenai ia gwau: “Dina dina iboudiai dagedage bona dadidadi idia vara.”

Unai kara dika dainai Iehova ena Witness taudia danu ese dika idia davaria. Henaohenao taudia ese Kingdom Hall momo idia hamakohia bena saun masini bona maikrofon idia henaoa. Keristani taudia be Kingdom Hall lalodiai idia hebou negadiai, nega haida raskol memerodia mai edia ipidi be idia vareai, bena hebou taudia edia moni, edia dina gaudia, bona edia dava bada gaudia ma haida idia dadia. Witness taudia haida idia gaukara noho lalonai, dadidadi taudia ese idia aladia mase.

Ena be unai hekwakwanai idia vara, to Iehova ena Witness taudia El Salvador dekenai ese sivarai namona harorolaia gaukarana idia goadalaia noho. Badina be Baibel ese ia haganidia, “Sivarai Namona bese ibounai dekenai be do idia haroro henia guna.” (Mareko 13:10) Basileia helarona, Baibel ese ia gwauraia gauna, idia ura henia taudia momo be unai tano lalonai idia do noho, bona Witness taudia ese idia ta ta iboudiai idia tahua noho. Nega idaudia ai bona gabu idaudia ai idia hedavari henia taudia idia haroro henia bona unai kara amo anina namona idia havaraia.

Witness tauna ta be hospital lalonai ia noho neganai, dala iboudiai ia tahua, Dirava ena gwauhamata, Baibel lalonai nega vaira gwauraia herevadia, be gorere taudia ma haida dekenai do ia herevalaia totona. Ena be gorere bada tauna ta be mai ena lalohisihisi ida ia gwau, “Kahirakahira do lau mase!” to unai Witness tauna ese Dirava ena Basileia ena sivarai namona ia hamaorolaia. Iehova ena Witness taudia ese idia karaia bukana ladana Mauri Hanaihanai Paradaiso Lalonai ena hereva ia duahia hedinarai ia dekenai. Dina haida murinai, Witness tauna ese hospital ia rakatania neganai, ena lalona ia hisihisi, badina be ia laloa unai tau be kahirakahira do ia mase.

Lagani hani murinai unai Witness tauna ia gorere lou dainai, hospital ma ta lalonai ia vareai. Unuseniai ia noho neganai, gorere tauna ta be ia dekenai ia mai, ia gwau: “Lau oi laloatao a?” Tauna be lagani hani gunanai ia hedavari henia tauna, ia laloa kahirakahira do ia mase tauna! Ia ese Witness tauna ia rosia, bena ia gwau: “Hari lau danu be Iehova ena Witness tauna ta!” Unai neganai Witness tauna ia hoa bona ia moale. Unai tau ese Baibel helarona ia abia dae vadaeni, Iehova ena Witness taudia ida Baibel ia stadilaia vadaeni, bona ena mauri be Iehova dekenai ia gwauhamatalaia vadaeni. Witness tauna ai ia lao sibona lasi, to lagani rua bamona gunanai regula painia ai ia lao bona unai nega amo ful-taim hesiai gaukarana ia karaia.

Anina be, Witness tauna ese gabu idauna ta ai hereva momokani uhedia ia hadoa neganai, lalo-namo tauna ta ese ena lalona ai ia abia dae. Taunimanima be hereva momokani do idia dibaia totona durudia gaukarana be hahenamo ta, bona Keristani korikori taudia ese inai hahenamo idia laloa bada dainai, ena be ‘nega ena dokona dekenai metau dikadia momo idia vara,’ to haroro gaukarana idia karaia noho.