Duahia Taudia Edia Henanadai
Baibel ena hereva rua, “mamoe idaudia” bona ‘hutuma bada herea,’ edia anina be idau, a?
Oibe, to bema ta be nega ta ta unai hereva ruaosi edia anina ia hatamonaia, unai ita laloa momo lasi be namo.
Keristani taudia momo be unai hereva ruaosi edia siri Baibel lalonai be idia manadalaia vadaeni. Ta be Ioane 10:16. Unuseniai Iesu ia gwau: “Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.” Hereva ma ta, ‘hutuma bada herea’ herevana, be Apokalupo 7:9 ai. Unai siri ia gwau: “Inai murinai egu matana lau negea, [hutuma bada] herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau. Idia ibounai be helai gabuna badana ena vairanai bona Mamoe ena Natuna ena vairanai idia gini. Edia dabua be kurokuro, bona edia imana dekenai pama au rauraudia idia dogoatao.”
Mani Ioane 10:16 do ita laloa guna. Mamoe be daidia? Namona be inai ita laloa: Iesu murinai idia raka mai edia kamonai taudia iboudiai be Baibel ese mamoe ia gwauraia. Luka 12:32 ai, Iesu ese ena hahediba taudia, guba dekenai do idia daekau taudia, be “orea maragi” ia gwauraia. Idia be dahaka oreana? Mamoe oreana. “Orea maragi” ‘mamoedia’ be Basileia ai do idia vareai, guba lalonai. To helaro idauna idia abia taudia be idia noho, Iesu ese idia danu be mamoe ia gwauraia.
Ioane karoa 10 ese unai ia hahedinaraia. Iesu ese mamoe, iena aposetolo hegeregeredia, gabeai do ia boiridia guba ai mauri do idia abia totona taudia, ia herevalaia guna, bena Ioa 10 siri 16 ai ia gwau: “Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai.” Iehova ena Witness taudia be nega daudau lalonai idia diba unai siri lalonai Iesu ese ia herevalaia taudia edia helaro be tanobada ai do idia mauri. Keriso ia do vara lasi neganai idia noho taudia momo mai edia kamonai, hegeregere Aberahamo, Sara, Noa, bona Malaki, edia helaro be unai. Unai dainai idia danu be Ioane 10:16 ena “mamoe idaudia” ita gwauraia be maoro. Lagani 1,000 Lohia Negana lalonai, Keriso Iesu ese do ia hatoredia isi lou; idia ese ia do idia dibaia bona do idia abia dae dainai, Mamoe Naria Tauna Namona ena “mamoe idaudia” ai do idia lao.
Ita diba, guba lalonai do idia noho taudia boiria negana be ia doko murinai, taunimanima milioni haida be Keristani korikori taudia ai idia lao vadaeni. Idia danu be “mamoe idaudia” ita gwauraia be maoro, badina be idia be “orea maragi” taudia lasi. Mamoe idaudia hari inai negai edia helaro be tanobada paradaisona lalonai do idia mauri.
Vadaeni, Apokalupo 7:9 ese ia gwauraia taudia ‘hutuma bada herea’ be daidia? Inai henanadai Apok 7 siri 13 lalonai mani oi itaia: “Inai dabua kurokuro idia karaia taudia be daika? Bona edeseni dekena amo idia mai?” Haere be Apokalupo 7:14 (NW) ai ita davaria: “Inai be hisihisi badana amo idia roho mauri taudia.” Anina be, ‘hutuma bada herea’ be hisihisi badana amo idia mai eiava idia roho mauri taudia. Apok 7 Siri 17 ena hereva hegeregerena, Mamoe ena Natuna ese “mauri ranuna, ia lohilohi gauna, dekenai do ia hakaudia lao,” tanobada ai.
To, hisihisi badana amo do idia roho mauri totona, namona be edia dabua be Mamoe ena Natuna ena rarana ai idia huria vadaeni bona tomadiho momokani taudia ai idia lao vadaeni. Unai dainai, ena be Apokalupo 7:9 ese hisihisi badana murinai idia noho taudia hutuma ia gwauraia, to hari inai negai, hisihisi badana, iena matamanai tanobada besedia ese tomadiho koikoi do idia tuari henia gauna, be ia kahirakahira neganai, tanobada helarona idia abia bona Dirava ena hesiai idia lao henia taudia iboudiai, be ‘hutuma bada herea’ ita gwauraia be maoro.
Inai ibounai ena anina be inai: Dirava ena hesiai taudia, edia helaro be mauri hanaihanai tanobada ai do idia abia taudia, iboudiai be “mamoe idaudia” ita gwauraia. Idia haida mo be hari inai negai idia gogodia noho taudia ‘hutuma bada herea’ edia orea lalonai, edia helaro be kahirakahira do ia vara hisihisina badana amo do idia roho mauri taudia unai. Keristani taudia mai edia kamonai kahirakahira iboudiai hari inai negai idia noho be “mamoe idaudia” taudia bona ‘hutuma bada herea’ taudia danu.
Inai ai gwauraia lou be namo: Ena be unai hereva ruaosi edia idau ita lalo-pararalaia be namo, to namona be Keristani taudia ese do idia laloa momo lasi. Paulo ese haida ia sisibalaia, ia gwau idia “hekokoroku” bona hereva haida idia heailaia. (1 Timoteo 6:4) Bema unai hereva ruaosi edia idau ita lalo-pararalaia, unai be namo. To, bema ta ese unai Baibel herevadia ruaosi amo ta ia abia hidi kerere, namo lasi iseda lalona ai eiava iseda uduna amo ita maumauraia.