Oi Abia Dae Baibel be Dirava Ena Hereva

“Nega ibounai ai ese Dirava ai hanamoa, badina be Dirava ena hereva ai mailaia neganai, umui kamonai henia, bona umui abia dae. . . . Umui dekenai ia be taunimanima edia hereva lasi, to ia be Dirava ena hereva momokani. Badina be Dirava ena hereva ese umui Keriso abidadama henia taudia emui kudouna dekenai ia gaukara noho.”​—1 TESALONIKA 2:13.

TANOBADA ibounai lalonai Baibel be gado idauidau momo ai idia hahanaia bona idia hariharilaia. Idia gwau ia be buka hereadaena ta. Gau badana be inai, Baibel lalonai be sisiba, bona herevana taunimanima ta ta edia dagi be dahaka, to bese iboudiai lalonai unai sisiba idia abia haraga be namo. (Apokalupo 14:​6, 7) Iseda darana bona iseda lalona hamoalea dalanai Baibel ese ia haerelaia henanadaidia haida be inai: Taunimanima edia mauri ena anina be dahaka? (Genese 1:28; Apokalupo 4:11) Dahaka dainai edia gavamani ese noho daudau mainona bona noho namo idia havaraia diba lasi? (Ieremia 10:23; Apokalupo 13:​1, 2) Dahaka dainai taunimanima idia mase? (Genese 2:​15-17; 3:​1-6; Roma 5:12) Inai tanobada dikana lalonai, iseda lalo-hekwarahi be edena bamona do ita haheaukalaia diba? (Salamo 119:105; Aonega Herevadia 3:​5, 6) Nega vairai dahaka do ia vara?​—Daniela 2:44; Apokalupo 21:​3-5.

² Badina be dahaka Baibel ese unai henanadai ia haerelaidia mai ena siahu ida? Badina be ia be Dirava ena Hereva. Ia ese taunimanima ia gaukaralaia idia torea totona, to 2 Timoteo 3:​16 ese ia hahedinaraia hegeregerena, “Buka Helaga ena hereva ibounai be Dirava ena Lauma ese ia havaraia.” Sibodia edia lalohadai amo ia vara lasi. “Peroveta hereva gunadia [gabeai do idia vara gaudia herevadia, Dirava ena oda herevadia, Baibel ena taravatu herevadia] be tau ta ese sibona ena ura dekenai ia gwauraia lasi. Lasi momokani. To Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.”​—2 Petero 1:21.

³ Baibel ena namo idia diba dainai, taunimanima momo be dibura lalonai do idia koudia garina bona mase garina idia gari lasi, to idia abia bona idia duahia. Guna Katolik tanona Spain dekenai be unai bamona; unuseniai haroro taudia idia gari, taunimanima ese Baibel be sibodia edia gado ai bema idia duahia neganai, edia siahu do ia maragi ia lao garina. Guna Albania ai danu unai bamona ia vara; unuseniai gavamani ese kara aukadia amo tomadiho ena siahu ibounai ia haorea toho. To, Dirava idia gari henia taudia ese Baibel idia laloa bada, idia duahia, bona edia bamodia idia henidia. Tanobada Ibounai Tuarina Iharuana negana lalonai, Sachsenhausen dibura kamepana lalonai, ena be Baibel be taravatu, to ruma ta amo idia abia lao ma ruma ta dekenai, bona idia abia taudia ese ena hereva haida idia laloatao bena haida idia hamaorolaia. Lagani 1950 murinai, Komiunis tanona East Germany lalonai, Iehova ena Witness taudia edia abidadama dainai dibura rumadia ai idia koua. Idia ta ta ese Baibel ena kahana maragidia ta ta be edia bamodia idia henidia, hanuaboi ai do idia duahia totona; unai kara dainai idia ta ta ena sel ena sel lalodiai nega daudau do idia koudia garina idia gari lasi. Badina be dahaka unai bamona idia kara? Badina be idia diba Baibel be Dirava ena Hereva, bona idia diba “aniani sibona dekena amo do idia mauri lasi,” to “Dirava ena hereva ibounai” amo danu. (Deuteronomi 8:3) Ena be unai Witness taudia idia dagedage henidia dikadika, to unai hereva, Baibel ena hereva, dainai, idia be lauma dalanai idia mauri noho.

⁴ Baibel be buka patana latanai ita atoa bena nega ta ta sibona ita kokia duahia totona, eiava iseda tomadiho heboudia dekenai sibona ita gaukaralaia, be maoro lasi. Namona be dina dina iboudiai do ita gaukaralaia, dala maorona do ita itaia bena do ita rakalaia totona.​—Salamo 25:​4, 5.

Ia Ura Do Ita Duahia Bona Do Ita Lalo-Pararalaia

⁵ Hari inai negai, tano momo dekenai Baibel abidia be haraga, bona ai ese Gima Kohorona duahia taudia ta ta iboudiai ai hamaoroa ta do idia abia be namo. Gunaguna, Baibel idia torea neganai, printa masinidia be lasi. Unai neganai taunimanima be sibodia mai edia Baibel lasi. To Iehova ese dala ia karaia, ena hesiai taudia ese toretore herevadia do idia kamonai totona. Esodo 24:7 ia gwau, Iehova ese ia haganilaia herevadia iboudiai be Mose ese ia torea murinai, “gwauhamata taravatuna ena buka ia abia, . . . bona Israela taudia edia vairana dekenai ia duahia hedinarai.” Hoa gaudia be Sinai Ororona dekenai idia itaia vadaeni dainai, idia diba Mose ese ia duahia herevadia be Dirava ena amo bona unai hereva idia diba be namo. (Esodo 19:​9, 16-19; 20:22) Ita danu be Dirava ena Hereva ita diba be namo.​—Salamo 19:​7-11.

⁶ Israela besena ese edia laolao tano gagaena dekenai be idia hadokoa bona Ioridane Sinavaina idia hanaia gwauraia neganai, Iehova ena Taravatu bona idia dekenai ia karaia karadia idia laloa lou be namo. Dirava ena lauma ese ia hasiahua dainai, Mose ese Taravatu ia gwauraia lou idia dekenai. Taravatu herevadia ia hadibadia lou, bona ia ese danu hakaua herevadia bona lalohadai maorodia ia gwauraia, unai gau hegeregeredia Iehova do idia badinaia. (Deuteronomi 4:​9, 35; 7:​7, 8; 8:​10-14; 10:​12, 13) Hari inai negai, gaukara matamatadia ita abia eiava iseda mauri idia senisi negadiai, namona be ita danu ese Baibel ena sisiba badinaia dalana ita laloa.

⁷ Israela besena ese Ioridane Sinavaina idia hanaia murinai, nega daudau lasi idia hebou lou, Iehova ese Mose ena amo ia hadibadia herevadia kamonai lou totona. Iduhu 6 be Ebala Ororona vairanai, bona ma 6 be Gerisima Ororona vairanai. Unai be Ierusalema ena not kahanai; unai gabu bona Ierusalema edia padana be kilomita 50 bamona. Unuseniai Iosua ese “Taravatu hereva ibounai ia duahia hedinaraia, hanamoa hereva, bona hadikaia hereva danu.” Unai dainai tatau, hahine, natu, bona idau bese taudia idia bogaraginai, ese taravatu herevadia idia kamonai lou; unai taravatu bema idia utudia, Iehova ese do ia badu henidia. Hahenamo herevadia danu idia kamonai; bema Iehova idia kamonai henia, unai hahenamo do idia abidia. (Iosua 8:​34, 35) Iehova ena matana ai idia namo karadia bona idia dika karadia idia diba goevagoeva be namo. Inai danu, namona be edia lalona ai namo do idia ura henia bona dika do idia inai henia. Ita danu be unai bamona do ita karaia be namo.​—Salamo 97:10; 119:​103, 104; Amosa 5:15.

⁸ Taravatu be unai nega badadia ai idia duahia hedinarai; unai sibona lasi, to Deuteronomi 31:​10-12 ai Mose ese ia haganidia vadaeni, lagani 7 idia ore negadia iboudiai bese taudia iboudiai do idia hebou bena taravatu be idia edia vairanai do idia duahia, iboudiai do idia kamonai. Unai dala amo Dirava ese edia lauma anianina ia henidia. Unai kara dainai Garana gwauhamatadia idia laloatao, bona kamonai taudia ese Mesia idia naria. Israela taudia be Gwauhamata Tanona lalonai idia vareai neganai, Dirava ese tano gagaena ai lauma anianina ia ubulaidia dalana be ia doko lasi. (1 Korinto 10:​3, 4) Lasi, peroveta taudia edia hereva ma haida amo Dirava ese ena Hereva ena anina ia habadaia.

⁹ Dirava ena ura be, unai hebou badadia do idia karaia negadiai sibona lasi, to dina dina iboudiai danu, iena Hereva ena kahana haida bona unai Hereva lalonai idia torea taravatudia be do idia herevalaia lou. (Deuteronomi 6:​4-9) Hari inai negai, gabu momo ai memero kekeni ese Baibel idia abia diba sibodia edia, bona unai amo namo bada idia davaria. To idaunegai Israelana lalonai be unai bamona lasi. Unai neganai, tama sina ese Dirava ena Hereva be edia natudia idia hadibaia negadiai, idia laloatao herevadia bona idia torea herevadia kwadogidia sibona mo idia herevalaia diba. Idia herevalaidia loulou; unai amo edia natudia idia durua toho, Iehova bona ena dala do idia ura henia totona. Unai be edia famili taudia ese hereva momo do idia dibaia dalana sibona lasi, to idia durudia toho, edia noho dalana amo do idia hahedinaraia Iehova bona ena Hereva idia ura henia.​—Deuteronomi 11:​18, 19, 22, 23.

Dubu Lalodiai Buka Helaga Idia Duahia

¹⁰ Iuda taudia idia hakaua oho bona Babulonia ai idia hanohodia murinai, idia ese dubu idia haginidia, idia lalonai do idia tomadiho totona. Dirava ena Hereva be unai hebou gabudia ai do idia duahia bona do idia herevalaia totona, Buka Helaga ena hereva be buka momo ai idia torea hanai. Unai idaunegai bukadia 6,000 bamona idia do noho, idia lalonai Heberu Revarevadia edia kahana haida idia torea.

¹¹ Dubu lalonai idia hebou negadiai idia karaia karana badana ta be Torah idia duahia hedinarai; unai be iseda Baibel edia buka ginigunadia 5 hegeregeredia. Kara 15:21 ia gwau aposetolo edia negai unai be Sabati dinadia iboudiai idia karaia, bona Mishnah ese ia hahedinaraia, lagani 100 C.E. murinai Torah be pura ena dina iharuana ai bona ena dina namba 5 ai danu idia duahia. Tatau haida idia abia hidi, idia ta ta ese kahana ta ta do idia duahia. Iuda taudia Babulonia ai idia noho edia kara be lagani ta ta iboudiai Torah ibounai idia duahia ore; Palestine dekenai lagani toi lalonai idia duahia ore. Peroveta taudia edia buka ena kahana ta danu idia duahia bona ena anina idia gwauraia hedinarai. Iesu ia noho gabuna ai, Sabati dinadia ai Baibel be dubu lalonai idia duahia negadiai, ia be vaia edia hebou lalonai ia vareai.​—Luka 4:​16-21.

Kamonaia Bona Badinaia

¹² Buka Helaga idia duahia hedinarai be tomadiho karana ena koukou ta sibona lasi. Idia duahia lasi taunimanima hamoaledia kava totona. Sinai Ororona vairanai, Mose ese “gwauhamata taravatuna” be Israela taudia edia vairanai ia duahia hedinarai, Dirava ese ia henidia taravatudia do idia diba bena do idia badinaia totona. Do idia badinaia a? Mose ia duahiduahi neganai, idia haere be namo. Idia be unai idia diba dainai, idia haere, idia gwau: “Lohiabada ena oda hereva ibounai do ai karaia, bona do ai kamonai henia.”​—Esodo 24:7; ma danu Esodo 19:8; 24:3 itaia.

¹³ Gabeai, Iosua ese hanamoa herevadia bona hadikaia herevadia be unai bese vairanai ia duahia hedinarai neganai, idia haere be namo. Hadikaia herevadia ta ta murinai, ia oda henidia, ia gwau: “Taunimanima ibounai do idia haere, do idia gwau, ‘Amen.’ ” (Deuteronomi 27:​4-26) Unai dala amo, idia ese Iehova ena hadikaia herevadia ta ta iboudiai idia hamomokania. Unai bese ibounai be idia hereva badabada hebou neganai, unai be hoa karana badana ta!

¹⁴ Nehemia ena nega lalonai, taunimanima iboudiai be Taravatu kamonaia totona Ierusalema lalonai idia hebou neganai, idia diba unai taravatu herevadia be guna idia badinaia guguru lasi. Unai neganai idia dibaia herevadia be idia badinaia haraga. Unai dainai dahaka ia vara? “Moale bada.” (Nehemia 8:​13-17) Aria purana lalonai Baibel be dina iboudiai idia duahia murinai, idia diba idia do hegeregere lasi. Iehova ese Aberahamo ena nega amo Iena bese taudia dekenai ia karaia karadia be idia laloa lou bona idia guriguri. Bena unai ibounai dainai gwauhamata aukana ta idia karaia, idia gwau Taravatu ibounai do idia badinaia, idau bese taudia do idia adavaia lasi, bona dubu gaukarana do idia durua.​—Nehemia, karoa 8-10.

¹⁵ Unai hegeregerena, famili lalodiai, Baibel hadibalaidia karana be tomadiho karana ena koukou ta sibona lasi. Ita dibaia vadaeni hegeregerena, Deuteronomi 6:​6-9 dekenai Mose ese taunimanima ia hagania, Dirava ena hereva be ‘edia imana dekenai do idia kwatua’​—anina be edia haheitalai bona edia kara amo do idia hahedinaraia Iehova ena dala idia ura henidia. Bona Dirava ena hereva be ‘edia baguna dekenai do idia kwatua’​—anina be nega ibounai Baibel ena taravatu herevadia do idia laloa, bona unai hegeregerena ai edia lalona do idia hadaia. (Esodo 13:​9, 14-16 ena hereva danu itaia.) Unai hereva be ‘edia iduara dogoatao audia edia latanai, bona iduara ena ataiai audia dekenai, bona edia ikoukou dekenai do idia torea’​—anina be unai amo do idia hahedinaraia edia ruma ai bona edia hanua ai Dirava ena hereva idia matauraia bona idia badinaia. Edia noho daladia amo do idia hahedinaraia goevagoeva Iehova ena taravatu maoromaorodia idia ura henia bona idia badinaia. Unai ese ia hanamodia bada diba! Iseda famili lalodiai Dirava ena Hereva be unai bamona ita laloa bada, a? Madi, gabeai Iuda taudia ese unai ibounai be anina lasi karadia ai idia halaoa, bona guriguri pepadia mauadia idia kwatua, toni hegeregeredia. Edia lalona amo idia tomadiho lasi dainai, Iehova ese edia tomadiho ia dadaraia.​—Isaia 29:​13, 14; Mataio 15:​7-9.

Gunalaia Taudia Edia Maduna

¹⁶ Iehova ese ia hahedinaraia bese gunalaia taudia ese Baibel idia duahia be mai anina bada. Ia ese Iosua ia hereva henia, ia gwau: “Taravatu ibounai do oi badinaia, bona ena kara do oi karaia.” Unai maduna do ia huaia totona, ma ia hagania, ia gwau: “Dina bona hanuaboi do oi tahua, . . . unai neganai oiemu raka do ia namo, bona oiemu kara ena anina do ia vara momokani.” (Iosua 1:​7, 8) Keristani elda taudia hari inai negai hegeregeredia, Iosua ese Baibel ia duahia loulou neganai, unai ese ia durua, Iehova ese Iena bese taudia ia henidia haheganidia ia laloatao totona. Namona be Iosua ese danu Iehova ese Iena hesiai taudia be nega idauidau ai ia kara henidia daladia do ia lalo-pararalaia. Dirava ena palani herevadia do ia duahia neganai, gau badana be sibona ena maduna unai palani ena anina havaraia karana lalonai do ia laloa.

¹⁷ Iehova ia gwau, tau ta be Iena bese ena king ai do ia lao neganai, ena lohia negana ena matamana ai, Dirava ena Taravatu buka ta lalonai do ia torea, hahelaga taudia edia buka amo do ia torea hanai. Bena “iena mauri dinadia ibounai lalonai do ia duahia.” Unai be ena hereva do ia laloatao totona sibona lasi, to unai amo “[Iehova] matauraia kara dekenai do ia manada” bona “do ia hekokoroku lasi, do ia laloa lasi, ia ese iena varavara Israela taudia ia hereaia.” (Deuteronomi 17:​18-20) Unai dainai, ia duahia herevadia edia anina do ia laloa namonamo be namo. Toana be, king haida idia laloa gavamani gaukarana dekenai idia bisi momokani dainai unai bamona idia karaia diba lasi, bena unai dainai bese ibounai ia dika. Momokani, elda taudia edia dagi Keristani kongregesen lalonai be king edia dagi hegeregerena lasi, to idia danu ese Dirava ena Hereva idia duahia bona idia laloa namonamo be mai anina bada. Unai ese do ia durudia, Keriso ese ia henidia do idia naria totona taudia do idia laloa maoromaoro noho totona. Do ia durudia danu, edia maduna ma ta do idia huaia totona; edia bamodia, Keristani taudia, be Dirava hanamoa momokani dalana amo do idia hadibaia bona hagoadaia.​—Tito 1:9; ma danu Ioane 7:​16-18; 1 Timoteo 1:​6, 7 itaia.

¹⁸ Aposetolo Paulo, idaunegai Keristani elda tauna ta, ese Buka Helaga ena hereva ia diba momo. Tesalonika taudia ia haroro henidia neganai, Buka Helaga ena hereva be idia dekenai ia herevalaia namonamo diba, bona ia durudia diba ena anina idia lalo-pararalaia totona. (Kara 17:​1-4) Lalo-momokani taudia edia lalona ia ania dainai, idia momo ese ena hereva idia abia dae. (1 Tesalonika 2:13) Oi be Baibel oi duahia loulou bona oi stadilaia dainai, ena hereva oi herevalaia namonamo diba, a? Baibel duahia karana ena gabu emu mauri lalonai bona oi duahia dalana danu ese idia hahedinaraia Dirava ena Hereva oi laloa bada, eiava? Hereva gabena lalonai dala ta do ita herevalaia; idia badinaia taudia, idia bisi momokani taudia danu, ese unai henanadai bema idia haerelaia neganai, do idia gwau oibe.

Edena Bamona Do Oi Haere?

◻ Dahaka dainai haida ese Baibel duahia dalana idia tahua neganai, mase garina bona dibura lalonai do idia koudia garina idia gari lasi?

◻ Idaunegai Israelana ese Dirava ena Hereva idia kamonai daladia herevalaia lou karana ese ita edena bamona ia durua?

◻ Baibel lalonai ita duahia herevadia be edena bamona ita gaukaralaia be namo?

◻ Dahaka dainai Keristani elda taudia ese Baibel idia duahia bona idia laloa namonamo be gau badana?

[Study Questions]

1. Baibel be hereadae, badina be edena bamona herevadia be ia lalonai?

2. Dahaka dainai Baibel ese iseda henanadai ia haerelaidia maoromaoro?

3. (a) Haheitalai haida amo mani oi hahedinaraia tano idauidau dekenai Baibel idia laloa bada? (b) Dahaka dainai haida ese Baibel duahia dalana idia tahua neganai mase garina idia gari lasi?

4. Baibel be edena bamona ita gaukaralaia be namo?

5. (a) Bema mai dalana, ita ta ta ibounai be dahaka ita abia be namo? (b) Idaunegai Israelana lalonai, taunimanima ese Baibel ena anina be edena bamona idia dibaia? (c) Salamo 19:​7-11 dainai oi ese Baibel duahia karana be edena bamona oi laloa?

6. (a) Israela besena be Gwauhamata Tanona ai idia vareai gwauraia neganai, Mose be dahaka ia karaia? (b) Mose ena kara be edena bamona ita tohotohoa be namo?

7. Israela taudia ese Ioridane Sinavaina idia hanaia murinai, Iosua ese edena bamona ia durudia, Iehova ena Taravatu do idia laloa bada totona?

8. Dirava ena Hereva be Israela besena ena hebou badadia dekenai idia duahia; unai kara ena namo be dahaka?

9. (a) Israela taudia be hebou badadia ai idia hebou negadia sibodia mo Baibel idia duahia, a? Herevalaia. (b) Famili ta ta lalonai Baibel be edena bamona idia hahedibalaia, bona dahaka totona?

10, 11. Dubu lalodiai Baibel be edena negadia ai idia duahia, bona Iesu ese unai nega be edena bamona ia lalodia?

12. (a) Mose ese Taravatu be taunimanima vairadiai ia duahia neganai, unai ese edena bamona ia hanamodia? (b) Edena bamona idia haere?

13. Iosua ese hadikaia herevadia ia duahia neganai, taunimanima be edena bamona idia kara be namo, bona unai be dahaka totona?

14. Nehemia ena nega lalonai, dahaka dainai Taravatu duahia hedinarai karana ese ia durudia bada?

15. Deuteronomi 6:​6-9 ena hereva ese edena bamona idia hahedinaraia, famili lalodiai Dirava ena Hereva idia hahedibalaia be tomadiho karana ena koukou ta sibona lasi?

16. Dahaka dainai Iosua ese Baibel do ia duahia loulou be gau badana?

17. (a) Baibel duahia karana ese Iehova ena hereva hegeregerena do ia durudia totona, king be dahaka danu do idia karaia be namo? (b) Dahaka dainai Keristani elda taudia ese Baibel idia duahia loulou bona idia laloa namonamo be gau badana?

18. Bema Baibel ita duahia loulou bona ita stadilaia loulou, unai ese ita do ia durua, ita ese aposetolo Paulo edena bamona do ita tohotohoa totona?

[Picture on page 9]