Diari—Badadia Bona Maragidia (Kahana Ginigunana)
“Kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.”—AONEGA HEREVADIA 4:18.
1. Dahaka dainai hereva momokani be sisina sisina ia hahedinaraia?
DIRAVA ena aonega hamomokania gauna ta be inai: Aonega Herevadia 4:18 ia hereva hegeregerena, sisina sisina diari ia henia, lauma herevadia momokanidia hahedinaraia totona. Inai hereva ia gunalaia herevana lalonai, unai siri be aposetolo edia negai ia momokani dalana ita itaia. Baibel ena hereva momokanidia momo be nega tamona ai bema ia hahedinaraia, unai ese taunimanima do ia hadaradaraia—ta be dibura kohuana amo ia raka lasi neganai dina ena diari bada ese ena matana ia botaia bona ia hadaradaraia bamona. Ma danu, hereva momokani be sisina sisina ia hahedinaraia dainai, unai ese Keristani taudia edia abidadama ia hagoadaia loulou. Edia helaro ia hadiaria bada bona idia rakalaia be namo dalana ia hadiaria goevagoeva.
‘Hesiai Tauna mai Ena Kamonai Bona mai Ena Kara Maoromaoro’
2 Aposetolo edia negai Iesu Keriso ese hoa daladia ai diari be ia murinai idia raka taudia ia henidia negadia rua be inai: Pentekoste 33 C.E. bona Korenelio be lagani 36 C.E. lalonai ia helalo-kerehai negana. Unai murinai, Keriso ese taunimanima ia gaukaralaia, ia peroveta vadaeni hegeregerena, ia gwau: “Hesiai tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona biaguna ena [memero] edia aniani neganai edia aniani do ia henia, tauna be daika? Iena biaguna do ia mai neganai do ia davaria, unai bamona ia karaia noho tauna be ia namo. Umui lau hamaoroa momokani, iena kohu ibounai naria tauna iena biaguna ese do ia halaoa.” (Mataio 24:45-47) Unai hesiai tauna be tau tamona lasi, badina be lauma anianina do ia henidia, Keristani ekalesiana be Pentekoste dekenai ia matamaia negana amo ela bona ena Biaguna, Iesu Keriso, ese ena kara do ia nanadailaia totona do ia mai. Idia vara gaudia ese idia hahedinaraia unai hesiai tauna mai ena kamonai bona mai ena kara maoromaoro be tanobada ai idia noho horoa Keristani taudia edia orea ibounai, herevana edena negai idia noho.
3. Hesiai tauna oreana lalonai idia noho taudia ginigunadia haida be daika daika?
3 Hesiai tauna mai ena kamonai bona mai ena kara maoromaoro oreana lalonai idia noho taudia ginigunadia haida be daidia? Ta be aposetolo Petero, Iesu ena hahegani, “Egu mamoe do oi ubua” haheganina, ia badinaia tauna. (Ioane 21:17) Hesiai oreana taudia ginigunadia ma haida be Mataio, Evanelia Mataio ia torea tauna, bona Paulo, Iamesi, bona Iuda, lauma helaga ese ia hasiahudia dainai revareva idia torea taudia. Aposetolo Ioane danu, Apokalupo bukana, ena Evanelia, bona ena revareva ia torea tauna, be hesiai tauna mai ena kamonai bona mai ena kara maoromaoro oreana tauna ta. Unai tatau be Iesu ena hereva hegeregerena idia toretore.
4. ‘Memero’ be daidia?
4 Herevana horoa taudia be edeseniai idia noho tanobada ai, to idia be hesiai tauna oreana taudia; vadaeni ‘memero’ be daidia? Idia danu be unai horoa taudia. Oibe, lauma anianina idia hariharilaia neganai idia be “hesiai tauna” oreana taudia, to idia ta ta idia ania neganai idia be ‘memero.’ Haheitalai ta be inai: Petero Iharuana 3:15, 16 ai, aposetolo Petero ese Paulo ena revareva ia gwauraidia. Ia duahidia neganai, Petero be unai memero ta bamona, badina be ia ese hesiai tauna oreana ena ladanai ia gaukara tauna, Paulo, ese ia henia lauma anianina ia ania dainai.
5. (a) Aposetolo idia mase murinai lagani handred momo lalonai unai hesiai tauna be edena bamona? (b) Lagani 1900 C.E. vairanai dahaka ia vara?
5 Unai ia herevalaia bukana ta ladana God’s Kingdom of a Thousand Years Has Approached ia gwau: “Biaguna Iesu Keriso ena aposetolo idia mase murinai, ‘hesiai tauna mai ena kamonai bona mai ena kara maoromaoro’ oreana be lagani handred momo lalonai idia noho bona idia gaukara dalana sivaraina be ita diba goevagoeva lasi. Toana be ‘hesiai tauna’ oreana ena uru ta ese ena uru gabena ia ubua. (2 Timoteo 2:2) To lagani 1900 C.E. vairanai, Dirava gari henia taudia, Buka Helaga ena lauma anianina idia ura henia bada bona idia ura do idia ania taudia, idia noho . . . Baibel stadi klas . . . idia havaradia bona edia diba Revareva Helagadia edia hereva momokanidia badadia dekenai be ia bada ia lao. Lalo-momokani taudia unai Baibel stadilaia taudia bogaragidiai, sibodia edia namo idia tahua lasi taudia, idia ura bada unai lauma anianina namona be ma haida do idia henidia. Edia lalohadai be ‘hesiai tauna’ ena hegeregerena, Iesu ese ia abia hidi, lauma anianina be nega korikori ai ‘memero’ do ia henidia. Idia laloa maoromaoro dainai, idia diba unai be aniani henia negana korikorina bona dabaraia dalana namo hereana danu idia lalo-pararalaia. Unai aniani idia dabaraia toho.”—Rau 344-5.a
Iseda Nega be Do Lasi Neganai Idia Hedinarai Diaridia Ginigunadia
6 Ia hedinarai goevagoeva gauna ta be inai: Inai lauma diarina henia totona Iehova ese ia gaukaralaia taudia ese sibodia edia ladana idia abia isi lasi. Watch Tower Society ena presiden ginigunana, C. T. Russell, ia laloa Lohiabada ena lalona be hegeregere edia diba maragina do ia gaukaralaia. Ena inai taudia ese idia hatoa ladadia idaudia be Tadikaka Russell ese ia herevalaia goadagoada, ia gwau “Russell Badinaia Taudia” ta ia hedavari henia lasi bona “Russell ena Tomadiho” dalana be lasi. Dirava sibona ena ladana idia abia isi.
7. Tadikaka Russell bona ia ida idia gaukara hebou taudia ese edena bamona idia hahedinaraia idia be hesiai tauna mai ena kamonai bona mai ena kara maoromaoro ida idia gaukara?
7 Idia vara gaudia ese idia hahedinaraia goevagoeva Iehova ena lauma helaga ese Tadikaka Russell bona ena bamona edia gaukara ia biagua. Idia hahedinaraia idia be hesiai tauna mai ena kamonai bona mai ena kara maoromaoro ida idia gaukara. Ena be haroro taudia momo unai nega lalonai idia gwau Baibel be Dirava ena Hereva, ena lauma ese ia havaraia gauna, bona Iesu be Dirava ena Natuna, to Babulonia amo idia mai hahediba herevadia koikoidia idia abia dae. Unai hereva haida be inai: Toi Tamona Diravana herevana, mase diba lasi soulina herevana, bona hisihisi ania hanaihanai herevana. Iesu ena gwauhamata hegeregerena, lauma helaga ena heduru amo Tadikaka Russell bona ena bamona mai edia manau ese hereva momokani idia halasia badabada, guna be unai bamona lasi. (Ioane 16:13) Unai horoa Bible Student taudia ese idia hamomokania idia be hesiai tauna mai ena kamonai bona mai ena kara maoromaoro oreana taudia, edia gaukara be lauma anianina be Biaguna ena memero do idia henidia. Edia hekwarahi amo horoa taudia gogoa gaukarana idia durua bada.
8. Bible Student taudia ese dahaka hereva badadia idia lalo-pararalaia goevagoeva, Iehova, Baibel, Iesu Keriso, bona lauma helaga dekenai?
8 Iehova be lauma helaga amo diari bada be unai Bible Student taudia ginigunadia ia henidia dalana be ita hoalaia. Matamana ai, idia hamomokania gau iboudiai havaraia Diravana ia noho bona ia sibona ena ladana be Iehova. (Salamo 83:18; Roma 1:20) Idia davaria Iehova be mai ena kara badadia hani—siahu, hahemaoro maoromaoro, aonega, bona lalokau. (Genese 17:1; Deuteronomi 32:4; Roma 11:33; 1 Ioane 4:8) Unai horoa Keristani taudia be idia hamomokania vaitani Baibel be Dirava ena Hereva, ena lauma ese ia havaraia, bona ia be hereva momokani. (Ioane 17:17; 2 Timoteo 3:16, 17) Ma danu, idia gwau Dirava ena Natuna, Iesu Keriso, be Dirava ese ia havaraia, bona Iesu ese sibona ena mauri ia henia, taunimanima iboudiai edia mauri davana. (Mataio 20:28; Kolose 1:15) Idia diba lauma helaga be Toi Tamona Diravana lalonai dirava ihatoina lasi, to ia be Dirava ena gaukara siahuna.—Kara 2:17.
9 Bible Student taudia idia diba goevagoeva taunimanima be mai ena mase diba lasi soulina lasi, to ia be mase diba soulina ta. Idia lalo-parara, kara dika ena davana be hisihisi ania ela bona hanaihanai lasi, to “ena davana be mase,” bona hel, ia lalonai lahi ia ara hanaihanai gabuna, be lasi. (Roma 5:12; 6:23; Genese 2:7; Esekiela 18:4) Ma danu, idia diba goevagoeva, evolusen herevana be Baibel ena hereva hegeregerena lasi bona hamomokania gaudia be lasi. (Genese karoa 1 bona 2) Idia davaria Baibel ese noho gabudia rua ia gwauraia—ta be guba, Keriso ena aena gabudia ai idia raka taudia, horoa taudia 144,000, do idia noho gabuna, bona ta be paradaiso tanobadana, “mamoe idaudia” ‘hutuma bada herea,’ edia momo be Baibel ese ia gwauraia lasi taudia, do idia noho gabuna. (Apokalupo 7:9; 14:1; Ioane 10:16) Unai Bible Student taudia ginigunadia idia diba tanobada be do ia noho hanaihanai, lahi ese do ia araia ore lasi, tomadiho oreadia momo idia hereva hegeregerena. (Hadibaia Tauna 1:4; Luka 23:43) Idia diba Keriso ena lou mai neganai taunimanima ese edia matana amo do idia itaia lasi, bona unai neganai tanobada besedia edia hahemaoro davana do ia henidia bona tanobada paradaisona do ia havaraia.—Kara 10:42; Roma 8:19-21; 1 Petero 3:18.
10. Bible Student taudia ese dahaka hereva momokani idia dibaia, bapatiso dekenai, haroro taudia bona tomadiho oreana taudia oredia hapararaia karana dekenai, bona Keriso ena mase laloatao karana dekenai?
10 Bible Student taudia idia diba Baibel ese ia gwauraia bapatisona be ranu amo beibi haparia karana lasi, to Iesu ena hahegani Mataio 28:19, 20 ai hegeregerena, idia hadibaia vadaeni kamonai taudia be ranu lalonai hadihoa karana. Idia davaria, haroro taudia bona tomadiho oreana taudia oredia hapararaia karana be Baibel ena hereva hegeregerena lasi. (Mataio 23:8-10) Lasi, namona be Keristani taudia iboudiai be sivarai namona harorolaia taudia ai do idia lao. (Kara 1:8) Bible Student taudia idia diba, Keriso ena mase laloatao hebouna, Memorial hebouna, be lagani ta ta amo nega tamona, Nisan 14 ai, idia karaia be maoro. Bona, idia davaria Ista be Dirava diba lasi taudia edia nega helagana ta. Ma danu, unai horoa taudia idia diba goevagoeva Dirava ese edia gaukara ia durua, unai dainai moni idia gogoa lasi. (Mataio 10:8) Edia nega matamana amo, idia diba namona be Keristani taudia ese Baibel ena taravatu be edia mauri lalonai idia badinadia bona Dirava ena lauma helaga ena huahua idia havaraia.—Galatia 5:22, 23.
Diari Ia Bada Ia Lao
11 Lagani 1919 amo, nega momo Iehova ese diari matamata be ena hesiai taudia ia henidia, unai amo ia hanamodia. Lagani 1922 ai, Cedar Point ena hebouhebou ai, diari bada ia henidia; J. F. Rutherford, Watch Tower Society ena presiden iharuana, ia hereva goada, ia gwau Iehova ena hesiai taudia edia gaukara badana be ‘King bona ena basileia do idia harorolaia, harorolaia, harorolaia’! Lagani gabena ai, Iehova ese mamoe bona nanigosi parabolena ena anina ia hadiaria. Bena idia diba unai peroveta herevana ena anina be nega vairai, Lagani 1,000 Negana lalonai, do ia vara lasi, guna idia laloa bamona, to Lohiabada ena dina ai, be hari inai nega lalonai do ia vara. Lagani 1,000 Negana lalonai, Keriso ena tadina do idia gorere lasi, bona dibura rumadia ai do idia koudia lasi. Ma danu, Lagani 1,000 Negana ena dokona ai, Iesu Keriso lasi, to Iehova Dirava ese taunimanima do ia kota henidia.—Mataio 25:31-46.
12. Dahaka diari ia halasia Aramagedono ena anina dekenai?
12 Guna Bible Student taudia idia laloa Aramagedono dekenai tanobada besedia ese edia gavamani do idia hamorudia, to lagani 1926 lalonai Dirava ese diari ia halasia lou, ia hahedinaraia unai tuari lalonai ia ese ena siahu do ia hahedinaraia goevagoeva, bena taunimanima iboudiai do idia diba goevagoeva ia be Dirava.—Apokalupo 16:14-16; 19:17-21.
Kerisimasi—Dirava Diba Lasi Taudia Edia Dina Helagana Ta
13 Nega daudau lasi murinai, diari ma ia halasia lou dainai Bible Student taudia ese Kerisimasi hahelagaia karana idia hadokoa. Guna, Bible Student taudia tanobada hegegemadai ese Kerisimasi idia hahelagaia, bona edia hedikwota Brooklyn ai, aria badana idia karaia. To gabeai edia lalona idia parara, December 25 hahelagaia karana be Kerisendom, hereva momokani ia negea oreana, ese ia abia hidi, Dirava diba lasi taudia be ena orea lalonai ia veria haraga totona. Bona idia davaria danu, Iesu be keru bada neganai ia vara lasi, badina be ia vara neganai, mamoe naria taudia ese edia mamoe oreadia be rei gabuna dekenai idia naria—December ena dokona kahanai, hanuaboi neganai, unai bamona idia karaia diba lasi. (Luka 2:8) To, Baibel ese ia hahedinaraia Iesu be October 1 bamona ai ia vara. Bible Student taudia edia lalona idia parara, Iesu ena mauri laganidia be rua bamona neganai idia vadivadi henia taudia, haida ese idia gwauraia aonega taudia, be Dirava diba lasi taudia, hisiu edia toana tahua taudia.b
Ladana Matamatana Ta
14 Lagani 1931 ai, diari badana ta ese hereva momokanina ta ia hahedinaraia Bible Student taudia dekenai; gauna be Baibel ese ia hatoa ladana maorona ta. Iehova ena orea taudia be guna idia diba taunimanima ese idia hatoa kava ladadia, hegeregere Russell Badinaia Taudia, Lagani 1,000 Negana Matamana Naria Taudia, bona “hel lasi taudia,” be idia abia dae diba lasi.c Bona edia lalona idia parara matamaia, idia sibodia ese idia hatoa ladana—International Bible Students—ese edia kara korikori ia hahedinaraia lasi. Idia be Baibel stadilaia taudia sibodia lasi. Ma danu, Baibel stadilaia taudia be momo, to idia momo be Bible Student taudia hegeregeredia lasi.
15. Lagani 1931 ai, Bible Student taudia ese dahaka ladana idia abia dae, bona dahaka dainai idia abia be maoro?
15 Edena dala amo Bible Student taudia ese ladana matamatana idia abia? Lagani momo lalonai Gima Kohorona ese Iehova ena ladana ia gwauraia momo. Unai dainai, Bible Student taudia ese Isaia 43:10 lalonai ia noho ladana idia abia dae be maoro. Unai siri lalonai Iehova ia gwau: “Umui be lauegu hereva hamomokania taudia. Lau ese umui lau abia hidi, egu hesiai gaukara do umui karaia totona, bona lau do umui diba, bona lau do umui abidadama henia totona. Bona do umui diba, lau sibona be Dirava, badina be dirava ta lasi ese lau ia gunalaia, bona lauegu murinai danu, dirava ta do ia hedinaraia lasi.”
Hamomokania Karana Bona ‘Hutuma Bada Herea’
16 Vindication bukana iharuana, lagani 1932 lalonai Watch Tower Society ese ia halasia gauna, ese diari ia henidia. Ia hahedinaraia, bese haginia lou herevadia, Isaia, Ieremia, Esekiela, bona peroveta taudia ma haida ese idia torea herevadia, ese Iuda taudia idia gwauraia lasi (guna idia laloa bamona); idia be mai edia abidadama lasi, bona politik dainai Palestine idia lou henia. To, unai peroveta herevadia edia anina be guna dala maragina ai ia vara, Iuda taudia be lagani 537 B.C.E. lalonai Babulonia ena igui amo edia tano idia lou henia neganai, bena gabeai, lagani 1919 lalonai, edia anina be dala badana ai ia vara matamaia; unai neganai Iehova ese lauma Israela taudia ia ruhaia, bena edia bese ia haginia lou, bona unai dainai hari inai negai iena hesiai taudia korikoridia be lauma paradaisona lalonai idia noho namonamo.
17, 18. (a) Gabeai, Iehova ese diari amo ia hahedinaraia ena palani hereadaena be dahaka? (b) Lagani 1935 ai, dahaka diari idia abia Apokalupo 7:9-17 dekenai?
17 Gabeai, diari ese ia hahedinaraia Iehova ena palani hereadaena be, taunimanima do ia hamauridia dalana lasi, to iena lohia siahuna do ia hamomokania dalana. Baibel ena hereva hereadaena be taunimanima davalaia karana herevana lasi, to Basileia herevana, badina be Basileia ese Iehova ena lohia siahuna do ia hamomokania. Diari bada ia halasia unai! Unai nega murinai gwauhamata Keristani taudia be guba do idia lao henia dalana idia tahua guna lasi, guna idia tahua bamona.
18 Lagani 1935 ai, diari badana ta ese ia hahedinaraia Apokalupo 7:9-17 ese ia gwauraia taudia hutuma bada herea be guba oreana iharuana lasi. Guna haida idia laloa unai siri ese idia gwauraia taudia be Dirava idia badinaia vaitani lasi horoa taudia; edia kara dainai terona latadiai idia helai lasi bona Iesu Keriso ida pavapava bona hahelaga gaukaradia idia karaia lasi, to terona vairanai idia gini. To, ta ese Dirava ia badinaia dalana tamona be, ia badinaia guguru. Bema ia badinaia guguru lasi, anina be ia badinaia lasi. Unai dainai idia diba unai peroveta herevana ese hutuma bada herea, bese iboudiai amo idia gogoa taudia, ia gwauraia. Edia momo be ta ia duahia diba lasi bona edia helaro be tanobada ai do idia mauri. Idia be Mataio 25:31-46 ese ia gwauraia ‘mamoedia’ bona Ioane 10:16 ese ia gwauraia ‘mamoedia idaudia.’
Korosi—Keristani Toana ta Lasi
19 Lagani momo lalonai Bible Student taudia ese korosi toana idia hahedinaraia momo, Keristani tomadihona ena toana ta bamona. Idia be mai edia “korosi-bona-korona” pinina. King James Version Baibel ia gwau Iesu ese ia murinai idia raka taudia ia hamaoroa edia “cross” do idia huaia, bona gabeai taunimanima momo idia abia dae ia be korosi dekenai idia hamasea. (Mataio 16:24; 27:32) Lagani momo lalonai unai toa be Gima Kohorona magasin ena kopina ai ia hedinarai.
19, 20. Dahaka dainai korosi be Keristani tomadihona korikorina ena toana lasi?
20 Buka ta ladana Riches, lagani 1936 ai Society ese ia halasia gauna, ese ia hahedinaraia goevagoeva Iesu Keriso be korosi dekenai idia hamasea lasi, to au maoromaorona ta dekenai idia hamasea. Diba tauna ta ia gwau, King James Version Baibel lalonai idia torea herevana, “cross,” be Greek gado herevana (stau·rosʹ) amo idia hahanaia, bona “ena anina badana be ia gini maoromaoro auna ta eiava du ta. [Ia be] idau, tomadiho oreadia ese idia gwauraia korosina mai ena au rua hegeregerena lasi. . . . Mai ena au rua gauna be idaunegai Kaledea dekenai idia gaukaralaia matamaia, bona edia dirava Tamusu ena toana ai idia halaoa.” Ia dekenai Iesu idia hamasea gauna be tomadiho gauna ai idia halaoa be maoro lasi, to namona be idia inai henia.
21. Hereva gabena lalonai dahaka do ita herevalaia?
21 Diari bada bona diari maragi herevadia ma haida idia hedinarai. Hereva gabena ese unai do ia gwauraia, unai dainai mani oi itaia.
[Footnotes]
a Watchtower Bible and Tract Society of New York, Inc. ese ia halasia.
b Gabeai, edia lalona idia parara, bema vara hereadaena hahelagaia karana be maoro lasi, taunimanima edia vara dinadia ita hahelagaia lasi be maoro. Unai sibona lasi, to Israela taudia bona Keristani taudia ginigunadia ese taunimanima edia vara dinadia idia hahelagaia lasi. Baibel ese taunimanima idia hahelagaia vara dinadia rua sibona ia herevalaia, ta be Farao ena, ta be Heroda Anetipa ena. Unai pati ruaosi ta ta ai, tau ta idia alaia mase. Iehova ena Witness taudia ese vara dinadia idia hahelagaia lasi, badina be Dirava diba lasi taudia ese unai kara idia hamatamaia bona unai kara amo idia ese edia vara dinadia idia hahelagaia taudia edia ladana idia abia isi.—Genese 40:20-22; Mareko 6:21-28.
c Kerisendom ena tomadiho oreadia haida be unai dala ai idia kerere. Martin Luther ena inai taudia ese ia idia badinaia taudia edia ladana idia hatoa Luteran taudia, bena idia ese unai ladana idia abia dae, edia. Unai hegeregerena, Baptis taudia ese murimuri taudia ese idia henidia kava ladana idia abia dae, edia. Unai ladana idia hatoa badina be bapatiso ranu lalonai abia karana idia harorolaia. Bona Metodis taudia ese murimuri tauna ta ese ia henidia ladana idia abia dae, edia. The World Book Encyclopedia ese ia hahedinaraia dahaka ia vara dainai orea ta ladana Society of Friends idia gwauraia Quaker taudia; ia gwau: “Matamanai ta ese inai hereva Quaker ia gwauraia, Fox [orea hamatamaia tauna] ena ladana hadikaia totona. Guna Fox ese England ena diadi ta ia hamaoroa namona be ‘Lohiabada ena Hereva dainai do ia heudeheude.’ Diadi ese Fox ia gwauraia ‘quaker [heudeheude] tauna.’ ”
Inai Oi Laloatao A?
◻ ‘Hesiai tauna mai ena kamonai bona mai ena kara maoromaoro’ be daika, bona ‘memero’ be daidia?
◻ Iseda nega be do lasi neganai Dirava ese ia halasia diaridia ginigunadia haida be dahaka?
◻ Dahaka dainai ladana matamatana, Iehova ena Witness Taudia, be ladana maorona?
◻ Lagani 1935 ai, dahaka hereva momokanidia badadia idia gwauraia hedinarai?
2. Iesu ia gwau ia ese daika do ia gaukaralaia, lauma diarina be ia murinai idia raka taudia do ia henidia totona, bona daidia be unai orea lalonai?
6. Hereva momokani be sisina sisina hahedinaraia karana lalonai, dahaka ia hedinarai goevagoeva?
9. (a) Bible Student taudia be dahaka hereva momokanidia idia dibaia goevagoeva, taunimanima ena anina dekenai bona Baibel ese ia gwauraia helarodia dekenai? (b) Iehova ena hesiai taudia ese dahaka hereva momokanidia ma haida idia lalo-pararalaia goevagoeva?
11. Keristani taudia edia gaukara bona Iesu ena parabole, mamoe bona nanigosi gauna, be dahaka diari ese ia hadiaria?
13. (a) Dahaka diari ia halasia Kerisimasi hahelagaia karadia dekenai? (b) Dahaka dainai vara dinadia hahelagaia karana idia hadokoa? (Futnout gwauraia danu.)
14. Dahaka dainai inai ladana Bible Student be hegeregere momokani lasi Iehova ena orea taudia dekenai?
16. Dahaka dainai peroveta herevadia, bese haginia lou herevadia, edia anina ia vara diba lasi Iuda taudia be Palestine idia lou henia neganai, to edia anina be daidia dekenai ia vara?
[Picture on page 17]
C. T. Russell bona ena bamona ese lauma diarina idia halasia, to Iehova ena ladana sibona idia abia isi