Duahia Taudia Edia Henanadai

Maria, Iesu ia havaraia hahinena, be ia rogorogo vadaeni, ena varavara Elisabeta ia vadivadi henia neganai eiava?

Oibe, toana be unai bamona.

Luka karoa 1 lalonai, hahelaga tauna Sekaraia ena adavana, Elisabeta, Ioane (Bapatiso) ia havaraia hahinena, ena rogorogo sivaraina ita duahia. “Elisabeta ena rogorogo hua namba 6 [ai], Dirava ese aneru ladana Gabriela ia siaia” Maria dekenai, ia hadibaia do ia rogorogo, “Dirava Ataiai Momokani ena Natuna” do ia havaraia. (Luka 1:​26, 30-33) Edena negai Maria ia rogorogo matamaia?

Luka ese ia torea sivaraina be ma ia gwau unai murinai Maria ia lao Iuda, iena varavara Elisabeta, mai bogana hahinena, vadivadi henia totona. Hahine ruaosi idia hedavari neganai, Elisabeta ena bogana lalonai ia noho natuna (Ioane) ia roho. Elisabeta ese ‘Maria do ia havaraia merona’ ia herevalaia, bona Maria ia gwauraia “lauegu Lohiabada ena sinana.” (Luka 1:​39-44) Unai dainai, ita gwau diba Elisabeta ia vadivadi henia neganai, Maria be ia rogorogo vadaeni.

Luka 1:56 ia gwau: “Maria be Elisabeta danu hua toi idia noho, gabeai iena ruma dekenai ia giroa lou.” Unai siri ese ia noho huadia sibona ia herevalaia, dina ia herevalaia lasi. Ia gwau “hua toi,” unai dainai anina be Elisabeta ena rogorogo huana namba 9 lalonai ia rakatania.

Maria ese Elisabeta ena rogorogo negana ena dokona kahanai ia durua murinai ia rakatania, sibona ena hanua Nasareta dekenai ia lao. Reana ia diba Elisabeta do ia mara (bona Ioane do ia abia) neganai, vadivadi taudia momo do idia mai, idia haida be varavara taudia. Idia vairanai do ia hemarai, badina be ia do headava lasi neganai ia rogorogo. Maria ena rogorogo huadia be hida, Nasareta dekenai ia giroa lou neganai? Ia be “hua toi” bamona Elisabeta ida ia noho, unai dainai Maria be Nasareta dekenai ia lou lao neganai, unai be ena rogorogo huana ihatoina ena dokona kahanai eiava ihahanina ena matamana kahanai.