“Lalokau be Do Ia Noho Hanaihanai”

SAMUEL D. LADESUYI ESE IA SIVARAILAIA

Guna negadia lau laloa bona ai hagugurua gaudia lau lalodia neganai, lau hoa bada. Iehova be gau namodia ia karaia noho tanobada hegegemadai lalonai. Lagani 1931 lalonai, Ilesha, Nigeria dekenai, haroro taudia be momo lasi, to hari kongregesen ibounai 36 idia noho. Lagani 1947 ai, misinari ginigunadia Watchtower Bible School of Gilead amo idia mai neganai, pablisa taudia be 4,000, to hari ia bada daekau lao 180,000. Unai nega lalodiai, ai diba lasi bona ai laloa lasi orea be unai bamona do ia bada. Lau moale bada badina lau be unai gaukara namona lalonai lau noho! Mani lau sivarailaia oi dekenai.

EGU TAMANA be taoni ta ta dekenai, ipidi bona ipidi ena pauda ia hoihoilaia; ruma dekenai ia noho diba lasi. Lau diba, iena adavana ibounai be 7, to idia haida be ia ida idia noho lasi. Egu sinana be egu tamana ese ia adavaia, iena kakana ia mase neganai. Ia be iena adavana iharuana, bona lau be sinagu ida lau noho.

Nega ta, Tamagu be emai dekena hanuana dekenai iena adavana ginigunana ia vadivadi henia murinai, ia giroa mai. Unuseniai ia noho neganai, ia itaia egu kakana ta be ia lao sikuli. Egu kakana ena lagani be 10, egu lagani hegeregerena. Unai dainai Tamagu ia gwau lau danu do lau lao sikuli. Ia ese pene 9 ia henia lau dekenai​—⁠pene 3 be sikuli buka totona bona pene 6 be toretore nadina hoia totona.

Baibel Stadi Grup Ta Ia Matamaia

Lau maragi negana amo, lau ese Baibel, Dirava ena Hereva lau ura henia. Sikuli dekenai Baibel klas lau moalelaia bona egu Sunday sikuli tisa ese lau ia hanamoa. Vadaeni, lagani 1930 lalonai, Bible Student ta be nega ginigunana Ilesha dekenai ia mai haroro neganai lau lao lau kamonai totona. Ia haroro murinai Yoruba gado dekenai idia hahanaia bukana, The Harp of God ia henia lau dekenai.

Nega ibounai Sunday sikuli dekenai lau lao. The Harp of God bukana lau abia lao matamaia, unuseniai idia hadibaia hereva haida lau hakoikoidia totona. Hepapahuahu idia vara, bona nega momo dubu gunalaia taudia ese lau idia hamaoroa unai ‘hahediba matamata’ lau rakatania totona.

Unai lagani murinai, dala dekenai lau raka lao noho neganai, taunimanima haida lau itaia, tau ta ia haroro idia kamonaia noho. Ia haroro tauna be J. I. Owenpa, Bible Student ta. Ia be William R. Brown (nega momo idia gwauraia Baibel Brown), Lagos amo Basileia harorolaia gaukara ia naria tauna, ese ia siaia.a Lau kamonai Ilesha dekenai Baibel stadi grup maragina ta idia hamatamaia, The Harp of God idia stadilaia totona. Unai dainai, idia lau bamodia.

Unai grup lalonai lau sibona be mero maragi​—⁠egu lagani be 16 bona lau lao sikuli. Vaia emai kara, unai tatau badadia, edia lagani be 30 amo ia daekau ida bema lau hebamo lasi, lau hemarai o gari dainai. To idia moale idia lau bamoa dainai, bona lau idia hagoadaia. Idia be tama bamona lau dekenai.

Dubu Gunalaia Taudia Idia Dagedage

Daudau lasi murinai, dubu gunalaia taudia ese ai idia dagedage henia. Guna idia heai heheni, to hari Katolik, Anglikan, bona ma haida ese ai idia dagedage henia hebou. Idia ese hanua lohiadia ida idia hereva hebou emai guriguri karana idia hadikaia totona. Idia ese pulisi idia siaia emai buka idia dadia totona. Idia gwau unai buka ese taunimanima idia hadikadia. To pulisi edia distrik opesa ese ia hamaorodia idia be maoro lasi emai buka idia abidia totona, bona pura rua murinai, emai buka idia abidia mai.

Unai murinai, ai idia boiria bona unuseniai lohia tauna badana, oba, bona taoni ena taunimanima badadia danu ai hebou. Unai neganai ai ibounai be 30 bamona. Unai hebou dekenai idia ura ai idia hamaoroa unai buka “dikadia” duahia karana ai hadokoa totona. Ai idia nanadaia bema ai be hanua idau taudia, to emai vairana idia itaia namonamo neganai, idia gwau: “Inai be iseda natudia memero, ena be idia huanai idau taudia haida idia noho.” Ai idia hamaoroa idia ura ai ese ai do ia hadikaia tomadihona ta ena buka duahia karana do ai hadokoa.

Gau ta ai gwauraia lasi, bona ai lao ruma, badina aiemai lalona ai hadaia vadaeni unai taunimanima badadia edia hereva do ai kamonai lasi. Ai momo be ai dibaia gaudia ai moalelaia bona ai ura lasi emai stadi do ai rakatania. Unai dainai, ena be haida idia gari bona emai grup idia rakatania, to ai momo be kamuta tauna ta ena gaukara rumana dekenai emai stadi ai karaia. Stadi naria tauna be lasi. Guriguri amo ai hamatamaia bena ai ibounai ese paragraf ta ta ai duahia. Hora tamona murinai, ai guriguri lou bena ai lao ruma. To haida ese hehuni dalanai ai idia raraia, bona lohia taudia bona dubu gunalaia taudia ese nega ibounai pura rua murinai idia hereva henia bona Bible Student taudia edia buka stadilaia karana dainai ai idia hereva auka henia.

Unai ia vara noho lalonai, ai dibaia sisina gaudia ai gaukaralaia taunimanima ai durudia totona, bona idia momo be aiemai hereva idia abia dae. Taunimanima ta ta ese ai idia bamoa. Ai moale bada herea, to ai ese ai bamoa tomadihona ai do diba namonamo lasi.

Lagani 1932 ena matamana ai Lagos amo tadikaka ta ia mai ai ia durua totona, bona April lalonai “Baibel” Brown ia mai. Tadikaka Brown ia itaia ai be 30 bamona dainai, emai duahiduahi lalonai dahaka ai dibaia vadaeni ia henanadailaia. Ai diba gaudia ibounai ai hamaoroa. Ia gwau ai hegeregere bapatiso do ai abia totona.

Unai neganai medu ia diho lasi dainai, Ilesha amo ai lao sinavai ta dekenai ena daudau be kilomita 14 bona ai ibounai 30 ai bapatiso. Unai nega amo, ai hegeregere Basileia ai harorolaia totona bona ruma-ta-ruma-ta gaukara ai hamatamaia. Ai ese unai gaukara do ai karaia be guna ai laloa lasi, to hari ai ura dikadika ma haida dekenai ai diba gaudia ai hadibaia. Ai hegaegae namonamo hahediba koikoi herevadia be Baibel amo do ai hakoikoidia totona. Unai dainai, emai hebou dekenai, hahediba koikoi herevadia ai kikilaidia bona ai diba gaudia amo ai heduru heheni.

Emai Haroro Gaukara

Taoni ena gabu ibounai dekenai ai haroro. Taunimanima ese ai idia hevasehalaia bona ai idia lolo henia, to ai laloa lasi. Ena be gau momo ai do diba lasi to ai moale bada badina hereva momokani ai abia dainai.

Sunday ibounai ruma ta ruma ta dekenai ai lao. Taunimanima ese henanadai idia henia bona ai haerelaidia toho. Sunday adorahi ai, pablik haroro ai henia. Ai be Kingdom Hall lasi dainai, murimuri ai emai hebou ai karaia. Taunimanima ai haboudia, haroro hereva ai henia, bena ai noidia henanadai idia henia totona. Nega haida dubu lalodiai ai haroro.

Iehova ena Witness taudia idia diba lasi taudia edia gabu dekenai danu ai lao. Nega momo baisikele amo ai lao, bona nega haida basi ta ai rentaia. Hanua ta dekenai ai ginidae neganai, emai kibi ai hiriria bada herea. Hanua ibounai ese idia kamonaia! Taunimanima idia heau mai dahaka ia vara itaia totona. Bena ai abia lao sivaraina ai harorolaia. Ai ore neganai, taunimanima be emai buka abia totona idia mai. Buka momo ai hariharilaia.

Mai emai ura ida Dirava ena Basileia do ia mai gauna ai naria. Lau laloatao lagani 1935 ena Yearbook ai abia neganai, tadikaka ta ese unai lagani ibounai do ita duahia siri ia itaia neganai, ia henanadai: “Unai anina be lagani ta do ita haorea murinai Aramagedono do ia mai, a?”

Grup ia naria tadikaka ese ia haere henia, ia gwau: “Tadikaka, oi laloa bema Aramagedono be kerukeru ia mai, Yearbook duahia karana do ita hadokoa, a?” Unai tadikaka be lasi ia gwau neganai, naria tauna ia gwau: “Vadaeni, dahaka dainai oi lalo-hekwarahi noho?” Unai neganai, bona hari inai nega danu, ai ese Iehova ena dina ai laloa bada.

Tuari Laganidia

Tanobada tuarina iharuana lalonai, emai buka abidia vareai dalana idia taravatua. Ilesha dekenai tadikaka ta be ia diba lasi bona pulisi tauna ta dekenai buka ladana Riches ia hariharilaia. Pulisi tauna ia henanadaia: “Inai be daika ena buka?” Tadikaka ia gwau unai be iena. Pulisi tauna ia gwau unai buka hariharilaia be taravatu, bona tadikaka ia abia lao pulisi steiseni dekenai bona dibura dekenai ia koua.

Pulisi steiseni dekenai lau lao bona lau hereva henidia murinai, ruhaia davana lau henidia bena tadikaka idia ruhaia. Bena, Tadikaka Brown lau telefon henia bona dahaka ia vara be ia lau hadibaia. Lau nanadaia bema taravatu ta ia noho buka ai hariharilaia lasi totona. Tadikaka Brown ia gwau buka abidia vareai sibona be taravatu to hariharilaia be taravatu lasi. Dina toi murinai, Tadikaka Brown ese Lagos amo tadikaka ta ia siaia mai dahaka ia vara ia itaia totona. Unai tadikaka ia gwau namona be ai ibounai be kerukeru emai magasin bona buka ai abidia lao haroro be namo.

Gabu idauidau dekenai ai lao. Hora ta murinai, lau kamonai tadikaka momo be pulisi ese ia abidia. Vadaeni, lau bona ia vadivadi tadikakana ai lao pulisi steiseni dekenai. Emai buka hariharilaia be taravatu lasi ai gwauraia hedinarai toho to pulisi idia ura lasi kamonai.

Idia abia tadikakadia ibounai 33 be idia siaidia lao Magistrate Badana ena Kota, Ife dekenai, bona lau be idia ida lau lao. Taoni taudia idia itaia ai idia abia lao neganai, idia boiboi, “Inai taudia edia gaukara be ia doko vadaeni. Iniseni do idia giroa mai lou lasi.”

Magistrate badana, Nigeria tauna, vairanai samani herevana idia gwauraia. Buka bona magasin ibounai idia hahedinaraia. Ia nanadaidia daika ese pulisi dekenai gwaumaoro ia henia inai taudia idia abia totona. Pulisi oreana tauna badana ia gwau distrik opesa ia hereva dainai idia karaia. Magistrate badana ese pulisi tauna badana bona emai tadikaka hani, lau danu iena opesi dekenai ia boiria lao.

Ia henanadai Mr. Brown be daika. Ai hamaoroa ia be Watch Tower Society edia gwaukau tauna Lagos dekenai. Bena ai ia hamaoroa ai dainai Mr. Brown amo telegram ta ia abia. Unai dina ai ia ese kota ia hadokoa bona ia gwau tadikaka ese ruhaia moni sibona idia henia. Unai dina murinai, ia ese tadikaka be samania hereva amo ia ruhadia, ia halasidia, bona pulisi ia oda henidia emai buka do idia henia lou.

Mai ane danu Ilesha dekenai ai giroa lou. Taunimanima ma idia boiboi lou, to hari inai bamona idia gwau: “Idia giroa mai lou!”

Iehova Ena Taravatu Headava Dekenai Idia Hahedinaraia

Lagani 1947 lalonai Gilead misinari toi be Nigeria dekenai idia ginidae. Unai tadikaka ta, Tony Attwood be hari Nigeria Betele dekenai ia do gaukara noho. Unai dina amo, Nigeria dekenai Iehova ena orea ia idau ia lao. Ia idau gauna badana ta be emai lalohadai adavana momo abia karana dekenai.

Lau be Olabisi Fashugba lau adavaia February 1941 lalonai, bona lau dibaia gaudia amo lau diba adavana ma haida do lau abia lasi. To, guna laganidia amo ela bona lagani 1947, misinari idia mai neganai, kongregesen lalonai adavana momo abia karana be bada herea. Adavana momo tadikakadia idia hamaorodia idia diba lasi dainai hahine momo idia adavadia. Unai dainai, bema idia be adavadia rua o toi o hani o ima, idia noho diba to ma haida do idia abia lasi. Unai taravatu idia atoa.

Ilesha dekenai taunimanima be idia ura bada ai idia bamoa, hegeregere Cherubim bona Seraphim taudia. Idia gwau Iehova ena Witness taudia sibodia ese hereva momokani idia hadibaia. Emai hahediba herevadia idia abia dae bona idia ura edia dubu be Kingdom Hall ai do idia halaodia. Ai hekwarahi bada unai ai karaia totona. Edia tau badadia hadibaia gabudia danu ai haginia.

Bena hakaua hereva matamatana, adavana momo abia karana dekenai ia hedinarai. Lagani 1947 ai, sekit hebouhebou dekenai misinari ta ese hereva ta ia henia. Ia ese kara namo bona kara dika ia herevalaia. Bena ia ese 1 Korinto 6:​9, 10 ia gwauraia, unuseniai ia gwau kara dika taudia be Dirava ena Basileia do idia vareai lasi. Ma ia gwau: “Bona adavadia momo taudia be Dirava ena Basileia lalonai do idia vareai lasi!” Kamonai taudia idia boiboi: “O, adavadia momo taudia ese Dirava ena Basileia lalonai do idia vareai lasi!” Taunimanima idia parara. Unai neganai be tuari bamona. Ai idia bamoa matamaia taudia momo ese ai idia rakatania, idia gwau: “Dirava ai tanikiu henia, inai orea ena kara ibounai lalonai ai vareai lasi.”

To, tadikaka momo ese edia kara idia hamaoromaoroa matamaia bona edia adavadia idia ruhadia. Moni idia henidia bona idia gwau: ‘Bema oi be do matamata, oi lao bona tau ta oi tahua. Lau kerere oi lau adavaia neganai. Hari, lau be do hahine tamona ena adavana.’

Daudau lasi murinai hekwakwanai ma ta ia vara. Haida, edia lalona idia hadaia adavana tamona do idia abia bona haida idia ruhadia taudia be edia lalona idia haidaua, idia ura idia ruhaia hahinena ta do idia abia lou bona guna idia abia hahinena do idia ruhaia! Vadaeni, hekwakwanai ia hamatamaia lou.

Brooklyn, hedikwota ese Malaki 2:14 amo heduru haida idia siaia, unai siri ese ‘oiemu uhau dinadia lalonai oi adavaia hahinena’ ia gwauraia. Edia sisiba be tatau ese idia adavaia hahine ginigunana do idia dogoatao. Unai dala amo unai hekwakwanai ai hamaoromaoroa.

Gaukara Ena Hahenamo

Lagani 1947 lalonai Society ese kongregesen ia hagoadadia matamaia bona sekit ia karadia. Idia ura manada bona mai edia diba momo bona tadikakadia idia abidia hidi ‘tadikaka edia hesiai taudia,’ hari idia gwauraidia sekit naria taudia, ai do idia lao. Tadikaka Brown ese lau ia nanadaia bema unai gaukara do lau abia dae. Lau hamaoroa, lau bapatiso ena anina be Iehova ena ura lau karaia totona. Ma lau gwau: “Oi ese lau oi habapatisoa. Iehova ena hesiai gaukara do lau karaia badabada diba negana ia ginidae neganai, oi laloa do lau abia dae lasi, a?”

October, unai lagani lalonai, ai ibounai 7 ai lao Lagos dekenai bona ai idia hadibaia murinai, ai idia siaia lao sekit gaukara totona. Unai nega lalonai sekit be bada herea. Emai tano ibounai idia haria sekit ibounai 7 sibona dekenai. Kongregesen be momo lasi.

Tadikaka edia hesiai lao henia gaukarana be auka herea. Dina ta ta ibounai gabu daudaudia dekenai ai raka lao, bona nega momo siahu bada herea udadia lalonai ai raka. Pura ta ta lalonai, hanua ta amo ai lao hanua ta dekenai. Nega haida egu mamina be do lau moru. Nega haida egu hemami be lau mase noho bamona! To, taunimanima momo ese hereva momokani idia abia dae ai itaia neganai, ai moale bada. Oibe, lagani 7 sibona lalonai, pablisa taudia edia namba be nega 4 amo ia bada daekau!

Sekit gaukara lau karaia ela bona lagani 1955, lau gorere dainai lau giroa mai Ilesha dekenai. Iniseniai taoni naria gaukara lau karaia. Egu hanua dekenai lau noho be namo, egu ruma bese be lauma dalanai lau durudia diba. Hari, egu natudia ibounai 6 be mai abidadama ida Iehova idia hesiai henia noho.

Lalokau Korikorina be Do Ia Noho Hanaihanai

Lagani gunadia lau laloa neganai, gau momo totona lau tanikiu bada diba. Lau lalohekwarahi, lalohisihisi bona lau gorere momo, to lau moale bada danu. Ena be emai diba bona lalo-parara be lagani momo lalodia ia bada ia lao, to egu mauri lalonai, 1 Korinto 13:8 ena hereva ena anina lau mamia vadaeni; ia gwau: “Lalokau be do ia noho hanaihanai.” Bema Iehova oi lalokau henia bona iena hesiai gaukara oi karaia namonamo, emu hekwakwanai negadia ai oi do ia durua bona do ia hanamoa bada.

Hereva momokani ena diari be ia bada ia lao noho. Hereva momokani ai abia matamaia neganai, ai laloa Aramagedono do ia mai haraga; unai dainai ai karaia diba gaudia ai karaia haraga. To, unai ese ai ia durua. Unai dainai salamo torea tauna ena hereva lau abia dae, ia gwau: “Egu mauri dinadia ibounai lalonai, lau ese Lohiabada do lau hanamoa. Ane dekenai, Lohiabada do lau hanamoa egu mauri dinadia ibounai lalona.”​—⁠Salamo 146:2

[Footnotes]

[Picture on page 23]

Samuel bona Milton Henschel, lagani 1955 ai

[Picture on page 24]

Samuel bona ena adavana, Olabisi