Mauri Namona Ia Gwauhamatalaia

OI URA emu mauri idia hametaua hekwakwanaidia amo do oi siri, a? Oi ura mauri namo hereana, ena toana be inai magasin ena kopina ai ia hedinarai laulauna ena hegeregerena, be tanobada ai do oi abia, a? Unai laulau mani oi itaia namonamo. Taunimanima be mai edia aniani momo. Unai aniani namo hereana do idia moalelaia. Taunimanima iboudiai idia moale. Bese idauidau taudia be maino ai idia noho hebou. Animal danu idia maino! Ta ia heatu lasi. Ta ia ogogami lasi. Ta ia gorere lasi. Gabu mai hairaidia, au mai hairaidia, bona ranu goevana idia noho. Gabu mai hairaina unai!

Inai tanobada ena toana be unai bamona do ia lao, a? Oibe, ia be paradaiso ai do ia lao. (Luka 23:43) Tanobada ia karaia Diravana ena palani be, taunimanima ese mauri namona paradaiso tanobadana ai do idia moalelaia. Unai neganai do oi noho diba!

Edena Mauri Oi Ura Henia?

Do ia vara tanobada Paradaisona be hari ita noholaia tanobadana amo edena bamona do ia idau? Hari inai negai, dina dina iboudiai taunimanima bilioni ta mai kahana idia hitolo. To Dirava ese tanobada ai ia havaraia gwauraia Paradaisona lalonai, taunimanima iboudiai edia aniani do ia hegeregere. Baibel ena gwauhamata be inai: “Siahu Ibounai Lohiabada ese tanobada ena bese idauidau ibounai totona aria do ia karaia. Inai aria dekenai be aniani namodia momokani, bona uaina danu namo herea.” (Isaia 25:6) Aniani ai do idia dabu lasi, badina be Baibel ia gwau: “Namona be koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo.”​—Salamo 72:16.

Hari inai negai, taunimanima momo be ruma dikadia ai bona setelmen ai idia noho, eiava idia hekwarahi idia rentaia rumadia edia davana henia totona. Ma haida be ruma lasi, unai dainai dala ai idia mahuta. World Health Organization ia gwau, tanobada hegegemadai memero kekeni 100 milioni be ruma lasi. To do ia mai Paradaisona ai, taunimanima iboudiai be mai edia ruma. Dirava ena Hereva ia gwau: “Idia ese edia ruma do idia haginia, bona unai ruma lalonai do idia noho.”​—Isaia 65:21.

Taunimanima momo be idia ura henia lasi gaukaradia idia karaia. Idia momo be dina dina iboudiai hora momo lalonai idia gaukara auka, to moni sisina mo idia abia. Tanobada taudia ima ima amo ta ta be lagani tamona lalonai idia abia monina be K650 henunai. To, do ia mai Paradaisona lalonai, taunimanima ese edia gaukara do idia moalelaia bona ia amo anina namona do idia abia. Dirava ia gwauhamata, ia gwau: “Lauegu abia hidi taudia ese, edia imana gaukara dekenai idia karaia gaudia do idia moalelaia. Do idia hekwarahi kava lasi.”​—Isaia 65:​22, 23.

Hari inai negai, gabu ibounai dekenai gorere idia vara. Taunimanima momo edia matadia idia kepulu. Haida edia taiadia idia kudima. Ma haida idia raka diba lasi. To Paradaiso lalonai, taunimanima do idia gorere lasi. Iehova ia gwau: “Noho taudia ta ese do ia gwau lasi, ‘Lau be gorere.’ ” (Isaia 33:24) Gwauhamata namona edia tauanina ia dika vadaeni taudia edia, be inai: “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.”​—Isaia 35:​5, 6.

Hari inai negai, hisihisi, lalohisihisi, bona mase idia vara. To tanobada Paradaisona ai, unai gau ta do ia vara lasi. Oibe, mase danu do ia ore! Baibel ia gwau: “Dirava be idia danu do ia noho . . . Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—Apokalupo 21:​3, 4.

Vadaeni, ia hedinarai goevagoeva, Iehova ese ia gwauhamatalaia tanobada Paradaisona lalonai, taunimanima ese mauri namona do idia davaria. To edena bamona ita diba momokani do ia mai? Edena negai do ia mai, bona edena bamona? Dahaka do oi karaia be namo, unuseniai do oi noho totona?