Namona be Iehova Ena Mamoe Idia Naridia mai Edia Hebogahisi Ida

‘Do umui diba momokani, Iehova sibona be Dirava. . . . Ita be iena bese taudia, ita be iena mamoe, ia ubua gaudia.’​—⁠SALAMO 100:⁠3.

IEHOVA be Mamoe Naria Tauna Badana. Bema ita be iena hesiai taudia, ita be iena mamoe ai ia halaoa bona ita ia naria mai ena hebogahisi ida. Iseda guba Tamana ese ita ia hagoadaia bona iseda mamina ia hanamoa lou bona ‘kara maoromaoro daladia dekenai, ia ese ita ia hakaua noho, iena gwauhamata hegeregerena.’ (Salamo 23:​1-4) Mamoe Naria Tauna Namona, Iesu Keriso, ese ita ia lalokau henia bada dainai, iena mauri ia bouboulaia ita totona.​—⁠Ioane 10:​7-15.

² Unai hebogahisi ita abia dainai, salamo ia torea tauna ida ita gwau: ‘Iehova do umui tomadiho henia, mai emui moale danu. Iena vairana dekenai umui mai, mai moale anedia danu. Do umui diba momokani, Iehova sibona be Dirava. Ia sibona ese ita ia karaia, bona ita be iena. Ita be iena bese taudia, ita be iena mamoe, ia ubua gaudia.’ (Salamo 100:​2, 3) Oibe, ita moale bona ita gari lasi. Ia be hegeregere nadi goadadia amo idia haginia maguna, dagedage gaudia ese mamoe idia hadikaia diba lasi totona gauna, lalonai ita noho.​—⁠Numera 32:16; 1 Samuela 24:3; Sepanaia 2:⁠6.

Mai Edia Ura ida Mamoe Oreana Idia Naria Taudia

³ Ita be Dirava ena mamoe taudia dainai ita moale! Elda taudia ese ita idia hakaua. Idia ura lasi idia be ‘iseda lohia,’ ita idia biagua auka, eiava iseda abidadama idia biagua. (Numera 16:13; Mataio 20:​25-28; 2 Korinto 1:24; Heberu 13:⁠7) Idia be mamoe naria taudia mai edia lalokau, aposetolo Petero ena sisiba idia badinaia taudia: “Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia. Ta ese umui ia oda dainai do umui karaia lasi, to sibona emui ura dainai. Kohu do umui davaria totona do umui karaia lasi. Lohia mai hekokoroku danu bamona emui orea do umui gunalaia lasi, to emui kara namodia do umui hedinaraia, vadaeni emui kara bamona do idia karaia.” (1 Petero 5:​2, 3) Aposetolo Paulo ese elda taudia ia hamaoroa, ia gwau: “Umui sibona do umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana dekena amo ia hoia orea taudia, do umui ubua.” Mamoe taudia idia moale unai lauma helaga ena siahu dainai edia dagi idia abia taudia be hebogahisi taudia bona “mamoe orea do idia hadikaia” lasi!​—⁠Kara 20:​28-30.

⁴ Kongregesen dekenai, Iesu ese “harihari gaudia taunimanima dekenai ia henia,” haida be “pasto taudia” o mamoe naria taudia, bona idia ese mamoe taudia idia kara henia mai edia hebogahisi ida. (Efeso 4:​8, 11; King James Version) Idia ta be Charles T. Russell, Watch Tower Society ena presiden ginigunana. Idia gwauraia Pasto Russell, badina mai ena hebogahisi bona lalokau karana ida Naria Mamoe Tauna Namona, Iesu Keriso, ena mamoe oreana ia naria dainai. Hari iseda nega lalonai, Keristani elda taudia be Iehova ena Witness taudia edia Hakaua Oreana amo edia gaukara idia abia, bona inai ladadia “pasto,” “elda,” eiava “tisa” be dagi ladana ta bamona idia hatoa lasi. (Mataio 23:​8-12) To hari, elda taudia ese pasto gaukarana, eiava mamoe naria gaukarana idia karaia Iehova ena mamoe, ia ubua gaudia, durudia totona.

⁵ Elda taudia be mamoe naria taudia dainai, idia gaukara goadagoada matamata taudia idia durua lauma dalanai idia goada totona. Unai dainai, Diba ese Mauri Dekenai Ita Ia Hakaua Lao bukana matamatana rau 168 ai, ia gwau: “Kongregesen ena elda taudia do oi hebamo henidia be namo. Dirava ena amo ia mai dibana gaukaralaia dalana idia manadalaia momokani, badina be Baibel ena taravatu hegeregeredia idia hegeregere unai dagi do idia abia. (1 Timoteo 3:​1-7; Tito 1:​5-9) Bema oi ura lauma heduruna do oi abia emu kara kererena ta do oi halusia totona, namona be maoromaoro idia ta do oi hereva henia. Do oi davaria elda taudia ese Paulo ena sisiba idia badinaia; ia gwau: ‘Gari taudia do umui hagoadaia, bona manoka taudia do umui durua. Bona taunimanima ibounai dekenai do umui lalo namo henidia.’​—⁠1 Tesalonika 2:​7, 8; 5:14.”

Matamata Taudia Idia Ura Idia Haroro Matamaia Neganai

⁶ Baibel ia stadilaia tauna be diba ia abia bona hebou lao henia karana ia manadalaia murinai, reana ia ura Basileia pablisa, sivarai namona harorolaia tauna ai ia lao. (Mareko 13:10) Bema ia ura, namona be ena Baibel stadi ia naria Witness tauna ida idia lao kongregesen naria tauna dekenai. Ia ese Kongregesen Hesiai Komiti ena elda ta bona ma elda ta do ia abia hidi Baibel stiuden bona ena hadibaia tauna ida do idia hebou. Hesiai Gaukara Karaia Totona Ita Hegaegae bukana, rau 98 bona 99 ai idia noho herevadia do idia kikilaia. Bema unai elda rua idia itaia unai matamata tauna be Baibel ena hahediba hereva badadia ia abia dae bona Dirava ena taravatu ia badinaia, ia do idia hamaoroa ruma-ta-ruma-ta haroro gaukara do ia hamatamaia diba.a Haroro gaukara ena ripoti pepana ai iena hesiai gaukara ia ripotilaia neganai, Pablisa Rekod kadi matamata dekenai iena ladana bona ena ripoti do idia torea. Hari unai pablisa matamata be taunimanima milioni momo ida ‘Dirava ena hereva idia harorolaia’ gaukarana ia ripotilaia diba. (Kara 13:⁠5) Kongregesen dekenai hadibaia hereva do idia karaia ia be bapatiso lasi pablisa tauna.

⁷ Namona be bapatiso lasi pablisa tauna ese elda bona lo Keristani taudia edia heduru ia abia. Hegeregere, ena Kongregesen Buka Stadi naria tauna ese lauma dalanai ena tubu namonamo karana do ia laloa bada. Reana unai pablisa matamatana be ruma-ta-ruma-ta gaukara dekenai ia hereva namonamo diba lasi. (Kara 20:20) Unai dainai, heduru do ia ura ia abia, bona Diba bukana amo ena Baibel stadi ia naria tauna ese ia durua bada diba. Unai bamona heduru ia abia be maoro, badina Iesu Keriso ese ena hahediba taudia ia hegaegaelaia edia hesiai gaukara totona.​—⁠⁠Mareko 6:​7-13; Luka 10:​1-22.

⁸ Hesiai gaukara namona ita karaia totona, ita hegaegae guna be gau badana. Unai dainai, pablisa rua ese hua ta ta ai idia abia Iseda Basileia Gaukara pepana dekenai ia noho kiki herevadia haida idia hegaegaelaia hebou diba. Haroro gaukara dekenai idia lao neganai, lo pablisa ese reana iduara ginigunana bona iharuana ai idia davaria taudia do ia hereva henidia guna. Ena hamatamaia herevana murinai, pablisa ruaosi ese idia haroro henidia diba. Bema wiki haida lalodiai idia haroro hebou, reana lou henia namodia bona reana Diba ese Mauri Dekenai Ita Ia Hakaua Lao bukana amo Baibel stadi do idia hamatamaia diba. Ia manada pablisa tauna ese nega sisina lalona stadi ia naria diba bena gabeai Basileia harorolaia tauna matamatana ese ia naria. Unai pablisa ruaosi do idia moale bada herea bema unai Baibel stadilaia tauna ia hahedinaraia Dirava ena diba ia laloa bada!

⁹ Bapatiso lasi pablisa ta be lauma dalanai ia tubu noho neganai, reana guriguri amo Dirava dekenai ena mauri ia gwauhamatalaia bona ia ura ia bapatiso. (Mareko 1:​9-11 itaia.) Namona be kongregesen naria tadikakana ia hamaoroa ia ura ia bapatiso, bena unai tadikaka ese elda haida do ia abia hidi Hesiai Gaukara Karaia Totona Ita Hegaegae bukana, rau 175 ia lao 218 ai idia noho henanadaidia be ia ida do idia riviulaia totona. Henanadai edia kahana hani be henanadai negadia toi dekenai do idia karaia ore. Bema mai dalana, elda idauna ta ese unai henanadai negana ta do ia naria. Bema idia iboudiai idia laloa unai bapatiso lasi pablisa ena diba Baibel ena hahediba hereva badadia dekenai be hegeregere bona dala idauidau ai ia hegeregere bapatiso ia abia totona, ia do idia hamaoroa do ia bapatiso diba. Ena mauri ia gwauhamatalaia bona ia bapatiso dainai hahemauri “maka” ia abia.​—⁠Esekiela 9:​4-6.

Edia Hekwakwanai Hegeregerena Idia Durua

¹⁰ Tau ta be Diba bukana ai ena stadi ia haorea bona ia bapatiso murinai, reana buka iharuana, hegeregere Dirava Momokani Tamona Tomadiho Henia mai Lalo-Tamona Danu bukanab amo ta ese do ia stadi henia noho lasi. To, bapatiso matamata tauna be hebou totona ia hegaegae bona ia lao henia neganai, unai amo gau momo do ia dibaia noho. Iena diba do ia habadaia badina hereva momokani ia ura henia dainai Keristani bukadia bona magasin do ia duahia bona stadilaia, bona tadikaka ida Baibel ia herevalaia. Dahaka do ia karaia bema gau idauna ta ia vara dainai ia ura heduru ia abia?

¹¹ Ena be Apolo be “Buka Helaga ia diba momo” bona ia ese Iesu ena sivarai ia gwauraia maoro, to lo Keristani taudia Prisikila bona Akwila be “edia ruma dekenai [Apolo] idia hakaua lao, bona idia ruaosi ese Dirava ena dala ibounai idia hadibaia maoromaoro” neganai, ia idia durua bada. (Kara 18:​24-26; Kara 19:​1-7 itaia.) Unai dainai, reana bapatiso matamata tauna ia ura taihu ta ida idia hebamo heheni badina ia ura ia headava. Lo Keristani tauna ese ia do ia durua diba Watch Tower Society ese ia halasia bukadia amo headava bona headava gwauraia karana namona idia kikilaia gaudia ia davaria totona. Hegeregere, unai kahana ia herevalaia bukana ta be Memero Kekeni edia Henanadai Haere Maorodia, Kahana 7 ai.c Ena be stadi ta do idia karaia lasi unai buka dekenai, to guna ena stadi ia naria pablisa tauna be reana unai buka ena hereva be ia ida idia herevalaia.

¹² Haheitalai ma ta ita laloa diba. Reana bapatiso matamata headava tauna bona ena adavana be edia headava lalonai Baibel ena taravatu badinaia totona idia hekwarahi noho. Reana elda tauna do idia hamaoroa bena ia be adorahi haida lalodiai idia ida Baibel siri haida do ia kikilaia bona idia dekenai Watch Tower Society ena buka edia hereva haida do ia hahedinaraia diba. To unai elda be hanaihanai Baibel stadi do ia karaia lasi idia ida.

Bema Matamata Tauna Ia Kerere

¹³ Elda taudia ese Mamoe Naria Tauna Badana, Iehova, idia tohotohoa. Ia gwau: “Lau sibona be mamoe naria tauna do lau lao, . . . edia bero do lau kumia, bona mai edia gorere gaudia be do lau hanamoa.” (Esekiela 34:​15, 16; Efeso 5:⁠1) Unai lalohadai hegeregerena, hahediba tauna Iuda ena hagoadaia hereva be edia abidadama ia manoka ia lao eiava kara dika dainai idia moru horoa Keristani taudia idia hebogahisi henia be namo. (Iuda 22, 23) Lo Keristani tauna dekena amo gau momo ita tahua diba, to diba bada lasi bapatiso matamata tauna​—⁠mamoe matamatana sibona​—⁠ia kara dika to ia helalo-kerehai dainai, ita hebogahisi henia be namo. (Luka 12:48; 15:​1-7) Elda taudia be ‘Iehova totona kota gaukara idia karaia,’ unai dainai mamoe idia naria mai lalokau ida bona idia sisiba henia mai manau ida.​—⁠2 Sivarai 19:6; Kara 20:​28, 29; Galatia 6:⁠1.d

¹⁴ Reana bapatiso matamata tauna be guna inuinu kekero karana ia manadalaia. Unai kara ia rakatania bona ia bapatiso murinai, nega ta o rua ai ia inuinu kekero lou. Eiava guna kuku ania karana ia manadalaia to ia rakatania, bona hari nega ta o rua, sibona ia noho neganai, kuku ia ania. Ena be iseda tadikaka matamatana ese Dirava ia noia vadaeni ena dika ia gwauatao totona, to namona be elda tauna ta ena heduru ia tahua, unai kara dika ia manadalaia lou lasi totona. (Salamo 32:​1-5; Iamesi 5:​14, 15) Elda ta dekenai ena kara kerere ia herevalaia neganai, namona be unai elda ese ia do ia durua mai ena hebogahisi ida, ena kerere hamaoromaoroa totona. (Salamo 130:⁠3) Baibel sisibana sibona be reana do ia hegeregere ena aena edia raka dalana hamaoromaoroa totona. (Heberu 12:​12, 13) Unai elda be kongregesen naria tauna ida unai sivarai do ia kikilaia, edena heduru idia henia be namo tahua totona.

¹⁵ Nega haida, unai sibona be hegeregere lasi. Bema momo idia diba vadaeni, mamoe taudia ia hadikaia diba, eiava hekwakwanai badadia ma haida idia vara, elda oreana ese elda rua do idia abia hidi sivarai ibounai idia tahua totona. Bema unai elda idia davaria kerere badana ia vara, bona idia laloa namona be hahemaoro komiti ese ia tahua be namo, elda oreana do idia hadibaia. Elda oreana ese hahemaoro komiti do idia haginia, kerere tauna durua totona. Idia ese mai edia hebogahisi ida do idia kara henia be namo. Baibel siridia amo do idia hakaua maoro. Bema hahemaoro komiti ena sisiba ia abia dae, do idia tahua bema Kingdom Hall dekenai idia hebou neganai, platfom ai kahana ta do ia karaia lasi, eiava haere do ia henia lasi be namo do ia havaraia.

¹⁶ Bema kerere tauna be helalo-kerehai toana ia hahedinaraia, hahemaoro komiti elda ta o rua do idia hegaegae idia vadivadi henia loulou bona edia hereva amo do idia durua ena abidadama hagoadaia bona Dirava ena taravatu maoromaoro ia laloa bada lou totona. Nega ta ta ai, haroro gaukara idia karaia neganai, idia ta be ia ida idia gaukara hebou be namo. Gima Kohorona eiava Noga! haida be mai edia heduru herevadia; ia ida edia Baibel siri namodia idia kikilaia to Baibel stadi do idia karaia lasi. Unai bamona hebogahisi karana ia abia neganai, kerere tauna do ia hagoadaia gabeai ena tauanina ena ura kereredia do ia dadaraia totona.

¹⁷ Momokani, ta be vanegai sibona ia bapatiso be badina namona lasi mai ena ura ida kara dika karaia totona. (Heberu 10:​26, 27; Iuda 4) Bema bapatiso vadaeni kerere tauna ta ese ena kara dika ia rakatania lasi bona ia helalo-kerehai lasi, kongregesen dekena amo do idia atoa siri. (1 Korinto 5:​6, 11-13; 2 Tesalonika 2:​11, 12; 2 Ioane 9-11) Bema idia itaia unai bamona do idia karaia be namo, elda edia orea ese hahemaoro komiti ta do idia abia hidi. Bema kongregesen murimurinai idia atoa, kongregesen dekenai inai hereva do idia gwauraia: “ . . . be orea murimurinai ai atoa.”e

Oi Durudia “Hereva Badadia” Idia Dibaia

¹⁸ Dirava ena hesiai taudia momo, kahirakahira ibounai ese ena mamoe oreana do idia rakatania lasi. Ita moale ita ta ta ese iseda guba Tamana dekenai do ita raka kahirakahira lao diba badina ena kara bona ena ura do ita dibaia hanaihanai. (Hadibaia Tauna 3:11; Iamesi 4:⁠8) Pentekoste dinana 33 C.E. ai idia bapatiso taudia ese gau momo idia do dibaia lasi. (Kara 2:​5, 37-41; 4:⁠4) Baibel idia diba lasi Idau Bese taudia danu ese gau momo idia do dibaia lasi. Hegeregere, Paulo ena hereva Atena ena Areo Ororo dekenai idia kamonaia murinai, idia bapatiso taudia bamona. (Kara 17:​33, 34) Hari iseda nega lalonai danu, bapatiso matamata taudia ese gau momo idia do dibaia lasi; Dirava ena matana ai dahaka be maoro idia badinaia noho totona, namona be ita durudia bona iseda nega ita henia idia dekenai.​—⁠Galatia 6:9; 2 Tesalonika 3:⁠13.

¹⁹ Lagani ta ta ai, taunimanima tausen momo idia bapatiso bona “hereva badadia” idia badinaia totona bona lo taudia ai idia lao totona ita durudia be namo. (Heberu 6:⁠1-3) Oiemu hereva, emu haheitalai namona, bona haroro gaukara lalonai heduru henia karana amo, do oi durudia mauri matamata idia atoa bona “hereva momokani ena dala dekenai idia raka noho” totona. (3 Ioane 4; Kolose 3:​9, 10) Bema oi be lo pablisa ta, reana elda taudia ese oi do idia noia tadikaka matamatana oi durua haroro gaukara lalonai, eiava wiki haida lalodiai ena hebou lao henia karana, o Dirava dekenai ena abidadama karana hagoadaia totona, Baibel siri haida do umui kikilaia. Mamoe naria taudia ese mamoe taudia idia sisiba henia tamana ta bamona, bona sinana ta bamona edia kara ia manau. (1 Tesalonika 2:​7, 8, 11) To elda bona hesiai taudia be momo lasi neganai, kongregesen ena gaukara ibounai idia naria diba lasi. Ita be famili tamona bamona dainai, ita heduru heheni be namo. Ita ta ta ese iseda tomadiho tamona taudia ita durua diba. Reana oiemu hagoadaia herevadia amo lalo-metau taudia oi hagoadaia bona manoka taudia oi durua diba.​—⁠1 Tesalonika 5:​14, 15.

²⁰ Tanobada taudia ese Dirava ena diba idia abia be namo, bona oi be Iehova ena Witness tauna ta dainai, unai diba harorolaia gaukarana oi karaia noho diba mai moale ida. Namona be elda taudia ese Iehova ena mamoe taudia idia naria mai edia hebogahisi ida, bona oi be mai emu lalokau ida unai kara oi durua diba. Aiemai ura be Iehova ese oiemu hesiai gaukara ia hanamoa, bona ia ubua gaudia, ena mamoe taudia oi durua mai emu lalona ibounai ida neganai, davana namona oi ia henia.

[Footnotes]

Edena Bamona Oi Haere?

◻ Iehova ese ena mamoe taudia edena bamona ia kara henia?

◻ Matamata taudia be haroro gaukara idia ura idia hamatamaia neganai, dahaka do ia vara be namo?

◻ Dirava idia tomadiho henia taudia ese matamata taudia mai edia lalo-hekwarahi be edena bamona idia durudia?

◻ Kara dika idia karaia to idia lalo-kerehai taudia dekenai, elda taudia ese edena bamona heduru idia henia diba?

◻ Edena dala ai oi ese bapatiso matamata taudia oi durua diba “hereva badadia” idia badinaia, lo taudia ai idia lao totona?

[Study Questions]

1. Iehova ese ena hesiai taudia be edena bamona ia kara henidia?

2. Dirava ena taunimanima edia noho be edena bamona?

3. Elda dagina idia abia Keristani taudia ese Dirava ena mamoe oreana be edena bamona idia kara henidia?

4. Taunimanima momo idia diba Charles T. Russell ena kara mamoe taudia dekenai be edena bamona?

5. Dahaka dainai matamata taudia be Keristani kongregesen ena elda taudia idia bamoa be namo?

6. Baibel ia stadilaia tauna ia ura Basileia pablisa ai ia lao neganai, dahaka ia karaia be namo?

7, 8. Edena daladia ai bapatiso lasi pablisa tauna be ena haroro gaukara ia hanamoa totona heduru ia abia diba?

9. Pablisa tauna ia ura ia bapatiso neganai, dahaka ia karaia?

10. Diba bukana ia stadilaia ore bona ia bapatiso murinai, edena dala ai ena diba Baibel dekenai do ia habadaia noho?

11. (a) Prisikila bona Akwila ese Apolo edena bamona idia durua? (b) Headava ia lalohadailaia bapatiso matamata tauna dekenai, edena bamona heduru idia henia diba?

12. Edia headava lalonai hekwakwanai idia davaria bapatiso matamata taudia dekenai, edena bamona heduru idia henia diba?

13. Dahaka dainai kongregesen elda taudia be kerere ia karaia to ia helalo-kerehai bapatiso matamata tauna dekenai hebogahisi henia karana idia hahedinaraia be namo?

14. Bapatiso matamata pablisa tauna be kara dika badana ta ia karaia neganai, dahaka ia vara be namo, bona edena bamona idia durua diba?

15 Nega haida, bapatiso matamata tauna be kara dika ia karaia neganai, dahaka do ia vara?

16. Elda taudia be kerere tauna durua totona, dahaka idia karaia diba?

17. Dahaka do idia karaia bema bapatiso vadaeni tauna ese ena kara dika ia rakatania lasi bona ia helalo-kerehai lasi?

18. Dahaka dainai ita diba bapatiso matamata taudia bona ma haida ese Iehova bona ena ura do idia hadibaia ore diba lasi?

19. Bapatiso matamata taudia be “hereva badadia” idia badinaia bena lo taudia ai do idia lao totona, edena bamona heduru idia abia be namo?

20. Dahaka oi karaia diba Dirava ena diba harorolaia totona bona mai hebogahisi ida Iehova ese ia ubua mamoe taudia naridia gaukarana oi durua totona?

[Picture on page 16]

Taunimanima momo idia diba Charles T. Russell be mamoe taudia ia kara henia mai ena lalokau ida

[Picture on page 18]

Mamoe naria taudia ese Dirava ena mamoe oreana idia kara henia mai edia hebogahisi ida