Iehova Ena Ura Idia Karaia

Iesu Ena Bamahuta Hereva Idia Badinaia

NISANA 14, 33 C.E. ena hanuaboi ai, Iesu bona iena aposetolo taudia 11 mai edia kamonai be Ierusalema dekenai atai daiutuna ta ena teibolo ai idia hekure hebou. Ia diba kahirakahira do ia mase dainai, ia hamaorodia, ia gwau: “Nega daudau lasi umui danu do lau noho.” (Ioane 13:33) Unai nega lalonai, Iuda Iskariote be ia lao vadaeni, idia ura Iesu idia alaia mase kara dika taudia ia hereva henidia totona.

Unai atai daiutuna lalonai idia helai taudia bogaragidiai Iesu sibona ia diba nega be kwadogi. Ia diba goevagoeva kahirakahira hisihisi do ia abia. Iesu ia diba danu unai hanuaboi ai iena aposetolo taudia ese do idia heautania. (Mataio 26:31; Sekaraia 13:⁠7) Unai hanuaboi be Iesu ena nega ginigabena iena aposetolo taudia ida do idia herevahereva, unai dainai ita diba iena hereva ginigabedia be mai anina bada herevadia.

‘Inai Bamona Do Umui Karaia, Lau Do Umui Laloa Totona’

Iena aposetolo taudia mai edia kamonai ida, Iesu ese Iuda Pasova ena gabu ia abia karana matamatana ia hamatamaia. Aposetolo Paulo ese ia gwauraia, “Lohiabada ena Anibou.” (1 Korinto 11:20) Iesu ese hatubua muramura lasi paraoana ia abia bona ia guriguri. Bena paraoa ia makohia bona iena aposetolo taudia dekenai ia henia. Ia gwau: “Umui abia, umui ania, lauegu tauanina be inai.” Bena, Iesu ese uaina kapusi ta ia abia, ia hanamoa bona iena aposetolo taudia dekenai ia henia. Ia gwau: “Umui ibounai umui inua. Inai be lauegu rarana, maino karaia ena rara, taunimanima momo totona do ia bubua, dika gwauatao totona.”​—⁠Mataio 26:​26-28.

Unai kara ena anina be dahaka? Iesu ia hereva bamona, unai paraoa ese iena tauanina, kara dika lasi gauna, ia laulaulaia. (Heberu 7:26; 1 Petero 2:​22, 24) Uaina be Iesu ese ia bubua rarana ia laulaulaia, unai rara ese dika gwauatao dalana ia kehoa. Danu, Iesu ese ia bouboulaia rarana ese Iehova Dirava bona 144,000 taudia huanai ia karaia gwauhamata matamatana ia hamomokania. Unai taudia be Iesu ida guba dekenai do idia lohia. (Heberu 9:14; 12:​22-24; Apokalupo 14:⁠1) Iesu ese iena aposetolo taudia ia boiridia ia ida idia aniani neganai, ia hahedinaraia idia be ia ida guba Basileiana lalonai do idia lohia.

Iesu ese do ita laloatao anibouna ia herevalaia neganai, inai hagania hereva ia gwauraia: “Inai bamona do umui karaia, lau dekenai do umui laloa totona.” (Luka 22:19) Oibe, Lohiabada ena Anibou be lagani ta ta ai do idia karaia, guna Pasova idia karaia bamona. Pasova idia karaia neganai, Dirava ese Israela taudia be Aigupito dekenai igui hesiai gaukara amo ia hamauridia negana idia laloatao. To, Lohiabada ena Anibou be hahemauri badana ia laulaulaia​—⁠kara dika bona mase edia igui amo taunimanima ia hamauridia karana ia laulaulaia. (1 Korinto 5:7; Efeso 1:⁠7) Unai sibona lasi, to Iesu ena tauanina ia laulaulaia paraoana idia ania bona ena rara ia laulaulaia uainana idia inua taudia be vaira negana ai Dirava ena guba Basileia lalonai pavapava bona helaga taudia ai do idia lao negana do idia laloa lou.​—⁠Apokalupo 20:⁠6.

Taunimanima edia histori lalonai Iesu Keriso ena mase be mai anina bada. Iesu ena mase ena anina idia laloa bada taudia ese iena oda herevana “Lohiabada ena Anibou” dekenai idia badinaia: “Inai bamona do umui karaia, lau dekenai do umui laloa totona.” Iehova ena Witness taudia be lagani ta ta lalonai Nisana 14 ena dina hegeregerena ai Iesu ena mase idia laloa lou. Lagani 1996 lalonai, unai dina be April 2, dina ia diho murinai. Mai moale ida oi ai boiria, oiemu gabu dekenai ia noho Kingdom Hall dekenai unai hebou do oi lao henia.

“Taravatu Matamata Lau Henia Umui dekenai”

Iesu ese Lohiabada ena Anibou hebouna ia hamatamaia sibona lasi, to iena aposetolo taudia dekenai sisiba haida ia henia danu. Ena be Iesu ese ia hadibadia goevagoeva vadaeni, to gau momo idia do dibaia lasi. Dirava ena palani Iesu, idia, bona vaira negana totona idia lalo-pararalaia momokani lasi. To Iesu be unai nega lalonai gau ibounai ia hahedinaraia lasi. (Ioane 14:26; 16:​12, 13) To ia ese mai anina bada gauna ta ia herevalaia. Ia gwau: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena.” Ma ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”​—⁠Ioane 13:​34, 35.

Edena dala amo unai be “taravatu matamatana”? Mose ena Taravatu be inai bamona ia hereva: “Emui badibadinai tauna do umui lalokau henia, umui sibona umui lalokau henia hegeregerena.” (Levitiko 19:18) To Iesu ese ia murinai idia raka taudia ia haganidia sibodia edia ura dadaraia lalokauna do idia hahedinaraia. Anina be edia lalona do idia hegeregere edia Keristani tadikaka totona edia mauri do idia henia. Oibe, unai ‘lalokau ena taravatu’ be nega namodia lalonai danu do idia badinaia. Iesu Keriso murinai ia raka tauna ese nega ibounai lalokau do ia hahedinaraia guna, lauma dalanai bona tauanina dalanai haida ia durudia totona.​—⁠Galatia 6:⁠10.

Iesu ena tanobada maurina ena hanuaboi ginigabena ai, lalokau ese ia doria, iena hadibaia taudia dainai Iehova Dirava ia guriguri henia. Ia gwau: “Idia be tanobada dekenai do idia noho, to lau be oi dekenai do lau mai. Egu Tamana Helaga e, lau dekenai oi henia taudia be oiemu ladana ena siahu dekena amo do oi dogoatao, vadaeni idia be do idia tamona, ita ruaosi ita tamona hegeregerena.” (Ioane 17:11) Inai oi laloa be namo: Iesu ese iena Tamana ia guriguri henia lalonai, ia noia ia murinai idia raka taudia do idia lalo-tamona mai edia lalokau ida. (Ioane 17:​20-23) Namona be idia ‘ta ta do idia lalokau heheni Iesu ese ia lalokau henidia hegeregerena.’​—⁠Ioane 15:⁠12.

Aposetolo taudia mai edia kamonai ese Iesu ena hereva idia badinaia. Ita danu ese ena oda herevadia ita badinaia be namo. Inai “nega ena dokona” ai tomadiho momokani taudia huanai lalokau bona lalo-tamona idia noho be mai anina bada herea. (2 Timoteo 3:⁠1) Momokani, Keristani korikori taudia ese Iesu ena oda herevadia idia badinaia bona edia tadikaka idia lalokau henidia. Anina be, iena oda hegeregerena Lohiabada ena Anibou laloatao karana do idia karaia danu.