Gaigai Ena Garana—Edena Bamona Idia Hahedinaraia?
“Bona lau ese badu oi bona hahine ihuanai do lau atoa bona oiemu garana bona iena garana ihuanai.”—GENESE 3:15, NW.
IEHOVA be moale Diravana bona badina namona dainai. Ia be gau namodia Henia Tauna hereadaena tamona, bona gau ta ese iena palani hagugurua dalana ia koua diba lasi. (Isaia 55:10, 11; 1 Timoteo 1:11, NW; Iamesi 1:17) Ia ura ena hesiai taudia ese ia abia moalena idia abia danu, bona idia moale ena badina namodia ia henia danu. Unai dainai, taunimanima edia mauri sivaraidia lalonai dika bada hereana ta—gwau-edeede karana Eden umana dekenai—ia vara neganai, ia ese vaira negana totona iseda helaro ena badina ia henia.—Roma 8:19-21.
2 Unai nega ai Dirava ena lauma natuna ta be Dirava ia dadaraia bona ia samania koikoi dainai, ia be sibona Satani Diabolo ai ia lao. Taunimanima ginigunadia, Heva bena gabeai Adamu, be iena siahu henunai idia vareai bona Iehova ena taravatu, ia gwauraia hedinarai goevagoeva gauna, idia utua. Edia davana maorona, mase, be idia dekenai ia gwauraia. (Genese 3:1-24) To, Iehova ese unai gwau-edeede taudia edia davana ia gwauraia neganai, ia be Adamu bona Heva edia natudia edia helaro ena badina ia henia. Edena dala ai? Genese 3:15 (NW) ena hereva hegeregerena, Iehova ia gwau: “Bona lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” Unai peroveta herevana be ita ia durua gauna, Baibel ibounai ita lalo-pararalaia totona bona guna bona hari tanobada dekenai bona Iehova ena hesiai taudia dekenai idia vara gaudia ita lalo-pararalaia totona danu.
Unai Peroveta Herevana Ena Anina
3 Unai peroveta herevana be mai anina bada bona unai ita laloa bada totona, mani ena kahana idauidau ita laloa. Genese 3:15 dekenai, Dirava ese Ia hereva henia tauna be Gaigai—tano gaigaina lasi to ia gaukaralaia tauna. (Apokalupo 12:9) “Hahine” be Heva lasi to Iehova ena guba oreana, Iena lauma amo tanobada ai ia horoa hesiai taudia edia sinana. (Galatia 4:26) Gaigai ena “garana” be Satani ena garana, iena natudia—demoni bona ia ena kara idia tohotohoa taudia bona edia orea idauidau, hahine ena “garana” idia inai henia taudia unai. (Ioane 15:19; 17:15) Hahine ena “garana” be Iesu Keriso, guna lagani 29 C.E. ai Dirava ese lauma helaga amo ia horoa. To 144,000 taudia, “ranu dekena amo bona lauma dekena amo idia vara lou” bona Keriso ida guba Basileia lalonai do idia lohia taudia, be unai garana ena kahana ma ta. Pentekoste 33 C.E. ai idia be hahine ena garana ai idia haboua matamaia.—Ioane 3:3, 5; Galatia 3:16, 29.
4 Unai tano gaigaina Eden dekenai be ta ese ena hereva halasia totona ia gaukaralaia, bona iena koikoi dainai taunimanima be Paradaiso idia haboioa. Genese 3:15 be vaira negana ai, unai gaigai ia gaukaralaia tauna do idia moia negana ia gwauraia. Bena dala do ia kehoa lou, Dirava ena hesiai taudia be Paradaiso do idia noholaia totona, mase bona kara dika ese idia do ia guia lasi. Unai be moale bada herea negana!—Apokalupo 20:1-3; 21:1-5.
5 Eden umana lalonai gwau-edeede ia vara murinai, Satani Diabolo ena kara idia tohotohoa taudia ta ta bona oreadia idia hedinarai matamaia—gwau-edeede, koikoi, samani koikoi, bona ala-ala karadia, bona Iehova ena ura bona ia idia tomadiho henia taudia idia inai henia. Unai kara amo idia hedinarai, daika be Diabolo ena natudia lauma dalanai. Idia ta be Kaino, Iehova ese ena tomadiho karana ia abia dae lasi to Abela ena ia abia dae neganai, ia ese Abela ia alaia. (1 Ioane 3:10-12) Nimiroda be ena ladana ese ena kara ia gwauraia hedinarai, ia be gwau-edeede tauna bona Dirava ia inai henia lohiana bona labana tauna goadana ai ia lao. (Genese 10:9) Danu, guna basileiadia mai edia gavamani ia durua tomadiho koikoidia, Babulonia danu, be ta ta edia nega ai idia noho, bona idia ese Iehova tomadiho henia taudia idia hahisia mai dagedage ida.—Ieremia 50:29.
“Badu Oi Bona Hahine Ihuanai”
6 Unai nega ibounai lalonai, Gaigai bona Iehova ena hahine edia huanai badu ia noho, Satani Diabolo bona Iehova ena aneru oreana mai edia kamonai guba dekenai edia huanai. Satani ena badu ia hahedinarai negana be ia ese Iehova ia hahisia bona Iehova ena guba oreana ia hadikaia toho; aneru ia koidia bena edia gabu korikori idia rakatania. (Aonega Herevadia 27:11; Iuda 6) Ia hedinarai negana ta be Iehova ese hesiai anerudia ia siaia neganai, Satani ese demoni ia gaukaralaidia idia koudia toho totona. (Daniela 10:13, 14, 20, 21) Lagani 1900 murinai unai ia hedinarai goevagoeva, Mesia Basileiana ia vara neganai Satani ia hekwarahi ia hadikaia ore totona.—Apokalupo 12:1-4.
7 Iehova ena hahine, aneru oreana mai edia kamonai unai, be Gaigai ese ia laulaulaia tauna idia badu henia. Satani ese Dirava ena ladana namona ia hadikaia kava; danu, ia be Dirava ese ia havaraia taudia ta ta ibounai, aneru danu, edia kara maoromaoro ia hepapahuahulaia, bona ia gaukara goadagoada edia badinaia karana Iehova dekenai ia hadikaia totona. (Apokalupo 12:4a) Momokani, edia badinaia karana dainai, aneru, kerubi, bona serapi be Satani Diabolo ai sibona ia halaoa tauna idia badu henia dikadika. To, idia be Iehova idia naria, iena nega bona ena dala ai unai gaudia do ia hamaoromaoroa.—Iuda 9 itaia.
Dirava Ena Hahine Ena Garana Idia Dagedage Henia
8 Unai nega lalonai, Satani be hahine ena Garana, Iehova ia peroveta Gaigai ena kwarana do ia haberoa tauna, ia naria noho. Ierusalema ai Iesu ia vara bena aneru idia gwau ia be “Hamauria Tauna . . . , Keriso Lohiabada,” neganai, idia hamomokania goevagoeva ia be hahine ena Garana ai do ia lao, idia gwauraia guna gauna.—Luka 2:10, 11.
9 Daudau lasi bena Satani ese ena badu dikana ia hahedinaraia; ia ese hisiu ena toa idia tahua taudia haida, Dirava idia diba lasi taudia, be laolao ta ai ia koidia bena King Heroda dekenai idia ia hakaua lao guna, bena gabeai idia lao Betelehema, unuseniai mero maragina Iesu bona ena sinana, Maria, idia davaria. Daudau lasi murinai King Heroda ese oda ia henia, Betelehema bona ia badinai idia noho hanuadia lalonai mauri lagani rua amo idia diho memerodia ibounai do idia alaia. Unai kara amo, Heroda be Garana dekenai Satani ena badu hegeregerena ia hahedinaraia. Toana be Heroda ia diba goevagoeva ia be Mesia ai do ia lao tauna ena mauri ia ura utua. (Mataio 2:1- 6, 16) Sivarai gunadia ese idia hahedinaraia King Heroda be kara kava, kara koikoi, bona ala-ala tauna—momokani ia be Gaigai ena garana tauna ta.
10 Lagani 29 C.E. ai, Dirava ese lauma helaga amo Iesu ia horoa bena guba amo Iehova ese ia gwauraia Iena natuna murinai, Satani be Iesu hamorua totona ia tohoa loulou, unai amo ia be dala ia tahua Dirava ena ura ena Natuna dekenai do ia koua. (Mataio 4:1-10) Ia kwalimu lasi dainai, ia be taunimanima haida ia gaukaralaia ena ura idia hagugurua totona. Iesu ena dagi idia hakoikoia totona ia gaukaralaia taudia haida be tomadiho gunalaia taudia mai edia koikoi. Idia be koikoi bona hadikaia herevadia idia gwauraia, Satani sibona ese ia gaukaralaia daladia unai. Iesu ese marere diba lasi tauna ia hamaoroa, “oi goada, oiemu karadika be lau gwauatao vadaeni,” neganai, taravatu hadibaia taudia be unai tau ia namo eiava lasi idia itaia totona idia naria lasi, to Iesu idia gwauraia Dirava hadikaia tauna. (Mataio 9:2-7) Iesu ese Sabati dinana dekenai taunimanima ia hanamodia neganai, Farisea taudia idia gwau ia be Sabati taravatuna ia utua bona idia hereva hebou do idia hamasea. (Mataio 12:9-14; Ioane 5:1-18) Iesu ese taunimanima edia amo demoni ia lulua neganai, Farisea taudia idia gwau ia be “lauma dika edia lohia tauna, Belesebulo,” ida ia gaukara hebou. (Mataio 12:22-24) Lasaro be mase amo ia hatorea isi lou neganai, taunimanima momo be Iesu idia abidadama henia, to hahelaga taudia badadia bona Farisea taudia be idia hereva hebou lou ia do idia alaia.—Ioane 11:47-53.
11 Ena be Iesu be edia palani ia diba goevagoeva, to Nisan 11, 33 C.E. ai, ia be mai gari lasi ida dubu lalonai ia vareai bona taunimanima vairanai idia ia hahemaoro henia. Taravatu hadibaia taudia bona Farisea taudia be orea tamona bamona ai, hanaihanai taunimanima dekenai idia hahedinaraia idia be edena bamona taudia; unai dainai Iesu ia gwau: “Taravatu hadibaia taudia bona Farisea taudia, kara koikoi taudia, dika do umui davaria momokani! Badina Guba Basileia ena iduara be taunimanima edia vairana dekenai umui koua. Umui be do umui raka vareai diba lasi, bona do idia raka vareai gwauraia taudia be umui ese umui koua.” Iesu ese maoromaoro idia ia gwauraia Gaigai ena garana taudia; ia gwau: “Gaigai e! Koria gaigai edia natuna! Dirava ena Kota Badana dekena amo hel [“Gehena,” NW] ena panisi edena bamona do umui heau mauri diba?” (Mataio 23:13, 33) Iena hereva dainai Genese 3:15 ena peroveta herevana danu ita laloa.
12 Iesu ena hereva idia kamonai neganai, edia lalona ia gwadaia bena Dirava ese do ia hebogahisi henidia totona idia noinoi, a? Edia kara dikana amo idia helalo-kerehai, a? Lasi! Mareko 14:1 ia hahedinaraia murina dinana ai, hahelaga tauna badana ena magu ariara ai idia hebou neganai, “Dubu biagudia bona taravatu hadibaia taudia danu ese dala idia tahua, Iesu do idia dogoatao koikoi dala dekenai, bona alaia mase.” Iesu ese ia gwauraia ala-ala tauna, Satani, ena ala-ala lalohadaina idia dogoatao noho. (Ioane 8:44) Nega sisina murinai Iuda Iskariote, Satani ese ena lalona ia ania bena hereva momokani dadaraia tauna ai ia lao tauna, ese idia ia bamoa. Iuda ese Dirava ena hahine ena kerere lasi garana ia dadaraia bona Gaigai ena garana ia bamoa.
13 Nisan 14 ena daba momokani ai, Iuda tomadiho ena kota naria taudia ese Iesu be dibura tauna ai idia halaoa bena Roma ena gavana dekenai idia abia lao. Unai neganai hahelaga taudia badadia be ia do idia hasatauroa ena boiboi idia gunalaia. Pilato ia henanadai: “Umui emui King do lau hasatauroa, a?” Unai neganai, hahelaga taudia badadia idia haere idia gwau: “Ai be mai emai king ta lasi, Kaisara sibona.” (Ioane 19:6, 15) Momokani, dala iboudiai dekenai idia hahedinaraia idia be Gaigai ena garana taudia. To idia sibona lasi. Dirava ena lauma amo idia torea sivaraina Mataio 27:24, 25 ai be inai: “Pilato . . . ranu ia abia, taunimanima edia vairanai iena imana ia huria.” Bena taunimanima ibounai idia gwau: “Inai tau ena rarana be aiemai latanai bona aiemai natudia edia latanai do ia noho.” Unai dala ai Iuda taudia momo unai uru lalonai be sibodia idia hahedinaraia idia be Gaigai ena garana taudia. Unai dina ia do ore lasi bena Iesu ia mase. Satani be ena garana, taunimanima ese idia itaia diba taudia ia gaukaralaia, Dirava ena hahine ena Garana ena aena geduna ia haberoa totona.
14 Satani ia kwalimu, a? Lasi momokani! Iesu ese tanobada bona ia lohiaia tauna ia halusia vadaeni. (Ioane 14:30, 31; 16:33) Ia ese Iehova badinaia karana ia hahedinaraia ela bona mase. Ia be tau goevadaena dainai, ena mase amo Adamu ese ia haboioa maurina abia lou ena davana ia henia. Unai amo ia ese ia henia gauna idia abidadama henia bona Dirava ena hahegani idia badinaia taudia dekenai mauri hanaihanai abia dalana ia kehoa. (Mataio 20:28; Ioane 3:16) Iehova ese Iesu be mase amo ia hatorea isi neganai guba dekenai mase diba lasi maurina ia henia. Iehova ena nega korikori ai, Iesu ese Satani do ia moia bona haorea. Genese 22:16-18 dekenai, peroveta herevana ia gwau Iehova ese unai badinaia karana ia hahedinaraia Garana dainai sibodia do idia hanamoa karana idia karaia ruma besedia be do ia lalo-namo henidia.
15 Iesu ia mase murinai, horoa Keristani taudia ese Gaigai ena garana ena kerere idia gwauraia hedinarai, edia Lohiabada ia karaia bamona. Aposetolo Paulo be lauma helaga ese ia hasiahua dainai, “tau dika rohorohona” ena kara dainai idia naria namonamo totona sisiba ia henia; unai tau be “Satani ena siahu dekena amo” do ia mai. (2 Tesalonika 2:3-10) Hari, unai “tau” oreana be Kerisendom gunalaia taudia. Unai Gaigai ena garana ese Iesu Keriso murinai idia raka taudia ia dagedage henidia bada. Apokalupo 12:17 ai ia noho peroveta herevana lalonai, aposetolo Ioane be ia gwau Satani be Dirava ena hahine ena garana taudia oredia do ia tuari henia noho ema bona iseda nega. Unai hegeregerena ia vara momokani. Tano momo lalonai, Iehova ena Witness taudia be idia taravatua, idia dadabaia, bona dibura ruma bona dibura kamepa dekenai idia atodia badina be Dirava ena Basileia bona iena kara maorodia totona idia gini goada.
Iseda Nega ai Satani Ena Garana Ia Hedinarai Dalana
16 Keristani taudia momokanidia be Iesu Keriso idia tohotohoa, mai gari lasi ida Satani bona ena garana edia kerere gwauraia hedinarai karana idia hadokoa lasi. Lagani 1917 ai Bible Students, Iehova ena Witness taudia unai nega ai idia gwauraia, ese buka ladana The Finished Mystery idia halasia, bona ia lalonai Kerisendom ena gunalaia taudia edia koikoi ia hahedinaraia. Unai murinai, lagani 1924 ai, idia printaia gwaubou herevana ladana Ecclesiastics Indicted, idia halasia. Kopi ibounai milioni 50 be tanobada hegegemadai idia hariharilaia. Lagani 1937 ai, J. F. Rutherford, unai nega ai Watch Tower Society ena presiden, be hereva edia ladana “Hahedinaraia” bona “Tomadiho Bona Keristani Oreana” lalonai Satani ena garana ena kerere hahedinaraia herevadia aukadia ia gwauraia. Murina laganina ai, ia ese hereva ladana “Hereva Momokanidia Laloa” be London, England ai, ia henia neganai, hebouhebou 50 idia lao henia taudia tano idauidau dekenai be reidiotelefon amo unai hereva idia kamonai. Hua ta murinai, hereva ladana “Fascism Eiava Ura Kwalimu” be reidio amo idia halasia United States ena gabu idauidau dekenai. Unai hereva be kerere hahedinaraia hereva aukadia idia torea bukadia edia ladana Enemies bona Religion bona buklet ladana Uncovered amo idia habadaia. Lagani 1920 amo idia halasia gaudia hegeregerena, Apokalupo—Ena Hagugurua Negana Ia Kahirakahira!,a hari gado 65 ai idia printaia bukana, ia hahedinaraia idia henaohenao politikol lohiadia bona taravatu idia utua mata-ganigani bisinesi taudia be tanobada ai Gaigai ena garana taudia badadia huanai. Politikol gunalaia taudia ese koikoi dalana ai hanaihanai idia lohiaia taudia idia gunalaia, bena idia laloa lasi rara be helaga, bona Iehova ena hesiai taudia idia dagedage henia (unai amo edia badu Dirava ena hahine ena garana dekenai idia hahedinaraia) neganai, idia be sibodia idia hahedinaraia idia be Gaigai ena garana taudia. Bisinesi taudia, edia lalona ena hemami idia laloa lasi, to moni abia totona idia koikoi bona gorere havaraia gaudia idia karaia bona hoihoilaia taudia, be unai bamona danu.
17 Tanobada ena tomadiho, politikol, eiava bisinesi ese idia hamiroa taudia ta ta ibounai lasi be dokonai Gaigai ena garana taudia do idia gwauraia. Unai tatau bona hahine haida be Iehova ena Witness taudia idia laloa bada. Edia siahu idia gaukaralaia idia durudia totona bona gabeai tomadiho momokani idia abia dae. (Kara 13:7, 12; 17:32-34 itaia.) Unai bamona taudia ibounai dekenai danu, inai sisiba be mai anina: “Tanobada ena lohia taudia e, do umui diba. Lohiabada do umui tomadiho henia, mai emui gari danu, Mai heudeheude danu Lohiabada do umui hanamoa. Dirava ena Natuna do umui kisi henia, do ia badu garina, bona do umui mase haraga garina. Badina be iena badu be ia vara haraga diba. To ia dekenai idia abidadama taudia be idia moale, ia ese ia naridia dainai.” (Salamo 2:10-12) Momokani, Hahemaoro Tauna guba dekenai ese dala ia do koua lasi lalonai, Iehova ena lalo-namo idia ura abia taudia ese hari kara ta idia karaia be mai anina bada!
18 Guba Basileia taudia sibona be hahine ena garana taudia. Idia be momo lasi. (Apokalupo 7:4, 9) To, ma haida, hutuma bada herea, oibe, Iehova idia tomadiho henia taudia milioni momo, edia helaro be tanobada Paradaisona ai mauri hanaihanai do idia abia. Edia hereva amo bona kara amo, Iehova ena horoa taudia idia hamaoroa: ‘Mani emui kara, umui danu do ita lao, badina be ai kamonai vadaeni, Dirava be umui dekenai ia noho.’—Sekaraia 8:23.
19 Taunimanima iboudiai ese hari edia lalona idia hadaia be gau badana. Idia ura Iehova idia tomadiho henia bona ena lohia siahuna idia abia isi, eiava Satani hamoalea karadia idia karaia amo dala do idia kehoa ia be edia lohia ai do ia lao totona? Taunimanima milioni ima ia hanaia vadaeni, bese idauidau amo be Iehova ena kahanai idia gini, hahine ena garana taudia oredia ida, Basileia ena lohia taudia unai. Bona ma milioni 8 be edia ura idia hahedinaraia, Iehova ena Witness taudia ida Baibel idia stadilaia eiava edia hebou idia lao henia. Iehova ena Witness taudia be unai taudia ibounai dekenai idia gwau: Dala be ia do kehoa noho. Iehova ena kahanai oi gini mai daradara lasi. Iesu oi abia dae, ia be gwauhamata Garana. Mai moale ida Iehova ena orea tanobada ai oi bamoa. Aiemai ura be Ia ese King, Iesu Keriso, ena lohia dalana amo do Ia henia hahenamo ibounai do oi abia danu.
[Footnotes]
a Watchtower Bible and Tract Society of New York, Inc. ese idia halasia bukana.
Inai Oi Laloatao A?
◻ Genese 3:15 ese ia gwauraia Gaigaina be daika? Bona hahine be daika?
◻ Hahine ena garana edia kara be dahaka dahaka?
◻ Iesu ese Gaigai ena garana ena kara be edena bamona ia gwauraia hedinarai?
◻ Ia hedinarai hari inai nega ai daidia danu be Gaigai ena garana taudia?
◻ Taunimanima ese dahaka idia karaia haraga be namo, Gaigai ena garana taudia ai idia lao lasi totona?
[Study Questions]
1. (a) Dahaka dainai Iehova be moale Diravana? (b) Iena moale ita abia danu totona, ia be dahaka ia karaia?
2. Iehova ese Eden umana lalonai gwau-edeede taudia ia hahemaoro henidia neganai, Adamu bona Heva edia natudia edia helaro ena badina be edena bamona ia henia?
3. Genese 3:15 ena hereva lalonai inai taudia be daika daika oi gwauraia: (a) Gaigai, (b) “hahine,” (c) Gaigai ena “garana,” (d) hahine ena “garana.”
4. Tanobada be paradaiso ai do ia lao, bona kara dika bona mase ese idia guia lasi taudia ese do idia noholaia herevana ena anina Genese 3:15 ai be edena bamona ia hedinarai?
5. Diabolo ena natudia lauma dalanai edia kara be dahaka dahaka?
6. Edena dala idauidau ai Satani ese ena badu Iehova ena hahine dekenai ia hahedinaraia?
7. Dahaka dainai Iehova idia badinaia anerudia ese Gaigai ia laulaulaia tauna idia badu henia, to dahaka haheauka karana idia hahedinaraia?
8. Satani be daika ia tahua?
9. Iesu ia vara murinai, Satani ena badu dikana be edena bamona ia hahedinaraia?
10. (a) Iesu ia bapatiso murinai, Satani be edena dala ai Iehova ena palani gwauhamata Garana dekenai ia koua toho? (b) Edena dala ai Satani ese Iuda tomadiho gunalaia taudia ia gaukaralaia iena ura hagugurua totona?
11. Dina toi idia do noho bena Iesu do ia mase neganai, ia ese daidia ia gwauraia Gaigai ena garana, bona dahaka dainai?
12, 13. (a) Hahelaga taudia badadia bona taravatu hadibaia taudia be edena bamona idia hahedinaraia edia tamana lauma dalanai be daika? (b) Daika ese idia ia bamoa? (c) Genese 3:15 ena hereva hegeregerena, hahine ena Garana ena aena geduna be edena bamona idia haberoa?
14. Dahaka dainai hahine ena Garana ena aena geduna idia haberoa karana be Satani ena kwalimu toana lasi?
15. (a) Iesu ena mase murinai, iena aposetolo taudia be edena bamona Gaigai ena garana ena kerere idia do gwauraia hedinarai? (b) Dahaka dagedage karadia ma haida be Gaigai ena garana ese idia hahedinaraia ema bona iseda nega?
16. Inai nega lalonai ia hedinarai daidia be Gaigai ena garana taudia, bona edena dala ai?
17. Inai tanobada oromana reana do idia rakatania taudia mai edia ladana bada be ta ta dekenai dahaka dala ia do kehoa noho?
18. Daidia be hahine ena garana lasi, to idia be Iehova tomadiho henia taudia?
19. (a) Dahaka gau dekenai namona be taunimanima ibounai ese edia lalona idia hadaia? (b) Daidia be dala ia do kehoa noho lalonai mai anina bada sisibana ta hegeregerena do idia kara be namo?
[Picture on page 10]
Iesu ese ia hahedinaraia tomadiho gunalaia taudia mai edia koikoi be Gaigai ena garana taudia