Dirava Ena Hereva ese “Hoa Karadia” Ia Havaraia
THÉRÈSE HÉON ESE INAI SIVARAI IA GWAURAIA
Dina ta lagani 1965 ai, lau be bisinesi gabuna ta dekenai lau vareai bona hoihoi taudia dekenai Gima Kohorona bona Noga! magasin lau hariharilaia. Lau rakatania gwauraia neganai, pou regena lau kamonai. Buleti ese egu aena kahirakahira foloa ia botaia. Hoihoi tauna ta be mai badu ida ia gwau: “Unai be Iehova ena Witness taudia kara henia dalana.”
UNAI ekspiriens ese lau ia hagaria—to ful-taim hesiai gaukara lau hadokoa lasi. Lau diba vadaeni Baibel ena hereva momokanidia lau laloa bada dainai, gau ta lasi ese egu hesiai gaukara amo lau ia veria oho diba. Egu hereva ena badina mani lau gwauraia hedinarai.
July 1918 dekenai lau vara murinai, egu tama sina be Cap-de-la-Madeleine, hanua maragina Quebec ai, Canada dekenai idia noho; unai gabu ena ladana ma ta be Hoa Karadia Idia Vara Gabuna. Taunimanima hutuma be iniseniai idia mai Maria Haneulato Rami-Hebouna ena dubu maragina idia hemataurai henia totona. Ena be Maria ia karaia hoa karadia idia hamomokania diba lasi, to unai hanua be taunimanima 30,000 mai kahana idia noho taoni ai ia lao lalonai, Dirava ena Hereva ese taunimanima momo edia mauri lalonai hoa karadia ia havaraia.
Lauegu mauri lagani be 20 bamona neganai, egu tamana ia itaia lau ese tomadiho lau laloa bada bona iena Baibel lau dekenai ia henia. Lau duahia matamaia neganai, lau hoa badina Esodo karoa 20 ese ia hahedinaraia goevagoeva kaivakuku tomadiho henia karana be ia dika. Maoromaoro egu abidadama Katolik Dubu ena hadibaia herevadia dekenai ia boio bona Mass dekenai lau lao lasi. Lau ura lasi kaivakuku lau tomadiho henia. Egu Tamana ena hereva lau laloatao, ia gwau: “Thérèse e, dubu dekenai oi lao lasi, a?” Bena lau haere, lau gwau: “Lasi, Baibel lau duahia noho.”
September 1938 ai lau headava murinai danu, Baibel lau duahia noho. Egu tau, Rosaire, be nega momo hanuaboi neganai ia gaukara dainai, ia gaukara neganai Baibel lau duahia. Daudau lasi murinai, lau lalo-parara Dirava be mai ena taunimanima, bona idia lau tahua matamaia.
Dirava Ena Taunimanima Lau Tahua
Lau maragi neganai dubu dekenai idia hadibaia gaudia dainai, lau ura lasi lau mahuta, badina hel dekenai do lau toreisi garina lau gari. Unai gari koua totona, sibona lau hamaoroa loulou lalokau Diravana ese unai bamona dika do ia karaia lasi. Mai lalo-goada ida Baibel lau duahia noho, hereva momokani lau tahua noho. Lau be Etiopia eunuko tauna bamona, ia duahia to ia lalo-pararalaia lasi.—Kara 8:26-39.
Egu taihuna André bona ena adavana be aiemai daiutudia henunai idia noho bona lagani 1957 bamona ai, Iehova ena Witness taudia ida Baibel idia stadilaia matamaia. Egu nakimi lau hamaoroa, Witness taudia be unai ruma dekenai idia haroro neganai edia guhi ia botaia amo lau ia hadibaia, bena iduara do lau kehoa lasi. Dina ta ia laloaboio bona lau ia hadibaia lasi.
Unai dina ai iduara lau kehoa bona Kay Munday lau davaria, ia be painia taihuna ta, unai be Iehova ena Witness taudia edia ful-taim hesiai gaukara taudia edia ladana. Ia ese Dirava ena ladana ia herevalaia, ia hahedinaraia Dirava be mai ena ladana, Iehova. Ia lao murinai, lauegu Baibel amo lau tahua, Baibel lalonai idia torea gaudia ese ena hereva idia hamomokania, eiava. Lau davaria gaudia ese lau idia hamoalea.—Esodo 6:3, Douay Version, futnout; Mataio 6:9, 10; Ioane 17:6.
Kay ia lou mai neganai, Katolik hadibaia herevana Toi Tamona ai herevalaia, unai hahediba herevana ia gwau Dirava be taunimanima toi Dirava tamona lalonai. Gabeai lauegu Baibel lau tahua namonamo, Toi Tamona herevana ia hadibaia lasi lau itaia momokani totona. (Kara 17:11) Egu stadi ese ia hamomokania Iesu be Dirava hegeregerena lasi. Dirava ese ia havaraia. Ia be mai ena matamana, to Iehova be mai ena matamana lasi. (Salamo 90:1, 2; Ioane 14:28; Kolose 1:15-17; Apokalupo 3:14) Lau dibaia gaudia lau moalelaia dainai, mai moale ida Baibel ai herevalaia noho.
Dina ta lagani 1958 ai, November ai sinou ia diho neganai, idia rentaia hebou rumana dekenai unai hanuaboi ai idia karaia sekit hebouhebou dekenai, Kay ese lau ia boiria. Lau ese unai noinoi lau abia dae bona program lau moalelaia. Program ia ore murinai, lau dekenai ia mai Witness tauna ida lau herevahereva neganai, ia lau nanadaia, lau gwau: “Keristani tauna korikorina be ruma-ta-ruma-ta haroro gaukarana ia karaia be gau badana, a?”
Ia haere, ia gwau: “Oibe, sivarai namona harorolaia gaukarana be mai anina bada, bona Baibel ese ia hahedinaraia taunimanima be edia ruma dekenai hereva henia karana be haroro gaukara ena kahana badana.”—Kara 20:20.
Iena haere lau moalelaia bada! Ia hamomokania lau ese Dirava ena taunimanima lau davaria vadaeni. Bema ia gwau: “Lasi, ia be gau badana lasi,” reana lau laloa lasi hereva momokani lau davaria, badina Baibel ena lalohadai ruma-ta-ruma-ta haroro gaukara dekenai lau diba dainai. Unai negana amo lauma dalanai lau tubu haraga.
Unai sekit hebouhebou murinai, kahirakahira ia noho taoni Trois-Rivières ai idia karaia Iehova ena Witness taudia edia hebouhebou idauidau dekenai lau lao matamaia. Unai neganai, Cap-de-la-Madeleine ai idia noho Witness taudia be Kay bona ena turana Florence Bowman sibona. Dina ta lau gwau: “Kerukeru umui ida do lau haroro.” Idia moale lau ese idia lau bamoa dainai.
Lau Noho Gabuna Dekenai Lau Haroro
Lau laloa taunimanima iboudiai be Baibel ena sivarai do idia abia dae, to karaharaga lau davaria unai ia vara lasi. Kay bona Florence be gabu ta dekenai idia siaia neganai, lau sibona be inai taoni dekenai Baibel ena hereva momokanidia lau harorolaia ruma ta ruma ta dekenai. Ena be lau sibona lau noho to lau gari lasi bona lau haroro noho ela bona June 8, 1963 ai lau bapatiso. Unai dina tamona ai, unai neganai idia gwauraia laga-ani painia gaukarana lau matamaia.
Lagani tamona lalonai laga-ani painia gaukara lau karaia. Bena Delvina Saint-Laurent ia gwauhamata, bema regula painia gaukara do lau matamaia, pura ta ta iboudiai nega ta do ia mai Cap-de-la-Madeleine dekenai bona lau ida do ia gaukara. Unai dainai egu painia aplikeisini pepana lau torea. To madi, pura rua idia do noho bena lau ese ful-taim hesiai gaukara lau hamatamaia neganai, Delvina ia mase. Lau be dahaka do lau karaia? Lau be aplikeisini lau torea vadaeni bona lau ura lasi egu palani lau haidaua. Unai dainai October 1964 lalonai, egu ful-taim hesiai gaukarana lau hamatamaia. Idia mai lagani hani lalonai, ruma-ta-ruma-ta haroro gaukarana dekenai lau sibona lau karaia.
Nega momo Cap-de-la-Madeleine ena Katolik taudia be lau idia kara dika henia. Haida ese pulisi idia boiria lauegu haroro gaukara idia koua totona. Dina ta ai, inai sivarai matamana ai lau gwauraia bamona, hoihoi tauna ta ese lau ia hagaria totona egu aena kahirakahira ia pidia. Taoni lalonai momo ese unai idia kamonai bona idia herevalaia. Unai gabu ena televisen steiseni ia gwau unai be Iehova ena Witness taudia hadikaia ore gaukarana. Unai ibounai ese witness namona ia henia. Lagani 10 murinai, kahirakahira lau ia pidia hoihoi tauna ena varavara ta be Witness tauna ai ia lao.
Dirava Ena Hereva ese Ia Havaraia “Hoa Karadia”
Idia lao laganidia lalonai lau itaia, Cap-de-la-Madeleine ai, Baibel ena hereva momokani dadaraia karana ia maragi ia lao. Lagani 1968 bamona lalonai, Witness taudia ma haida be iniseniai idia mai, bona inai gabu taudia be Baibel ena hereva momokani idia kamonai matamaia. Lagani 1970 murinai, Baibel stadi edia namba be ia bada daekau. Idia momo idia lao ela bona Witness taudia ma haida lau noia egu Baibel stadi haida idia karaia, lauegu nega ia hegeregere ruma-ta-ruma-ta haroro gaukara do lau karaia noho totona.
Dina ta ai, hahine matamata ese lau amo Baibel stadi durua gauna, Mauri Ia Lao Henia Hereva Momokanina bukana ia abia. Unai neganai ena turana be tau matamata, iena ladana be André, ena toana be ia be raskol tauna dikana bona emai herevahereva lalonai ia vareai. André ida lau herevahereva karana ese iena lalona ia veria, bona Baibel stadi lau hamatamaia. Nega sisina murinai, ia diba gaudia be iena turadia dekenai ia herevalaia matamaia.
Nega ta lalonai, raskol taudia hani ida Baibel lau stadilaia, idia ta ia hereva momo lasi to ia kamonai namonamo. Iena ladana be Pierre. Daba ta 2 okaloka ai, egu adavana bona lau be pidipidi ai kamonai iduara dekenai. Mani inai oi laloa: Raskol taudia hani be iduara dekenai idia gini bona idia ura henanadai haida lau dekenai idia henia. Lau moale badina Rosaire be unai bamona vadivadi dainai ia maumau lasi.
Gabeai unai tatau hani be hebou dekenai idia lao. To, André bona Pierre sibona idia mai hanaihanai. Edia mauri be Dirava ena ura hegeregerena ai idia haidaua bona idia bapatiso. Lagani 20 idia lao vadaeni, unai tatau ruaosi be mai abidadama ida Iehova idia hesiai henia noho. Stadi idia hamatamaia neganai, momo ese edia raskol karadia idia diba bona pulisi ese idia raraidia. Nega haida pulisi ese emai Baibel stadi ta murinai eiava kongregesen ena hebou neganai idia tahudia. Lau moale badina “taunimanima ibounai” dekenai lau haroro, bona unai dainai lau itaia Dirava ena Hereva ese hoa dalanai taunimanima edia mauri ia haidaua.—1 Timoteo 2:4.
Egu hesiai gaukara lau matamaia neganai, bema ta ia gwau gabeai Cap-de-la-Madeleine dekenai be Kingdom Hall do ia noho bona ia be Iehova ena taunimanima amo ia honu, reana unai hereva lau abia dae lasi. Lau moale bada badina kahirakahira ia noho Trois-Rivières taonina ena kongregesen maragina be ia tubu ela bona hari kongregesen namodia 6 be Kingdom Hall toi lalonai idia hebou, unai kongregesen ta be iniseniai Cap-de-la-Madeleine dekenai.
Lau ese taunimanima 30 bamona lau durua diba bena idia gwauhamata bona bapatiso, unai dainai lau moale. Hari, lauegu mauri lagani be 78, bona momokani lau gwau diba lau moale bada herea egu mauri be Iehova dekenai lau gwauhamatalaia dainai. To, do lau hereva momokani lalo-metau negadia danu lau davaria. Unai negadia lau hanaia totona, nega ibounai egu Baibel lau kehoa bona lau idia hagoadaia bada kahana idauidau lau duahia. Dina ta ia lao bona Dirava ena Hereva lau duahia lasi be hegeregere lasi lau dekenai. Hagoadaia siri namona be Ioane 15:7, ia gwau: “Bema lau do umui badinaia, bona egu hereva be emui lalona dekenai idia noho neganai, emui ura gaudia dekenai do umui noinoi, vadaeni unai gaudia do umui abia.”
Lauegu ura gauna be kahirakahira do ia vara tanobada matamatana lalonai Rosaire do lau itaia. (2 Petero 3:13; Apokalupo 21:3, 4) Lagani 1975 ai, iena mase ia kahirakahira neganai, lauma dalanai ia tubu noho bona kahirakahira ia bapatiso. Hari egu ura badana be ful-taim hesiai gaukara lalonai do lau haheauka noho bona Iehova ena gaukara lau moalelaia noho.