Dirava be Edena Bamona Do Ita Guriguri Henia?
HAHEDIBA tauna ta be guriguri dalana totona ia noinoi neganai, Iesu ese ia dadaraia lasi, to ia hadibaia. Luka 11:2-4 ena hereva hegeregerena, ia haere ia gwau: “Umui guriguri neganai be umui gwau, ‘Aiemai Tamana e, oiemu ladana do ai hahelagaia. Oiemu Basileia do ia mai. Dina ta ta ibounai aiemai aniani do oi henia ai dekenai. Aiemai dika do oi gwauatao, badina be ai danu ese ai dekenai idia hadikaia taudia edia dika ai gwauatao. Bona dibagani dekenai ai do oi hakaua vareai lasi.’ ” Unai be Lohiabada ena Guriguri. Ia ese ita dekenai gau momo ia hadibaia.
Gau ginigunana be, iena hereva ginigunadia ese ita idia hadibaia daika dekenai do ita guriguri—iseda Tamana dekenai. Ita itaia Iesu ia gwau lasi, tau ta, kaivakuku, “helaga tauna,” eiava ia sibona dekenai danu ita guriguri. Oibe, badina Dirava ia gwau: “Egu hairaina be dirava ta dekenai do lau henia lasi. Lau abia noho hanamoa, be kaivakuku ta dekenai do lau henia lasi.” (Isaiah 42:8) Unai dainai bema gau ta eiava dirava ta ita guriguri henia, to iseda guba Tamana ita guriguri henia lasi, ita do Ia kamonai henia lasi, ena be mai momokani ida ita tomadiho. Baibel lalonai, Iehova Dirava sibona be idia gwauraia ‘Guriguri kamonaia’ tauna.—Salamo 65:2.
Haida idia gwau “helaga taudia” be idia totona Dirava idia noia. To Iesu sibona ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona. Egu ladana dekenai do umui noia gaudia ibounai do lau karaia, vadaeni egu Tamana ese hairai do ia abia, iena Natuna dainai.” (Ioane 14:6, 13) Unai amo Iesu ese helaga taudia be taunimanima totona Dirava idia noia lalohadaina ia hakoikoia. Aposetolo Paulo ese Iesu ia herevalaia dalana mani oi laloa, ia gwau: “Ita totona ia mase sibona lasi—mase amo ia toreisi lou, bona Dirava ena imana idibana kahana dekenai ia gini bona ita totona Dirava ia noia noho.” “Ia noho hanaihanai, ia dekena amo Dirava dekenai idia lao taudia ibounai dainai ia noinoi totona.”—Roma 8:34; Heberu 7:25, Katolik Jerusalem Bible.
Do Ita Hahelagaia Ladana
Iesu ese ena guriguri lalonai ia gwauraia herevadia ma haida be inai: “Oiemu ladana do ai hahelagaia.” Bema ta be Dirava ena ladana ia diba lasi, bona ia gaukaralaia lasi, edena bamona do ia hahelagaia eiava ia hahedinaraia diba? “Taravatu Gunana” lalonai nega 6,000 Dirava be iena ladana, Iehova, amo idia gwauraia hedinarai.
Katolik Douay Version Baibel lalonai, Esodo 6:3 ena futnout ese Dirava ena ladana inai bamona ia gwauraia: “Hari inai negai taunimanima haida ese inai ladana Jehovah idia gaukaralaia . . . , [Dirava ena] ladana, Heberu toretore lalonai ia noho ladana, gwauraia dalana korikorina be nega daudau lalonai idia gwauraia lasi dainai, gwauraia dalana be ia boio.” Unai dainai Katolik edia New Jerusalem Bible ese Yahweh ia gaukaralaia. Ena be aonega taudia momo ese unai gwauraia dalana idia ura henia, to “Jehovah” be English gado dekenai Dirava ena ladana idia gwauraia dalana maorona bona nega daudau idia gaukaralaia dalana. Gado ma haida be mai edia dirava ena ladana gwauraia dalana. Gau badana be unai ladana do ita gaukaralaia ita hahelagaia totona. Oiemu dubu ese oi ia hadibaia guriguri lalonai inai lada, Iehova, oi gaukaralaia totona, a?
Ita Gurigurilaia Gaudia Maorodia
Iesu ese iena hahediba taudia ma ia hadibadia inai bamona do idia guriguri: “Oiemu Basileia do ia mai.” Evanelia bukana, Mataio ese inai hereva ma haida ia torea: “Oiemu ura gauna tanobada dekenai do ia karaia, guba dekenai ia karaia bamona.” (Mataio 6:10, Dy) Dirava ena Basileia be Iesu Keriso ese ia biagua gavamanina. (Isaia 9:6, 7) Baibel ena peroveta hereva hegeregerena, kahirakahira ia ese taunimanima edia gavamani do ia kokidia bona tanobada hegegemadai maino do ia mailaia. (Salamo 72:1-7; Daniela 2:44; Apokalupo 21:3-5) Unai dainai Keristani momokani taudia edia guriguri lalonai Basileia do ia mai idia herevalaia loulou. Oiemu dubu ese oi ia hadibaia unai bamona do oi karaia totona, a?
Danu, Iesu ia hahedinaraia ita laloa bada gaudia be iseda guriguri lalonai danu ita herevalaia diba. Ia gwau: “Dina ta ta ibounai aiemai aniani do oi henia ai dekenai. Aiemai dika do oi gwauatao, badina be ai danu ese ai dekenai idia hadikaia taudia edia dika ai gwauatao. Bona dibagani dekenai ai do oi hakaua vareai lasi.” (Luka 11:3, 4) Iesu ena hereva ena anina be dina ta ta ai ita karaia gaudia lalonai Dirava ena ura do ita tahua, herevana dahaka dahaka ese ita idia hahisia eiava iseda lalo-maino idia hadikaia, Iehova dekenai ita gurigurilaia diba. Hanaihanai Dirava be unai bamona ita guriguri henia neganai, do ita abia dae ia dekenai ita tabekau be namo. Unai amo iena kara iseda mauri lalonai do ita itaia. Dina ta ta ai Dirava ita noia iseda kara dika do ia gwauatao be mai ena namo danu. Unai amo ita lalo-parara ita be mai eda kara dika—bona ma haida edia kara dika do ita haheaukalaia. Iesu ena hereva, hedibagani lalonai do ita vareai lasi totona do ita guriguri be mai anina bada, badina be hari inai tanobada ena kara be ia dika ia lao noho. Unai guriguri hegeregerena, namona be ita naria namonamo kara dika do ia havaraia diba karana ta lalonai do ita vareai lasi.
Momokani, Lohiabada ena Guriguri ese ita dekenai gau momo ia hadibaia, iseda guriguri karana be Iehova ese ia moalelaia totona. To Iesu ia gwau unai guriguri be hanaihanai do ita herevalaia loulou, a?
Sisiba Ma Haida Guriguri Totona
Iesu ese sisiba ma haida ia henia guriguri totona. Mataio 6:5, 6 dekenai ia gwau: “Umui guriguri neganai, koikoi taudia bamona umui karaia lasi, badina be idia ura dubu dekenai bona dala edia huanai idia gini, vadaeni idia guriguri, taunimanima ese idia itaia totona. . . . To oi guriguri neganai oiemu ruma dekenai oi vareai, iduara oi koua, oiemu Tamana, hunia gabuna ia noho dekenai do oi guriguri henia. Vadaeni oiemu Tamana ese hunia gabuna dekenai oi sibona oi karaia gauna ia itaia noho, bona ena davana do ia henia oi dekenai.” Unai hereva ese ita ia hadibaia namo lasi mai hekokoroku ida do ita guriguri tau ta ese ita ia hanamoa totona. Baibel ia hereva hegeregerena, hunia gabuna ai oiemu kudouna ena ura gaudia Iehova dekenai oi hamaoroa, a?—Salamo 62:8.
Iesu be inai sisiba ia henia: “Umui guriguri neganai, hereva kava momo do umui gwauraia lou, gwauraia lou lasi, Dirava diba lasi taudia bamona, badina be idia laloa edia hereva momo dainai, Dirava ese idia do ia kamonai.” (Mataio 6:7) Unai ese ia hahedinaraia goevagoeva, Iesu ia ura lasi guriguri ta ita laloatao bona ita gwauraia loulou—unai hegeregerena ia ura lasi buka ta amo do ita duahidia. Iena hereva ese ia hahedinaraia rosary gaukaralaia karana be maoro lasi.
Katolik misal bukana ta ese inai ia hahedinaraia, ia gwau: “Ita gwauraia guriguri namodia be ita mamia gaudia ita herevalaia neganai, ita ura ita tanikiu henia, eiava ita ura heduru, hebogahisi negadia ai, eiava dina ta ta ai ita ura hanamoa neganai.” Iesu be ena mamina hegeregerena ai ia guriguri, ia laloatao gurigurina ta ia gwauraia lasi. Haheitalai be Iesu ena guriguri Ioane karoa 17 dekenai mani oi duahia. Ia hadibaia gurigurina hegeregerena, unai guriguri ia hahedinaraia Iesu ena ura be Iehova ena ladana do ia helaga. Iesu ena guriguri be iena mamina hegeregerena bona iena kudouna amo.
Dirava ese Ia Kamonai Henia Guriguridia
Bema oi idia hadibaia guriguri oi laloatao bona oi gwauraia loulou, “helaga taudia” eiava kaivakuku oi guriguri henidia, eiava tomadiho kohudia, hegeregere rosary oi gaukaralaia, Iesu ese ia gwauraia dalanai do oi guriguri be reana oi gari. To, unai oi karaia totona, Dirava do oi diba namonamo—iena ladana, iena ura, bona iena kara. Baibel oi stadilaia namonamo karana amo unai oi karaia diba. (Ioane 17:3) Iehova ena Witness taudia be idia hegaegae bona idia ura unai dala amo oi idia durua. Oibe, idia ese tanobada hegegemadai taunimanima milioni idia durua ‘iena dala do idia tohoa namonamo, vadaeni do idia diba momokani, Lohiabada be namo momokani.’ (Salamo 34:8) Dirava oi diba namonamo neganai, unai ese oi do ia doria emu guriguri lalonai oi hanamoa totona. Bona nega momo oi guriguri henia neganai, do oi tura henia bona ia kahirakahira dekenai do oi lao.
Unai dainai, Dirava idia tomadiho henia momokani taudia be idia hagoadaia ‘nega ibounai do idia guriguri.’ (1 Tesalonika 5:17) Namona be emui guriguri be Baibel ena hereva hegeregerena, bona Iesu Keriso ese ia henia sisiba hegeregerena. Unai dala amo do oi diba momokani oiemu guriguri be Dirava ese do ia abia dae.
[Picture on page 7]
Iehova ita diba namonamo neganai, unai ese ita ia doria iseda kudouna amo ia ita guriguri henia totona