“Emui Kara Ibounai Lalonai Do Umui Helaga”

“To emui kara ibounai lalonai do umui helaga, umui ia boiria Diravana ese ia helaga hegeregerena. Badina be Buka Helaga lalonai Dirava sibona ia gwau, ‘Do umui helaga, badina lau be lau helaga noho.’ ”​—1 PETERO 1:​15, 16.

DAHAKA dainai aposetolo Petero ese ataiai ai torea sisiba ia henia? Badina ia diba Keristani ta ta be Iehova ena helaga hegeregerena ia kara totona, iena lalohadai bona iena kara ia naria be gau badana. Unai dainai, unai hereva vairanai ia gwau: “Do umui laloa namonamo, bona do umui naria namonamo. . . . Dirava do umui kamonai henia. Guna, umui be do diari umui diba lasi neganai, emui tauanina ena ura dikadia ese umui idia biagua. Unai bamona do umui karaia lou lasi.”​—1 Petero 1:​13, 14.

² Iseda ura gunadia idia helaga lasi. Dahaka dainai? Badina be ita momo ese Keristani dalana ena hereva momokani ita do abia dae lasi neganai tanobada taudia edia kara ita badinaia. Petero be unai ia diba, inai ia torea neganai: “Badina be gunaguna umui be Dirava diba lasi taudia hegeregerena umui noho. Emui kara gunadia be inai: Matabodaga, sihari kava, kekero, lebulebu, uaina umui inua momo, bona kaivakuku dikadia umui tomadiho henia.” Momokani, Petero ese iseda nega lalonai idia vara helaga lasi karadia ia gwauraia hedinarai lasi, badina iena nega ai unai gaudia idia itaia lasi.​—⁠1 Petero 4:​3, 4.

³ Oi itaia diba unai ura gaudia be tauanina ia ura gaudia, hemami idia ha-uraia, bona lalona idia veria gaudia, ani? Bema unai gaudia ita koua lasi, iseda lalohadai bona kara be helaga lasi ai idia lao haraga. Unai ese ia hahedinaraia namona be mai iseda darana ibounai ida iseda kara ita biagua be namo. Paulo ese inai bamona ia gwauraia: “Unai dainai, tadikaka e, Dirava ena hebogahisi dainai umui lau noia, emui tauanina do umui henia, boubou gauna mai mauri bona mai helaga, Dirava ese ia moalelaia gauna; emui hesiai gaukara helagana, mai emui darana ida umui karaia gaukarana, be unai.”​—⁠Roma 12:​1, 2, NW.

⁴ Dirava dekenai boubou helagana ita henia totona, namona be iseda hemami ese ita ia biagua lasi, to gau badana be iseda darana ese ita ia biagua. Taunimanima momo herea ese sihari kava karadia idia karaia badina edia hemami ese edia kara ia biagua! Ita gwau lasi unai ena anina be iseda hemami ita hahedinaraia lasi; bema unai be momokani, Iehova ena hesiai gaukara dekenai iseda moale be edena bamona do ita hahedinaraia diba? To, bema ita ura lauma ena huahua ita havaraia bona tauanina karadia ita ura ita havaraia lasi, namona be Keriso ena laloa dalana hegeregerena ita laloa.​—⁠Galatia 5:​22, 23; Filipi 2:5.

Davana Helagana, Mauri Helagana

⁵ Dahaka dainai Petero ia laloa Keristani taudia idia helaga be gau badana? Badina ia diba ta ese davana helagana ia henia, kamonai taudia ia hamauria totona. Ia ese inai ia torea: “Bona namona be umui diba namonamo, guna umui ese emui sene taudia edia anina lasi karadia umui karaia. To Dirava ese inai karadia dekena amo umui ia hamauria. Umui ia hamauria ena davana be do idia dika ore gaudia, hegeregere siliva o golo, a? Lasi momokani. Umui ia hamauria gauna be Keriso ena rarana. Inai rara be davana bada herea gauna. Keriso be mamoe natuna goevagoeva momokani hegeregerena, ia be maka dikana ta lasi, bona toto ta lasi.” (1 Petero 1:​18, 19) Oibe, helaga ena Badina, Iehova Dirava, ese sibona ia havaraia natuna tamona, “Dirava ena Helaga Tauna,” be tanobada dekenai ia siaia, davana ia henia taunimanima be Dirava idia tura henia diba totona.​—Ioane 3:​16; 6:​69; Esodo 28:36; Mataio 20:28.

⁶ To, namona be ita diba mauri helagana badinaia be auka, badina be Satani ena tanobada dikana bogaraginai ita noho. Ia ese inai tanobada dikana amo idia ura idia roho mauri Keristani momokani taudia ia koua totona tarapu momo ia atoa. (Efeso 6:​12; 1 Timoteo 6:​9, 10) Moni gaukara ena hekwarahi, famili edia dagedage karana, sikuli ai idia kirikirilaia, bona lagani tamona taudia edia lalo-ani karadia dainai, ta be ia helaga noho diba totona gau badana be lauma dalanai ia goada. Unai dainai sibona eda stadi karana bona Keristani heboudia ai ita lao loulou be mai anina bada gaudia. Paulo ese Timoteo ia sisiba henia: “Hereva momokani, oi dekenai lau hadibaia gaudia do oi badinaia noho, bona idia edia murinai do oi raka. Keriso Iesu danu ita hakapua tamona dainai, ita be iena abidadama bona lalokau lalonai ita noho. Inai abidadama bona lalokau lalonai do oi gini noho.” (2 Timoteo 1:​13) Unai goada ia henia hereva momokani be Kingdom Hall ai ita kamonai bona sibona eda Baibel stadi karana lalonai ita duahia. Idia ese ita idia durua dina ta ta ai, bona gabu idauidau ai, iseda kara idia helaga totona.

Helaga Karana Famili Lalonai

⁷ Petero be Levitiko 11:44 ena hereva ia gwauraia neganai, Greek herevana ta haʹgi·os ia gaukaralaia, ena anina be “kara dika amo ia gini siri gauna bona unai dainai ia be Dirava dekenai idia gwauhamatalaia, Dirava ena.” (An Expository Dictionary of New Testament Words, W. E. Vine ena) Iseda Keristani famili maurina dekenai unai ena anina be dahaka? Ena anina be iseda famili maurina ena badina be lalokau, badina be “Dirava be lalokau.” (1 Ioane 4:8) Sibona eda ura dadaraia lalokauna be oela bamona, tau bona ena adavana, bona tama sina bona natudia ihuanai ia noho tura heheni mamina ia durua.​—1 Korinto 13:​4-8; Efeso 5:​28, 29, 33; 6:4; Kolose 3:​18, 21.

⁸ Reana ita laloa Keristani famili lalonai unai bamona lalokau hahedinaraia be vaia edia kara. To madi, Keristani famili haida lalonai lalokau hahedinaraia karana idia karaia namonamo lasi. Reana Kingdom Hall dekenai edia toana be lalokau idia hahedinaraia, to ruma dekenai reana edia helaga karana ia maragi ia lao. Unuseniai reana ita laloaboio iseda hahine be iseda taihuna ta eiava iseda tau be iseda tadikaka ta, (bona reana ia be hesiai tauna eiava elda tauna) bona toana be Kingdom Hall dekenai idia ita matauraia. Reana hesiku dainai ita badu, bona hepapahuahu badana ta ia vara. Gabeai, iseda mauri lalonai, ita be dala rua nega tamona ai ita rakalaia. Guna edia headava lalonai, tau bona ena hahine be Keriso ia hahedinarai dalanai idia tura heheni, to hari idia be inai heheni taudia. Idia laloaboio namona be edia ruma lalonai helaga mamina ia noho. Reana idia hereva neganai, tanobada taudia bamona idia hereva. Bena karaharaga hereva dikana, hemataurai lasi herevana be ta ena uduna amo ia halasia!​—Aonega Herevadia 12:18; Kara 15:37-​39 itaia.

⁹ To, Paulo be inai sisiba ia henia: “Hereva mirodia [Greek gado ai, loʹgos sa·prosʹ, “ta ia hadikaia herevana,” unai dainai helaga lasi] do umui gwauraia lasi, hereva namodia sibona. Vadaeni emui hereva idia kamonai taudia ese durua bona namo do idia davaria, bona emui hereva dekena amo manoka taudia do umui hagoadaia.” Emu ruma dekenai emu hereva idia kamonai taudia iboudiai ia herevalaia, unai be emu natudia danu.​—Efeso 4:​29; Iamesi 3:​8-​10.

¹⁰ Unai helaga karana ia sisibalaia herevana be mai anina bada Keristani famili lalonai idia noho memero kekeni dekenai danu. Sikuli ia ore bona ruma dekenai idia giroa neganai, tanobada memero kekeni edia gwau-edeede bona hemataurai lasi herevadia idia tohotohoa be auka lasi! Memero, kekeni e, namona be Iehova ena peroveta tauna idia gwau henia memerodia, hari iseda nega ai memero kekeni momo ese edia kara idia tohotohoa taudia, edia laloa daladia dikadia ese umui ia veria lasi. (2 King Taudia 2:​23, 24) Namona be idia lahedo eiava ma ta idia laloa lasi dainai hereva namodia idia gwauraia lasi taudia edia hereva dalana amo emu hereva oi hamiroa lasi. Ita be Keristani taudia dainai, namona be iseda hereva ia helaga, ia namo, ta ia hagoadaia, ia manada, bona ‘mai gado namo ida ita hereva.’ Namona be iseda hereva dalana be taunimanima edia hereva dalana amo ia idau.​—Kolose 3:​8-​10; 4:6.

Helaga Karana, Iseda Murimuri Famili Taudia Ita Kara Henia Neganai

¹¹ Ita hekwarahi iseda kara ia helaga totona neganai, namo lasi iseda toana be ita hekokoroku bona iseda kara maoromaoro ita laloa momo. Murimuri famili taudia ita kara henia neganai unai be gau badana. Iseda Keristani hebogahisi karadia ese idia do ia durua bena do idia itaia ita be idau to taunimanima namodia. Bona do idia itaia ita be lalokau bona hebogahisi ita hahedinaraia diba, Iesu ena parabole lalonai Samaria tauna namona ena kara hegeregerena.​—Luka 10:30-​37.

¹² Petero be Keristani hahine dekenai revareva ia torea neganai, ia hahedinaraia badabada iseda lalohadai murimuri varavara taudia dekenai be anina bada gauna, ia gwau: “Hahine taudia e, emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, bona Dirava do idia abidadama henia. Unai bamona do idia karaia, badina be emui kara goevagoeva, bona emui mataurai kara do idia itaia dainai.” Keristani hahinena ta (eiava tauna ta) be ena kamonai lasi adavana dekenai hereva momokani ena namo do ia hahedinaraia diba bema iena kara ia goeva, ma ta ena namo ia tahua, bona matauraia karana ia karaia neganai. Unai ena anina be ena tiokratik sediual ia laloa neganai, ena kamonai lasi adavana do ia laloaboio lasi, eiava do ia laloa lasi nega be lasi ia totona.a​—1 Petero 3:​1, 2.

¹³ Nega haida kamonai lasi tauna tura henia dalana amo, elda bona hesiai taudia idia durua diba. Unai dala amo unai tauna do ia itaia Witness taudia be idau herea lasi, idia be ma gau idauidau idia ura karaia taudia namodia, Baibel idia ura henia sibona lasi. Nega ta, elda tauna ese taihu ta ena adavana ena ura gauna ia dibaia, haoda. Unai amo ia tura henia matamaia. Gabeai ena adavana be bapatiso tadikakana ai ia lao. Sivarai ma ta be inai, taihu ta ena adavana be canary manudia ia ura dikadika. Elda taudia idia hekwarahi unai tauna durua totona. Idia ta ese canary manudia ia stadilaia, bena unai tauna ia davaria neganai ena ura gauna kikilaia amo herevahereva do ia hamatamaia diba! Ita gwau lasi helaga ena anina be ita be lalo-auka eiava gau tamona sibona do ita laloa.​—1 Korinto 9:​20-​23.

Kongregesen Lalonai Edena Bamona Ita Helaga Diba?

¹⁴ Satani Diabolo be ladana hadikaia tauna, badina be Greek gado ai Diabolo, di·aʹbo·los, ena anina be “samania tauna” eiava “ladana hadikaia tauna.” Ladana hadikaia karana be iena kara badana ta, bona kongregesen lalonai ia gaukaralaia toho. Ia ura henia dalana badana be udu mauri. Ita be Satani ita durua unai helaga lasi karana karaia totona, a? Edena bamona unai ia vara diba? Ia vara diba bema udu mauri ita hamatamaia, ita herevalaia loulou, eiava ita kamonai henia. Aonega herevana ta be inai: “Laloa kerere tauna ese heai ia havaraia noho, bona hadikaia hereva kava gwauraia tauna ese, turana korikori taudia edia turana dala ia hamakohia noho.” (Aonega Herevadia 16:28) Udu mauri bona ladana hadikaia herevadia hanamoa dalana be dahaka? Hanaihanai hagoadaia herevadia, edia badina be lalokau herevadia, sibona ita gwauraia. Bema iseda tadikaka edia kara namo ita laloa bona edia kerere maragidia ita tahua lasi, iseda hereva be lauma dalanai bona taunimanima dekenai do ia namo. Laloaboio lasi, maumau karana karaia be auka lasi. Bona oi dekenai ia udu mauri tauna be reana oiemu manoka gaudia do ia gwauraia ma haida dekenai!​—1 Timoteo 5:​13; Tito 2:3.

¹⁵ Kongregesen ia helaga noho totona, ita ibounai be Keriso ena laloa dalana hegeregerena ita laloa be namo, bona ita diba iena kara badana be lalokau. Unai dainai, Paulo be Kolose taudia ia sisiba henia, namona be Keriso bamona idia hebogahisi: “Umui be Dirava ena taudia, ia ese umui ia lalokau henia, bona umui ia abia hidi, iena. Unai dainai inai bamona karadia, dabua bamona do umui atoa: Bogahisihisi, durua, manau, manada bona haheauka. . . . Ia kara dika henia dainai, namona be unai dika do ia gwauatao. . . . To unai kara ibounai ia hereaia kara be lalokau. Do umui lalokau henia, vadaeni do umui noho hebou namo herea, mai laloa tamona danu.” Bena ma ia gwau: “Keriso ena maino nega ibounai do umui abia noho emui kudouna lalonai.” Bema unai bamona gwauatao karana ita karaia, kongregesen ena lalo-tamona bona ena helaga karana do ita naria diba.​—Kolose 3:​12-​15.

Dekena Taudia be Iseda Helaga Karana Idia Itaia, A?

¹⁶ Iseda dekena taudia be edena bamona? Ita idia itaia neganai, dahaka idia laloa? Hereva momokani ena moale ita hahedinaraia, eiava iseda toana be maduna metauna ta ita huaia? Bema ita helaga Iehova ia helaga hegeregerena, vadaeni iseda hereva bona iseda kara lalonai unai moale do ia hedinarai be namo. Namona be iboudiai idia itaia goevagoeva iseda tomadiho helagana be moale ia havaraia tomadihona ta. Dahaka dainai? Badina iseda Dirava Iehova be moale Diravana, ia ura ia idia tomadiho henia taudia idia moale. Unai dainai, salamo torea tauna be Iehova ena idaunegai taudia ia herevalaia, ia gwau: “Edia Dirava be Lohiabada, ena bese taudia be idia moale noho.” Ita be unai moale ita hahedinaraia, a? Iseda natudia be Kingdom Hall eiava hebouhebou ai Iehova ena taunimanima ida idia noho moalena idia hahedinaraia danu, a?​—⁠Salamo 89:15, 16; 144:15b.

¹⁷ Iseda helaga karana hahedinaraia namonamo dalana be mai hebogahisi ida iseda dekena taudia danu ita gaukara. Nega haida dekena taudia idia gaukara hebou be namo, edia gabu idia hagoevaia totona, eiava tano haida lalonai dala maragidia bona badadia idia hanamoa totona. Unai hegeregerena, iseda uma gabu, ruma ena murimuri, o iseda gabu ma haida ita naria karana amo, iseda helaga karana ita hahedinaraia diba danu. Bema momoru ita negea lasi, eiava iseda gabu ena toana ia miro o namo lasi, bona reana motuka dikana ta ia noho taunimanima idia itaia gabuna ai, ita gwau diba iseda dekena taudia ita matauraia, a?​—Apokalupo 11:18.

Helaga Karana Moni Gaukara Bona Sikuli Gabudia Ai

¹⁸ Aposetolo Paulo ese helaga lasi hanuana Korinto dekenai idia noho Keristani taudia ia tore henia: “Revareva ta umui dekenai lau torea guna, lau gwau, ‘Heudahanai taudia danu umui turana karaia lasi.’ Lau hereva lasi, Dirava diba lasi taudia, idia heudahanai, idia mataganigani, idia henaoa, bona kaivakuku idia tomadiho henia taudia do umui rakatania. Lau be inai bamona lau hereva lasi. Badina be bema inai bamona taudia umui rakatania, umui be inai tanobada do umui rakatania kava, durua ta do umui henia lasi.” (1 Korinto 5:​9, 10) Unai be dina ta ta iboudiai miro karadia o kara namo idia badinaia lasi taudia ida idia gaukara Keristani taudia edia hekwakwanai ta ia herevalaia. Unai ese edia Dirava badinaia karana ia tohoa, bona sihari kava vareai totona, bisinesi kara gagevadia, bona koikoi karadia karaia totona taunimanima idia hagoadaia gabudia o idia gwauraia dika lasi gabudia ai unai be tohoa gauna badana. Unai bamona gabudia ai, ia namo lasi bema iseda toana ia “idau lasi” totona iseda kara maorodia ita rakatania. To, namona be aonega taudia, lauma gaudia idia laloa bona gau namona idia tahua taudia, do idia itaia, iseda hebogahisi Keristani kara idauna dainai, ita be tanobada taudia bamona lasi.​—Mataio 5:3; 1 Petero 3:​16, 17.

¹⁹ Unai hegeregerena, sikuli dekenai idia lao memero kekeni ese hetoho momo do idia davaria danu. Tama sina e, emui natuna ena sikuli umui vadivadi henia, a? Umui diba ia be edena bamona gabuna ta, a? Edia tisa taudia ida umui herevahereva diba, a? Dahaka dainai unai be mai anina henanadaidia? Badina siti momo lalodiai, sikuli gabudia ai dagedage, drag ania kava, bona sihari kava karadia idia vara badabada vadaeni. Bema umui tama sina ese umui durudia lasi, edena bamona emui natudia be edia abidadama bona kara helagana idia badinaia diba? Paulo be tama sina taudia ia sisiba henia maoro: “Tamana bona sinana, emui natudia do umui habadua kava lasi, do idia hesiku garina.” (Kolose 3:​21) Natudia habadua kava dalana ta be dina ta ta ai idia davaria hekwakwanai bona hetoho lalo-pararalaia lasi karana amo. Lauma gaudia idia tahua Keristani taudia edia ruma dekenai sikuli ena hedibagani hanaia dalana idia hegaegaelaia matamaia diba.​—Deuteronomi 6:​6-9; Aonega Herevadia 22:6.

²⁰ Hereva dokonai, badina be dahaka ita ta ta ita helaga be gau badana? Badina be Satani ena tanobada bona ena laloa dalana amo ita ia naria. Harihari ita ia hanamoa bona nega vairai ita do ia hanamoa danu. Ita dekenai ia hamomokania unai bamona maurina be kara maoromaoro tanobada matamatana lalonai do ita naria mauri korikorina. Ita ia durua bena ita be laloa namonamo taudia, taunimanima ese idia ura hereva henia taudia, bona taunimanima ida ita herevahereva diba Keristani taudia ai ita lao​—⁠ita be tomadiho goadalaia kavakava taudia lasi. Hereva kwadogina ai ita gwau diba, ita ia durua Keriso bamona do ita lao totona.​—1 Timoteo 6:​19.

[Footnotes]

Inai Oi Laloatao, A?

◻ Dahaka dainai Petero be Keristani taudia dekenai do idia helaga be namo sisibana ia henia?

◻ Dahaka dainai helaga maurina badinaia be auka?

◻ Iseda famili lalonai dahaka ita karaia diba iseda helaga karana habadaia totona?

◻ Kongregesen ia helaga noho totona, dahaka helaga lasi karana ita dadaraia be namo?

◻ Moni gaukara gabuna ai bona sikuli gabuna ai, edena bamona ita helaga noho diba?

[Study Questions]

1. Dahaka dainai Petero be Keristani taudia ia hagoadaia idia helaga be namo?

2. Dahaka dainai hereva momokani ita do dibaia lasi neganai iseda ura be helaga lasi?

3, 4. (a) Iseda ura dikadia ita koua totona, dahaka ita gaukaralaia? (b) Keristani taudia be edia hemami idia hahedinaraia lasi, a? Mani oi gwauraia hedinarai.

5. Dahaka dainai Petero ia diba helaga karana be gau badana?

6. (a) Dahaka dainai kara helaga ita goadalaia be auka? (b) Iseda kara ia helaga noho totona, dahaka ese ita ia durua diba?

7. Iseda ruma bese maurina lalonai, helaga karana ena anina be dahaka?

8, 9. (a) Nega haida, Keristani famili lalonai dahaka ia vara? (b) Baibel be edena sisiba namona ia henia?

10. Memero kekeni ese helaga karana ena sisiba be edena bamona do idia badinaia?

11. Dahaka dainai ita helaga ena anina be iseda kara maoromaoro ita laloa bada karana lasi?

12. Keristani taudia be edia adavadia dekenai hereva momokani ena namo be edena bamona idia hahedinaraia diba?

13. Nega haida edena dala amo elda bona hesiai taudia be kamonai lasi tatau dekenai hereva momokani laloa bada dalana idia kehoa diba?

14. (a) Satani ese kongregesen ia hadikaia dalana ta be dahaka? (b) Ita be Satani ena hedibagani edena bamona ita dadaraia diba?

15. Edena kara, Keriso ena bamona, ese kongregesen taudia iboudiai do idia durua idia helaga noho totona?

16. Dahaka dainai namona be iseda tomadiho helagana be moale ia havaraia tomadihona?

17. Helaga karana be laloa namonamo dalana ai ita karaia totona, dahaka ita karaia diba?

18. (a) Hari iseda negai, Keristani taudia ese idia hekwarahilaia gauna ta be dahaka? (b) Inai tanobada amo ita idau dalana be dahaka?

19. (a) Memero kekeni e, emu sikuli ai dahaka hetoho gaudia umui davaria? (b) Tama sina taudia be dahaka idia karaia diba edia natudia bona edia kara helagana idia durua totona?

20. Dahaka dainai ita ta ta dekenai helaga karana be mai anina bada?

[Picture on page 16]

Ita be Iehova ena Witness taudia dainai, mai moale ida Dirava ita hesiai henia bona ma gaukara idauidau ita karaia