Duahia Taudia Edia Henanadai

Ia namo bema Keristani tauna ta be kwarana gorere hanamoa diba doketa ena heduru ia tahua, a?

Tano haida amo ai itaia ripoti idia hahedinaraia “nega ena dokona” ai hemami bona kwarana goreredia idia momo idia lao. (2 Timoteo 3:⁠1) Keristani taudia be unai bamona gorere idia haheaukalaia tadikakadia idia hebogahisi henia bada, to idia diba ta sibona ese do ia abia hidi ena gorere hanamoa dalana do ia tahua eiava bona edena bamona heduru do ia tahua.a “Badina be ibounai ta ta sibona ena metau, ena metau do idia huaia.” (Galatia 6:⁠5) Haida be inai gorere dikadia dainai idia hekwarahi bada: edia hemami, lalohadai, eiava kara idia biagua diba lasi goreredia, ia kavakava ia lao gorerena, lalo-metau dikadika gorerena, imana huria loulou o ma kara ta karaia loulou gorerena, sibona ia utua gorerena, bona lalohisihisi idia havaraia goreredia ma haida idia haheaukalaia taudia be doketa maorona ena heduru dainai mauri namona idia moalelaia diba.

Gabu haida dekenai taunimanima momo be unai bamona heduru idia tahua. Nega momo, idia be kwarana gorerena dikana idia abia lasi, to edia mauri lalonai sibodia idia hanaia diba lasi hekwakwanai ta ia noho. To, mauri ena hekwakwanai aukadia hanaia totona, Baibel ena sisiba be herea. (Salamo 119:​28, 143) Baibel amo, Iehova ese iseda lalona bona iseda hemami idia hagoadaia gaudia​—⁠aonega, laloa namonamo goadana, bona diba momokanina​—⁠ia henia. (Aonega Herevadia 2:​1-​11; Heberu 13:⁠6) Dirava ena abidadama hesiai taudia be nega haida edia lalona ia hisihisi bada herea dainai, idia hereva kava. (Iobu 6:​2, 3) Iamesi 5:​13-​16 ese unai bamona taudia ia hagoadaia elda taudia edia heduru bona sisiba idia tahua. Reana Keristani ta be lauma dalanai ia gorere, eiava ia haidaua diba lasi gauna, ia doria auka gauna, eiava ena mamina be maoro lasi karana ia haheaukalaia dainai, ia lalohisihisi. (Hadibaia Tauna 7:7; Isaia 32:2; 2 Korinto 12:​7-​10) Unai tauna ta ese heduru do ia abia diba elda taudia amo, idia ese “dehoro do idia atoa”​—⁠ena anina be mai edia aonega ida Baibel ena sisiba namona do idia henia​—⁠bona ia ida “do idia guriguri.” Dahaka do ia vara? “Inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa [do ia lalohisihisi noho lasi eiava Dirava ese ia rakatania mamina do ia ore], bona iena kara dika do ia gwauatao.”

Ena be lauma dalanai mamoe idia naria taudia ese heduru namona idia henia namonamo, to bema unai tauna ia lalohisihisi bada noho o ia lalo-daradara noho, dahaka ia karaia diba? Taunimanima haida idia lao doketa dekenai, tauanina ia sekea namonamo totona. (Aonega Herevadia 14:30; 16:24; 1 Korinto 12:26 itaia.) Reana tauanina ena hekwakwanai ese hemami dikana o lalo-metau ia havaraia. Nega haida unai bamona hekwakwanai idia hanamoa murinai, hemami gorerena ia abia tauna ena hemami ia namo.b To bema doketa ese tauanina gorerena ta ia davaria lasi, bona gorere tauna eiava ena famili idia noia dainai, reana ia ese kwarana gorerena ia hanamoa doketa ta ena ladana ia henia. Bena edena bamona? Ai gwauraia guna hegeregerena, unai gauna dekenai ta ta be edia lalona edia lalona idia hadaia diba. Ma haida ese idia gwauraia kerere eiava idia kota henia be namo lasi.​—⁠Roma 14:⁠4.

Ena be unai be momokani, to aonega ita gaukaralaia bona Baibel ena hakaua herevadia ita laloaboio lasi be namo. (Aonega Herevadia 3:​21; Hadibaia Tauna 12:13) Ta ena tauanina ia gorere neganai, hanamoa daladia idauidau idia noho; doketa o hospital dekena amo, eiava heduru idaudia, hegeregere naturopathy, acupuncture, bona homeopathy daladia amo heduru ia abia diba. Kwarana gorerena hanamoa taudia idauidau idia noho. Idia ta idia gwauraia analytic psychotherapist, bona idia be gorere tauna ena sivarai idia kamonai bona iena kara idauna ta eiava ena lalo-metau idia havaraia gaudia idia tahua. Behavioral psychotherapist taudia be gorere tauna dekenai kara karaia daladia matamatadia idia hadibaia. Kwarana gorere durua taudia haida idia laloa unai bamona gorere hanamoa totona, muramura idia gaukaralaia be namo.c Ma haida idia gwau namona be aniani taravatu haida idia badinaia bona vitamins idia ania.

Gorere taudia bona edia famili taudia idia naria namonamo unai bamona gaudia idia lalohadailaia neganai. (Aonega Herevadia 14:15) Professor Paul McHugh, Department of Psychiatry and Behavioral Sciences ena dairekta tauna, Johns Hopkins University School of Medicine dekenai, ia gwau kwarana gorere hanamoa taudia be “goevadae lasi medikal daladia idia gaukaralaia. Ena be unai bamona gorere​—⁠lalona bona kara goreredia​—⁠hanamodia daladia be auka, to nega momo, gorere hanamoa toho daladia edia namo ia hamomokania gauna oi davaria haraga lasi.” Unai dainai, koikoi karadia, kavakava karadia, bona taunimanima idia laloa idia namo to idia be anina lasi hanamoa daladia idia noho, bona reana dika do idia havaraia.

Namona be inai ai herevalaia danu, ena be psychiatrist bona psychologist taudia be iunivesiti ai kwalimu pepana ta idia abia, to ma haida be sikuli ta dekenai idia lao lasi, bona diba taudia henunai idia gaukara lasi, to sisiba eiava heduru idia henia toho. Taunimanima haida be unai bamona idia hegeregere lasi taudia idia itaia, bona moni bada idia halusia.

Ena be ta ese treinini ia abia bona kwarana gorere hanamoa kosina ia haorea, to namona be gau haida oi laloa guna. Medikal doketa eiava ivaia doketa ta ita tahua neganai, Baibel amo ita badinaia hakaua herevadia ia matauraia tauna do ita tahua. Unai hegeregerena, iseda tomadiho bona kara idia biagua taravatudia ia matauraia lasi kwarana gorere hanamoa tauna ita vadivadi henia be namo lasi. Ena be darana eiava hemami gorere dainai Keristani taudia momo be mai edia hekwakwanai, to idia hekwarahi bada “Keriso ena kara” idia karaia noho totona. (Roma 15:⁠5) Unai Keristani taudia be edia kara o laloa dalana reana idia haidaua diba taudia iboudiai edia lalohadai do idia tahua namonamo guna. Unai durua henia taudia haida idia laloa Baibel ena taravatu be anina lasi bona iseda laloa dalana idia hadikaia diba. Reana Baibel ese ia taravatua karadia, hegeregere tatau be tatau ida mahuta hebou karana eiava heudahanai karana be idia gwauraia dika lasi, to do idia gwau ita karaia be namo.

Aposetolo Paulo ia gwau unai bamona lalohadai idia abia taudia “edia diba be aonega koikoi sibona.” (1 Timoteo 6:​20) Edia lalohadai be Keriso ena sivarai momokanina hegeregerena lasi bona idia be inai tanobada ena ‘aonega hereva kava dekena amo, ita idia koia’ taudia haida. (Kolose 2:⁠8) Baibel ena hereva amo edia kara ita itaia goevagoeva: “Taunimanima edia aonega, edia laloa kehoa, bona edia laloa ese, Lohiabada ena ura do idia koua diba lasi, lasi momokani.” (Aonega Herevadia 21:30) Idia gwau ‘dika ia namo, bona namo ia dika’ kwarana gorere hanamoa taudia, be “kara dika” taudia. Idia ese lalo-manoka taudia do idia hanamoa lasi, to edia “kara namona do idia hadikaia.”​—⁠Isaia 5:​20; 1 Korinto 15:⁠33.

Unai dainai bema Keristani ta ia laloa namona be kwarana gorere hanamoa tauna ia itaia, namona be edeseniai ia sikuli, iena kara, bona iena ladana ia namo o ia dika, bona do ia abia medikal heduru ena namo eiava ia havaraia dika do ia laloa namonamo guna. Bema ia lalo-metau bada herea dainai ia sibona ia karaia diba lasi, reana ia lo vadaeni turana eiava varavara ta ese ia durua diba. Ia daradara noho Keristani tauna be kongregesen elda taudia danu ia herevahereva diba​—⁠to hereva dokona be iena (eiava ena tamana o sinana, eiava ia bona ena adavana edia).d

Hari saiens be gau momo ia karaia diba hisihisi koua totona. To, gorere momo​—⁠tauanina dalanai bona laloa dalanai​—⁠idia hanamoa diba lasi bona hari inai negai do ita haheaukalaia sibona. (Iamesi 5:​11) To unai nega ita do naria noho lalonai, “hesiai tauna mai ena kamonai, bona mai ena kara maoromaoro,” elda taudia, bona kongregesen taudia iboudiai ese gorere taudia idia durua mai edia hebogahisi ida. Bona Iehova ese idia do ia hagoadaia idia haheauka totona, ela bona gorere be lasi negana ia mai.​—⁠Mataio 24:45; Salamo 41:​1-3; Isaia 33:⁠24.

[Footnotes]