Tamana Bona Elda Tauna—Maduna Rua Hagugurua

“Bema tau ta ese iena ruma korikori taudia ia biagua diba lasi neganai, Dirava ena ekalesia edena bamona do ia gunalaia diba?”—1 TIMOTEO 3:5.

IDAUNEGAI Keristani kongregesen naria taudia be headava lasi taudia, eiava headava tatau mai edia natudia lasi, eiava headava tatau mai edia natudia. Unai Keristani taudia haida be aposetolo Paulo ena sisiba Korinto taudia dekenai ia siaia revareva ginigunana, karoa 7 lalonai, idia badinaia diba, bona idia headava lasi. Iesu be guna ia gwau: “Eunuko taudia haida be guba basileia dainai sibodia eunuko taudia ai idia halaoa.” (Mataio 19:​12, NW) Unai bamona headava lasi taudia, hegeregere Paulo bona reana ia idia bamoa loaloa taudia, be mai edia ura kwalimu ida edia tadikaka idia durudia.

² Baibel ia gwau lasi bema Banaba, Mareko, Sila, Luka, Timoteo, bona Tito be headava lasi taudia, eiava. Bema idia be headava taudia, edia famili maduna idia huaia hegeregere dainai, idia loaloa diba, gaukara idauidau karaia totona. (Kara 13:2; 15:​39-41; 2 Korinto 8:​16, 17; 2 Timoteo 4:​9-11; Tito 1:⁠5) Reana Petero bona “aposetolo” taudia ma haida idia karaia hegeregerena, idia be gabu ta gabu ta dekenai idia lao neganai, edia adavadia be idia danu idia lao. (1 Korinto 9:​5) Akwila bona ena adavana Prisikila be haheitalai namona, unai headava taudia be mai edia ura ida edia noho gabuna idia haidaua. Paulo ida idia be Korinto amo idia lao Efeso, unai murinai Roma dekenai idia lao, bena Efeso dekenai idia giroa lao. Baibel ia hahedinaraia lasi bema idia be mai edia natudia, eiava. Edia tadikaka totona idia hesiai mai goada ida dainai, “Iuda lasi ekalesia orea taudia ibounai danu” ese idia hanamodia. (Roma 16:​3-5; Kara 18:​2, 18; 2 Timoteo 4:19) Hari iseda nega ai, reana headava taudia momo be Akwila bona Prisikila bamona, kongregesen ma haida idia durua diba, reana tadikaka be momo lasi gabuna ta dekenai idia lao diba.

Tamana Bona Elda

³ Aposetolo taudia edia nega ai, toana be Keristani elda taudia momo be headava taudia mai edia natudia. Paulo be “ekalesia ena gunalaia tauna ena dagi” idia tahua taudia dekenai dagi ena hahegani ia hahedinaraia neganai, ia gwau unai bamona Keristani tauna be “iena ruma taudia, adavana bona iena natuna do ia biagua namonamo. Iena natuna ese ia do idia kamonai henia” be namo.​—⁠1 Timoteo 3:1, 4.

⁴ Guna ita itaia hegeregerena, naria tauna be mai ena natudia, eiava ia be headava tauna be hahegani ta lasi. To Keristani headava tauna, bema ia be hegeregere elda eiava hesiai tauna ena gaukara karaia totona, ena adavana dekenai mai ena lalokau ida kwara dagina ia gaukaralaia maoro bona ena natudia ese ena hakaua dalana do idia badinaia guna. (1 Korinto 11:⁠3; 1 Timoteo 3:​12, 13) Bema ena ruma bese naria karana lalonai ia manoka momokani, do ia hegeregere lasi kongregesen lalonai maduna huaia totona. Dahaka dainai? Paulo ia gwau: “Bema tau ta ese iena ruma korikori taudia ia biagua diba lasi neganai, Dirava ena ekalesia edena bamona do ia gunalaia diba?” (1 Timoteo 3:⁠5) Bema ena bese korikori taudia idia ura lasi ena gunalaia dalana idia badinaia, taunimanima ma haida ese edena bamona do idia kara?

‘Iena Natuna Idia Abidadama’

⁵ Paulo be Tito ia hadibaia Kerete kongregesen idauidau lalonai naria taudia ia abia hidi neganai, ia gwau inai bamona taudia ia abia hidi be namo: “Kerere ta lasi tauna, bona ia be adavana tamona tauna. Iena natuna be Iesu do idia abidadama henia, idia be lebulebu lasi, bona edia tamana bona sinana do idia kamonai henia. Badina be ekalesia orea gunalaia tauna ese Dirava ena gaukara ia naria dainai, ia be kerere ta lasi tauna.” Inai hahegani, “iena natuna be Iesu do idia abidadama henia,” ena anina be dahaka?—Tito 1:6, 7.

⁶ Inai hereva “Iesu do idia abidadama henia” be Iehova dekenai edia mauri idia gwauhamatalaia bona idia bapatiso vadaeni memero kekeni, eiava unai gaudia idia tahua noho memero kekeni ia gwauraia. Kongregesen ena memba taudia idia laloa elda tauna ena natudia edia kara do ia namo bona idia gwau-edeede lasi. Namona be elda tauna ia hahedinaraia ia hekwarahi ena natudia edia abidadama ia hagoadaia totona. King Solomona be inai ia torea: “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.” (Aonega Herevadia 22:⁠6) Bema mero ta be unai hadibaia ia abia to Iehova hesiai henia gaukarana ia dadaraia eiava kara dika badana ta ia karaia, unai neganai edena bamona?

⁷ Ita diba ataiai ai torea sirina ese taravatu aukana ta ia atoa lasi. Unai hereva ese ta ena ura kwalimu ia koua lasi. (Deuteronomi 30:​15, 16, 19) Bema mero ta eiava kekeni ta ia bada neganai, ia sibona do ia abia hidi diba, ena mauri do ia gwauhamatalaia bona do ia bapatiso, eiava. Bema elda tauna ese lauma dalanai ia durua, hakaua, bona matahakani ia henia, to ena natuna ena abia hidi be Iehova do ia hesiai henia lasi, ena tamana ena naria gaukara do idia kokia kava lasi. To, bema elda tauna ena natudia idia do bada lasi bona ruma dekenai idia noho, bena idia ta ta be ia bada neganai lauma dalanai ia gorere bona hekwakwanai ia davaria, reana hari ia be ‘iena natuna ia biagua namonamo’ lasi tauna. (1 Timoteo 3:⁠4) Hereva badana be inai: namona be iboudiai idia itaia diba unai elda tauna ia hekwarahi bada ena natudia be ‘abidadama, lebulebu lasi, bona tama sina kamonai henia natudia’ ai idia lao totona.a

Adavana be “Abidadama Lasi Hahine”

⁸ Keristani tatau haida edia adavadia be abidadama lasi hahinedia; Paulo be unai bamona taudia ia gwauraia, ia gwau: “Sedira emui Keristani varavara tauna ta be mai ena adavana, abidadama lasi hahine. Bema unai hahine ia ura iena tau danu ia noho neganai, iena tau ese do ia rakatania lasi. . . . Badina be . . . Keristani tauna ese iena adavana, abidadama lasi hahine ia hahelagaia noho. Bema lasi neganai, umui emui natudia be helaga lasi. To momokani, harihari be idia helaga noho. . . . Bona oi Keristani tauna, sedira bema ia danu oi noho, oi ese oiemu hahine do oi durua diba, vadaeni ia ese Keristani hahine do ia halaoa, ani?” (1 Korinto 7:​12-14, 16) Inai hereva “abidadama lasi” be tomadiho ta ia badinaia vaitani lasi hahinena ia herevalaia lasi, to Iehova dekenai ena mauri ia gwauhamatalaia lasi hahinena ia gwauraia. Reana unai negai ia be Iuda hahinena, eiava dirava koikoina ta ia abidadama henia. Hari iseda negai, reana elda tauna ta ena adavana be tomadiho idauna ta ia badinaia, ia daradara bema Dirava ia noho, eiava ia laloa Dirava ta be lasi. Bema ia ura ena tau danu ia noho, herevana ena abidadama be idau, namona be tau ese ia rakatania lasi. Ia be ena ‘adavana danu ia noho hebou ena dala do ia laloa namonamo noho. Hahine ena tauanina be goada herea lasi, unai dainai do ia naria namonamo, bona matauraia,’ badina ia ura ia hamauria.​—⁠1 Petero 3:⁠7; Kolose 3:19.

⁹ Bema elda tauna be mai ena natudia, ia be ena adavana bona natudia edia kwarana dainai, ‘Lohiabada ena hadibaia hereva idia dekenai do ia hadibaia.’ (Efeso 6:⁠4) Tano momo lalodia, edia taravatu idia gwau tau bona hahine danu be mai edia maoro edia natudia be edia tomadiho dalana ai idia hadibaia totona. Unai neganai tau ena adavana be unai maoro do ia gaukaralaia ena tomadiho ena hahediba herevadia bona karadia ena natudia dekenai do ia hadibaia, reana ena dubu dekenai danu do ia abidia lao.b To momokani, edia natudia be edia lalona ena hemami, Baibel amo idia hadibaia vadaeni gauna, idia badinaia be namo, tomadiho karadia koikoidia do idia vareai lasi totona. Tamana be famili ena kwarana dainai, ia be mai ena maoro ena natudia ida ia stadi bona bema mai dalana, Kingdom Hall dekenai hebou ai do ia abidia mai. Idia bada neganai, idia sibodia do idia abia hidi diba edena dala idia ura idia badinaia. (Iosua 24:15) Bema kongregesen ena elda bona memba taudia idia itaia tano ena taravatu hegeregerena ia karaia diba gaudia iboudiai ia karaia ena natudia dekenai hereva momokani hadibaia totona, ia be do hegeregere elda gaukara karaia totona.

‘Ruma Bese Taudia Ia Biagua Namonamo’

¹⁰ Ena be elda tauna be tamana ta bona ena adavana be Keristani hahinena, to ena adavana, natudia, bona kongregesen gaukara totona, ena nega bona goada haria namonamo be mai ena hekwarahi. Baibel ia hahedinaraia goevagoeva, Keristani tamana ena maduna ginigunana be ena adavana bona natudia ia naria. Paulo ia gwau: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” (1 Timoteo 5:⁠8) Unai revareva ta lalonai, Paulo ia gwau, idia hahedinaraia vadaeni idia be adavana bona tamana namona taudia, edia ladadia sibodia do idia siaia, kongregesen naria gaukarana do idia abia totona.​—⁠1 Timoteo 3:​1-5.

¹¹ Elda tauna be tauanina dalanai sibona lasi, to lauma dalanai ena ruma bese taudia do ia “naria” bona edia hemami do ia laloa. Aonega tauna King Solomona ia gwau: “Oiemu tano hanamoa gaukara do oi haorea, bona oiemu uma gabuna do oi abia hegaegae. Unai murinai, oiemu noho rumana do oi haginia [“ruma taudia oi hagoadaia,” NW].” (Aonega Herevadia 24:27) Naria tauna ese ena adavana bona ena natudia dekenai edia mauri gaudia do ia henia, edia hemami do ia hanamoa, bona moale karadia do idia karaia hebou, to danu gau badana be lauma dalanai idia do ia hagoadaia. Anina be ena nega do ia haorea​—⁠unai nega do ia gaukaralaia diba lasi kongregesen gaukara karaia totona. To ia haorea negana be mai ena davana namona, anina be ena famili do idia moale bona lauma dalanai do idia goada. Gabeai, bema elda tauna ena ruma bese taudia be lauma dalanai idia goada, reana nega bada lasi do ia haorea famili ena hekwakwanai hanamoa totona. Unai dainai ruma bese do ia lalo-hekwarahilaia bada lasi bona kongregesen gaukara karaia totona do ia hegeregere. Ia be adavana namona bona tamana namona dainai, iena haheitalai namona ese lauma dalanai kongregesen do ia durua.​—⁠1 Petero 5:​1-3.

¹² Ruma bese ia gunalaia namonamo karana ta be nega ia atoa famili stadi karaia totona. Elda taudia ese unai kara idia haheitalaia be mai anina bada, badina be ruma bese ia goada neganai kongregesen be do ia goada. Namo lasi elda tauna ena nega be hanaihanai hesiai gaukara amo ia honu dainai, nega be lasi ena adavana bona natudia ida ia stadi totona. Bema guna unai be momokani, namona be ena sediual ia itaia lou. Reana ma gau haida karaia totona ia henia nega do ia hamaragia, ena sediual do ia haidaua, eiava nega haida gaukara namodia haida do ia dadaraia.

Gunalaia Gaukarana Laloa Maoromaoro

¹³ Elda taudia dekenai ruma bese ena maduna bona kongregesen gaukara ena maduna laloa maoromaoro sisibana be matamata lasi. Lagani momo lalodia “hesiai tauna mai ena kamonai, bona mai ena kara maoromaoro” ese unai bamona sisiba idia henia elda taudia dekenai. (Mataio 24:45) Lagani 37 gunanai, The Watchtower, September 15, 1959 gauna, rau 553 bona 554 ai, ia gwau: “Momokani, iseda nega idia haorea gaudia iboudiai ita laloa maoromaoro be namo, ani? Unai gaudia oi hahegeregerea neganai, namona be nega bada oi atoa emu ruma bese totona. Iehova Dirava ia ura lasi tau ta be ena nega ibounai ia haorea kongregesen gaukara karaia totona, ena tadikaka durua totona, bona dekena taudia hamauria totona, to ena ruma bese hamauria dalana do ia naria lasi. Tau ta ena adavana bona ena natudia be ena maduna ginigunana.”

¹⁴ The Watchtower, November 1, 1986 gauna, rau 22, ese inai sisiba ia henia: “Ruma bese be haroro gaukara ai idia gaukara hebou neganai, unai ese idia do ia hatamonaia, to emu natudia ta ta edia ura be idauidau bona ena anina be emu nega bona emu lalona ena goada do oi henidia. Unai dainai, kongregesen gaukaradia ai . . . hora hida do oi atoa diba, to lauma dalanai, hemami dalanai, bona tauanina dalanai emu ‘ruma taudia’ do oi naria diba danu, oi laloa namonamo be gau badana. Namona be [Keristani ta ese] ‘Dirava do [ia] hamoalea karana ta be, [ena] ruma taudia do [ia] laloa bona durua’ guna. (1 Timoteo 5:⁠4, 8)”

¹⁵ Baibel ena aonega herevana ta be inai: “Aonega bona laloa kehoa tauna ese ruma ia haginia noho, bona iena famili idia tubu goada noho.” (Aonega Herevadia 24:⁠3) Oibe, elda tauna be ena tiokratik gaukara bona ena ruma taudia hagoadaia ena maduna hagugurua totona, gau badana be aonega bona lalo-parara ia abia. Baibel ia gwau ena gunalaia gaukara be tamona sibona lasi. Ruma bese lalonai bona kongregesen lalonai ia be mai ena maduna. Lalo-parara ia abia be namo, idia ia laloa maoromaoro totona. (Filipi 1:​9, 10) Aonega ia abia be namo, badina unai amo gau badadia do ia atoa guna. (Aonega Herevadia 2:​10, 11) Ena be kongregesen ai ena gaukara naria maduna ia laloa bada, to gau badana be ia diba ia be hahine ta ena adavana bona ia be tamana ta dainai, Dirava amo ia abia maduna ginigunana be ena ruma bese taudia naria bona hamauria daladia do ia laloa guna.

Tama Namodia Bona Idia be Elda Taudia Namodia Danu

¹⁶ Bema elda tauna ta be mai ena natudia bona edia kara be namo, unai be durua bada gauna. Bema ruma bese taudia naria dalana ia diba namonamo vadaeni, kongregesen lalonai famili ma haida do ia durua diba. Ia be edia hekwakwanai do ia lalo-pararalaia namonamo diba bona ia davaria vadaeni gaudia amo sisiba namona ia henia diba. Ita moale tanobada ibounai lalonai, elda taudia tausen momo be gaukara namona idia karaia, tau ena maduna, tamana ena maduna, bona kongregesen naria ena maduna idia huaia lalonai.

¹⁷ Mai ena ruma bese tauna be elda gaukara ia karaia totona, namona be ia be lo Keristani tauna, ena adavana bona ena natudia ia naria, bona ena nega ia haria namonamo diba dainai, nega bona goada haida ia henia diba kongregesen taudia dekenai. Namona be ia laloaboio lasi ena mamoe naria gaukarana be ena ruma dekenai ia hamatamaia. Kongregesen taudia idia diba elda taudia haida edia maduna be edia adavana bona natudia naria bona kongregesen gaukara karaia danu, unai dainai kongregesen taudia do idia hekwarahi toho edia nega do idia halusia kava lasi totona. Hegeregere, elda ta ena natudia be kerukeru sikuli do idia lao dainai, reana nega momo hanuaboi hebou murinai do ia noho daudau diba lasi. Kongregesen taudia ese unai idia lalo-pararalaia bona idia hebogahisi henia be namo.​—⁠Filipi 4:⁠5.

Namona be Iseda Elda Taudia Ita Lalokau Henia

¹⁸ Paulo ese Korinto taudia dekenai ia siaia revareva ginigunana ena karoa 7 ita itaia vadaeni, bona ita itaia, Paulo ena sisiba idia badinaia headava lasi tatau momo be edia ura kwalimu idia gaukaralaia Basileia gaudia tahua guna totona. Danu headava tadikaka tausen tausen momo be mai edia natudia lasi, bona edia adavadia idia naria namonamo lalonai, distrik, sekit, kongregesen, Watch Tower ena brens opesi idauidau ai idia gaukara bona edia adavana edia heduru idia abia. Bona ginigabena, Iehova ena taunimanima edia kongregesen 80,000 bamona lalonai, tama momo idia noho bona mai lalokau ida edia adavadia bona natudia idia naria, to danu nega idia atoa mamoe naria gaukara idia karaia mai hebogahisi ida, edia tadikaka durua totona.​—⁠Kara 20:28.

¹⁹ Aposetolo Paulo ia gwau: “Dala namona ai kongregesen idia gunalaia taudia ita matauraia bada, inai be mai anina bada haroro bona hadibaia gaukara idia goadalaia taudia dekenai.” (1 Timoteo 5:​17, NW) Oibe, elda taudia be dala namona ai edia ruma bese bona kongregesen gaukara idia naria neganai, ita lalokau henia bona ita matauraia be namo. Namona be unai ‘kara bamona idia karaia taudia ibounai ita matauraia’ bona ita lalokau henidia.​—⁠Filipi 2:⁠29.

[Footnotes]

Riviu Karaia Totona

◻ Dahaka dainai ita diba aposetolo taudia edia  nega ai elda taudia momo be mai edia adavana bona natudia?

◻ Idia headava elda taudia mai edia natudia dekenai, dahaka hahegani ia noho, bona dahaka dainai?

◻ Inai hereva “iena natuna be Iesu do idia abidadama henia” ena anina be dahaka, to bema elda tauna ena natuna be Iehova hesiai henia karana ia abia dae lasi, dahaka do ia vara?

◻ Edena dala idauidau ai elda tauna be ena ruma bese ia “naria” be namo?

[Study Questions]

1, 2. (a) Aposetolo taudia edia nega ai, headava lasi elda taudia bona mai edia natudia lasi headava elda taudia be edena dala ai edia tadikaka idia durua? (b) Edena dala ai Akwila bona ena adavana Prisikila be haheitalai namona hari idia headava taudia momo dekenai?

3. Dahaka dainai ita gwau diba aposetolo taudia edia nega ai idia noho elda taudia momo be headava taudia mai natudia?

4. Idia headava elda taudia mai natudia edia maduna be dahaka?

5, 6. (a) Paulo be Tito dekenai dahaka hahegani elda tauna ena natudia dekenai ia herevalaia? (b) Elda taudia bema idia be mai edia natudia, dahaka idia karaia be namo?

7. (a) Dahaka dainai ita itaia diba Aonega Herevadia 22:6 ena hereva be taravatu aukana ta lasi? (b) Bema elda ena natuna ese Iehova hesiai henia karana ia abia dae lasi, dahaka dainai ita gwau diba reana elda be ena gaukara namodia kongregesen lalonai do ia haboioa lasi?

8. Elda tauna be ena abidadama lasi adavana edena bamona do ia kara henia?

9. Tano haida ai, taravatu be tau bona hahine dekenai gwaumaoro idia henia edia natudia dekenai edia tomadiho ena hahediba herevadia hadibaia totona, elda tauna be edena bamona do ia kara, bona ena kara dainai ena kongregesen gaukaradia dekenai dahaka do ia vara?

10. Bema famili ena kwarana tauna be elda tauna, iena maduna ginigunana be dahaka?

11. (a) Edena dala idauidau ai elda tauna be ena ruma bese ia “naria” be namo? (b) Unai ese elda tauna edena bamona do ia durua ena kongregesen maduna ia huaia namonamo totona?

12. Famili lalonai edena kara ai tama, elda taudia unai, be haheitalai namona do idia hahedinaraia?

13, 14. “Hesiai tauna mai ena kamonai, bona mai ena kara maoromaoro” be dahaka sisiba idia henia mai edia ruma bese elda taudia dekenai?

15. Badina be dahaka elda tauna, mai ena adavana bona mai ena natudia tauna, be aonega bona lalo-parara ia abia be gau badana?

16. Bema elda tauna be tama ta danu, unai ese dahaka namo ia havaraia?

17. (a) Bema tau ta be tama ta bona ia be elda tauna, dahaka ia laloaboio lasi? (b) Kongregesen taudia be edena dala ai elda taudia dekenai hebogahisi karana idia hahedinaraia diba?

18, 19. (a) Hari Korinto ginigunana, karoa 7 ita stadilaia vadaeni dainai, dahaka ita diba? (b) Namona be ita ese unai bamona Keristani taudia be edena bamona do ita laloa?

[Picture on page 23]

Famili idia goada neganai, kongregesen idia goada