Ehuda—Boga Auka Tauna mai Ena Abidadama

ISRAELA taudia be Gwauhamata Tanona ai idia vareai negana amo lagani momo idia ore vadaeni. Mose bona iena dagi ia abia tauna, Iosua, be nega daudau idia mase vadaeni. Unai bamona tatau mai edia abidadama be lasi dainai, tomadiho goevana laloa bada karana ia maragi ia lao momokani. Israela taudia ese dirava ladadia Bala bona au helagadia idia tomadiho henidia.a Unai dainai, Iehova ese iena bese taudia be Suria taudia edia imana ai ia atodia, bena lagani 8 lalodiai edia hesiai idia lao henia. Bena Israela taudia ese Dirava idia tai henia, bona ia be mai ena hebogahisi ida ia kamonai. Gunalaia tauna ta, Otoniele, ia abia hidi, Iena bese taudia hamauria totona.​—Gunalaia Taudia 3:7-11.

Unai gau idia vara dainai, namona be Israela taudia be inai hereva momokanina idia diba​—Iehova kamonai henia karana dainai hahenamo idia vara, to gwau-edeede henia karana dainai dika idia vara. (Deuteronomi 11:26-28) To Israela taudia ese unai idia dibaia lasi. Lagani 40 lalodiai maino ai idia noho, bena tomadiho goevana idia rakatania lou.​—Gunalaia Taudia 3:12.

Moaba Taudia ese Idia Halusidia

Unai neganai Iehova ese iena bese taudia ia durua lasi dainai, Egalona, Moaba pavapavana, ese ia halusidia. Baibel ia gwau ia be “tauanina bada herea tauna.” Amono taudia bona Amaleka taudia edia heduru amo, Egalona ese Israela taudia ia tuari henidia, bena iena ruma badana be Ieriko, “pama audia hanua badana,” ai ia haginia. Hoa gauna be inai: Israela taudia ese Kanana tanona ai idia abia hanuana ginigunana lalonai, dirava koikoina Kemoso ia tomadiho henia tauna ese iena hedikwota ia haginia!b​—Gunalaia Taudia 3:12, 13, 17.

Bena Egalona ese Israela taudia ia hahisia lagani 18 lalodiai. Ia haganidia, lagani ta ta ai takisi monina bada do idia henia. Unai amo Moaba besena ese ena taga ia habadaia bona Israela besena ena taga ia hamaragia. Unai dainai Dirava ena orea taudia ese Iehova idia tai henia, idia noia do ia durudia, bona Iehova ia kamonai lou. Hamauridia tauna ta ma ia abia hidi​—tauna be Ehuda, Beniamina iduhuna tauna. Egalona ena kara, Israela besena ia biagua mai ena dagedage ida karana, hadokoa totona, Ehuda ese kara ta ia palania, takisi monina henia negana gabena ai do ia karaia.​—Gunalaia Taudia 3:14, 15.

Unai boga auka karana hegaegaelaia totona, Ehuda ese tuari kaiana ta, matana rua gauna, ia karaia, ena lata be sentimita 38 bamona. Haida idia laloa ia be gwadaia totona idia gaukaralaia kaiana. Toana be kaia ena imana bona anina ena huanai be gau ta lasi. Unai dainai, Ehuda ese iena tuari kaiana maragina be ena dabua lalonai ia hunia diba. Inai danu, Ehuda be imana lauri tauna, unai dainai ena tuari kaiana be ena idiba kahana ai ia kwatua diba​—unai be ala-ala gauna atoa gabuna korikorina lasi.​—Gunalaia Taudia 3:15, 16.

Ehuda be ena palani hegeregerena do ia kara neganai, dika do ia davaria diba. Hegeregere, bema king ena hesiai taudia ese tuari gaudia be Ehuda dekenai do idia tahua, dahaka do ia vara? Bema unai bamona do idia kara lasi, edia king do idia rakatania lasi, ia sibona be Israela tauna ta ida do ia noho! To bema Egalona idia rakatania bena Ehuda ese alaia dalana ia davaria, do ia alaia mase murinai edena bamona do ia heau mauri? Do ia heau lao ena daudau be edena bamona bena Egalona ena hesiai taudia be ia vara gauna do idia diba?

Ehuda be unai gau ia laloa, bona dika idauidau, iena kara dainai do idia vara diba gaudia, be reana ia laloa danu. To, iena palani hegeregerena ia kara. Ia hahedinaraia ia be mai ena boga auka bona Iehova ia abidadama henia.

Ehuda ese Egalona Ia Hedavari Henia

Takisi monina henia negana gabena ia ginidae. Ehuda bona ena heduru taudia be king ena ruma lalonai idia raka vareai. Nega daudau lasi murinai King Egalona vairanai idia gini. To Ehuda ese do ia alaia mase negana be ia do ginidae lasi. Takisi monina idia henia murinai, Ehuda ese huaia taudia ia siaia lao.​—Gunalaia Taudia 3:17, 18.

Dahaka dainai Ehuda ese Egalona be karaharaga ia alaia mase lasi? Ia gari, a? Lasi momokani! Ehuda be iena palani hegeregerena do ia kara totona, namona be ia sibona be king ida do ia noho​—to ia hedavari henia negana ginigunana ai unai bamona ia vara lasi. Inai danu, namona be ia be mai ena dala do ia heau siri haraga. Tau tamona be unai bamona do ia karaia be haraga, to gau huaia taudia iboudiai danu do idia karaia be auka. Unai dainai, Ehuda ese nega namona ia naria. Egalona ida ia noho negana kwadogina lalonai, king ena ruma ena oromana ia manadalaia, bona king ena sekuriti ena bada ia dibaia danu.

Ehuda be “nadi utua gabuna, Gilegala kahirakahira” ia ginidae murinai, ena heduru taudia ia rakatania, bena Egalona ena ruma ia lou henia. Ehuda ena laolao ena daudau be kilomita rua bamona, bona ia raka lao lalonai ia be mai ena nega, ia karaia gwauraia karana do ia laloa, bona Iehova do ia noia do ia hanamoa.​—Gunalaia Taudia 3:19.

Ehuda Ia Lou Lao

King ena ruma ai, Ehuda idia abia dae lou. Guna ia henia takisi monina ena bada ese Egalona ena lalona ia hamoalea reana. Eiava, ena be ruaosi idia hedavari negana ginigunana be kwadogi sibona, to reana unai nega lalonai Ehuda ese king ena lalona ia hanamoa. Gau badana be inai: Ehuda be Egalona vairanai ia gini lou.

Ehuda ia gwau: “King badana e, lau ese hunia hereva ta oi sibona totona lau mailaia inai.” Ia be Egalona vairanai ia gini vadaeni ese ia hahedinaraia Iehova ese ia hakaua. To, Ehuda ese ia hahedinaraia unai “hunia hereva,” ia ese ia mailaia herevana, be king ena hesiai taudia edia vairanai do ia gwauraia diba lasi. Bema Iehova ese Ehuda ia durua gwauraia, maoromaoro do ia durua be namo. King Egalona ia ura lasi haida ese unai “hunia hereva” do idia kamonai, unai dainai iena hesiai taudia ia hagania, ia gwau: “Umui lao, ai ruaosi sibona do ai noho!” Mani oi laloa, Ehuda ena lalo-hekwarahi ia maragi ia lao unai!​—Gunalaia Taudia 3:​19.

Ehuda be Egalona dekenai ia raka lao neganai, king be daiutu kerumana ta lalonai sibona ia helai; Ehuda ia gwau: “Hereva ta Dirava dekena amo lau mailaia vadaeni, oi totona.” Ehuda be “Dirava” ia gwau neganai, ia be Kemoso ia gwauraia, a? Egalona be reana unai bamona ia laloa. Ia ura unai hereva do ia kamonai, unai dainai ena terona amo ia toreisi. Ehuda be king dekenai ia raka lao namonamo, badina be ia ura lasi do ia laloa ia hadikaia gwauraia. Bena, karaharaga, “Ehuda ese, iena imana laurina dekenai, iena kaia, hunia gauna, idiba kahana dekena amo ia veria, Egalona ena bogana ia gwadaia. Tuari kaia ena auauna danu be bogana lalonai ia vareai. Kaia ena matana be king ena doruna kahanai ia hedinarai. King ena bogana ese kaia ia koua, vadaeni Ehuda ia veria lou lasi.”​—Gunalaia Taudia 3:​20-22.

Unai neganai king ena hesiai taudia be kahirakahira, to idia marere lasi. To Ehuda ese dika ia do davaria diba. Reana Egalona ena hesiai taudia do idia heau vareai bena edia king ena mase tauanina do idia davaria. Namona be Ehuda do ia heau oho haraga! Ia raka lasi murimuriai, bena unai daiutu ena iduara ia lokaia namonamo.​—Gunalaia Taudia 3:23, 24a.

Idia Davaria Bona Idia Lusi

Nega daudau lasi Egalona ena hesiai taudia idia laloa daradara matamaia. To king bona Ehuda sibodia idia herevahereva daiutuna lalonai idia vareai lasi, do ia badu henidia garina. Bena idia itaia daiutu ena iduara ia lokaia. Idia gwau: “Sedira king be mei totona ia lao.” Idia naria daudau dainai idia laloa hekwarahi. Egalona ena hesiai taudia idia naria noho diba lasi. “Vadaeni ki idia abia, [daiutu kerumana ena] iduara idia kehoa, edia biaguna idia itaia, reirei dekenai ia hekure, ia mase vadaeni.”​—Gunalaia Taudia 3:24b, 25.

Unai nega lalonai, Ehuda be ia heau mauri vadaeni. Nadi utua gabuna, Gilegala kahirakahira, ia hanaia bena Seira dekenai ia ginidae; unai gabu be Eparaima ororodia ai. Bena Ehuda ese Israela tataudia ia haboua bena ia hakaudia lao, Moaba taudia idia tuari henidia. Baibel ia gwau, idia ese “Moaba taudia 10,000 bamona idia alaia mase, idia ibounai be Moaba tuari diba momo taudia, bona mai edia goada danu. Idia ta ia heau mauri lasi.” Moaba idia halusia dainai, Israela tanona ia maino, lagani 80 lalodiai.​—Gunalaia Taudia 3:26-30.

Ehuda Ena Kara Sivaraina ese Ita Ia Hadibaia

Ehuda ese Dirava ia abidadama henia dainai unai kara ia karaia. Heberu karoa 11 ia gwau, haida ese “Dirava idia abidadama henia dainai, idia ese tanobada basileia momo idia tuari henia, bona idia kwalimu. . . . Tuari lalonai idia be mai siahu. Idau bese edia tuari taudia idia halusia.” (Heberu 11:33, 34) Ena be unai karoa lalonai Ehuda ena ladana be lasi, to ia be mai ena abidadama ida ia kara bona Israela taudia be King Egalona ena lohia siahuna aukana amo ia hamauridia.

Ehuda be boga auka tauna. Tuari kaiana do ia gaukaralaia namonamo totona, ia gari lasi be namo. Ita Dirava ena hesiai taudia hari inai negai be unai bamona tuari kaiana ita abia lasi. (Isaia 2:4; Mataio 26:52) To, “Lauma Helaga ena tuari kaia,” Dirava ena Hereva, ita gaukaralaia. (Efeso 6:17) Ehuda ese ena tuari kaiana ia gaukaralaia namonamo mai ena diba ida. Basileia ena sivarai namona do ita harorolaia lalonai, namona be Dirava ena Hereva do ita gaukaralaia namonamo mai eda diba ida. (Mataio 24:14) Bema Baibel ita stadilaia, Keristani heboudia ita lao henidia loulou, haroro gaukarana ita goadalaia, bona iseda Tamana guba lalonai ita abidadama henia mai eda guriguri ida, unai ese ita do ia durua, Ehuda ena kara do ita tohotohoa. Momokani, ia be boga auka tauna mai ena abidadama.

[Footnotes]

[Picture on page 31]

Ehuda bona ena heduru taudia ese takisi monina be King Egalona idia henia

[Picture Credit Line on Page ]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s