Duahia Taudia Edia Henanadai

November 1, 1995, ena “Gima Kohorona” be Iesu ena hereva “inai nega idia noho taudia,” Mataio 24:34 lalonai, ia herevalaia. Unai ena anina be ita diba momokani lasi Dirava ena Basileia be guba dekenai lagani 1914 ai ia haginia eiava, a?

Unai Gima Kohorona ese lagani 1914 ita hahedibalaia herevana badana ia haidaua lasi. Iesu ese Basileia siahuna ai do ia noho vadaeni toana ia gwauraia hedinarai. Idia vara vadaeni gaudia momo ese idia hamomokania lagani 1914 amo unai toa ena anina ia vara. Tuari, hitolo bada, daihanai goreredia, tano mareremarere, bona ma gau haida edia sivarai korikoridia ese idia hamomokania lagani 1914 amo, Iesu be Dirava ena Basileia ena King gaukarana ia karaia noho vadaeni. Ia hahedinaraia unai nega amo ita be hari inai nega ena dokona ai ita noho.

Vadaeni, Gima Kohorona ese dahaka lalohadai ia hamaoromaoroa? Ia herevalaia gauna be Mataio 24:34 ai Iesu ese inai hereva “inai nega idia noho taudia” ia gwauraia ena anina amo do ita diba. Unai siri ia gwau: “Umui lau hamaoroa momokani, inai nega idia noho taudia do idia mase ore lasi neganai, be inai gaudia ibounai do idia vara momokani.” Iesu be unai hereva “inai nega idia noho taudia” amo dahaka ia herevalaia, iena negai bona iseda negai danu?

Siri momo ese idia hamomokania Iesu ese inai hereva, “inai nega idia noho taudia,” ia gaukaralaia lasi orea maragina o idauna ta, hegeregere Iuda ena gunalaia taudia o iena hahediba taudia mai edia kamonai, herevalaia totona. Lasi, to unai hereva ia gaukaralaia ia idia dadaraia Iuda taudia hutuma ia gwauraia dika neganai. Moale gauna be taunimanima ta ta be Pentekoste dinana ai aposetolo Petero ese ia hamaorodia karana idia karaia diba, anina be do idia helalo-kerehai bona ‘unai nega noho gagevagageva taudia dekena amo idia heau mauri.’​—⁠Kara 2:⁠40.

Ia hedinarai goevagoeva, Petero ese taunimanima edia mauri laganidia edia namba ia herevalaia lasi eiava nega ta ena daudau ia herevalaia lasi, bona ‘unai nega noho taudia’ edia uru ena dokona laganina ia herevalaia lasi. Ia gwau lasi Iesu ia vara laganina lalonai idia vara taudia eiava lagani 29 C.E. lalonai idia vara taudia edia amo do idia roho mauri be namo. Petero ese ia herevalaia taudia be kamonai lasi Iuda taudia​—⁠haida be reana matamata, ma haida idia buruka​—⁠idia be Iesu ena hahediba herevadia idia kamonai, ena hoa karadia idia itaia eiava edia sivarai idia kamonai, to idia abia dae lasi ia be Mesia.

Toana be Petero ese Iesu ena hereva “inai nega idia noho taudia” be unai bamona ia lalo-pararalaia, ia bona ma aposetolo taudia toi be Olive Ororona ai Iesu ida idia noho neganai. Iesu ena peroveta herevana hegeregerena, unai negai idia noho Iuda taudia​—⁠Iesu ena negai idia noho taudia unai​—⁠ese tuari, tano mareremarere, hitolo, bona Iuda negana ena dokona ia kahirakahira do idia hahedinaraia gaudia ma haida do idia itaia eiava edia sivarai do idia kamonai. Momokani, unai nega taudia idia do mase ore lasi neganai, lagani 70 C.E. ai unai dokona ia ginidae.​—⁠Mataio 24:​3-​14, 34.

Momokani, guna ita ese Iesu ena hereva ena anina be unai bamona ita laloa lasi. Ita goevadae lasi taudia be vaia ita ura unai dokona ena lagani do ita davaria. Mani umui laloa, aposetolo taudia danu ese nega ta idia henanadailaia, idia gwau: “Lohiabada e, inai negana be, basileia do oi henia lou Israela taudia dekenai, a?”​—⁠Kara 1:⁠6.

Idia hegeregeredia, Dirava ena hesiai taudia hari inai negai ese mai edia ura maoromaorodia ida Iesu ese “inai nega idia noho taudia” ia gwauraia herevana amo dokona negana davaria totona lagani 1914 amo lagani idia duahidia. Hegeregere, haida be inai bamona idia laloa: Uru ta ena lagani iboudiai be 70 eiava 80, bona unai uru taudia edia mauri laganidia be hegeregere tanobada ibounai tuarina ginigunana bona idia vara gaudia ma haida edia anina idia lalo-pararalaia; unai amo lagani hida bamona idia noho bena dokona do ia ginidae ita duahia diba.

Ena be mai edia ura namona ida unai bamona idia laloa, to unai be Iesu ena sisiba hegeregerena, a? Iesu ia gwau: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba. . . . Unai dainai do umui naria, badina be umui emui Lohiabada do ia mai negana be umui diba lasi.”​—⁠Mataio 24:​36-42.

Unai dainai vanegai Gima Kohorona ai “inai nega idia noho taudia” herevana ese iseda lalohadai lagani 1914 ai ia vara karana dekenai ia haidaua lasi. To unai hereva dainai, Iesu ese inai hereva, “inai nega idia noho taudia,” ia gaukaralaia dalana ita lalo-pararalaia goevagoeva diba, bona ita ia hadibaia unai hereva ese ita dekenai dala ia kehoa lasi nega do ita duahia​—⁠lagani 1914 amo ita duahia​—⁠dokona ena daudau ita diba totona.