Oi be Dirava Turana, A?—Emu Guriguri ese Idia Hahedinaraia Gauna

NEGA ta oi be taunimanima rua edia herevahereva oi kamonaia, a? Reana nega daudau lasi murinai edia hetura karana be edena bamona oi dibaia diba​—⁠reana idia be tura momokanidia eiava ta ta idia diba lasi taudia, hari sibona idia hedavari taudia eiava nega daudau lalonai idia be abidadama heheni turadia. Unai hegeregerena, iseda guriguri ese iseda hetura karana Dirava ida ia hahedinaraia.

Baibel ese ita ia hagoadaia, ia gwau, Dirava be “daudau lasi ita ta ta dekenai.” (Kara 17:27) Oibe, ita ia boiria ia ita diba totona. Ita be ia turana ai ita lao diba. (Salamo 34:8; Iamesi 2:23) Ita be Dirava ida tura heheni namona karana ita moalelaia diba! (Salamo 25:14) Ia hedinarai goevagoeva, ita mai eda kara dika taudia, eda hetura karana Dirava ida be mai anina bada gauna momokani. Bona Iehova ese iseda hetura karana ia laloa bada. Unai ia hahedinaraia badina ia sibona ese ia havaraia Natuna tamona sibona ena mauri ia henia ita totona bona ita ese unai boubou gauna ita abidadama henia neganai ia ita tura henia diba.​—⁠Kolose 1:​19, 20.

Unai dainai, namona be iseda guriguri lalonai ita hahedinaraia Iehova ita laloa bada bona ita lalokau henia momokani. To nega haida oi mamia ena be mai hemataurai ida oi guriguri, to emu guriguri be mamina lasi, a? Unai be nega momo ia vara gauna. Dahaka ita karaia diba ita hanamoa totona? Emu hetura karana Iehova Dirava ida oi naria namonamo.

Guriguri Totona Nega Oi Atoa

Gau ginigunana be, nega do ita atoa unai hetura karana ita naria namonamo bona ita hagoadaia totona. Dina ta ta ai oi ese taunimanima momo oi hanamodia eiava oi hereva henidia​—⁠dekena taudia, gaukara taudia, basi taria tauna, bona sitoa naria taudia. To, unai be gau ta lasi, ia hahedinaraia lasi unai taudia be oiemu turadia momokani. Hetura karana ia goada ia lao bema oi be ta ida oi herevahereva nega daudau lalonai, anina maragi gaudia umui herevalaia ela bona emu lalona ena mamina bona oi laloa bada gaudia umui herevalaidia.

Unai hegeregerena, guriguri ese ita ia veria lao Iehova kahirakahira dekenai. To unai karaia totona nega sisina bada do ita atoa; aniani totona guriguri kwadogina sibona ita gwauraia be hegeregere lasi. Nega momo Iehova oi hereva henia neganai, oi ese emu lalohadai, emu ura, bona emu kara ena badina do oi tahua namonamo diba. Iehova ena lauma helaga ese ena Hereva lalonai idia noho hakaua herevadia be oiemu lalona dekenai ia hahedinaraia lou dalana amo hekwakwanai hanamoa daladia be sibodia idia hedinarai matamaia. (Salamo 143:10; Ioane 14:26) Danu, oi guriguri neganai, oi diba Iehova be ia noho momokani, bona nega ia hanai lalonai oi ia lalokau henia bona oi ia laloa bada karana oi itaia goevagoeva.

Unai be momokani bema emu guriguri edia haere oi abia neganai. Oibe, Iehova ena “siahu be goada momokani, bona iseda noinoi bona iseda laloa ibounai ia hereaia diba”! (Efeso 3:20) Dirava ese hoa karadia do ia karaia lasi. To, iena Hereva amo, hesiai tauna mai ena kamonai ese idia halasia buka bona magasin amo, eiava lalokau tadikaka bona taihu edia uduna amo, ia ese oi ia durua sisiba eiava hakaua dalana ia henia. Eiava ia ese goada ia henia oi dekenai hetoho ta oi haheaukalaia eiava ita dadaraia totona. (Mataio 24:45; 2 Timoteo 4:17) Unai bamona ekspiriens ita mamia neganai mai iseda kudouna ibounai ida iseda guba Turana ita ura henia!

Unai dainai ta ese nega do ia atoa guriguri totona. Momokani, inai hekwakwanai bada negana lalonai, nega be lasi. To bema oi be tau ta oi laloa bada, nega do oi davaria diba ia oi bamoa totona. Salamo torea tauna ena hereva mani oi laloa, ia gwau: “Dirava e, dia ese sinavai ranu ia ura henia bada bamona, unai bamona lau ese oi lau ura henia noho. Dirava e, oi be mauri ena Dirava, bona oi lau ura henia noho, ranu mase neganai, ranu lau ura henia bamona. Dirava e, edena negai oiemu vairana dekenai oi do lau tomadiho?” (Salamo 42:​1, 2) Salamo torea tauna ena ura hegeregerena, oi ura Dirava oi hereva henia, a? Vadaeni, nega do oi atoa unai oi karaia totona!​—⁠Efeso 5:16 itaia.

Hegeregere, daba matana ai regerege lasi neganai oi toreisi diba, oi guriguri totona. (Salamo 119:147) Hanuaboi haida oi mahuta namonamo diba lasi, a? Vadaeni, Salamo torea tauna bamona, unai hekwakwanai negadia be nega namona emu lalo-hekwarahi be Dirava dekenai oi gwauraia hedinarai totona. (Salamo 63:⁠6) Eiava dina lalonai oi ese guriguri kwadogidia haida oi henia diba. Salamo torea tauna ese Dirava dekenai ia gwau: “Dina ena nega ibounai, lau ese oi dekenai lau tai henia noho.”​—⁠Salamo 86:⁠3.

Iseda Guriguri Ita Hanamodia

Nega haida do oi davaria emu guriguri ena daudau oi halataia be heduru gauna. Guriguri kwadogina lalonai, reana oi ese anina bada lasi gaudia oi herevalaia. To mai anina bada guriguri latadia oi gwauraidia neganai, ia auka lasi emu lalona bona emu kudouna dekenai oi mamia gaudia oi gwauraidia totona. Iesu be nega ta hanuaboi ibounai ia guriguri. (Luka 6:12) Do oi davaria bema oi guriguri haragaharaga lasi emu kudouna lalonai idia noho gaudia bona oi laloa bada gaudia do oi herevalaia.

To unai ena anina be do oi hereva kava hereva kava lasi; bona hereva tamona do ita gwauraia lou gwauraia lou lasi. Iesu ese unai ia sisibalaia, ia gwau: “Umui guriguri neganai, hereva kava momo do umui gwauraia lou, gwauraia lou lasi, Dirava diba lasi taudia bamona, badina be idia laloa edia hereva momo dainai, Dirava ese idia do ia kamonai. Idia danu do umui hegeregere lasi, badina be emui Tamana guba dekenai ia noho, be umui ura gaudia ia diba vadaeni, do umui noinoi henia lasi neganai.”​—⁠Mataio 6:​7, 8.

Guriguri be mai ena anina bema oi do guriguri lasi neganai oi ura oi herevalaia gaudia oi laloa guna. Ita herevalaia gaudia be momo herea​—⁠iseda moale haroro gaukara lalonai, iseda manoka bona kerere gaudia, ita lalohisihisilaia gaudia, moni ena hekwakwanai gaudia, gaukara eiava sikuli dekenai ita davaria hekwakwanai, iseda ruma bese edia namo, bona iseda kongregesen ena goada lauma dalanai bona unai bamona gaudia haida ita gurigurilaia diba.

Oi guriguri neganai nega haida ma gau idauidau oi laloa, a? Vadaeni oi hekwarahi oi gurigurilaia gaudia sibona oi laloa totona. Iehova be mai ena ura ida ‘iseda taitai ia kamonai.’ (Salamo 17:⁠1) Unai dainai ita danu be ita hekwarahi bada be namo iseda guriguri ita laloa bada totona, ani? Io, namona be ‘lauma helaga ena ura gaudia sibona oi laloa’ bona oi hekwarahi ma gau idauidau oi laloa lasi totona.​—⁠Roma 8:⁠5.

Iehova ita hereva henia dalana danu be mai anina bada. Ena be ia ura ia ita laloa iseda turana bamona, to namona be ita laloaboio lasi ita be tanobada ibounai ena Lohiabada ita hereva henia. Apokalupo karoa 4 bona 5 ese ia herevalaia hoa bada gauna oi duahia bona oi laloa dobu. Unuseniai Ioane be matahanai amo guriguri dalanai ita lao henia Tauna ena hairai bada ia itaia. “Helai gabuna badana dekenai ia helai Diravana” ita lao henia diba bona ita hereva henia diba be hahenamo badana ta! Ita ura lasi iseda guriguri be hemataurai lasi dalanai ita gwauraia. To namona be ita ibounai ita hekwarahi ‘iseda uduna ena hereva bona iseda kudouna ena laloa be do idia namo Iehova vairanai.’​—⁠Salamo 19:⁠14.

To namona be ita diba, Iehova be iseda hereva idauidau eiava hereva badadia gaukaralaia karana amo do ita hamoalea lasi. Ena be hereva badadia ita gaukaralaia lasi, to iseda kudouna lalonai ita mamia gaudia be mai hemataurai ida ita gurigurilaia neganai, Iehova ia moale.​—⁠Salamo 62:⁠8.

Lalohisihisi Neganai Ia Lalo-Parara Bona Ia Heduru

Heduru bona hahegoada ita ura ita abia neganai, nega momo iseda turana namona ta dekenai ita lao ena hebogahisi bona heduru totona. Nega ibounai ita lao henia diba turana be Iehova. “Iseda nega dika negadia ibounai ita dekenai ia noho, ita do ia durua totona.” (Salamo 46:⁠1) Ia be ‘hebogahisi bona durua ibounai ia henia Diravana’ dainai, ia be iseda lalo-hekwarahi ia lalo-pararalaia goevagoeva. (2 Korinto 1:​3, 4; Salamo 5:1; 31:⁠7) Bona dika bada herea idia davaria taudia edia mamina ia mamia danu bona ia hebogahisi henidia. (Isaia 63:9; Luka 1:​77, 78) Ita diba Iehova be lalo-parara turana neganai, ita ura iseda kudouna dekenai idia noho gaudia be mai iseda lalona ibounai ida ia dekenai ita herevalaia. Iena kara ese ita ia ha-uraia iseda gari gaudia bona iseda lalo-hekwarahi gaudia ita herevalaia totona. Unai amo mamina do ita abia Iehova be ‘iseda lauma ia hamoalea noho.’​—⁠Salamo 94:​18, 19.

Nega haida iseda kara kereredia dainai iseda mamia ia hegeregere lasi Dirava ita guriguri henia totona. To bema oiemu turana namona ta be ia kara dika oi dekenai bona oi ia noia oi gwauatao totona, dahaka do oi karaia? Do oi hamaoroa ia namo bona ena lalona do oi hagoadaia, ani? Vadaeni, oi laloa Iehova be unai bamona do ia karaia lasi, a? Iena turadia be kara dika taunimanima dainai, idia kerere neganai ia gwaudiatao. (Salamo 86:5; 103:​3, 8-11) Unai ita diba neganai, iseda kerere ita hunia lasi to ita gwauraia hedinarai ia dekenai; iena lalokau bona hebogahisi ita abidadama henia. (Salamo 51:17) Bema iseda kara kereredia dainai ita lalohisihisi, 1 Ioane 3:​19, 20 ena hereva amo hahegoada ita abia diba, ia gwau: “Inai . . . amo, be do ita diba ita be momokani taudia. Vadaeni unai dekenai, iseda kudouna be mai maino danu, Dirava ena vairana dekenai. Bona bema iseda kudouna ese ita idia kota henia noho neganai, Dirava ena vairanai do ita laloa hekwarahi lasi. Badina Dirava ese gau ibounai ia diba, bona iena diba ese iseda kudouna ena diba ia hereaia momokani.”

To, ita ese Dirava ena lalokau karana be dika bada herea negadia sibodia lalonai ita mamia lasi. Iehova be iseda abidadama dekenai bona iseda lalona ena hemami dekenai idia vara gaudia ia laloa bada. Oibe, namo lasi ita laloa iseda hemami, iseda helalo, bona iseda ura be gau maragidia dainai iseda guriguri lalonai ita gwauraidia lasi. (Filipi 4:⁠6) Oi be emu turana namona ida oi helai neganai, emu mauri lalonai idia vara anina bada gaudia sibona oi gwauraidia, a? Umui ese anina maragi gaudia danu umui kikilaidia, ani? Unai hegeregerena, gari lasi ida emu mauri lalonai idia vara gaudia idauidau be Iehova dekenai oi herevalaia diba, badina oi diba ‘oi ia laloa noho.’​—⁠1 Petero 5:⁠7.

Oibe, turana karana ta be do ia noho daudau lasi bema nega ibounai oi ese oi sibona oi herevalaia. Unai hegeregerena, namo lasi iseda guriguri lalonai ita sibona ita laloa. Namona be iseda lalokau Iehova totona ita gwauraia hedinarai bona ena ura totona ita guriguri danu. (Mataio 6:​9, 10) Guriguri be Dirava ita noia ita ia durua totona sibona, lasi to ia be dala namona ia ita tanikiu henia bona ita hanamoa totona. (Salamo 34:1; 95:⁠2) ‘Diba ita abia’ siboda eda stadi hanaihanai karana amo ese ita do ia durua unai ita karaia totona, Iehova bona ena dala ita dibaia namonamo totona. (Ioane 17:⁠3) Heduru karana be Salamo bukana oi duahia, bona kamonai hesiai taudia haida edia guriguri gwauraia dalana Iehova dekenai oi itaia diba.

Iehova ena hetura karana be dava bada gauna momokanina. Namona be ita hahedinaraia unai ita abia dae iseda guriguri amo; ita laloa bada gaudia ibounai ita gurigurilaidia mai iseda kudouna ibounai ida bona iseda lalona dekenai idia noho gaudia ita hahedinaraia ia dekenai. Unai amo Salamo torea tauna ese ia gwauraia moale herevana do ita gwauraia: “Oi ese oi abia hidi taudia, bona oi ese oiemu gabu helagana dekenai oi mailaidia taudia, be idia moale bada.”​—⁠Salamo 65:⁠4.

[Pictures on page 28]

Dina ibounai lalonai dala ia noho neganai Dirava ita guriguri henia diba