Ororo Nadidia Edia Roho Idauidau Animal

MASE Davara ena west kahana ena kone dekenai be idaunegai hanuana bona taunimanima idia noho lasi gabuna, Ene Gedi. Unai gabu ena nadi momo hanai gabudia bona hagahaga be Gwauhamata Tanona ena ororo nanigosi, laulau dekenai idia noho gaudia bamona, edia noho gabuna.

Inai dedi diba lasi nanigosi be idia hoalaia animal ta. Mani Baibel ita kehoa bona inai animal ena sivarai ita tahua namonamo.

“Uda Nanigosi be Ororo Badadia Lalonai Idia Noho”

Salamo torea tauna be unai bamona ane ia abia. (Salamo 104:18) Ororo nanigosi be idia hegeregere atai gabudia ai idia noho! Idia ese edia tauanina idia hamarerea haraga diba, unai dainai gabu aukadia dekenai mai edia diba bada ida idia loaloa haraga. Idia karaia diba ena badina ta be edia aena palapala edia oromana dainai. Nanigosi be ena metau dainai, ena aena kwakikwaki edia padana ia lababa diba, unai amo nadi palaka maragina latanai ia gini neganai ia dogoatao auka diba.

Danu, ororo nanigosi be edia metau idia hahegeregerea namonamo diba. Idia roho daudau diba bena edia aena haniosi be kahirakahira idia atoa diba lasi nadi palakana maragina ai do idia gini. Mauri gaudia stadilaia tauna Douglas Chadwick be nega ta ororo nanigosi idauna ta ia itaia, ena metau hahegeregerea karana dainai, ena be nadi palaka maragina ta latanai ena tauanina ia giroa diba lasi, to unai gabu amo ia siri diba. Ia gwau: “Nanigosi ia itaia nadi palaka ma ta be mita 120 henuai, vadaeni ena aena vaira gaudia ia haginia auka bena metairametaira ena aena muri gaudia ia abia isi, hagahaga dekenai ena kwarana ataiai amo ia hamarerea lao, rini ta ia karaia gwauraia bamona. Egu lagana lau dogoatao noho lalonai, nanigosi be unai kara ia karaia noho ela bona ena aena muri gaudia ma ia atoa diho bona ena vairana be ia mai gabuna ma ia itaia lou.” (National Geographic) Momokani unai dainai ororo nanigosi idia gwauraia “ororo nadidia edia roho idauidau animal”!

“Ororo Nanigosi Edia Mara Negana Oi Diba, A?”

Ororo nanigosi be idia hemarai bada. Idia ura taunimanima lasi gabudia dekenai sibodia idia noho. Bona taunimanima be idia edia mauri dalana korikori itaia totona idia lao kahirakahira be auka. Unai dainai “uda dekenai noho mauri gaudia ibounai” edia Biaguna be mai maoro ida Iobu ia nanadaia diba, ia gwau: “Ororo nanigosi edia mara negana oi diba, a?”​—⁠Salamo 50:10; Iobu 39:⁠1.

Dirava ese ororo nanigosi hahinena lalonai ia atoa dibana ese ia hadibaia edena negai do ia mara. Gabu namona ta ia tahua bena natuna ta o rua ia havaraia, nega momo May dokonai eiava June lalonai. Natuna matamata be dina haida sibona lalonai idia gini goada diba.

‘Ia be Dia Hahine, Bona Ororo Nanigosi Namo Herea Bamona’

Aonega tauna King Solomona ese headava tatau ia hamaorodia ia gwau: “Oiemu eregabe dinadia neganai, oi adavaia hahine do oi moalelaia. Ia be dia hahine, bona dia ena natuna [“ororo nanigosi,” NW] namo herea bamona oi dekenai.” (Aonega Herevadia 5:​18, 19) Unai hereva amo hahine ia laloa maragi lasi. To toana be, Solomona ese ia hahegeregerea gauna be unai animal edia hairai, edia marere dalana, bona edia kara badadia ma haida.

Unai ororo nanigosi bona ma “mauri gaudia” momo herea ese Havaraia Tauna ena aonega ia hahedinaraia badabada. (Genese 1:​24, 25) Ita moale bada herea badina Dirava ese ita hoalaia gaudia idauidau momo herea ia havaraia, ani?

[Picture Credit Line on page 24]

Courtesy of Athens University