Dokona be Kahirakahira Neganai Ita “Laloa Maoromaoro”

“Gau ibounai edia dokona ena nega be kahirakahira. Unai dainai do umui noho namonamo, mai laloa maoromaoro danu.”​—1 PETERO 4:7.

1. “Laloa maoromaoro” karana be dahaka?

NAMONA be ataiai ia noho aposetolo Petero ena hereva be mai anina bada Keristani taudia edia mauri lalonai. To, Petero ia gwau lasi unai idia duahia taudia ese edia maduna idauidau mauri lalonai do idia rakatania; danu ia gwau lasi dika be kahirakahira dainai do idia gari bada. To, idia ia hagoadaia: “Do umui noho namonamo, mai laloa maoromaoro danu.” Ita “laloa maoromaoro” bema iseda lalona ita hadaia namonamo, ita laloa namonamo, ita kara maoromaoro, bona iseda hereva bona kara ita naria namonamo. Anina be Dirava ena Hereva ese iseda laloa dalana bona kara ia biagua. (Roma 12:⁠2) “Inai tanobada taudia mai edia dika bona mai edia kerere bada danu edia huanai” ita noho dainai, ita laloa maoromaoro be gau badana, hekwakwanai bona kerere ita koua totona.​—Filipi 2:15.

² “Laloa maoromaoro” ese ita ia durua danu sibona ita laloa maoro totona. (Roma 12:3; Tito 2:​12) Unai be gau badana, badina 2 Petero 3:​9 ia gwau: “Lohiabada . . . ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” Oi itaia Iehova ia haheauka noho, abidadama lasi taudia totona sibona lasi, to “umui”​—Keristani kongregesen ena memba taudia​—totona danu. Badina be dahaka? “Badina be ia ura lasi tau ta ia mase.” Reana haida be edia mauri idia do haidaua bona hamaoromaoroa be namo, mauri hanaihanai ena harihari gauna idia abia totona. Vadaeni, namona be ita hamaoromaoroa gaudia haida ita itaia.

Taunimanima Ita “Laloa Maoromaoro”

3. Tama sina ese edia natudia idia laloa neganai, idia sibona dekenai edena bamona idia nanadaia be namo?

³ Namona be noho rumana be maino gabuna. To haida dekenai ia be “heai bona hepapahuahu” gabuna. (Aonega Herevadia 17:1) Oiemu ruma bese be edena bamona? Oiemu ruma lalonai, “heai, dagedage, bona badu” be lasi, a? (Efeso 4:31) Oiemu natudia be edena bamona? Idia mamia oi ese oi lalokau henidia bona oi lalodia bada, a? (Luka 3:​22 itaia.) Nega oi atoa idia oi hakaua bona hadibaia totona, a? “Dala maoromaorona” ai idia oi matahakani henia to hepapahuahu bona badu ai lasi, a? (2 Timoteo 3:​16) “Natudia be Dirava ena harihari gauna” dainai, oi kara henidia dalana ia laloa bada.​—Salamo 127:⁠3.

4. (a) Bema tau ese ena adavana ia kara auka henia, dahaka ia vara diba? (b) Edena dala ai headava hahinedia be Dirava ida idia maino diba bona ruma bese ibounai ena moale idia habadaia diba?

⁴ Iseda adavana be edena bamona? “Namona be tatau ese edia adavana do idia lalokau henia, idia edia tauanina idia lalokau henia hegeregerena. Adavana ia lalokau henia tauna ese sibona ia lalokau henia noho. Badina be tau ta ese sibona ena tauanina ia badu henia diba lasi. To ia ubua noho, bona ia naria noho, Keriso ese ekalesia ia ubua bona naria noho hegeregerena.” (Efeso 5:28, 29) Ena adavana ena lalona ia hadikaia, ia biagua auka, eiava ia kara auka henia tauna ese ena ruma bese ena maino ia hadikaia sibona lasi to ena turana karana Dirava ida ia hadikaia danu. (1 Petero 3:7) Headava hahine be edena bamona? Idia danu be edia ‘adavana idia kamonai henia’ be namo. (Efeso 5:​22) Dirava hamoalea karana ia laloa bada ese headava hahine ia durua diba ena adavana ena kerere do ia laloa bada lasi bona ia henunai do ia noho diba mai lalo-namo ida. Nega haida, reana headava hahine ia ura ena lalohadai ia gwauraia hedinarai. Aonega Herevadia 31:26 ese hahine namona ia herevalaia, ia gwau: “Ia be mai aonega danu ia hereva noho, bona iena hadibaia hereva be maoromaoro, bona mai momokani danu.” Ena adavana be dala namona mai hemataurai ida ia kara henia neganai, Dirava ida ia maino noho, bona ruma bese ibounai ena moale ia habadaia.​—Aonega Herevadia 14:⁠1.

5. Dahaka dainai matamata taudia ese Baibel ena sisiba hegeregerena edia tama sina idia kara henidia be namo?

⁵ Umui matamata taudia e, edena bamona emui tama sina umui kara henia? Hari tanobada dekenai idia abia dae hereva kavakava, hemataurai lasi herevana, umui gaukaralaia, a? Eiava Baibel ena hahegani: “Memero bona kekeni e, umui emui tamana bona sinana do umui kamonai henia. Kara maorona be unai. ‘Emui tamana bona sinana do umui matauraia.’ Inai be Buka Helaga ena Taravatu mai ena gwauhamata ginigunana. Badina be inai bamona umui karaia neganai, gwauhamata be inai: ‘Mauri namona do umui abia, bona emui mauri do ia daudau tanobada dekenai’ ” umui badinaia, a?​—Efeso 6:1-3.

6. Abidadama tamona taudia ida maino be edena bamona ita tahua diba?

⁶ Ita “laloa maoromaoro” danu bema abidadama tamona taudia ida maino ita “tahua, bona maino ena dala” ita badinaia. (1 Petero 3:​11) Nega haida ita lalo-tamona lasi bona gau ta ita laloa kerere. (Iamesi 3:2) Bema badu ia noho daudau, kongregesen ibounai ena maino ia dika ia lao diba. (Galatia 5:​15) Unai dainai, hepapahuahu do umui hamaoromaoroa haraga; mai maino ida hanamoa dalana umui tahua.​—Mataio 5:​23-​25; Efeso 4:​26; Kolose 3:​13, 14.

“Laloa Maoromaoro” Bona Iseda Maduna Ruma Bese Lalonai

⁷ Aposetolo Paulo ese Keristani taudia ia sisiba henia, ia gwau do idia “noho namonamo” be namo. (Tito 2:​12) Unai ena badina siridia lalonai, Paulo ese hahine ia hagoadadia “edia adavana bona natuna do idia lalokau henia. Bona do idia laloa maoromaoro, do idia noho namonamo, mai laloa goevagoeva danu, bona edia ruma lalonai do idia gaukara.” (Tito 2:4, 5) Paulo ese lagani 61-​64 C.E. lalodiai unai ia torea, bena lagani haida sibona murinai Iuda oreana do ia ore momokani. To, dina ta ta gaudia, hegeregere ruma gaukara, be do mai anina bada. Unai dainai tau mai ena adavana ese edia maduna ruma bese lalonai idia laloa namonamo be namo, “tau ta ese Dirava ena Sivarai Namona do ia hadikaia diba lasi” totona. Ruma bese kwarana ta be vadivadi tauna dekenai ia sori badina ena ruma ena toana be ia dika. Ia gwau ruma ia do hanamoa lasi badina ia be “painia gaukara ia karaia dainai.” Basileia dainai gau haida ita reaia be namo, to ita naria namonamo dika iseda ruma bese ena noho namona ita hadikaia garina.

⁸ Baibel ese tamana ia hagoadadia edia ruma bese idia laloa guna, ia gwau bema ta ese ena ruma bese ia naria lasi, “ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” (1 Timoteo 5:8) Tanobada ena kahana idauidau taunimanima edia noho dalana be idauidau, bona kohu momo ita ura henia lasi be namo. Aonega Herevadia 30:⁠8 ia torea tauna ia guriguri: “Ogogami o kohu momo lau dekenai do oi henia lasi.” To namo lasi tama sina ese edia natudia edia tauanina gaudia idia dadaraia. Hegeregere, ruma bese taudia be mauri ena anina bada gaudia idia abia lasi, badina tiokratik gaudia oi tahua be aonega dalana, a? Unai ese natudia edia lalona ia hadikaia diba, ani? To danu, Aonega Herevadia 24:27 ia gwau: “Oiemu tano hanamoa gaukara do oi haorea, bona oiemu uma gabuna do oi abia hegaegae. Unai murinai, oiemu noho rumana do oi haginia [“ruma taudia oi hagoadaia,” NW].” Oibe, ena be mauri gaudia ita laloa be mai badina, to ‘ruma taudia ita hagoadaia’​—lauma dalanai ita durua bona edia lalona ita hagoadaia​—be gau badana.

⁹ Bema do oi mase haraga, oiemu ruma bese do idia noho namonamo totona oi hegaegae vadaeni, a? Aonega Herevadia 13:22 ia gwau: “Tau namona be ia mase neganai, ia ese iena kohu be iena tubuna dekenai ia henia.” Tama sina ese natudia dekenai Iehova ena diba bona tura henia karana ena kohu sibona idia henia lasi, to idia ura tauanina dalanai edia natudia idia naria danu. Tano momo dekenai edia maduna idia huaia namonamo ruma bese kwaradia idia hekwarahi banika dekenai moni sisina, will pepana, bona insurens idia abia totona. Momokani, Iehova ena taunimanima danu ese “nega dika idia davaria noho.” (Hadibaia Tauna 9:11) Moni ese ita “ia gimaia noho diba” bona hegaegae namonamo karana amo nega momo hekwakwanai ita koua diba. (Hadibaia Tauna 7:12) Tano haida dekenai gavamani ese medikol heduru ena davana ia karaia lasi dainai, haida ese moni idia atoa siri eiava helt insurens totona dala idia hegaegaelaia.a

¹⁰ Baibel ma ia gwau: “Memero maragi ese moni idia haboua lasi tamadia sinadia totona. To tamadia sinadia ese moni idia haboua edia natudia totona.” (2 Korinto 12:14) Tanobada dekenai tama sina momo ese moni idia atoa siri edia natudia edia edukeisini bona headava totona, badina idia ura natudia edia mauri do ia namo. Oi laloa oiemu natudia edia lauma maurina totona moni oi atoa siri diba, a? Hegeregere, oi laloa ia bada vadaeni natuna ta ia ura ful-taim hesiai gaukarana do ia karaia. Ena be ful-taim hesiai taudia be idia noinoi lasi eiava idia laloa lasi ma haida ese moni dalanai do idia durudia, to reana mai lalokau tama sina idia ura ‘ena gau be lasi neganai ia idia durua,’ ful-taim gaukara do ia karaia noho diba totona.​—Roma 12:13; 1 Samuela 2:​18, 19; Filipi 4:​14-​18.

11. Moni be dala maorona ai ita laloa ena anina be ita abidadama lasi, a? Mani oi gwauraia hedinarai.

¹¹ Namo lasi ita laloa moni be dala maorona ai ita laloa ena anina be ita be Satani ena tanobada dikana ena dokona ita daradaralaia. Lasi, to ena anina be ita “aonega” bona ita laloa maoromaoro. (Aonega Herevadia 2:7; 3:​21) Nega ta Iesu ia gwau edia moni gaukaralaia dalana ai “inai tanobada taudia edia aonega be ia bada, to diari taudia edia aonega be ia maragi.” (Luka 16:8) Unai dainai ita hoa lasi haida idia lalo-parara edia kohu gaukaralaia dalana idia hamaoromaoroa be namo, edia ruma bese do idia naria namonamo totona.

Edukeisini Ita “Laloa Maoromaoro”

12. Edena bamona Iesu ese ena hahediba taudia ia hadibaia nega haida edia kara do idia haidaua be namo?

¹² Hari inai tanobada ena toana ia idau ia lao, bona bisinesi daladia idia idau bona gaukara karaia daladia idia idau haraga. (1 Korinto 7:31, NW) To, Iesu ese ena hahediba taudia ia hadibaia nega haida edia kara do idia haidaua be namo. Nega ginigunana haroro totona idia ia siaia neganai, ia gwau: “Umui emui pusepuse lalonai moni badadia o maragidia do umui udaia lasi. Dala dekenai laolao pusena, dabua rua, tamaka, raka au, do umui abia lao lasi. Badina be gaukara tauna dekenai iena aniani idia henia be maoro.” (Mataio 10:9, 10) To, gabeai, Iesu ia gwau: “To harihari, ta mai ena pusepuse, do ia abia.” (Luka 22:36) Dahaka ia idau? Edia mauri. Tomadiho idauidau taudia edia badu ia bada ia lao, bona hari sibona edia heduru gaudia idia abia be namo.

13. Edukeisini ena badina badana be dahaka, bona tama sina ese edia natudia unai kara dekenai edena bamona idia durua diba?

¹³ Hari inai negai danu, reana tama sina ese moni bona kohu gaukaralaia daladia idia laloa namonamo be namo. Hegeregere, dala oi karaia oiemu natudia be edukeisini maorona idia abia totona, a? Edukeisini ena badina badana be matamata tauna ia durua Iehova ena hesiai tauna namona ai do ia lao. Bona ita abia diba mai anina bada edukeisini be lauma dalanai ita abia. (Isaia 54:13) Tama sina idia laloa danu bema natudia do idia hegeregere moni dalanai sibona idia naria totona. Unai dainai oiemu natudia oi hadibaia, oi durudia sikuli dekenai idia hadibaia gaudia amo anina bada gaudia do idia abia hidi, bona sikuli murinai ma kosi ta idia abia be aonega dalana eiava lasi do umui herevalaia. Unai abia hidi be ruma bese ta ta edia maduna, bona namo lasi haida ese edia abia hidi gauna do idia maumauraia. (Aonega Herevadia 22:6) Ruma dekenai edia natudia idia hadibaia taudia be edena bamona?b Ena be haida ese gaukara namona idia karaia, to haida idia davaria unai gaukara be auka herea, bona natudia idia abia edukeisini be hegeregere lasi. Unai dainai, bema ruma dekenai natudia hadibaia karana oi lalohadailaia, namona be oi laloa namonamo guna, mai laloa maoromaoro ida do oi itaia bema oiemu diba ia hegeregere bona oiemu ura oi biagua diba unai gaukara do oi karaia haorea totona.​—Luka 14:28.

‘Gau Namo Herea Oi Tahua Lasi’

¹⁴ Tanobada ena dokona ia do ginidae lasi dainai, haida ese tanobada ia henia diba gaudia idia tahua matamaia​—ladana bada bona moni bada gaukaradia, bona kohu. Ieremia ena seketere tauna, Baruku, oi laloa. Ia taitai: “Lau madi o, lau be dika vadaeni, badina Lohiabada ese egu hisihisi ena latanai lalohisihisi ma ia atoa kau vadaeni, bona lau tai noho, ia mai bona lau hesiku vadaeni, bona laga-ani sisina lau davaria diba lasi.” (Ieremia 45:3) Baruku be ia hesiku. Ieremia ena seketere tauna ena gaukara be auka bona mai garina. (Ieremia 36:​14-​26) Bona toana be do ia doko lasi. Lagani 18 do idia lao ela bona Ierusalema idia hadikaia ore.

¹⁵ Iehova be Baruku ia hamaoroa, ia gwau: “Lau Lohiabada ese lau haginia vadaeni gauna lau veria diho noho, bona lau ese lau hadoa gauna be lau kokia noho. Inai bamona do lau karaia inai tano ena kahana ibounai dekenai. To oi ese gau namo herea, oi sibona totona, oi tahua noho, a? Lau Lohiabada lau gwau: Inai bamona tahua kara do oi karaia lasi.” Baruku ese ena laloa maoromaoro karana ia haboioa. Ia ese ‘gau namo herea be ia sibona totona ia tahua’ matamaia, reana kohu, ladana bada, eiava tauanina dalanai noho namona. Iehova ese ‘ia hadoa gauna be tano ena kahana ibounai amo do ia kokia’ dainai, Baruku be unai gaudia ia tahua be aonega karana, a? Unai dainai Iehova ese Baruku dekenai inai mai anina bada herevana ia henia: “Badina be lau ese taunimanima ibounai dekenai dika do lau havaraia, to oiemu mauri be oi dekenai do lau henia. Do oi lao gabudia ibounai dekenai oi be do oi heau mauri.” Ierusalema do idia hadikaia ore neganai, kohu ibounai do idia boio! Iehova ese do ia “heau mauri” sibona ia gwauhamatalaia.​—Ieremia 45:​4, 5.

16. Hari inai negai idia noho Iehova ena taunimanima ese Baruku dekenai ia vara gauna amo dahaka idia dibaia diba?

¹⁶ Baruku ese Iehova ena sisiba ia abia dae, bona, Iehova ena gwauhamata hegeregerena, Baruku ia roho mauri. (Ieremia 43:​6, 7) Hari inai negai idia noho Iehova ena taunimanima dekenai unai haheitalai be mai anina bada! Inai be nega namona lasi ‘gau namo herea be ita sibona totona do ita tahua.’ Dahaka dainai? Badina “tanobada, mai ena gau dikadia, taunimanima idia ura dikadika gaudia, be kahirakahira do idia ore.”​—1 Ioane 2:17.

Nega Dokona Gaukaralaia Dalana Namona

17, 18. (a) Nineva taudia idia helalo-kerehai neganai, Iona ena hemami be edena bamona? (b) Iehova ese Iona dekenai dahaka ia hadibaia?

¹⁷ Vadaeni, edena bamona nega dokona ita gaukaralaia namonamo diba? Peroveta tauna Iona dekenai ia vara gauna amo diba oi abia. Ia be “Nineva dekenai ia lao, . . . Vadaeni ia haroro, ia gwau, ‘Dina 40 do idia ore, vadaeni Nineva hanua be do ia dika momokani.’ ” To Iona ia hoa, badina Nineva taudia ese ena hereva idia abia dae bona idia helalo-kerehai! Iehova ese unai hanua ia hadikaia lasi. Iona ena hemami be edena bamona? Ia gwau: “Lohiabada e, oi lau noia inai, lauegu mauri do oi haorea. Badina do lau mase be namo, do lau mauri be dika.”​—Iona 3:​3, 4; 4:⁠3.

¹⁸ Bena Iehova ese Iona dekenai gau badana ia hadibaia. Ia ese “au maragina ta ia hatubua, ela bona Iona ena atai dekenai ia noho. Inai au ese dina ena siahu ia koua, . . . Iona be unai au dainai ia moale bada.” To, Iona ia moale nega sisina sibona, badina unai au ia mase haraga. Dina ese ia gabua dainai Iona ia “badu” bada. Iehova ese ena lalohadai ia hahedinaraia namonamo, ia gwau: “Oi be unai au totona oi bogahisihisi noho, ani? Unai bamona danu, lau be Nineva totona do lau bogahisihisi be namo. Ia be hanua badana momokani, bona ia lalonai be natuna maragidia ibounai [“edia imana idibana bona imana laurina edia idau idia diba lasi taudia,” NW] 120,000 idia noho, boromakau momo herea danu.”​—Iona 4:​6, 7, 9-​11.

19. Edena bamona sibona laloa bada karana ita dadaraia be namo?

¹⁹ Iona be sibona ia laloa bada! Au ia hebogahisi henia, to Nineva taudia​—lauma dalanai “edia imana idibana bona imana laurina edia idau idia diba lasi taudia”​—ia hebogahisi henia lasi. Reana ita danu be unai bamona, ita ura dikadika inai tanobada dikana do ia ore bona unai be maoro! (2 Tesalonika 1:8) To, unai ita naria noho lalonai, ita be mai eda maduna kudou-maoro taudia, lauma dalanai “edia imana idibana bona imana laurina edia idau idia diba lasi taudia” do ita durua. (Mataio 9:​36; Roma 10:​13-​15) Inai nega dokona kwadogina do oi gaukaralaia taunimanima momo oi durua Iehova ena diba mai davana bada do idia abia totona, a? Gaukara ma ta ese hamauria gaukarana ena moale ia hanaia diba lasi, ani?

Do Oi “Laloa Maoromaoro”

20, 21. (a) Dina vairai, edena dala idauidau ai ita “laloa maoromaoro” diba? (b) Ita “laloa maoromaoro” karana dainai dahaka hahenamo do ita abia?

²⁰ Satani ena tanobada ena dokona be kahirakahira ia mai noho lalonai, iseda mauri lalonai hekwakwanai matamatadia do ita davaria. Timoteo Iharuana 3:​13 ia gwau: “Kara dika taudia bona koikoi taudia ese edia kara dika bona edia koikoi do idia habadaia.” To ‘do oi hesiku lasi, bona do oi manoka lasi.’ (Heberu 12:3) Iehova dekenai oi tabekau, goada totona. (Filipi 4:​13, NW) Guna gaudia oi laloa momo lasi, to tanobada ia dika ia lao neganai emu mauri dalana do oi haidaua danu. (Hadibaia Tauna 7:​10) Do oi aonega bona “hesiai tauna mai ena kamonai, bona mai ena kara maoromaoro” ena hakaua dalana oi badinaia.​—Mataio 24:45-​47.

²¹ Nega dokona ena lata be ita diba lasi. To, mai abidadama ida ita gwau diba “gau ibounai edia dokona ena nega be kahirakahira.” Ela bona unai nega, namona be taunimanima ida ita noho neganai, ruma bese ita naria neganai, bona maduna ma haida ita huaia neganai, do ita “laloa maoromaoro.” Unai ita karaia dainai, ita diba momokani dokonai ita be “mai goevagoeva bona kerere lasi”!​—2 Petero 3:14.

[Footnotes]

Hereva Badadia Ita Riviulaia

◻ Taunimanima be edena bamona ita “laloa maoromaoro” diba?

◻ Iseda ruma bese maduna ita huaia neganai, edena bamona ita laloa maoromaoro diba?

◻ Dahaka dainai tama sina ese edia natudia edia edukeisini idia laloa bada be namo?

◻ Baruku bona Iona edia mauri amo dahaka ita dibaia?

2. Iehova ena haheauka karana ese hari inai negai Keristani taudia be edena bamona ia durua?

7. (a) Paulo ese edena bamona ita ia hagoadaia dina ta ta gaudia ita karaia neganai ita “noho namonamo”? (b) Keristani tatau bona hahine ese edia maduna ruma bese lalonai be edena bamona idia laloa be namo?

8. Edena dala ai, ruma bese kwaradia ese edia ruma bese taudia idia naria namonamo diba?

9. Dahaka dainai ruma bese kwaradia ese edia mase eiava gorere totona idia hegaegae be aonega dalana?

10. Edena dala ai Keristani tama sina ese edia natudia totona “moni idia haboua” diba?

14, 15. (a) Baruku ese lauma dalanai laloa maoromaoro karana be edena bamona ia haboioa? (b) Dahaka dainai ‘gau namo herea be sibona totona ia tahua’ be aonega dalana lasi?

[Picture on page 18]

Tau bona ena adavana be idia kara dika heheni neganai, edia turana karana Iehova ida idia hadikaia

[Picture on page 20]

Tama sina ese edia natudia edia edukeisini idia laloa bada be namo