Elia Bamona Do Oi Kamonai, A?
“Inai dina badana do ia ginidae neganai, taunimanima be do idia gari bada momokani. To unai dina do ia ginidae lasi neganai, lau ese peroveta tauna Elia do lau siaia umui dekenai guna.”—MALAKI 4:5.
1. Israela taudia be lagani 500 bamona Gwauhamata Tanona dekenai idia noho murinai, dahaka dika ia vara?
“UNAI tano be aniani namodia gabuna.” (Esodo 3:7, 8) Lagani 1513 B.C.E. ai, Iehova Dirava ese Aigupito ena igui hesiai amo Israela taudia ia ruhaia bena unai tano ia henidia. To itaia! Lagani 500 idia ore vadaeni, bona hari iduhu ten basileiana, Israela dekenai, hitolo bada ia vara. Rei namona idia davaria be auka. Animal idia mase, bona lagani toi mai kahana medu ia diho lasi. (1 King Taudia 18:5; Luka 4:25) Dahaka dainai unai dika ia vara?
2. Israela dekenai unai dika ia vara ena badina be dahaka?
2 Hereva momokani negea karana ese unai dika ia havaraia. King Ahaba ese Dirava ena taravatu ia utua bona Kanana taudia edia king ta ena natuna kekeni Iesebele ia adavaia bona ia ese Bala tomadihona be Israela dekenai ia mailaia neganai, Ahaba ese ia koua lasi. To kara dika bada hereana be, unai dirava koikoi ena dubu ta be Samaria, edia hanua badana dekenai ia haginia. Momokani, Israela taudia idia hakaua kerere, idia laloa Bala tomadiho henia karana dainai uma ena anina bada do idia abia! To, Iehova ese guna ia sisiba henidia hegeregerena, hari idia ‘be do idia mase.’—Deuteronomi 7:3, 4; 11:16, 17; 1 King Taudia 16:30-33.
Dala Idauna ai Idia Tahua Daika be Dirava Korikorina
3. Edena dala amo Elia ese Israela taudia edia lalona ia veria edia hekwakwanai badana dekenai?
3 Hitolo badana ia matamaia neganai, Dirava ena kamonai peroveta tauna Elia be King Ahaba ia hamaoroa: “Lohiabada, Israela ena Mauri Diravana ena ladana dekenai, lau ese oi lau hamaoroa inai, paripari bona medu be do ia diho lasi, lagani rua o toi, ela bona ma lau hereva.” (1 King Taudia 17:1) Unai hereva be dala aukana ai ia guguru ia itaia neganai, king ese Elia ia samania ia gwau ia ese Israela dekenai dika ia havaraia. To Elia ia haere kerere be Ahaba bona ena ruma bese amo ia vara, badina hereva momokani idia negea bona Bala idia tomadiho henia. Unai hepapahuahu idia hamaoromaoroa totona, Iehova ena peroveta tauna ese King Ahaba ia hagoadaia Israela taudia ibounai, Bala ena peroveta taudia 450, bona au helagana ena peroveta taudia 400 be Karamele Ororona dekenai do ia haboudia. Ahaba bona ia lohiaia taudia be unuseniai idia hebou, reana idia laloa unai kara ese medu lasi negana do ia hadokoa. To Elia ese mai anina bada gauna dekenai edia lalona ia veria. Henanadai ia henidia: “Laloa rua ena dala dekenai do umui noho, ela bona edena negai? Bema Lohiabada be Dirava, ia dekenai do umui tomadiho, to bema Bala be Dirava, ia dekenai do umui tomadiho.” Israela taudia idia diba lasi dahaka do idia hereva.—1 King Taudia 18:18-21.
4. Daika be Dirava korikori hepapahuahuna idia hamaoromaoroa totona, Elia ese edena dala ia gwauraia?
4 Lagani momo lalonai Israela taudia ese Iehova tomadiho henia karana be Bala tomadihona ida idia hatamonaia toho. Daika be Dirava korikori hepapahuahuna idia hamaoromaoroa totona, Elia ese tahua dalana ia gwauraia. Ia ese boromakau ta be boubou totona do ia hegaegaelaia, bona ma ta be Bala ena peroveta taudia ese do idia hegaegaelaia. Bena Elia ia gwau: “Bala ena peroveta taudia ese edia dirava do idia noia, bona lau ese Lohiabada do lau noia, bona edena dirava ese lahi dekena amo do ia haere, ia be Dirava.” (1 King Taudia 18:23, 24) Mani oi laloa guriguri ia haerelaia totona lahi be guba amo ia diho mai!
5. Edena bamona ia hedinarai Bala tomadihona be mai anina lasi?
5 Elia ese Bala ena peroveta taudia ia hamaorodia do idia matamaia. Boromakau tau ta idia hegaegaelaia bona boubou patana dekenai idia atoa. Bena boubou patana idia mavaru hagegea, idia guriguri: “Bala e, ai dekenai do oi haere.” Unai idia karaia daba amo “ela bona dina tubua.” Elia ese idia dekenai ia hevaseha ia gwau “do umui boiboi bada.” Reana Bala be mai anina bada gauna dainai ia bisi, eiava “sedira ia mahuta noho, do umui hanogaia.” Nega sisina murinai Bala ena peroveta taudia idia lalo-dika momokani. Itaia! Kaia amo edia kopina idia utua, bona rara ia diho badabada. Bona idia 450 iboudiai be idia boiboi badabada dainai regerege be dika herea momokani! To haere be lasi.—1 King Taudia 18:26-29.
6. Daika be Dirava korikorina idia tahua totona, Elia ese dahaka gaudia ia hegaegaelaia?
6 Hari be Elia ena nega. Ia ese Iehova ena boubou patana ia haginia lou, hagegea dadaira ia karaia, bona boubou gauna ia hegaegaelaia. Bena ia hamaoroa ranu be au rakuraku bona boubou gauna latanai idia bubua. Hodu badadia 12 amo ranu idia bubua boubou patana dekenai ela bona dadaira danu ia honu. Edia lalo-hekwarahi mani oi laloa Elia ia guriguri neganai, ia gwau: “Lohiabada e, Aberahamo bona Isako bona Iakobo edia Dirava e, hari dina do oi hedinaraia momokani oi be Israela ena Dirava, bona lau, oiemu hesiai tauna, ese inai kara oiemu oda dekenai lau karaia noho. Lohiabada e, lau dekenai do oi haere, mani oi haere, vadaeni inai bese taudia do idia diba, oi Lohiabada sibona be Dirava momokani. Bona oi ese idia edia lalona do oi hagiroa lou oi dekenai.”—1 King Taudia 18:30-37.
7, 8. (a) Iehova be edena bamona Elia ena guriguri ia haerelaia? (b) Karamele Ororona dekenai idia vara gaudia dainai dahaka ia vara?
7 Elia ena guriguri ena haere be, ‘Iehova ese lahi ia siaia diho, unai boubou gauna ia gabua ore, bona au, bona nadi, bona dadaira danu, ranu ibounai be ia kaukau momokani.’ Taunimanima be tano dekenai idia moru idia gwau: ‘Iehova be Dirava, Iehova be Dirava.’ (1 King Taudia 18:38, 39) Hari Elia ese kara badana ia karaia. Ia oda henidia: “Bala peroveta taudia do umui dogoatao, ta do ia heau mauri lasi.” Kisona ena kourana ai idia hamasedia murinai, ori koremadia ese guba idia koua. Vadaeni, medu lasi negana ia ore unai!—1 King Taudia 18:40-45; Deuteronomi 13:1-5 itaia.
8 Unai be dina badana momokani! Daika be Dirava korikorina idia tahua lalonai, Iehova ia hahedinaraia ia be Dirava momokanina. Ma danu, unai gaudia dainai Israela taudia momo edia kudouna be Dirava dekenai idia giroa lou. Unai bona ma dala haida ese idia hamomokania Elia be kamonai peroveta tauna, bona ia sibona ena mauri be peroveta dalanai ma tau ta ia laulaulaia.
“Peroveta Tauna Elia” Do Ia Mai, A?
9 Gabeai, Dirava ese Malaki amo ia peroveta, ia gwau: “Inai dina badana do ia ginidae neganai, taunimanima be do idia gari bada momokani. To unai dina do ia ginidae lasi neganai, lau ese peroveta tauna Elia do lau siaia umui dekenai guna. Bona Elia ese tamana taudia bona edia natuna taudia edia laloa do ia hatamonaia lou, vadaeni mai laloa tamona do idia noho. Unai bamona do idia karaia, lau ese mase herevana ta dekena amo emui tano do lau hadikaia ore garina.” (Malaki 4:5, 6) Elia be guna ia mauri bona unai hereva be lagani 500 murinai idia gwauraia. Unai be peroveta herevana dainai, aposetolo edia negai idia noho Iuda taudia ese Elia do ia mai unai peroveta herevana hagugurua totona idia naria.—Mataio 17:10.
10. Idia perovetalaia Elia be daika, bona edena bamona ita diba?
10 Vadaeni, do ia mai Elia be daika? Iesu Keriso ese unai ia hahedinaraia, ia gwau: “Ioane Bapatiso ese iena haroro ia hamatamaia ia mai bona harihari, Guba Basileia abia totona be taunimanima ese idia heatu henia noho, bona heatu taudia ese idia ura dogoatao momokani. Badina be peroveta taudia ibounai bona Mose ena taravatu ese Basileia idia herevalaia, ia mai bona Ioane. Bema emui lalona idia hegeregere, inai hereva do umui abia dae: Ioane be Elia, peroveta taudia idia gwauraia do ia mai tauna.” Oibe, Elia ese Ioane Bapatiso ia laulaulaia. (Mataio 11:12-14; Mareko 9:11-13) Aneru ta ese Ioane ena tamana, Sekaraia, ia hamaoroa, Ioane be “mai goadana bona mai siahuna, Elia peroveta tauna ena kara hegeregerena” bona “Lohiabada ena bese taudia do ia abidia hegaegae.” (Luka 1:17) Ioane ia karaia bapatisona ese tau ta be Taravatu ia utua dainai ia helalo-kerehai ena toana. Unai Taravatu ese Iuda taudia be Keriso dekenai ia hakaudia. (Luka 3:3-6; Galatia 3:24) Unai dainai Ioane ena gaukara ese ‘taunimanima ia hegaegaelaia Iehova do idia abia dae totona ia hahedinaraia.’
11. Pentekoste ai, Petero ese ‘Iehova ena dina’ be edena bamona ia herevalaia, bona edena negai ia vara?
11 Ioane Bapatiso be “Elia” bamona ia gaukara ese ia hahedinaraia ‘Iehova ena dina’ be kahirakahira. Dirava ese ena inai taudia ia hamasea bona ena taunimanima ia hamauria dinana be aposetolo Petero ese ia herevalaia danu. Ia hahedinaraia Pentekoste 33 C.E. ai idia vara hoa karadia be Ioela ese ia perovetalaia Dirava ena lauma bubua karana idia hagugurua. Petero ia hahedinaraia unai be ‘Iehova ena dina badana bona namo hereana’ ia do mai lasi neganai do ia vara. (Kara 2:16-21; Ioela 2:28-32) Lagani 70 C.E. ai, Iehova ese ena Hereva ia hagugurua bona Roma tuari taudia ia gaukaralaia, ena Natuna idia dadaraia besena latanai ena hahemaoro karana do idia karaia totona.—Daniela 9:24-27; Ioane 19:15.
12 To, lagani 70 C.E. murinai ma gau ta do ia vara. Aposetolo Paulo ese do ia mai ‘Iehova ena dina’ be Iesu Keriso ena noho ida ia hatamonaia. Ma danu, aposetolo Petero ese unai dina ia herevalaia neganai, “guba matamata bona tanobada matamata,” do idia vara gaudia, ia herevalaia danu. (2 Tesalonika 2:1, 2; 2 Petero 3:10-13) Laloaboio lasi, Ioane Bapatiso ese Elia bamona gaukarana ia karaia, lagani 70 C.E. ai ‘Iehova ena dina’ ia do mai lasi neganai. Unai ibounai ita laloa hebou neganai ia hedinarai goevagoeva gau ma ta do ia vara Elia ena gaukara ese ia hahedinaraia hegeregerena. Unai be dahaka?
Elia Ena Lauma Idia Abia
13, 14. (a) Elia ena gaukara bona hari inai negai horoa Keristani taudia edia gaukara be edena bamona idia hegeregere? (b) Kerisendom lalonai idia noho hereva momokani idia negea taudia ese dahaka idia karaia?
13 Elia ena gaukara ese Ioane Bapatiso ena gaukara sibona ia laulaulaia lasi to horoa Keristani taudia edia gaukara ia laulaulaia danu hari inai nega dikana lalonai ela bona ‘Iehova ena dina’ do ia mai. (2 Timoteo 3:1-5) Elia ena lauma bona siahu ida idia ese tomadiho momokanina idia badinaia goadagoada. Bona unai be mai anina bada! Keriso ena aposetolo taudia idia mase murinai, haida ese Keristani tomadiho momokanina idia negea, Elia ena negai Israela dekenai Bala tomadihona ia bada ia lao hegeregerena. (2 Petero 2:1) Sibona idia gwauraia Keristani taudia ese Keristani tomadiho be tomadiho koikoi hahediba herevadia bona karadia ida idia haboua matamaia. Hegeregere, idia ese dirava koikoi idia tomadiho henia taudia edia hahediba hereva, Baibel ese ia hadibaia lasi herevana, taunimanima be mai mase diba lasi soul herevana unai, idia abia dae. (Hadibaia Tauna 9:5, 10; Esekiela 18:4) Kerisendom lalonai idia noho hereva momokani idia negea taudia ese Dirava momokani tamona, Iehova, ena ladana idia gaukaralaia lasi. To idau, idia ese Toi Tamona Diravana idia tomadiho henia. Danu, idia ese Bala tomadiho henia karana bamona, Iesu bona ena sinana, Maria, edia laulau idia tomadiho henia. (Roma 1:23; 1 Ioane 5:21) To unai sibona lasi.
14 Lagani 1800 amo ela bona hari, Kerisendom dubu gunalaia taudia ese Baibel ena kahana haida idia daradaralaia matamaia. Hegeregere, Genese ia gwauraia havaraia karana idia dadaraia bona evolusen idia abia dae, idia gwau ia be “saiens hegeregerena.” Unai be Iesu Keriso bona ena aposetolo taudia edia hahediba herevadia hegeregerena lasi. (Mataio 19:4, 5; 1 Korinto 15:47) To, Iesu bona ia murinai idia raka taudia ginigunadia hegeregerena, horoa Keristani taudia hari inai negai ese Baibel ena hereva, Dirava ese gau iboudiai ia havaraia herevana, idia abia isi.—Genese 1:27.
15, 16. Kerisendom bamona lasi, daidia ese hanaihanai lauma aniani idia moalelaia, bona edena dala amo idia abia?
15 Tanobada ena “dokona negana” ia matamaia neganai, Kerisendom lalonai lauma dalanai hitolo badana ia vara. (Daniela 12:4; Amosa 8:11, 12) To horoa Keristani taudia edia orea maragina ese “aniani neganai” Dirava ia henia lauma aniani idia moalelaia, Elia ena negai hitolo badana ia vara neganai, Iehova ese dala ia karaia Elia be aniani ia abia hegeregerena. (Mataio 24:45; 1 King Taudia 17:6, 13-16) Guna edia ladana idia gwauraia International Bible Students, to Dirava ena kamonai hesiai taudia be gabeai Baibel amo ladana Iehova ena Witness taudia idia abia.—Isaia 43:10, NW.
16 Elia ese ena ladana hegeregerena ia kara, ena anina be “Egu Dirava be Iehova.” Iehova ena tanobada hesiai taudia edia magasin badana, Gima Kohorona, ese hanaihanai Dirava ena ladana ia gaukaralaia. Momokani, ena magasin iharuana (August 1879) ia hahedinaraia idia abia dae Iehova ese unai magasin ia naria. Unai magasin bona Watch Tower Society ena buka idauidau ese Kerisendom bona Babulonia Badana, tomadiho koikoi ena tanobada oreana, ena orena edia hahediba herevadia, Baibel amo idia abia lasi herevadia unai, idia hahedinaraia, bona Dirava ena Hereva, Baibel, ena hereva idia abia isi.—2 Timoteo 3:16, 17; Apokalupo 18:1-5.
Hahetoho Lalonai Idia Kamonai Noho
17, 18. Bala ena peroveta taudia idia hamasea dainai, Iesebele be dahaka ia karaia, to Elia be edena bamona heduru ia abia?
17 Edia kara idia hedinarai neganai, dubu gunalaia taudia edia kara be Iesebele ena kara hegeregerena, Elia ese Bala ena peroveta taudia ia hamasea ia kamonai neganai. Ia ese Iehova ena kamonai peroveta tauna dekenai hereva ia siaia, ia gwau do idia hamasea. Unai be hereva kava lasi, badina Iesebele ese Dirava ena peroveta taudia momo ia hamasea vadaeni. Ia gari dainai, Elia be sautwest kahanai ia heau lao, Bere Sieba dekenai. Unuseniai ena hesiai tauna ia rakatania, ia raka lao ela bona tano gagaena dekenai ia ginidae, bona ia guriguri ia ura do ia mase. To Iehova ese ena peroveta tauna ia rakatania lasi. Aneru ta be ia mai bona Elia ia hegaegaelaia daudau dekenai ia noho Horeb (Sinai) Ororona dekenai do ia lao. Unai dalanai ia ese aniani ia abia dina 40 lalonai kilomita 300 bamona do ia raka lao diba totona. Horeb dekenai, Dirava ese Elia ia hereva henia ena siahu be lai badana, tano mareremarere, bona lahi badana amo ia hahedinaraia murinai. Unai gaudia ese ena lauma helaga, eiava gaukara siahuna, idia hahedinaraia. Bena Iehova ese ena peroveta tauna ia hereva henia. Unai kara ese Elia ia hagoadaia dalana mani oi laloa. (1 King Taudia 19:1-12) Edena bamona bema tomadiho momokani inai henia taudia ese ita idia dagedage henia dainai Elia bamona do ita gari? Elia dekenai ia vara gauna ese ita ia durua do ita diba Iehova ese ena taunimanima ia rakatania lasi.—1 Samuela 12:22.
18 Dirava ese ia hahedinaraia goevagoeva Elia dekenai peroveta gaukarana ia do noho. Ma danu, ena be Elia ia laloa Israela dekenai ia sibona be Dirava momokanina ia tomadiho henia, to Iehova ese ia hahedinaraia taunimanima 7,000 be Bala idia tomadiho henia lasi. Bena Dirava ese Elia be ena gaukara gabuna dekenai ia siaia lou. (1 King Taudia 19:13-18) Elia bamona, reana tomadiho momokani idia inai henia taudia ese ita idia hamasea toho danu. Reana dagedage bada do ita abia, Iesu ese ia peroveta hegeregerena. (Ioane 15:17-20) Nega haida reana ita gari. To, Elia bamona do ita kara diba, Dirava ena hahegoada ia abia bena Iehova ena hesiai gaukara be mai ena kamonai ida ia haheaukalaia.
19. Tanobada Ibounai Tuarina Ginigunana lalonai, horoa Keristani taudia ese dahaka idia davaria?
19 Tanobada Ibounai Tuarina Ginigunana lalonai, horoa Keristani taudia haida be dagedage karana aukana dainai idia gari bona haroro gaukarana idia hadokoa. Edia kerere be idia laloa edia gaukara tanobada dekenai be ia ore. To Dirava ese ia dadaraidia lasi. To idau, mai ena hebogahisi ida ia naridia, Elia dekenai aniani ia henia hegeregerena. Elia bamona, kamonai horoa taudia ese Dirava ena sisiba idia abia dae bona idia goada lou. Basileia ena sivarai harorolaia gaukarana ena hahenamo badana idia itaia matamaia.
20. Hari inai negai, Elia bamona idia kamonai taudia ese dahaka hahenamo idia abia?
20 Iesu ese ena noho ia perovetalaia neganai, ia ese tanobada hegegemadai gaukarana, inai tanobada dikana ena dokona ia do mai lasi neganai idia haorea gaukarana, ia gwauraia. (Mataio 24:14) Hari inai negai, horoa Keristani taudia bona edia bamodia milioni momo, tanobada paradaiso maurina idia naria taudia, ese unai gaukara idia karaia. Basileia idia harorolaia ela bona dokona be Elia bamona idia kamonai taudia sibodia edia hahenamo.
Elia Bamona Do Oi Kamonai Noho
21, 22. (a) Horoa Keristani taudia ese edena gaukara idia gunalaia hari? (b) Daika ena heduru dainai haroro gaukarana ita karaia diba, bona dahaka dainai unai heduru be mai anina?
21 Mai edia lalo-goada ida, Elia bamona, horoa Keristani taudia korikoridia edia orena maragina ese edia maduna idia huaia, terona dekenai ia helai vadaeni King Iesu Keriso ena kohu tanobada dekenai idia naria totona. (Mataio 24:47) Bona lagani 60 ia hanaia vadaeni lalonai, Dirava ese unai horoa taudia ia gaukaralaia, tanobada paradaisona ai do idia mauri hanaihanai taudia be hahediba taudia ai idia halaodia gaukarana idia gunalaia. (Mataio 28:19, 20) Unai taudia milioni momo idia moale diba badina horoa orena taudia, ena be idia be haida sibona, to idia be mai edia goada bona kamonai ida edia maduna idia huaia!
22 Unai Basileia haroro gaukarana be goevadae lasi taudia ese idia karaia, bona Iehova ese ia dekenai idia guriguri bona idia tabekau henia taudia dekenai ia henia goadana dainai idia karaia diba. Iamesi ese kara maoromaoro tauna ena guriguri ena siahu be Elia ena haheitalai amo ia herevalaia neganai, ia gwau “Elia be taunimanima sibona, ita bamona.” (Iamesi 5:16-18) Nega ibounai Elia be peroveta herevadia ia gwauraia eiava hoa karadia ia karaia lasi. Ena hemami bona manoka gaudia be ita bamona, to mai kamonai ida Dirava ia hesiai henia. Ita danu be Dirava ena heduru ita abia bona ia ese ita ia hagoadaia dainai, Elia bamona do ita kamonai noho diba.
23. Dahaka dainai do ita kamonai noho bona vaira negana be mai moale ida do ita laloa be mai badina?
23 Badina namona dainai do ita kamonai noho bona vaira negana be mai moale ida do ita laloa. Oi laloatao lagani 70 C.E. ai ‘Iehova ena dina’ be ia do mai lasi neganai, Ioane Bapatiso ese Elia bamona gaukarana ia karaia. Elia ena lauma bona siahu ida, horoa Keristani taudia ese unai bamona gaukara, Dirava ia henia gaukarana, idia karaia vadaeni tanobada hegegemadai. Unai ese ia hamomokania goevagoeva ‘Iehova ena dina’ be kahirakahira.
Edena Bamona Oi Haere?
◻ Edena dala ai Karamele Ororona dekenai idia hamomokania Iehova be Dirava korikorina?
◻ Daika be ‘do ia mai Elia,’ bona dahaka ia karaia?
◻ Hari inai negai horoa Keristani taudia be edena bamona idia hamomokania Elia ena lauma idia abia?
◻ Elia bamona do ita kamonai diba ena badina be dahaka?
9. Malaki 4:5, 6 ese dahaka ia perovetalaia?
12. (a) Paulo bona Petero be edena bamona ‘Iehova ena dina’ idia herevalaia? (b) Dahaka dainai ita diba gau ta do ia vara momokani Elia ena gaukara ese ia hahedinaraia hegeregerena?
[Box on page 15]
Elia Be Edena Guba Dekenai Ia Daekau?
‘IDIA [Elia bona Elisaia] be idia raka noho, bona herevahereva noho neganai, nega tamona lahi kariota ta, bona lahi hosidia danu ese idia ruaosi ia hapararaia. Unai neganai Elia be koehirihiri ese ia abia daekau lao guba dekenai.’—2 King Taudia 2:11.
Unai siri lalonai “guba” ena anina be dahaka? Nega haida unai hereva ena anina be Dirava bona ena aneru memerodia edia noho gabuna ia herevalaia. (Mataio 6:9; 18:10) “Guba” ese dina, hua, bona hisiu idia noho gabuna ia herevalaia danu. (Deuteronomi 4:19) Bona Baibel ese unai hereva ia gaukaralaia tanobada kahirakahira ia noho guba, manu idia roho bona lai idia toa gabuna, ia herevalaia neganai.—Salamo 78:26; Mataio 6:26, NW.
Peroveta tauna Elia be edena guba dekenai ia daekau? Toana be, Dirava ese tanobada kahirakahira ia noho guba dekenai ia abia lao bona kahana ma ta dekenai ia atoa. Lagani momo murinai, Elia be tanobada dekenai ia do noho, badina ia ese Iuda ena King Iehorama dekenai revareva ia torea. (2 Sivarai 21:1, 12-15) Elia be Iehova Dirava ena noho gabuna dekenai ia daekau lasi be gabeai Iesu Keriso ese ia hamomokania, ia gwau: “Tau ta lasi guba dekenai ia daekau vadaeni, guba dekena amo ia diho Tauna sibona, Taunimanima ena Natuna unai.” (Ioane 3:13) Goevadae lasi taudia be guba dekenai idia vareai dalana be Iesu Keriso ese ia kehoa ia mase, ia toreisi-lou, bona guba dekenai ia daekau murinai.—Ioane 14:2, 3; Heberu 9:24; 10:19, 20.