Kara Maoromaoro Tanobadana be Nihi ta Lasi!

AMERICA gavamani tauna Daniel Webster ia gwau, “tanobada ai idia noho taudia dekenai kara maoromaoro be mai ena anina bada.” Bona Baibel ia gwau: “Lohiabada ese, kara maoromaoro ia ura henia noho.” (Salamo 37:28) Dirava ena toana hegeregerena ia havaradia dainai, taunimanima ginigunadia rua edia kara be Dirava ena kara bamona, unai kara ta be kara maoromaoro.​—Genese 1:​26, 27.

Baibel ese “Iuda lasi taudia be Mose ena Taravatu idia diba lasi, to idia haida ese sibodia edia laloa diari dekena amo taravatu idia badinaia” ia herevalaia danu. Unai amo idia hahedinaraia, “Dirava ena Taravatu be edia kudouna dekenai ia noho vadaeni. Idia edia kudouna ena laloa ese ia hamomokania Dirava ena Taravatu be edia kudouna lalonai ia noho. Unai dainai nega haida edia lalona dekenai idia gwau, ‘Egu kara ia kerere,’ bona nega haida edia lalona dekenai idia gwau, ‘Egu kara be ia maoro.’ ” (Roma 2:​14, 15) Oibe, taunimanima be mai edia lalona ena mamina​—⁠maoro bona kerere edia toana idia diba. Ia hedinarai goevagoeva, taunimanima be kara maoromaoro idia ura henia momokani.

Taunimanima edia ura kara maoromaoro totona be edia noho namo tahua karana ida ia hegeregere, badina Salamo 106:3 ia gwau: “Mai edia laloa maoromaoro bona edia momokani taudia be namo. Nega ibounai kara maoromaoro idia karaia taudia danu be namo.” To, dahaka dainai taunimanima be kara maoromaoro tanobadana idia do havaraia lasi?

Dahaka Dainai Taunimanima Idia Kwalimu Lasi?

Taunimanima idia kwalimu lasi kara maoromaoro tanobadana idia havaraia totona ena badina ta be iseda tama sina ginigunadia, Adamu bona Heva amo kerere ita abia. Baibel ia gwau: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.” (Roma 5:12) Unai kerere be kara dika. Ena be Dirava ese idia ia havaraia neganai kerere ta ia noho lasi, to Adamu bona Heva ese Dirava idia gwau-edeede henia dainai, kara dika taudia ai sibodia idia halaoa. (Genese 2:​16, 17; 3:​1-6) Unai dainai, kara dika karaia urana edia natudia dekenai idia henia.

Kara dika karaia urana ese mataganigani bona idau bese taudia dadaraia karadia ia havaraia, ani? Bona unai kara ese kara gageva tanobada ai ia habadaia, ani? Mataganigani dainai taunimanima ese hodahoda bona ranu idia hadikaia bona moni dekenai taunimanima idia biagudia auka! Idau bese taudia dadaraia karana ese bese idauidau idia hepapahuahu karana bona bese idauidau kara gageva henidia karana ia havaraia. Unai kara ese taunimanima idia doria idia henaohenao, idia kara koikoi, bona ma taunimanima haida idia hadikaia.

Ena be ita ura dikadika kara maoromaoro bona kara namo ita karaia, to ura dikadia dainai, ita be hegeregere lasi. Aposetolo Paulo ia gwau: “Kara namodia lau ura karaia neganai, be lau karaia diba lasi. Bona kara dikadia lau ura lasi karaia neganai, be lau karaia inai.” Bena unai hekwarahi ia hahedinaraia, ia gwau: “Momokani, egu kudouna be Dirava ena Taravatu dekenai ia moale bada. To lau davaria, egu lalona dekenai taravatu idauna ta ia gaukara noho. Inai taravatu ese egu lalona ia ura henia Taravatuna ia tuari henia noho. Vadaeni inai taravatu, egu lalona dekenai kara dika ia havaraia gauna ese lau ia guia noho.” (Roma 7:​19-​23) Toana be, hari inai negai ita be unai bamona ita hekwarahi danu. Unai dainai kara gageva be nega momo idia vara.

Taunimanima edia lohia dalana ese kara gageva ia habadaia tanobada ai. Tano iboudiai, taravatu bona pulisi taudia idia noho. Kota biagudia bona kota idia noho danu. Momokani, taunimanima namodia haida ese taunimanima edia maoro bona maka tamona ai hahemaoro henia karana idia abia isi toho. To, edia gaukara momo ena anina ia vara lasi. Dahaka dainai? Edia kara ese anina idia havaraia lasi ena badina be Ieremia 10:23 ese ia herevalaia, ia gwau: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” Dirava amo daudau idia noho dainai, taunimanima be hegeregere lasi kara maoromaoro tanobadana idia haginia totona.​—Aonega Herevadia 14:12; Hadibaia Tauna 8:⁠9.

Taunimanima ese kara maoromaoro tanobadana idia haginia ia koua gauna badana be Satani Diabolo. Baibel ese ia hahedinaraia goevagoeva gwau-edeede aneruna Satani be “alaia tauna” bona “koikoi tauna” ginigunana bona ia “ese tanobada taudia ibounai ia gunalaia noho.” (Ioane 8:44; 1 Ioane 5:19) Aposetolo Paulo ia gwau Satani be “inai tanobada ena dirava.” (2 Korinto 4:​3, 4) Ia be kara maoromaoro ia inai henia dainai, Satani be ia gaukara goadagoada kara dika ia habadaia totona. Ia ese tanobada ia gunalaia noho negana lalonai, kara gageva idauidau bona idia havaraia hisihisi ese taunimanima do ia guia.

Inai ibounai ena anina be kara gageva be vaia do ia vara taunimanima dekenai, a? Kara maoromaoro tanobadana be do ia vara diba lasi nihi ta, a?

Kara Maoromaoro Tanobadana Do Ia Vara Momokani​—⁠Edena Bamona?

Kara maoromaoro tanobadana ena helaro ia vara momokani totona, taunimanima be kara gageva ena badina ia kokia tauna idia davaria be namo. To daika ese kara dika, Satani, bona ena lohia siahuna ia kokia diba? Ia hedinarai goevagoeva, tau ta eiava taunimanima edia orea ta be ia hegeregere lasi unai bamona gaukara badana ia karaia. Iehova Dirava sibona be ia hegeregere! Baibel ese ia herevalaia, ia gwau: “Ia be Nadi Badana, iena gaukara be namo momokani. Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro.” (Deuteronomi 32:⁠4) Ia ese “kara maoromaoro ia ura henia” dainai, Iehova ia ura taunimanima ese kara maoromaoro tanobadana ai mauri do idia moalelaia.​—Salamo 37:⁠28.

Aposetolo Petero ese Dirava ena ura kara maoromaoro tanobadana ia havaraia totona ia herevalaia, ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13) Unai “guba matamata” be ita itaia diba gubana lasi. Dirava ese guba korikorina ia havaraia neganai ia goevadae, bona iena hairai ia hahedinaraia. (Salamo 8:3; 19:​1, 2) “Guba matamata” ena anina be tanobada ia lohiaia gavamani matamatana. Hari ia noho “guba” ena anina be taunimanima ese idia haginia gavamanidia. Kahirakahira, Dirava ena tuari Aramagedono dekenai, unai do idia ore bena “guba matamata”​—⁠iena guba Basileiana, eiava gavamani​—⁠ese edia gabu do ia abia. (Apokalupo 16:​14-16) Unai Basileia ena pavapava be Iesu Keriso. Taunimanima edia lohia siahuna be do ia haorea vaitani, bona unai Basileia be do ia lohia ela bona hanaihanai.​—Daniela 2:⁠44.

Vadaeni, “tanobada matamata” be dahaka? Ia be tanobada matamata korikorina lasi, badina be Dirava be tanobada ia karaia namo herea, taunimanima ese do idia noholaia totona, bona ena ura be do ia noho hanaihanai. (Salamo 104:⁠5) “Tanobada matamata” ena anina be taunimanima edia bese matamatana. (Genese 11:​1; Salamo 96:⁠1) Do ia ore “tanobada” ena anina be inai tanobada dikana ena kara lalonai idia vareai taudia. (2 Petero 3:⁠7) Edia gabu ia abia “tanobada matamata” be Dirava ena hesiai taudia korikoridia, kara dika idia inai henia bona kara maoromaoro idia ura henia taudia. (Salamo 37:​10, 11) Unai dala ai, Satani ena tanobada be do ia ore.

To dahaka do ia vara Satani dekenai? Aposetolo Ioane ese ia perovetalaia, ia gwau: “Inai aneru [Keriso Iesu] ese unai huala, unai idaunegai gaigaina, ma iena ladana be ‘Diabolo’ bona ‘Satani,’ ia dogoatao, seini dekenai ia guia. Vadaeni do ia guia noho, ela bona lagani 1,000 idia ore. Aneru ese unai huala be guri dobu masemase lalonai ia negea diho. Vadaeni unai guri ia lokaia, bona koua toana ia karaia. Satani be unai bamona ia koua, tanobada bese do ia koia diba lasi totona.” (Apokalupo 20:​1-3) Seini amo Satani idia guia neganai iena siahu be guri dobu masemase dekenai ia noho dibura tauna ena siahu hegeregerena. Taunimanima ese unai do idia moalelaia bada, badina be kara maoromaoro tanobadana be unai kara murinai do ia vara! Bona lagani 1,000 idia ore neganai, Satani be do idia hadikaia vaitani.​—⁠Apokalupo 20:​7-10.

To, Adamu bona Heva amo ita abia kara dika dekenai dahaka do ia vara? Iehova be kara dika kokia dalana ia hegaegaelaia vadaeni. “Taunimanima ena Natuna bamona ia mai . . . iena mauri do ia atoa diho, taunimanima momo edia dika davana karaia totona.” (Mataio 20:28) Inai hereva “dika davana” ena anina be, abia mauri taudia hoia lou totona idia henia davana. Iesu ese ena mauri goevadaena ia henia davana bamona, taunimanima ia hamauridia totona. ​—⁠2 Korinto 5:14; 1 Petero 1:​18, 19.

Hari inai negai danu Iesu ena boubou gauna ese ita ia durua diba. Unai ita abidadama henia karana amo, Dirava vairanai ita goeva diba. (Kara 10:43; 1 Korinto 6:11) Dirava ena Basileia ena lohia siahuna henunai, unai mauri davana ese taunimanima amo kara dika do ia kokia. Baibel ena buka ginigabena ese Dirava ena terona amo ia aru lao “mauri ranuna ena sinavai” ia herevalaia, bona sinavai ena kahana kahana be mauri audia idia gini bona edia raurau be “bese idauidau idia hanamoa” totona. (Apokalupo 22:​1, 2) Unuseniai Baibel ese ia hahedinaraia edena bamona Iesu ena boubou gauna amo iseda Havaraia Tauna ese dala ia karaia, kara dika be taunimanima amo ia kokia totona. Unai henia gauna ena heduru badana be kara dika bona mase amo kamonai taudia do ia ruhaia.

Kara Maoromaoro Tanobadana Ena Mauri

Mauri, Basileia lohia siahuna henunai, mani oi laloa. Taravatu utua karadia bona dagedage karadia be guna karadia. (Aonega Herevadia 2:​21, 22) Moni dainai idia vara kara gageva be do idia ore. (Salamo 37:6; 72:​12, 13; Isaia 65:​21-23) Taunimanima edia noho dalana, edia kopina, edia iduhu bona bese dainai idia inai henia karadia be do idia ore. (Kara 10:​34, 35) Tuari bona tuari kohudia be do idia noho lasi. (Salamo 46:⁠9) Taunimanima milioni momo be mase amo do idia toreisi lou kara gageva idia noho lasi tanobadana dekenai. (Kara 24:15) Taunimanima iboudiai be mauri goevadaena mai goada ida do idia moalelaia. (Iobu 33:25; Apokalupo 21:​3, 4) Baibel ese ita ia hagoadaia, ia gwau: “[Iesu Keriso] ese noho hanaihanai kota maoromaorona, taunimanima ibounai dekenai do ia mailaia.”​—⁠Isaia 42:3

Hari inai nega lalonai, haida ese ita dekenai kara gageva idia karaia, to namona be nega ta kara gageva ita karaia lasi idia dekenai. (Mika 6:⁠8) Ena be kara gageva ita haheaukalaia, to namona be lalohadai namodia laloa karana ita goadalaia. Iehova ese ia gwauhamatalaia kara maoromaoro tanobadana be kahirakahira do ia vara momokani. (2 Timoteo 3:​1-5; 2 Petero 3:​11-13) Siahu Ibounai Diravana ese gwauhamata ia henia vadaeni, bona “anina do ia havaraia.” (Isaia 55:​10, 11) Hari be nega namona Dirava ena ura ita dekenai ita dibaia, unai amo kara maoromaoro tanobadana dekenai do ita noho totona ita hegaegae.​—⁠Ioane 17:3; 2 Timoteo 3:​16, 17.

[Picture on page 7]

Dirava ese ia gwauhamatalaia tanobada matamatana lalonai kara gageva iboudiai do ia kokia