Dahaka Dainai Tanikiu Karana Ita Hahedinaraia be Namo?

HARLEY be ena doruna turiana dekenai operesen ia abia dainai masini gaukaralaia gaukarana ia haidaua bona opesi gaukara ia karaia. Idia nanadaia ena gaukara ia haidaua dainai edena bamona ia laloa neganai, Harley ia gwau: “Masini gaukaralaia gaukarana lau laloa momo. To, egu lalohadai momokanina be inai, hari lau karaia gaukara dekenai lau moale bada, guna lau karaia gaukara dekenai bamona lasi.”

Ia moale ena badina ia gwauraia neganai, Harley ia gwau: “Unai be lau gaukara hebou taudia edia kara dainai. Idia be egu gaukara gunana gabuna dekenai bamona lasi, hari egu gunalaia tauna bona egu gaukara hebou taudia be egu gaukara idia laloa bada, bona hanamoa hereva idia gwauraia lau dekenai. Unai be idau momokani.” Iena mamina be ia be gaukara namona ia karaia bona idia ura henia dainai, hari Harley be mai ena moale danu ia gaukara.

Haida ese gau ta idia karaia dainai hanamoa eiava tanikiu herevadia ita gwauraia neganai, idia moale. To, tanikiu lasi karana be moale hakerua bamona karana, Shakespeare ese ia herevalaia bamona, ia gwau: “Sinou negana ena lai oi mai, oi mai, oi be taunimanima ena tanikiu lasi karana ena dika oi hanaia lasi.” Madi, momo be unai bamona hebogahisi lasi karana idia mamia vadaeni.

Tanikiu Lasi Karana Dainai Oi Naria

Hari inai tanobada lalonai, tanikiu hereva momokanidia be idia boio noho. Hegeregere, toretore tauna ta be inai henanadai ia henia: “Bema do ia headava kekeni be nega ia atoa headava dekenai do idia mai taudia edia kadi 200 ia torea totona, badina be dahaka nega ia atoa lasi tanikiu kadi ia torea totona harihari gaudia 163 idia henia taudia dekenai?” Nega momo unai auka lasi herevana “tanikiu” idia gwauraia lasi. Lau guna karana ese tanikiu karana ena gabu ia abia. Unai kara be inai nega dokona ena toa ta. Aposetolo Paulo ia gwau: “Namona be oi diba nega dokona ai gau dikadia momo herea do idia vara. Taunimanima ese sibodia edia ura do idia tahua . . . Idia be tanikiu karana do idia diba lasi vaitani.”​—⁠2 Timoteo 3:​1, 2, Phillips.

Nega haida, hanamoa koikoi herevana ese tanikiu henia karana ena gabu ia abia. Tanikiu herevadia be kudou amo idia mai bona gau ta do idia abia dainai idia gwauraia lasi. To, hanamoa koikoi herevana be nega momo idia gwauraia kava bona ia momokani lasi, bona idia ura dagi bada idia abia eiava gau ta idia abia dainai idia gwauraia. (Iuda 16) Idia hereva henia tauna idia koia sibona lasi, to unai bamona hereva manau koikoi be hekokoroku bona sibona laloa bada karana ena huahua. Vadaeni, daika ia ura ma ta ese do ia hanamoa koikoi? To tanikiu herevana momokanina be hagoadaia gauna korikorina.

Tanikiu ia hereva tauna ese namo ia davaria ia gwauraia dainai. Ena kudouna amo tanikiu karana ia hahedinaraia dainai, moale bona maino ia davaria. (Aonega Herevadia 15:​13, 15 itaia.) Bona tanikiu karana be kara namona dainai, ia ese kara dikadia, hegeregere badu, mama, bona moale lasi karadia amo ia gimaia.

“Dirava Do Umui Tanikiu Henia”

Baibel ese ita ia hagoadaia namona be tanikiu henia karana ita habadaia. Paulo ia gwau: “Emui mauri lalonai idia vara gaudia ibounai dainai Dirava do umui tanikiu henia. Badina inai be Dirava ena ura umui totona, Keriso Iesu danu umui hakapua dainai.” (1 Tesalonika 5:18) Bona Paulo ese Kolose tadikaka ia sisiba henidia, ia gwau: “Keriso ena maino nega ibounai do umui abia noho emui kudouna lalonai . . . Bona Dirava do umui tanikiu henia.” (Kolose 3:15) Salamo anedia momo ese tanikiu herevadia idia gwauraia, unai amo idia hahedinaraia kudouna amo tanikiu ita gwauraia karana be Dirava amo ia mai kara namona ta. (Salamo 27:4; 75:⁠1) Ia hedinarai goevagoeva, Iehova Dirava ia moale bema iseda mauri dinadia lalonai idia vara gaudia dainai tanikiu karana ita hahedinaraia.

To inai tanikiu lasi tanobada lalonai, dahaka gaudia ese tanikiu henia karana habadaia dalana idia hadikaia? Edena bamona iseda mauri dinadia ta ta lalonai tanikiu karana ita hahedinaraia diba? Unai henanadai be hereva gabena ese do ia herevalaidia.