Nega Sisina Murinai Dirava Ena Natudia ese Kwalimu mai Hairaina Do Idia Abia
“Dirava ese unai ia karadia gaudia be mauri anina lasi idia davaria, . . . [to] do ia ruhaia, dika ena bodaga dekena amo, vadaeni Dirava ena natuna edia hairaina bamona do idia abia, . . . kwalimu momokani do idia abia.”—ROMA 8:20, 21.
1. Kara Dika ena Davana Karaia Dinana ai idia karaia gaudia ese Keriso ena boubou be edena bamona idia laulaulaia?
IEHOVA ese ia sibona ia havaraia Natuna tamona ia henia mauri davalaia boubouna bamona, unai ese dala ia kehoa taunimanima 144,000 ese guba maurina bona taunimanima oredia ese tanobada dekenai mauri hanaihanai do idia abia totona. (1 Ioane 2:1, 2) Hereva gunana ese ia hahedinaraia bamona, Kara Dika ena Davana Karaia Dinana ai, Israela ena hahelaga tauna badana ese ia sibona, ena ruma bese taudia, bona Levi iduhuna taudia edia kara dika boubouna totona boromakau tau ia bouboulaia karana ese Iesu ena boubou lauma helaga amo Dirava ena natudia ai idia lao Keristani taudia totona ia laulaulaia. Unai dina tamona ai, hahelaga tauna badana ese kara dika boubouna totona nanigosi ta ia bouboulaia Israela taudia oredia edia, taunimanima ibounai danu ese Keriso ena boubou amo namo do idia davaria hegeregerena. Ia mauri nanigosi ta ese ia ore laganina lalonai taunimanima idia karaia kara dika ibounai be laulau dalanai ia huaia oho, bona taunimanima lasi gabuna dekenai ia boio.a—Levitiko 16:7-15, 20-22, 26.
2 Aposetolo Paulo ese “Dirava ena natudia” guba dekenai do idia lao taudia edia helaro ia herevalaia murinai, ia gwau: “Dirava ese ia karadia gaudia ibounai ese . . . edia matana idia negea noho, idia naria noho, unai Dirava ena natudia do idia itaia totona. Badina Dirava ese unai ia karadia gaudia be mauri anina lasi idia davaria, sibodia edia ura dainai lasi, to Dirava ena ura dainai. To dala namona ta Dirava ese ia laloa: Dirava ese dina ta ia karadia gaudia be do ia ruhaia, dika ena bodaga dekena amo, vadaeni Dirava ena natuna edia hairaina bamona do idia abia.” (Roma 8:14, 17, 19-21) Unai hereva ena anina be dahaka?
2, 3. Paulo ena hereva Roma 8:20, 21 ai ena anina be dahaka?
3 Dirava ese iseda tamana ginigunana Adamu ia havaraia neganai, ia goevadae bona ia be “Dirava ena natuna.” (Luka 3:38) Kara dika ia karaia dainai, ia be “dika ena bodaga” lalonai ia vareai bona unai bamona mauri be taunimanima ibounai dekenai ia henia hanai. (Roma 5:12) Taunimanima ese idia abia hanai kara dika dainai, “anina lasi” maurina idia davaria bona Dirava ese unai ia koua lasi, to “garana,” Iesu Keriso, amo helaro ia henia. (Genese 3:15, NW; 22:18, NW; Galatia 3:16, NW) Apokalupo 21:1-4 ese ‘mase, lalohisihisi, taitai, bona hisihisi be do idia ore’ negana ia herevalaia. Unai gwauhamata be “taunimanima” dekenai ia henia dainai, ita diba Basileia ena lohia siahuna henunai ia noho tanobada bese matamatana taudia edia lalona bona tauanina do idia namo lou momokani bona idia be tanobada ai “Dirava ena natuna” ai idia lao dainai mauri hanaihanai do idia abia. Keriso ena Lagani 1,000 Lohia Negana lalonai, kamonai taudia be “dika ena bodaga dekena amo” do ia ruhaia. Hahetoho ginigabena lalonai idia hamomokania idia be Iehova idia badinaia taudia murinai, Adamu amo idia abia hanai kara dika bona mase amo idia do ia ruhaia ela bona hanaihanai. (Apokalupo 20:7-10) Unai neganai, tanobada dekenai idia noho taudia ese “Dirava ena natuna edia hairaina bamona do idia abia, . . . kwalimu momokani do idia abia.”
Idia Gwau “Oi Mai”!
4. Ta ese ‘davana lasi mauri ranuna ia abia’ ena anina be dahaka?
4 Helaro namo hereana be taunimanima vairanai ia noho! Ita hoa lasi lauma helaga amo Dirava ena natudia ai idia lao taudia oredia be tanobada dekenai mai edia lalo-goada ida unai helaro harorolaia gaukarana idia gunalaia! Horoa taudia oredia be hairai ia abia Mamoe ena Natuna, Iesu Keriso, ena “headava matamata kekeni” ai idia lao taudia bona idia ese inai peroveta herevana idia hagugurua: “Lauma Helaga bona Headava Matamata Hahine idia gwau, ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 21:2, 9; 22:1, 2, 17) Oibe, horoa taudia 144,000 sibona lasi ese Iesu ena mauri dalaia boubouna amo namo idia abia. Dirava ena lauma ese tanobada dekenai idia do noho headava matamata kekeni oreana ena orena taudia amo ia gwau noho, “Oi mai.” Unai hereva idia kamonai bona kara maoromaoro idia ura henia taudia iboudiai idia boiria do idia gwau “Oi mai,” bona unai amo Iehova ena hahemauri dalana idia abia dae.
5. Iehova ena Witness taudia idia moale, badina daidia be idia bogaraginai idia noho?
5 Iehova ena Witness taudia be Dirava ese Iesu Keriso amo ia henia hahemauri dalana idia abidadama henia. (Kara 4:12) Idia moale badina kudou-maoro taudia, idia ura Dirava ena ura idia dibaia bona badinaia taudia, be idia bogaraginai idia noho. Edia Kingdom Hall idia kehoa, hari “dokona negana” lalonai, idia ura ‘davana lasi mauri ranuna’ idia abia taudia ibounai idia vareai totona.—Daniela 12:4.
Nega Ia Hanaia Lao Lalonai Gau Haida Idia Idau
6. Nega idauidau lalodiai, Iehova ena hesiai taudia dekenai Dirava ena lauma be edena bamona ia gaukara?
6 Dirava be mai ena nega ena ura ia karaia totona, bona taunimanima ia kara henia dalana dekenai unai be mai anina. (Hadibaia Tauna 3:1; Kara 1:7) Ena be Keriso be tanobada dekenai ia do mai lasi negana lalonai, Dirava ena hesiai taudia ese ena lauma idia abia, to ena lauma natudia ai idia lao lasi. To, Iehova ena nega ia ginidae ia ese edia mauri idia gwauhamatalaia vadaeni tatau bona hahine be guba ahuna totona ena lauma helaga amo ena natudia ai ia halaoa, bona idia ginigunana be Iesu. Bona iseda nega be edena bamona? Unai lauma tamona be Iesu ena “mamoe idaudia” dekenai ia gaukara, to edia lalona ai guba maurina ena helaro bona ura ia havaraia lasi. (Ioane 10:16) Dirava ese ia henia helarona be tanobada paradaisona dekenai mauri hanaihanai do idia abia, bona hari inai tanobada be kahirakahira Dirava ena kara maoromaoro tanobadana matamatana ai do ia lao negana lalonai, idia ese haroro gaukara dekenai mai edia moale ida horoa taudia oredia idia durua.—2 Petero 3:5-13.
7 Pentekoste 33 C.E. ai, lauma helaga ia bubua neganai, Dirava ese ena ‘natudia momo dekenai hairai ia henia’ matamaia, bona toana be nega ia atoa “Dirava ena [lauma] Israela” taudia edia namba 144,000 ia guguru totona. (Heberu 2:10; Galatia 6:16; Apokalupo 7:1-8) Lagani 1879 amo, nega momo inai magasin ese horoa Keristani taudia gogoa gaukarana ia herevalaia. To Bible Student taudia (hari Iehova ena Witness taudia) idia diba Baibel ese tanobada paradaisona ai mauri hanaihanai abia helarona ia gwauraia danu. Hegeregere, July 1883 ena Watch Tower ia gwau: “Iesu ese ena basileia ia haginia, dika ia haorea, bona gau ma haida ia karaia murinai, inai tanobada be paradaiso ai do ia lao, . . . bona mase guria gabuna dekenai idia noho taudia ibounai be ia dekenai do idia mai. Bona ena taravatu idia kamonai henia dainai ia lalonai do idia noho hanaihanai diba.” Nega ia hanaia lalonai, horoa taudia gogoa gaukarana ia maragi ia lao, bona gabeai guba helarona idia abia lasi taudia be Iehova ena orea lalonai idia gogoa. Unai ia vara lalonai, Dirava ese ena horoa hesiai taudia, idia vara lou Keristani taudia dekenai, lalo-parara ia henia.—Daniela 12:3; Filipi 2:15; Apokalupo 14:15, 16.
8. Lagani 1930 murinai, tanobada helarona dekenai lalo-parara be edena bamona ia bada ia lao?
8 Lagani 1931 amo, tanobada helarona idia abia taudia be Keristani kongregesen lalonai idia vareai. Unai lagani ai, Iehova ese ena lauma amo ena natudia ai ia halaoa taudia oredia edia lalona ia hadiaria bena idia itaia Esekiela karoa 9 ese unai tanobada oreana ia herevalaia, hari roho mauri maka idia abia Dirava ena tanobada matamatana dekenai do idia noho totona. Lagani 1932 ai, idia abia dae Iehu ia bamoa tauna Ionadaba (Iehonadaba) ese hari idia noho mamoe bamona taudia ia laulaulaia. (2 King Taudia 10:15-17) Lagani 1934 ai, idia itaia goevagoeva namona be “Ionadaba taudia” ese Dirava dekenai edia mauri idia “gwauhamatalaia.” Lagani 1935 ai, idia lalo-parara “hutuma bada herea” taudia—guna idia laloa idia be lauma oreana iharuana taudia, Keriso ena headava matamata kekeni ena “durua kekeni taudia” guba dekenai—be tanobada helarona idia abia mamoe idaudia taudia. (Apokalupo 7:4-15, NW; 21:2, 9; Salamo 45:14, 15) Bona lagani 1935 amo ema bona hari, horoa taudia ese kara maoromaoro taudia, paradaiso dekenai mauri hanaihanai idia ura dikadika taudia, tahua gaukarana idia gunalaia.
9. Lagani 1935 murinai, dahaka dainai Keristani taudia haida ese Lohiabada ena Anibou idia karaia neganai, paraoa ania bona uaina inua karadia idia hadokoa?
9 Lagani 1935 murinai, Lohiabada Ena Anibou idia karaia neganai paraoa idia ania bona uaina idia inua taudia haida be unai kara idia hadokoa. Dahaka dainai? Badina idia lalo-parara edia helaro be tanobada helarona, guba helarona lasi. Lagani 1930 ai ia bapatiso hahinena ta ia gwau: “Ena be ai abia dae [paraoa ai ania bona uaina ai inua] be maoro, bona ai laloa mai edia lalo-goada ida ful-taim hesiai gaukara idia karaia taudia ese idia ania bona idia inua be maoro momokani, to lau abia dae momokani lasi guba helarona lau abia. Bena lagani 1935 ai, ai idia hadibaia goevagoeva edia helaro be tanobada dekenai mauri hanaihanai do idia abia taudia hutuma bada herea idia haboua noho. Ai momo ai moale bada badina ai lalo-parara ai be unai hutuma bada herea taudia, bona paraoa ania bona uaina inua karadia ai hadokoa.” Keristani buka bona magasin idia idau danu. Guna laganidia lalonai, idia halasia gaudia be Iesu murinai idia raka bona lauma helaga amo Dirava ena natudia ai idia lao taudia totona idia karaia, lagani 1935 amo ema bona hari, Gima Kohorona bona “hesiai tauna mai ena kamonai” ese ia karaia buka bona magasin idauidau ese horoa taudia bona edia bamodia, tanobada helarona idia abia taudia, edia lauma aniani namona idia henia.—Mataio 24:45-47.
10. Edena dala ai, ta ese Dirava badinaia karana ia rakatania horoa tauna ta ena gabu do ia abia?
10 To bema horoa tauna ta ese Dirava badinaia karana ia rakatania, ta be ena gabu do ia abia, a? Paulo ese olive auna ia laulaulaia gauna ia herevalaia neganai, unai ia hahedinaraia. (Roma 11:11-32) Bema ta ese lauma helaga amo Dirava ena natuna ai ia lao tauna ta ena gabu ia abia be namo, ita laloa diba Dirava ese lagani momo lalonai mai ena abidadama goadana ida hesiai gaukara helagana ia karaia vadaeni tauna ta be guba maurina totona do ia boiria.—Luka 22:28, 29; 1 Petero 1:6, 7 itaia.
Badina Momo Dainai Ita Tanikiu Henia
11. Herevana iseda helaro be dahaka, to Iamesi 1:17 ese edena bamona ita ia hagoadaia?
11 Herevana edeseniai ita noho, bema Iehova ita hesiai henia mai eda abidadama ida, ia ese iseda dabu gaudia do ia henia bona iseda ura maorodia do ia hagugurua. (Salamo 145:16, NW; Luka 1:67-74) Herevana iseda helaro korikorina be guba maurina eiava tanobada dekenai do ita mauri noho, badina namodia momo dainai Dirava ita tanikiu henia. Nega ibounai ia karaia gaudia ese ia idia lalokau henia taudia edia namo idia havaraia. Hahediba tauna Iamesi ia gwau “gau namodia ibounai, bona harihari gaudia namodia momokani ibounai, be [Iehova] Dirava dekena amo idia diho mai.” (Iamesi 1:17) Namona be unai harihari gaudia bona hahenamo haida ita laloa.
12. Dahaka dainai ita gwau diba Iehova ese ena kamonai hesiai taudia ta ta dekenai helaro namona ia henia?
12 Iehova ese ena kamonai hesiai taudia ta ta dekenai helaro namona ia henia. Haida be guba maurina totona ia boiria. Keriso be tanobada ai ia do mai lasi neganai, Iehova ena ladana idia gwauraia taudia dekenai, Iehova ese helaro namona ia henia, do idia toreisi lou bona tanobada dekenai mauri hanaihanai do idia abia. Hegeregere, Aberahamo be toreisi lou ia abidadama henia bona ‘hanua mai ena nadi badina aukana’ ia naria—unai be guba Basileiana, ia henunai do ia toreisi lou bona tanobada maurina do ia abia. (Heberu 11:10, 17-19) Ma nega ta hari inai dokona negana lalonai, Dirava ese taunimanima milioni momo dekenai tanobada paradaisona ai mauri hanaihanai do idia abia helarona ia henia lou. (Luka 23:43, NW; Ioane 17:3) Momokani, Iehova ia henia helaro namona idia abia taudia iboudiai be ia do idia tanikiu henia be namo.
13. Dirava ena lauma helaga be edena dala ai ena taunimanima dekenai ia gaukara?
13 Iehova ese ena lauma helaga be harihari gauna bamona ena taunimanima dekenai ia henia. Guba helarona idia abia Keristani taudia be lauma helaga amo ia horoa. (1 Ioane 2:20; 5:1-4, 18) To, Dirava ena hesiai taudia, edia helaro be tanobada dekenai do idia noho taudia, ese unai lauma ena heduru idia abia bona idia ia hakaua. Idia ta be Mose, Iehova ena lauma ia abia, bona heduru totona ia abia hidi tatau 70 ese idia abia danu. (Numera 11:24, 25) Lauma helaga ena siahu henunai, Besalele ese Israela ena palai dubu gaudia be mai ena diba bada ida ia karaia. (Esodo 31:1-11) Dirava ena lauma be Gideona, Iepeta, Samson, Davida, Elia, Elisaia, bona ma haida latanai ia diho. Ena be unai idaunegai taudia be guba hairaina do idia abia lasi, to lauma helaga ese idia ia hakaua bona durua, hari inai negai Iesu ena mamoe idaudia ia hakaua bona durua hegeregerena. Unai dainai, Dirava ena lauma ita abia dainai ita gwau diba lasi guba maurina totona ita ia boiria. To, Iehova ena lauma ese ita ia hakaua, ita ia durua ita haroro bona Dirava ia henia gaukara ma haida ita karaia totona. Taunimanima edia goada ia hanaia goadana ia henia, bona ita lalonai ia havaraia huahua be lalokau, moale, maino, haheauka, hebogahisi, kara maoromaoro, abidadama, manau, bona tauanina ena ura koua karana. (Ioane 16:13; Kara 1:8; 2 Korinto 4:7-10; Galatia 5:22, 23) Unai harihari gauna namona be Dirava amo ita abia dainai, ia ita tanikiu henia be namo, ani?
14. Dirava ena harihari gaudia, diba bona aonega, amo dahaka namo ita abia?
14 Diba bona aonega be harihari gaudia Dirava amo, bona idia dainai ia ita tanikiu henia be namo, herevana guba eiava tanobada helarona ita abia. Bema Iehova ita diba namonamo, unai ese ita ia durua ‘gau namodia edia toana do ita diba’ bona ‘Lohiabada ena ura hegeregerena do ita noho, bona nega ibounai ita ese ia do ita hamoalea.’ (Filipi 1:9-11; Kolose 1:9, 10) Dirava ena aonega ese iseda mauri lalonai ita ia gimaia bona hakaua. (Aonega Herevadia 4:5-7; Hadibaia Tauna 7:12) Diba bona aonega korikori be Dirava ena Hereva amo ita abia, bona horoa taudia oredia be ia lalonai edia guba helarona ia herevalaia herevadia idia ura bada. To, Dirava ena Hereva ita ura henia bona ena hereva ita lalo-pararalaia namonamo ese idia hamomokania lasi Dirava ese guba maurina totona ita ia boiria. Tatau haida, hegeregere Mose bona Daniela ese Baibel ena kahana idia torea, to do idia toreisi lou bona tanobada ai do idia mauri. Herevana guba eiava tanobada helarona ita abia, ita ibounai be Iehova ese ia lalo-namo henia “hesiai tauna mai ena kamonai, bona mai ena kara maoromaoro” oreana amo lauma aniani ita abia. (Mataio 24:45-47) Unai dala ai diba ita abia dainai ita moale bada!
15. Dirava ena harihari gauna badana ta be dahaka, bona edena bamona unai oi laloa?
15 Dirava ena harihari gauna badana be Iesu ena mauri davalaia boubouna, bona ena namo do ita abia, herevana iseda helaro be guba dekenai eiava tanobada dekenai do ita mauri. Dirava ese taunimanima “ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Bona Iesu ena lalokau ese ia doria ena mauri “ia atoa diho taunimanima momo edia dika davana karaia totona.” (Mataio 20:28) Aposetolo Ioane ese ia gwauraia hedinarai hegeregerena, Iesu “Keriso sibona be iseda kara dika [horoa taudia edia] gwauatao dalana. Bona iseda dika sibona lasi, to Keriso be taunimanima ibounai edia dika gwauatao dalana.” (1 Ioane 2:1, 2) Unai dainai, namona be ita ibounai ese unai lalokau karana, mauri hanaihanai abia dalana ia kehoa karana, dainai ia ita tanikiu henia.b
Do Oi Noho, A?
16. April 11, 1998 ai, dina ia diho murinai, edena hebou badana do idia karaia, bona daidia idia noho be namo?
16 Namona be Dirava ese ena Natuna amo ia karaia mauri davalaia boubouna ita laloa bada dainai, April 11, 1998 ai, dina ia diho murinai, Iehova ena Witness taudia be edia Kingdom Hall eiava ma gabu haida dekenai Keriso ena mase laloatao totona hebou idia karaia neganai, do ita noho danu. Iesu be ena tanobada maurina ena hanuaboi ginigabena dekenai, ena kamonai aposetolo taudia ida unai hebou ia hamatamaia neganai, ia gwau: “Inai bamona do umui karaia, lau dekenai do umui laloa totona.” (Luka 22:19, 20; Mataio 26:26-30) Idia do noho horoa taudia oredia ese hatubua muramura lasi paraoana, Iesu ena kara dika lasi tauanina ia laulaulaia gauna, idia ania bona uaina korikori kakakakana, ena rara, boubou bamona ia bubua rarana, ia laulaulaia gauna, idia inua. Lauma helaga amo Dirava ena natudia ai idia lao Keristani taudia sibona ese unai gaudia idia ania bona inua be maoro, badina idia sibona be gwauhamata matamatana bona Basileia gwauhamatana lalonai idia noho bona Dirava ena lauma helaga ese ia hamomokania vaitani idia be guba helarona idia abia. Taunimanima ma milioni momo be do idia noho bona mai edia hemataurai ida unai do idia itaia bona Dirava bona Keriso ese Iesu ena boubou gauna, mauri hanaihanai abia dalana ia kehoa gauna, amo idia hahedinaraia lalokauna idia laloa bada.—Roma 6:23.
17. Lauma helaga amo ta idia horoa karana ita laloa neganai, dahaka ita laloatao be namo?
17 Guna idia abia dae tomadiho lalohadai, lalokau tauna ta ia mase dainai idia lalohisihisi, hari tanobada maurina ia havaraia hekwakwanai, eiava idia laloa Iehova amo hahenamo idauna idia abia dainai haida idia laloa kerere, idia laloa Iehova ese guba maurina totona idia ia boiria. To namona be ita ibounai ita laloatao, Baibel ese ita ia hagania lasi Memorial paraoa ita ania bona uaina ita inua, Keriso ena mauri davalaia boubouna ita laloa bada karana ita hahedinaraia totona. Ma danu, lauma helaga amo ta idia horoa be “taunimanima edia ura dainai, o edia kara dainai lasi, to inai be Dirava ena bogahisihisi dainai sibona,” Iesu be ena lauma Natuna ai ia halaoa bona ma natudia 144,000 sibona be hairai ia henidia Tauna unai.—Roma 9:16; Isaia 64:8.
18. Hari inai negai Iehova idia hesiai henia taudia momo herea be edena hahenamo do idia abia?
18 Hari inai dina gabedia lalonai, Iehova idia hesiai henia taudia momo herea dekenai Dirava ia henia helarona be tanobada paradaisona dekenai mauri hanaihanai do idia abia. (2 Timoteo 3:1-5) Nega daudau lasi murinai, unai paradaiso namona do idia moalelaia. Guba gavamani henunai idia noho lohia taudia ese tanobada gaudia do idia naria. (Salamo 45:16, NW) Maino be tanobada ai do ia noho, badina tanobada idia noholaia taudia ese Dirava ena taravatu do idia badinaia bona edia diba Iehova ena dala dekenai do idia habadaia. (Isaia 9:6, 7; Apokalupo 20:12) Gaukara badana do ia noho, ruma do idia haginidia bona tanobada do idia naria. (Isaia 65:17-25) Bona mase taudia do idia toreisi lou bona edia ruma bese taudia ida idia hedavari lou neganai mani edia moale oi laloa! (Ioane 5:28, 29) Hahetoho ginigabena murinai, kara dika ibounai be do ia ore vaitani. (Apokalupo 20:7-10) Unai murinai ela bona hanaihanai, tanobada be Dirava ese ‘dika ena bodaga dekena amo ia ruhaia bona Dirava ena natuna edia hairaina idia abia’ vadaeni goevadae taudia amo do ia honu.
[Footnotes]
a Insight on the Scriptures, Volium 1, rau 225-6 itaia.
b The Watchtower, March 15, 1991, rau 19-22 itaia.
Edena Bamona Do Oi Haere?
◻ Ta ese ‘davana lasi mauri ranuna ia abia’ ena anina be dahaka?
◻ Herevana ita be guba eiava tanobada helarona ita abia, to dahaka badina idauidau dainai Dirava ita tanikiu henia be namo?
◻ Edena hebou, lagani ta ta idia karaia hebou badana, dekenai ita ibounai ita noho be namo?
◻ Iehova ena taunimanima momo herea edia vaira negana be edena bamona?
7. Bible Student taudia ese edena gogoa gaukarana idia laloa bada, to paradaiso dekenai dahaka idia diba?
[Picture on page 18]
Taunimanima milioni momo ese ‘davana lasi mauri ranuna idia abia.’ Oi be idia ta, a?