Lauma Dalanai Oi Goada Oi Lao Diba

GAU ta ena davana korikori davaria be nega haida ia auka. Unai be maoro daimon nadidia dekenai. Ena be oi polisia daimon ta ia diaridiari, to oi polisia lasi gauna ena diari be maragi sibona. To, idia polisia lasi daimon lalonai, do ia hairai diba nadina ia noho.

Dala idauidau ai Keristani taudia be idia do polisia lasi daimon nadidia bamona. Ena be ita be goevadae lasi taudia, to Iehova ese ita lalonai ia noho gauna namona ia laloa bada. Daimon nadidia bamona, ita ta ta sibona eda kara be idauidau. Bona ita ta ta be lauma dalanai ita goada ita lao diba bema mai eda kudouna ibounai ida ita ura unai ita karaia. Iseda kara ita polisia diba, bena do idia diaridiari bona Iehova do idia hahairaia momokani.​—⁠1 Korinto 10:⁠31.

Daimon nadina idia utua bona idia polisia murinai, rini o herahera gauna ma ta dekenai idia atoa, ena diari hahedinaraia namonamo totona. Unai hegeregerena, Iehova ese ita do ia gaukaralaia diba gaukara idauna ta do ita karaia totona bema ‘mauri matamata ita atoa, dabua matamata ita atoa bamona. Inai mauri matamata dainai, iseda toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.’​—⁠Efeso 4:​20-​24.

Reana lauma dalanai unai bamona ita goada ita lao karana be ita dekena ia vara haraga lasi, hegeregere daimon be tano amo idia abia matamaia neganai dava bada nadina bamona ia do diaridiari lasi. Reana ita dekenai ia noho manoka gauna ta ita kokia be namo, eiava maduna abia karana dekenai iseda lalohadai ita hamaoromaoroa be namo, eiava namona be ita hekwarahi lauma dalanai tubu lasi karana ita manadalaia noho lasi totona. To ita be lauma dalanai ita goada ita lao diba bema unai be iseda ura momokanina, badina Iehova Dirava ese “siahu badana,” goada ibounai ia hanaia siahuna ia henia diba.​—⁠2 Korinto 4:7; Filipi 4:​13.

Iehova ese Ena Hesiai Taudia Ia Hagoadaia

Daimon nadidia ia utua tauna be diba maoromaoro dainai ia diba momokani do ia hegeregere unai gaukara karaia totona be gau badana, badina unai nadi ia utua neganai ena kahana ta do ia boio. Unai dava bada gauna ena kahana badana​—⁠nega haida unai nadi ena 50 pesen​—⁠do idia utua, idia ura idia abia toana idia karaia totona. Namona be diba maoromaoro ita abia dainai ita diba do ita hegeregere iseda kara ita haidaua bona lauma dalanai ita goada ita lao. Gau badana be ita diba momokani Iehova ese ita do ia hagoadaia.

To, reana ita laloa ita hegeregere lasi, eiava ita laloa gaukara ma haida do ita karaia diba lasi. Dirava ena idaunegai hesiai taudia mai edia abidadama be nega haida unai bamona idia laloa. (Esodo 3:​11, 12; 1 King Taudia 19:​1-4) Ieremia dekenai Dirava ese “peroveta dagi” ia henia neganai, Ieremia ia gwau: “Lau be hereva dalana lau diba lasi, lau be mero sibona.” (Ieremia 1:​5, 6) Ena be Ieremia ia hemarai, to gabeai ia gari lasi peroveta tauna ta ai ia lao bona badu taudia dekenai ia hereva maoromaoro. Edena bamona ia karaia diba? Iehova tabekau henia karana ia dibaia. Ieremia be gabeai ia gwau: ‘Iehova ia abidadama henia noho tauna be namo. Iena laloa goada be Ia dekena amo ia abia tauna, be do Ia hanamoa.’​—⁠Ieremia 17:7; 20:⁠11.

Hari inai negai, Iehova ese ia idia abidadama henia taudia ia hagoadaia danu. Edward,a mai ena natudia hani tamana ta, lauma dalanai ia goada haraga lasi tauna, ia davaria unai hereva be momokani. Ia gwau: “Lagani 9 lalonai lau be Iehova ena Witness tauna ta, to toana be lauma dalanai lau goada lau lao lasi. Egu hekwakwanai be lau egu ura ia goada lasi bona sibona lau abidadama henia lasi. Spain dekenai ai lao neganai, kongregesen maragina ta dekenai lau noho, bona unuseniai elda tauna be tamona bona hesiai tauna be tamona. Elda bona hesiai taudia be momo lasi dainai, elda tauna ese nega momo lau ia noia hereva idauidau momo lau henia totona. Egu hereva bona hebou ena kahana ginigunadia lau abia neganai lau gari. To Iehova tabekau henia karana lau dibaia. Elda tauna ese hanaihanai lau ia hanamoa bona heduru herevadia ia henia.

“Unai neganai, egu haroro gaukara lau habadaia bona lauma dalanai egu famili lau hakaua namonamo matamaia. Unai dainai, ruma bese taudia ibounai dekenai hereva momokani ena anina be ia bada ia lao, bona lau moale bada herea. Hari lau be hesiai tauna, bona lau gaukara noho Keristani naria tauna ena kara lau manadalaia totona.”

‘Mauri Gunana be Dabua Gunana Bamona Umui Kokia’

Edward ia diba vadaeni hegeregerena, lauma dalanai ita goada ita lao totona, gau badana be Iehova ita abidadama henia. Keriso ena kara ia hahedinaraia “mauri matamata” ita karaia be gau badana danu. Edena bamona unai ita karaia diba? Gau ginigunana be mauri gunana ena kara dikadia ita “kokia.” (Kolose 3:⁠9, 10) Daimon ena kopina dekenai ia noho miro o nadi idaudia idia kokia bena ia diaridiari dava bada nadina ai ia lao hegeregerena, “tanobada” ena lalohadai ita dadaraia be gau badana, iseda mauri matamata do ia hedinarai goevagoeva totona.​—⁠Galatia 4:⁠3.

Unai bamona lalohadai ta be, haida idia ura lasi dagi o maduna ta idia abia dae, gaukara bada herea do idia abia garina. Momokani, ta ese maduna ia huaia ena anina be gaukara do ia karaia, to unai be do ia hamoalea gaukarana. (Kara 20:35 itaia.) Paulo ia gwau Dirava badinaia karana ena anina be “ita hekwarahi bona ita hisihisi noho.” Ia gwau mai moale ida ita karaia noho badina “Mauri Diravana ita abidadama henia noho,” ia be iseda Keristani tadikaka bona ma haida totona ita karaia gaukarana ia laloaboio vaitani lasi Diravana.​—⁠1 Timoteo 4:​9, 10; Heberu 6:​10.

Daimon haida idia vara negana ai “manoka gabuna” ia vara danu bona ia dainai utua tauna ia naria namonamo. To, masini ta ladana polariscope amo nadi ia polisia tauna be unai manoka gabuna ia itaia bona unai nadi dekenai gaukara ia karaia diba mai kwalimu ida. Reana ita be mai edia hekwakwanai ta, eiava iseda kara ta ia namo lasi, guna ita dekenai ia vara gau dikana ta o guna iseda noho dainai. Dahaka ita karaia diba? Gau ginigunana be, namona be ita sibona dekenai ita abia dae unai hekwakwanai ia noho bona iseda lalona ita hadaia do ita hanaia. Namona be guriguri amo Iehova dekenai iseda lalo-hekwarahi ita henia, reana Keristani elda ta amo lauma heduruna do ita tahua danu.​—⁠Salamo 55:22; Iamesi 5:​14, 15.

Unai bamona hekwakwanai ese Nicholas ia hadikaia. Ia gwau: “Egu tamana be inuinu kekero karana ia manadalaia tauna, bona ia ese lau bona egu taihuna ia hahisia bada. Sikuli lau rakatania neganai tuari oreana lalonai lau vareai, to egu gwau-edeede karana ese lau ia hahekwakwanaia. Tuari biagua taudia ese lau idia hadiburaia, drag dikadia lau hoihoilaia dainai, bona ma nega ta gwaumaoro lau abia lasi to kamepa lau heautania dainai. Gabeai, tuari oreana lau rakatania momokani, to egu hekwakwanai idia ore lasi. Ena be drag ania kava bona inuinu kekero karana lau manadalaia dainai egu mauri ia dika, to Baibel lau laloa bada bona lau ura egu mauri be mai badina. Gabeai, Iehova ena Witness taudia lau davaria, egu mauri dalana lau haidaua, bona hereva momokani lau abia dae.

“To lagani momo idia ore, bena lau abia dae diba egu kara ta ia do namo lasi bona hanamoa dalana lau tahua. Dagi taudia lau ura henia lasi bona ta ese sisiba ia henia neganai lau badu. Lau ura Iehova ena hesiai gaukara ibounai lau karaia, to unai manoka karana ese lau ia koua. Vadaeni, hebogahisi elda taudia rua ese lau idia durua dainai, lau gwau lau diba unai hekwakwanai ia noho bona Baibel amo mai lalokau ida idia henia sisiba lau badinaia matamaia. Ena be nega ta ta unai badu sisina ia hedinarai, to egu gwau-edeede karana lau biagua diba. Iehova lau tanikiu henia, lau ia kara henia mai haheauka ida bona elda taudia be mai edia lalokau ida lau idia durua dainai. Vanegai, lauma dalanai lau tubu daekau dainai, hesiai tauna ena maduna lau abia.”

Nicholas ia davaria hegeregerena, ita manadalaia momokani vadaeni lalohadai ta ita haidaua be auka. Reana ita be mai eda hekwakwanai, iena bamona. Reana taunimanima idia hereva kava neganai unai ese ita ia hahisia haraga. Reana ma ta ita badu henia noho, eiava sibona eda dala abia hidi karana ita laloa badabada. Unai dainai, Keristani dalana dekenai do ita tubu daekau haraga lasi. Unai hegeregerena, daimon polisia taudia be nega haida naats nadidia idia davaria. Unai be daimon idia vara neganai, nadi rua idia veve hebou bona nadi tamona ai idia lao. Unai dainai, naats nadina tamona lalonai tubu dala idaudia rua idia noho bona unai ese dala maorona ai nadi utua karana ia ha-aukaia. Ita dekenai ura rua idia tuari noho bamona, ita ura kara namo ita karaia to iseda goevadae lasi tauanina ena ura be idau. (Mataio 26:⁠41; Galatia 5:​17) Nega haida, reana iseda hemami be ura kererena do ita tuari henia noho lasi, bona reana ita laloa iseda goevadae lasi karadia be gau badana lasi. Reana ita gwau, ‘To egu ruma bese taudia bona egu turadia ese lau do idia lalokau henia noho.’

To, do ita hegeregere iseda tadikaka totona hesiai gaukara ita karaia bona iseda guba Tamana abia isi totona, namona be ‘iseda laloa bona iseda kudouna do ita hamatamataia,’ bona ita karaia dalana be dabua bamona mauri matamata ita atoa. Unai hekwarahi be mai ena davana namona, Nicholas bona taunimanima momo ese unai idia hamomokania. Daimon polisia tauna ia diba kerere gabuna tamona sibona be nadi ibounai ia hadikaia diba. Unai hegeregerena, bema iseda manoka karana ta ita hamaoromaoroa lasi, lauma dalanai iseda toana ibounai ia hadikaia diba. Danu, manoka karana dikana ta ese lauma dalanai ita ia hamorua diba.​—⁠Aonega Herevadia 8:​33.

“Lahi” Bamona Ita Lalonai

Daimon polisia tauna ia ura unai nadi lalonai ia noho lahi toana ia hahedinaraia. Unai ia karaia ia utua dalana amo, ena kahana ta ta amo kevau ena kala idauidau idia diaridiari. Daimon lalonai, kala idauidau idia diari lao diari mai, bona unai ese daimon ena lahi o diari bada herea ia havaraia. Unai hegeregerena, Dirava ena lauma be “lahi” ta bamona ita lalonai ia diaridiari diba.​—⁠1 Tesalonika 5:​19, NW; Kara 18:​25, NW; Roma 12:​11, NW.

To edena bamona bema ita laloa namona be lauma dalana ai goada ita abia? Edena dala ai unai ita karaia? Namona be iseda “mauri ena dala” ita tahua. (Salamo 119:​59, 60) Unai ita karaia totona, lauma dalanai ita idia hametaua gaudia do ita tahua, bena do ita laloa edena tiokratik karadia do ita tahua goadagoada be namo. Lauma gaudia laloa bada karana ita habadaia daladia be hanaihanai sibona eda stadi ita karaia bona ita guriguri goadagoada. (Salamo 119:​18, 32; 143:​1, 5, 8, 10) Danu, bema idia gaukara goadagoada abidadama tadikaka ita bamoa, unai ese iseda lalona do ia hagoadaia Iehova do ita hesiai henia mai eda lalo-goada ida.​—⁠Tito 2:​14.

Louise, Keristani hahine matamatana ta, ia gwau: “Lagani rua lalonai regula painia gaukara lau laloa noho, ela bona ful-taim Basileia hesiai gaukara o painia gaukara lau hamatamaia. Gau ta ese lau ia koua lasi, to egu kara lau manadalaia vadaeni, bona lau hekwarahi lasi lau haidaua totona. Bena egu tamana ia mase. Lau lalo-parara mauri ia ore haraga diba to egu mauri lau gaukaralaia namonamo lasi. Unai dainai egu lalohadai lauma gaudia dekenai lau haidaua, egu haroro gaukara lau habadaia, bona regula painia gaukara lau hamatamaia. Lau idia durua bada taudia be egu tadikaka bona taihu, haroro gaukara hebouna dekenai idia lao bona haroro gaukara lalonai hanaihanai lau idia bamoa. Hari inai lau dibaia, ita bamoa taudia idia ura henia bona idia tahua goadagoada gaudia, herevana idia namo o idia dika, be do ita ura bona do ita tahua danu.”

Auri ese Ia Segea Bamona

Tanobada dekenai, taunimanima idia diba gaudia ibounai amo, daimon nadidia be auka herea. Unai dainai, daimon ta utua totona daimon ma ta do oi gaukaralaia. Reana Baibel stiuden taudia ese inai aonega herevana idia laloatao: “Tau ta ese ma tau ta dekena amo, diba ia davaria noho, auri ta ese ma auri ta ia segea noho bamona.” (Aonega Herevadia 27:17) Edena dala ai tau ta ese ma tau ta “ia segea”? Reana tau ta be ma tau ta ena laloa dalana bona lauma dalana ena goada do ia segea bamona, auri ena kahana ta amo auri tamona dekenai idia karaia kaia ena matana idia karaia bamona. Hegeregere, bema iseda ura gauna ita abia lasi bona ita lalohisihisilaia, ma ta ena hagoadaia herevadia ese ita idia durua bada. Iseda moale lasi toana ia hanamoa diba, bona ita ia hasiahua do ita gaukara goadagoada lou totona. (Aonega Herevadia 13:12) Kongregesen elda taudia ese Baibel amo hagoadaia herevadia bona sisiba idia henia neganai, ita idia segea namonamo bamona. Solomona ia henia hahegani herevana idia badinaia: “Aonega tauna do oi hadibaia, vadaeni iena aonega do ia bada lao. Kara maoromaoro tauna do oi hadibaia, vadaeni iena diba do ia bada lao.”​—⁠Aonega Herevadia 9:⁠9.

Momokani, lauma dalanai diba be karaharaga ita abia gauna lasi. Lagani 10 bona ma haida lalonai, aposetolo Paulo be Timoteo dekenai iena aonega bona hadibaia daladia ia hahedinaraia. (1 Korinto 4:​17; 1 Timoteo 4:​6, 16) Mose be lagani 40 lalonai Iosua ia hadibaia bona nega daudauna lalonai unai kara ese Israela besena dekenai namo ia havaraia. (Iosua 1:​1, 2; 24:​29, 31) Lagani 6 lalonai, Elia be peroveta tauna Elisaia ia bamoa, unai amo iena hesiai gaukara, lagani 60 bamona ia karaia gaukarana ena badina namona ia haginia. (1 King Taudia 19:21; 2 King Taudia 3:​11) Elda taudia be mai edia haheauka ida tadikaka ma haida idia hadibaia noho neganai, Paulo, Mose, bona Elia edia haheitalai idia tohotohoa.

Hadibaia gaukarana lalonai mai anina bada kahana ta be hanamoa herevadia. Mai momokani ida haida oi hanamoa badina idia abia gaukara idia naria namonamo o kara namodia idia karaia dainai ese idia do ia hagoadaia dala idauidau ai Dirava ena hesiai gaukara do idia karaia goadagoada totona. Hanamoa herevadia ese ta ena lalona ia hagoadaia, unai dainai ia ura ia hekwarahi ena manoka gaudia ia hanaia totona. (1 Korinto 11:⁠2 itaia.) Basileia harorolaia gaukarana bona kongregesen gaukara ma haida ita karaia goadagoada neganai, ita do ia hagoadaia hereva momokani dekenai do ita tubu daekau noho totona. (Kara 18:⁠5) Elda taudia ese tadikaka dekenai gaukara idia henia, lauma dalanai edia goada hegeregerena neganai, unai tatau be diba do idia abia bona unai ese idia do ia hagoadaia lauma dalanai do idia goada idia lao noho.​—⁠Filipi 1:​8, 9.

Lauma Dalanai Ita Tubu Daekau Noho Ena Badina Namona

Taunimanima ese daimon idia gwauraia dava bada gaudia. Hari, tanobada hegegemadai oreana lalonai Iehova idia tomadiho henia taudia idia bamoa taudia dekenai unai be momokani danu. Oibe, Dirava ese idia ia gwauraia, bese iboudiai edia “kohu namodia” eiava edia dava bada gaudia. (Hagai 2:⁠7) Lagani gunanai, taunimanima 375,923 be bapatiso idia abia bona Iehova ena Witness taudia ai idia lao. Unai tadikaka matamatadia momo dainai, namona be iseda ‘palai ruma do ita habadaia.’ Lauma dalanai ita goada noho neganai​—⁠bona Keristani hesiai gaukara ena hahenamo ita tahua neganai​—⁠dala do ia noho unai matamata taudia ita durua totona.​—⁠Isaia 54:2; 60:⁠22.

Dava bada daimon nadidia idia atoa banika dekenai bona nega ta ta sibona idia itaia hegeregerena lasi, lauma dalanai ita be dava bada gaudia bona ita diaridiari diba. Bona iseda Keristani karadia be hanaihanai ita polisia bona hahedinaraia neganai, Iehova Dirava ita hahairaia. Iesu ese ia murinai idia raka taudia ia hamaoroa, ia gwau: “Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” (Mataio 5:⁠16) Momokani, unai badina namona dainai lauma dalanai ita tubu daekau be namo.

[Footnote]