Ruma Bese Naria Maduna Oi Huaia Noho

“TAMA e, emui natudia do umui habadua kava lasi, to Iehova ena matahakani bona lalona biagua karana ai do umui naridia.” (Efeso 6:4, NW) Aposetolo Paulo ese Dirava ena lauma amo unai hereva ia torea, bona idia hahedinaraia goevagoeva ia ese ruma bese naria maduna be gabu maorona​—tamana ena pagana​—dekenai ia atoa.

Ruma bese momo dekenai tamana sibona ese ena natudia ia naria lasi. Ena adavana, ena natudia edia sinana, be mai ena moale ida ena tau ida unai maduna ia huaia. Unai dainai, King Solomona ia gwau: “Lauegu natuna e, oiemu tamana bona sinana, edia hadibaia hereva do oi kamonai henia.”​—Aonega Herevadia 1:8.

Tauanina Dalanai Bona Lauma Dalanai Oi Naridia

Edia natudia idia lalokau henia tama sina idia ura lasi edia natudia idia dadaraia. Momokani, Paulo ese Timoteo dekenai ia torea herevadia dainai, ita diba Keristani tauna ese ena natudia ia naria lasi karana be ena abidadama ia dadaraia karana hegeregerena. Paulo ia gwau: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” (1 Timoteo 5:8) Keristani taudia idia diba, idia ese “Iehova ena matahakani bona lalona biagua karana ai” natudia idia naria totona, tauanina dalanai sibona idia naridia be hegeregere lasi.

Israela besena be Moaba ena tano palakana dekenai idia kamepa bona Gwauhamata Tanona ai idia do vareai lasi neganai, Mose ese idia dekenai ia gwauraia hahegoada herevana mani oi laloa. Unuseniai idia dekenai Dirava ena taravatu ia gwauraidia lou bona idia ia hadibaia, ia gwau: “Inai lauegu oda hereva do umui laloatao, bona emui kudouna dekenai do umui dogoatao.” (Deuteronomi 11:18) Guna ia ese idia ia hadibaia lou, namona be mai edia kudouna, soul, bona goada ibounai ida Iehova idia lalokau henia, bona ma ia gwau: “Hari dina ai oi dekenai lau henia hahegani herevadia be oiemu kudouna ai do idia noho be gau badana.” (Deuteronomi 6:5, 6, NW) Dirava ena Taravatu be Israela tama sina edia kudouna dekenai ia vareai be mai anina bada. Israela tama sina edia kudouna ibounai be lauma gaudia amo ia honu neganai, Mose ena hereva idia badinaia be auka lasi, Mose ia gwau: “Emui natudia dekenai inai [Dirava ena] Taravatu do umui hadibaia goada, ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai, inai Taravatudia do umui herevalaia.”​—Deuteronomi 6:​7; 11:19; ma danu Mataio 12:​34, 35 itaia.

Ita itaia tamana ese edia natudia dekenai unai hereva idia “hadibaia goada” bona idia “herevalaia” be namo. Merriam-Webster’s Collegiate Dictionary ia gwau “hadibaia goada” ena anina be “gwauraia loulou herevadia eiava sisiba herevadia amo hadibaia bona kudouna hamarerea.” Dina ta ta​—dabai, dina tubua ai, bona hanuaboi ai​—tama sina ese Dirava ena Taravatu idia herevalaia neganai, edia natudia ese gau momo idia dibaia. Natudia ese idia mamia edia tama sina ese Dirava ena Taravatu idia lalokau henia neganai, unai ese natudia edia lalona ia veria bona idia be Iehova kahirakahira idia lao. (Deuteronomi 6:​24, 25) Mai anina bada gauna be Mose ese tama ia hamaorodia ‘ruma dekenai idia noho neganai’ edia natudia do idia hadibaia. Unai bamona hadibaia karana be ruma bese naria karana ta. To hari inai negai be edena bamona?

“Ruma Dekenai Umui Noho Neganai”

Janet, mai ena natudia hani Keristani sinana ta, ia gwau: “Unai be auka.”a Ena adavana Paul, ia gwau: “Oi haheauka be namo.” Witness tama sina momo hegeregerena, Paul bona Janet idia hekwarahi pura ta ta ai, edia natudia ida Baibel idia stadilaia totona. Paul ia gwau: “Monday adorahi ibounai, ai makaia negana ai, emai famili Baibel stadi ai karaia toho.” Bona ma ia gwau: “To nega ibounai ai karaia diba lasi.” Ia be ena kongregesen ena elda tauna ta dainai, nega haida idia boiria, idia karaia haraga be namo gaudia ia karaia totona. Ena natudia badadia ruaosi be ful-taim hesiai gaukara idia karaia. Idia davaria adorahi be nega namona, haroro gaukara lalonai taunimanima idia hereva henia totona. Unai dainai, edia famili stadi ena nega idia haidaua. Paul ia gwau: “Nega haida adorahi ena aniani murinai, maoromaoro emai stadi ai karaia.”

Ena be tama sina ese famili stadi ena nega be mai aonega ida idia haidaua, to idia hekwarahi stadi idia karaia hanaihanai totona. Kekeni ta ladana Clare ia gwau: “Bema emai stadi ena nega ai haidaua be mai badina, egu Tamana ese frisa ena iduara dekenai stadi ena nega matamata ia atoa, ai ibounai be unai ai diba totona.”

Hanaihanai famili Baibel stadi karaia karana ese dala namona ia kehoa, matamata taudia ese idia laloa bada bona idia lalo-hekwarahilaia gaudia be edia tama sina dekenai idia hahedinaraia totona. Unai bamona stadi ese anina namona ia havaraia, bema dala aukana, hegeregere idia gaukaralaia Baibel stadi bukana amo natudia ese haere idia duahia sibona dalana ai idia karaia lasi. Martin, ena natuna memero be rua, ia gwau: “Emai famili stadi dekenai ai herevahereva momo.” Ma ia gwau: “Pura ai Baibel herevana ta oi herevalaia totona oi hebou neganai, lauma dalanai ruma bese ena goada oi itaia diba. Herevahereva lalonai, gau idauidau idia hedinarai. Sikuli dekenai idia vara gaudia oi dibaia, bona gau badana be emu natudia edia lalohadai oi dibaia?” Ena adavana, Sandra, be unai bamona ia laloa danu bona ia gwau ia ese famili stadi amo namo bada ia abia. Ia gwau: “Egu adavana ese stadi ia hakaua noho neganai, egu natuna memero edia haere dalana lau kamonaia neganai gau momo lau diba.” Bena Sandra ese ena haere ia haidaua ena natuna memero ia durua totona. Ia ese stadi ia moalelaia bada, badina stadi lalonai maduna ia huaia danu. Oibe, famili stadi negadia ese tama sina idia durua, edia natudia edia lalohadai idia diba totona.​—Aonega Herevadia 16:23; 20:⁠5.

Emu Kara Oi Haidaua Bona Oi Haheauka

Emui famili stadi ena nega ia ginidae neganai, reana oi davaria natuna ta ena lalona ia gaukara namonamo bona ia ura ia kamonai, to ma ta be oi doria sisina be namo ia kamonai namonamo bona namo ia abia totona. Keristani sinana ta ia gwau: “Ruma bese maurina be unai bamona! Oi be tamana o sinana bona oi diba dahaka do oi karaia be namo. Unai dainai, bema oi haheauka, Iehova ese oi do ia durua bona anina do ia havaraia.”

Natuna ia kamonai namonamo negana ena lata be ena mauri laganidia hegeregerena. Mai ena lalo-parara tamana o sinana be unai ia laloa. Tau ta mai ena adavana edia natudia be ima, bona edia mauri laganidia be 6 ia lao 20 mai kahana. Edia tamana, Michael, ia gwau: “Namona be maragidia dekenai nega oi henia idia haere guna totona. Bena natudia badadia ese gau maragidia bona idia hegaegaelaia gaudia idia gwauraia diba.” Tama sina ese unai dala ai mai edia lalo-parara ida edia natudia idia kara henia neganai, ma haida laloa karana idia hadibadia. Martin ia gwau: “Reana emai mero ta ia lalo-parara, to ma mero ta ese heduru ia abia be namo gau ta ia lalo-pararalaia totona. Lau davaria stadi negana be Keristani haheauka karana bona lauma ena huahua ma haida hahedinaraia negana ai ia lao.”​—Galatia 5:​22, 23; Filipi 2:⁠4.

Namona be oi hegaegae emu natudia edia diba bona mauri laganidia hegeregerena emu kara oi haidaua totona. Simon bona Mark, hari idia be mero badadia, idia davaria idia be mero maragidia neganai, edia tama sina ida Tau Hereadaena bukana stadilaia karana idia moalelaia bada. Idia gwau: “Emai tamana ia ura ai be drama bamona kahana idauidau ai haheitalaia.” Edia tamana ia laloatao ia be ena imana bona tuina ai ia diho Samaria tauna namona parabolena be ena memerodia ida idia haheitalaia hebou neganai. (Luka 10:30-​35) “Unai dainai buka ena hereva be mauri korikorina bamona bona ai moalelaia bada.”

Natudia momo be famili stadi karana idia ura henia lasi. Unai dainai tama sina be stadi idia palanilaia negadia ai do idia karaia lasi be namo, a? Lasi momokani. Aonega Herevadia 22:​15 ia gwau: “Natuna maragidia ibounai ese kavakava idia karaia noho.” Mai ena adavana lasi sinana ta ia laloa famili stadi hakaua karana dekenai ia kwalimu lasi, badina nega momo, gau idauidau ese edia stadi negana idia hadikaia. To ia haheauka. Hari ena natudia ese ia idia matauraia bada bona hanaihanai famili stadi karaia totona ia haheauka karana amo ia hahedinaraia lalokau bona hebogahisi karadia idia laloa bada.

“Tamana Lasi” Memero Bona Kekeni Durua Karana

Keristani elda taudia edia gaukara be ‘Dirava ena mamoe orea do idia naria namonamo.’ (1 Petero 5:2, 3) Edia kongregesen ena ruma besedia idia vadivadi henidia neganai, dala ia kehoa idia ese edia Keristani maduna idia huaia namonamo tama sina idia hanamoa totona. Tamana sibona o sinana sibona ia noho ruma besedia dekenai natudia hadibaia gaukarana be daika ena maduna? Laloaboio lasi, natudia hadibaia gaukarana be ia noho tamana o sinana ena maduna.

Keristani laloa maoromaoro karana ese elda taudia do ia durua, ia noho lasi tamana ena maduna bema idia huaia toho neganai idia vara diba Keristani hakaua herevadia badinaia lasi karadia idia koua totona. Ena be tadikaka rua be Keristani taihu, mai adavana lasi sinana, idia vadivadi henia diba, to famili stadi durua karadia idia hegaegaelaia neganai, idia vara diba gaudia be nega ibounai idia laloa namonamo guna be namo. Nega haida, natudia (bona mai adavana lasi sinana danu) be elda tauna ena famili stadi dekenai idia boiria neganai, reana unai be hagoadaia kara namona. To laloaboio lasi, Iehova be iseda guba Tamana badana. Ena be sinana sibona ese ena natudia ida stadi ia karaia, to Iehova be ia ida ia noho bona heduru ia henia unai ia karaia totona.

To edena bamona bema natuna be lauma gaudia ia laloa bada, to ena tama sina ese edia lauma maduna idia laloa bada lasi eiava idia laloa lasi momokani? Iehova ena hesiai taudia mai edia kamonai be idia lalo-hisihisi lasi be namo. Salamo torea tauna ese ane ia abia, ia gwau: “Hekwakwanai ia davaria tauna, tamana lasi merona, be oi [Iehova Dirava] dekenai ia tabekau. Oi be iena durua tauna ai oi lao.” (Salamo 10:14, NW) Danu, mai edia lalokau kongregesen elda taudia be idia hekwarahi edia natudia idia naria tama sina idia hagoadaia totona. Reana ruma taudia idia boiria idia herevahereva hebou totona bena idia danu idia noho bona stadi hebou daladia namodia do idia hahedinaraia. To momokani, Baibel ese ia gwauraia maduna be tama sina amo idia kokia lasi.

Edia tama sina be abidadama lasi natudia ese heduru bada idia abia be namo. Bema edia tama sina idia gwau ia hegeregere, reana emui famili stadi lalonai unai natudia umui boiria diba bona namo do idia davaria. Robert, hari ia be tau badana mai ena natudia, ena mauri lagani be toi neganai, ena tama sina ida Keristani heboudia ia lao henia. Ena tama sina be Keristani kongregesen amo idia raka siri murinai danu, unai hebou be mai moale ida ia lalodia. Ena mauri laganidia be 10 neganai, Witness mero ta ia davaria bona ia ida hebou dekenai ia lao. Unai Witness mero ena tama sina be mai edia moale ida Robert, lauma dalanai tama sina lasi natuna, idia naria bona gabeai ia ida idia stadi. Unai lalokau naria karana dainai, lauma dalanai ia tubu haraga bona hari kongregesen ena elda gaukarana ia karaia.

Ena be tama sina ese lauma dalanai natudia idia tubu dalana idia koua toho, to unai natudia be sibona idia noho lasi. Iehova be idia ia naria noho guba Tamana. Salamo 68:⁠5 (NW) ia gwau: “Iena noho gabuna helagana ai, Dirava be tamana lasi memero edia tamana.” Lauma dalanai idia be tama sina lasi memero bona kekeni idia diba idia guriguri henia diba, bona ia ese idia do ia durua. (Salamo 55:22; 146:⁠9) Iehova ena orea, sinana bamona oreana, ese mai ena goada ida ena maduna ia huaia bona lauma aniani namona ia hegaegaelaia bona ia halasia buka bona magasin amo bona Keristani kongregesen 85,000 ma haida amo ia haria. Unai dala ai, iseda Tamana, Iehova, bona iena sinana bamona orea idia henia lauma heduruna dainai, “tamana lasi” natudia danu ese Baibel stadi idia moalelaia diba.

Edia natudia ida famili Baibel stadi idia karaia hanaihanai Keristani tama sina ita hanamoa be namo. Mai edia adavana lasi tamana o sinana be edia natudia dekenai Iehova ena dala idia hadibaia totona idia haheauka neganai, ita laloa bada bona edia hekwarahi dainai ita hanamodia be namo. (Aonega Herevadia 22:⁠6) Lauma dalanai tama sina lasi natudia idia durua taudia ibounai idia diba unai kara ese iseda guba Tamana, Iehova, ia hamoalea. Lauma dalanai ruma bese naria karana be maduna metauna. To ‘bema umui manoka lasi, nega do ia ginidae huahua do umui abia.’​—Galatia 6:9.

[Footnote]

[Picture on page 23]

Famili stadi be nega namona, natudia ese idia laloa bada gaudia be edia tama sina dekenai idia hahedinaraia totona

[Picture Credit Line on page 20]

Harper’s