Tanobada—Ia Noho Ena Badina be Dahaka?

Namona be inai henanadai oi laloa: Havaraia Tauna mai ena aonega ese iseda tanobada mai hairaina bona taunimanima ia havaraia be mai ena badina, a? Bema unai henanadai oi lalohadailaia namonamo, heduru do oi abia iseda tanobada ena vaira negana oi diba totona.

GUBA bona iseda tanobada idia stadilaia namonamo saiens taudia momo idia davaria gaudia ese idia hamomokania Havaraia Tauna ia noho, oibe, Dirava ese unai gaudia ia havaraia. Idia ta ena hereva mani oi laloa:

Profesa Paul Davies be buka ladana The Mind of God lalonai, ia gwau: “Guba bona tanobada ai idia senisi lasi gau namodia idauidau idia gaukara hebou namonamo totona, taravatu bona dala maorodia idau herea idia noho be gau badana.”

Profesa Davies ese astrophysicist taudia bona ma haida idia itaia “vara kava gaudia” ia herevalaia murinai, ma ia gwau: “Unai gaudia ibounai bema ita laloa, idia hamomokania goevagoeva ita diba maurina dekenai fisiks ena taravatu idauidau, bona gau maragimaragi edia metau, siahu, goada, bona ma gau haida, idia vara kava gaudia unai, be mai anina bada. . . . Idia hahedinaraia, bema ita be Dirava ena gaukara ita karaia, bona unai gaudia be sibona eda ura hegeregerena, nob haida ita hagiroa amo ita haidaua bona edia metau, siahu, o goada ita abia hidi, do ita davaria ita abia hidi gaudia kahirakahira iboudiai dainai, gau ta be guba bona tanobada dekenai idia mauri diba lasi. Nega haida toana be unai nob idauidau be kahana maorona momokani dekenai sibona ita hagiroa neganai, mauri be tanobada dekenai ia noho diba. . . . Idia noho gaudia edia noho dalana bema sisina sibona ita haidaua, reana guba bona tanobada gaudia ita itaia diba lasi, bona unai lalohadai be mai anina bada herea.”

Taunimanima momo dekenai ena anina be Havaraia Tauna ese mai ena ura ida iseda tanobada, bona guba gaudia iboudiai, ia havaraia. Bema unai be momokani, namona be tanobada be dahaka totona ia havaraia ita dibaia. Danu, bema ita hegeregere, namona be ena ura tanobada totona ita tahua. Unai ese gau idauna ta ia havaraia. Ena be momo ese Dirava ia noho lasi lalohadaina idia abia dae, to taunimanima momo herea ese Havaraia Tauna mai ena aonega idia abidadama henia. Kerisendom ena dubu momo ese siahu ibounai Diravana bona guba bona tanobada ia Havaraia Tauna idia herevalaia. To, idia ta ese Dirava ena ura tanobada dekenai idia herevalaia goadagoada lasi.

Baibel be Dahaka Ia Gwau?

Taunimanima momo idia abia dae Havaraia Tauna ese buka ta ia henia, bona aonega karana be unai buka amo diba ita tahua. Unai buka be Baibel. Ia lalonai iseda tanobada ena vaira negana ia herevalaia herevana goevagoevana ta be Hadibaia Tauna 1:4 ai ita davaria. Ia gwau: “Uru ta ia lao, bona uru ma ta ia mai; to tanobada do ia noho ela bona hanaihanai.” (King James Version) Baibel ese ia hahedinaraia goevagoeva Iehova Dirava ese tanobada ia havaraia ena badina be dahaka. Danu, ia hahedinaraia ia ese gabu maorona dekenai ia atoa bona ena daudau dina amo be maoro momokani gau idauidau idia mauri totona. Siahu Ibounai Diravana ese ena lauma amo idaunegai peroveta tauna Isaia ia hasiahua bena inai ia torea: “Lohiabada ese guba ia karaia. Ia sibona be Dirava! Ia ese tanobada ia karaia, bona tanobada ena toana, be Dirava ese ia henia. Ia ese tanobada ia karaia, goada herea. Ia ese tano do ia noho kava totona ia karaia lasi, to tano mai anina namona, taunimanima idia noholaia diba gabuna, ia karaia. Unai ia karaia Dirava be ia gwau, ‘Lau be Lohiabada, bona dirava ma ta be lasi.’ ”​—Isaia 45:18.

To taunimanima ese tanobada dekenai mauri ibounai idia haorea diba gaudia idia havaraia be edena bamona? Ena aonega badana ai, Dirava ia gwau taunimanima ese tanobada amo mauri ibounai idia do haorea lasi neganai, kara ta do ia karaia. Baibel ena buka ginigabena, Apokalupo, dekenai ia noho gwauhamata namona mani oi itaia, ia gwau: “Dirava diba lasi taudia idia badu dikadika, badina be oiemu badu ena nega ia ginidae vadaeni. Mase taudia edia kota henia nega danu ia ginidae vadaeni. Oiemu hesiai taudia, peroveta taudia, be harihari edia davana namona do oi henia. Oi dekenai idia gari henia taudia ibounai, badadia bona maragidia, edia davana namona do oi henia ena nega danu, be ia ginidae vadaeni. Harihari be tanobada idia hadikaia vadaeni taudia do oi alaia ore.”​—Apokalupo 11:18.

Iehova ese ita dekenai ia hahedinaraia tanobadana, guba ai roketi ta dekenai tanobada ia gegea tauna ta ia gwauraia guba dekenai ia noho davana bada nadina, ia havaraia neganai ena ura be dahaka. Dirava ia ura taunimanima​—tatau bona hahine​—be tanobada ibounai paradaisona mai maino bona mai lalo-tamona ida do idia noho. Dirava ese dala ia kehoa, taunimanima ginigunadia ruaosi ese natudia idia havaraia bona gabeai tanobada do idia hahonua. Unai taunimanima ginigunadia ruaosi edia namo bona moale totona, Iehova ese tanobada ena kahana maragina be paradaiso ai ia halaoa. Lagani momo idia hanaia lalonai, taunimanima edia bese be idia bada idia lao neganai, Eden umana be do ia bada ia lao ela bona Genese 1:​28 ena hereva ia guguru: “Bona Dirava ese ia hanamodia, idia dekenai ia gwau, ‘Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.’ ”

Hari tanobada bona taunimanima edia noho dikana ita itaia neganai, ena anina be Dirava ena ura korikorina tanobada totona be ia guguru lasi, a? Eiava ena ura ia haidaua bona ia laloa taunimanima idia kerere dainai idia ese tanobada idia hadikaia momokani karana do ia koua lasi bona matamatana do ia karaia, a? Lasi, ita diba unai hereva ruaosi be momokani lasi. Baibel ese ita ia hamaoroa Iehova ia ura gaudia ibounai be do idia vara, taunimanima ta lasi eiava ia vara kava gauna ta lasi ese ia abia hidi gaudia idia koua diba lasi. Ita ia hagoadaia, ia gwau: “Lau ese lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.”​—Isaia 55:11.

Dirava ese Ena Ura Ia Haidaua Lasi

Adamu bona Heva ese Dirava idia rakatania bona ia ese Eden umana amo idia ia lulua neganai, ia hedinarai goevagoeva Dirava ena ura paradaiso totona be idia amo do ia hagugurua lasi. To, unai negana ai bona unai gabu ai, Iehova ese ia hahedinaraia edia natudia haida amo ena ura korikorina be do ia vara. Momokani, unai ia vara totona nega daudau do ia ore, reana lagani handred momo do idia ore guna, to gau ta ese ia hahedinaraia lasi, bema Adamu bona Heva idia goevadae noho, lagani hida do idia lao ela bona Dirava ena ura korikorina do ia vara. To hereva momokani be inai, Iesu Keriso ena Lagani 1,000 Lohia Negana ena dokona ai​—lagani 1,000 bona ma haida inai nega murinai​—Eden bamona Paradaisona be tanobada ibounai dekenai do ia noho bona taunimanima ginigunadia ruaosi edia natudia be mai edia maino bona moale ida Tanobada ai do idia noho. Oibe, ta ese do ia gorea diba lasi Iehova be ena ura ia Hagugurua Tauna korikorina!

Unai nega ai, nega daudau gunanai Dirava ese ia gwauraia peroveta herevadia namodia be do idia guguru. Isaia 11:​6-9 bamona herevadia be do idia guguru momokani, ia gwau: “Uda sisia bona mamoe, be do idia noho hebou mai maino danu, bona taiga be nanigosi danu do idia hekure hebou. Boromakau natuna bona laiona natuna be do idia aniani hebou, bona taunimanima ena natuna maragina ta ese do ia hakaudia. Boromakau hahine bona bea, be do idia aniani hebou. Edia natudia do idia hekure hebou mai maino danu. Laiona ese rei kakoro do ia ania, boromakau ese ia ania bamona. Rata ia inua merona, be gaigai ena guri latanai do ia gadara, bona mero ese gaigai koremana ena guri lalonai, iena imana do ia toia vareai. Siona, Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.”

Gorere bona mase danu be do idia noho lasi. Baibel ena buka ginigabena ai idia noho herevadia be unai idia hahedinaraia goevagoeva, ani? Ia gwau: “Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—Apokalupo 21:3, 4.

Oibe, ita gari lasi be namo​—iseda Tanobada mai hairaina be do ia noho hanaihanai. Namona be oi ese inai tanobada dikana ena oromana bona tanobada idia hadikaia karadia ibounai idia ore negana amo do oi roho mauri. Dirava ese do ia karaia tanobada matamatana bona goevana be kahirakahira. Bona lalokau taudia momo herea be toreisi lou ena hoa karana dainai mase amo do idia toreisi. (Ioane 5:​28, 29) Momokani, iseda tanobada be do ia noho hanaihanai, bona ia dekenai do ita noho diba bona do ita moalelaia diba.