Agora—Idaunegai Atena Ena Anina Bada Gabuna

ATENA ena diba bada taudia idia helogohelogo! Lalohadai matamatadia be unai Greece ena siti ta ena agora, o maketi gabuna dekenai hanaihanai idia halasia. To, inai negai ia be idau herea momokani. Toana be siti dekenai hari sibona ia ginidae Iuda tauna ta be “idau dirava haida ia gwauraia” noho. Mai anina bada herevadia ia gwauraia “unuseni ia davaria taudia dekenai.” Hekokoroku Epikuro taudia bona vaira auka Stoa taudia idia henanadai: “Inai hereva kava tauna be dahaka ia gwauraia noho?” Oibe, Atena ena agora be taunimanima vairanai gau idauidau ibounai idia hepapahuahulaia goadagoada gabuna badana. To idau dirava haida​—⁠lasi, unai idia herevalaia lasi vaitani!​—⁠Kara 17:​17, 18.

Nega ginigunana aposetolo Paulo be Atena ena agora dekenai ia haroro neganai, ena hereva idia laloa kerere Atena taudia be unai bamona idia laloa. Ia be Iesu Keriso bona toreisi lou ia harorolaia. To, nega momo lalohadai idaudia idia abia dae Atena taudia ese agora dekenai ia gwauraia lalohadai idauna be dahaka dainai unai bamona idia laloa?

Atena ese Ena Ariara Ia Abia

Unai agora bona ena anina Atena taudia edia tomadiho bona mauri lalonai, ia idau momokani. Atena ena agora be Acropolis ena notwest kahana dekenai, ororo sisina gabuna bona unai gabu ena bada be hekta 10 bamona. Toana be lagani 600 B.C.E. sisina murinai, Atena ena gavamani tauna bona taravatu karaia tauna Solon ena nega lalonai, unai tano be siti ena ariara totona idia makaia. Demokratik dalana be Atena dekenai idia hamatamaia bona siti maurina idia hanamoa neganai, lagani 500 B.C.E. sisina murinai, ruma haginia gaukarana be ia bada ia lao. Unai ese agora ia hamatamataia bona ena anina ia habadaia.

Greek herevana a·go·raʹ be hereva ta anina “hebou” amo ia mai. Unai ladana be hegeregere badina agora idia gaukaralaia siti ena hebou gabuna badana. Agora be taunimanima ese ma haida ida, eiava ma haida vairanai idia karaia gaudia edia gabu badana. Ia be siti ena kaunsolo bona kota idia noho gabuna, idia maketi bona bisinesi idia karaia gabuna badana, Greek drama idia hahedinaraia gabuna, gadara helulu karaia gabuna, bona mai edia aonega ida gau idauidau idia kikilaia totona unai hebou gabuna idia ura henia bada.

Oi ura Atena ena agora dekenai oi loaloa bona hari idia noho dubu, guhi mai edia du momo, kaivakuku, toa nadidia bona ruma oi itaia, a? Agora ena guna negana ita tahua totona, namona be hari inai nega ena siti ena regerege bona mauri haragana ita rakatania bona nadinadi daladia dekenai do ita raka lao, guna marble amo idia karaia rumadia, hari idia moru vadaeni gaudia, idia utua nadi badadia, bona idia moru iduara badadia, ava bona tubutubu gaudia ese idia koua vadaeni gabudia dekenai do ita lao.

Dubu Badadia, Maragidia, Bona Gimaia Diravadia

Loaloa taudia be dubu badadia, dubu maragidia, bona dirava idauidau dekenai idia hahelagaia gabudia momo idia itaia neganai, idia hoa momokani. Unai gaudia ibounai dainai agora be tomadiho gabuna badana iharuana, Acropolis murinai. Idaunegai Atena ena nega namona ai, tomadiho be kara ibounai lalonai ia vareai vadaeni. Unai dainai gavamani dipatmen bona gaukara idauidau idia naria opesi idia “gimaia diravadia” edia dubu helaga be agora dekenai idia haginia.

Unai bamona dubu huanai mai anina bada dubu ta be Hephaestus ena Dubu. Dirava hahinena Athena be Hephaestus ida idia gwauraia hebou. Unuseniai unai dirava ruaosi be imana amo gau idauidau karaia karana edia dirava bamona idia tomadiho henidia. Akioleji gaukara amo auri bona uro karaia gaudia be unai dubu badinai idia davaria, bona idia hahedinaraia unai dubu be Hephaestus ena dubu, Greek taudia edia imana amo karaia gaudia edia dirava, unai gaudia idia karaia neganai lahi idia gaukaralaia. Lagani 600 C.E. murinai, unai ia do dika lasi dubuna be St. George ena Greek Otodoks Dubu ai idia halaoa, ena be hari unai bamona idia gaukaralaia lasi.

Oibe, agora danu be ia gimaia diravana ia abia be namo. Ia be Zeus Agoraios, momo idia laloa iena siahu amo taunimanima ese ma haida vairadiai herevahereva karana idia hamatamaia, ia totona Pentelic marble amo boubou patana hereadaena idia haginia bona idia hahelagaia. (Kara 14:​11, 12 itaia.) Kahirakahira dekenai ia noho Dirava edia Sinana Badana ena boubou patana ena kahana kahana be taunimanima ese idia matauraia bada taudia laloatao totona nadi badadia mai hairai idia noho.

Ita raka lao sisina neganai, Ionic dubu maragina ta ita davaria. Tanobada bona ena mauri gaudia ia stadilaia tauna ia gwau ia be Tamana Apollo ena Dubu. Dahaka dainai? Badina idaunegai Greek taudia edia gori hegeregerena, ia be Ion iduhuna ia havaraia tauna Ion ena tamana, bona Atena taudia be unai iduhu ena kahana ta.a Unai hegeregerena, Apollo be gaukara idauidau naria oreana edia dirava badana, siti lalonai idia noho orea idauidau ia naria.

Not kahana dekenai, guna ia gini dubu maragina ena momoru ita itaia, ia be lagani 450 B.C.E. bamona ai idia haginia gauna. Unuseniai Zeus bona Athena Phatrios idia tomadiho henia, idia be idaunegai tomadiho oreadia edia dirava badadia. Atena dekenai idia noho taudia ibounai ese unai orea lalonai idia vareai be taravatu bamona. Dala ena kahana dekenai, Dirava Twelve edia boubou patana ita davaria.

Kahirakahira Zeus Eleutherios ena Stoa dekenai, Greek taudia edia dirava badana be hari ura kwalimu bona hahemauri edia dirava bamona idia hanamoa lou. Unai guhi mai ena du momo gabuna, o stoa, be momo idia raka loaloa bona idia hebou gabuna namona. Idia gwau taunimanima momo ese idia diba aonega tauna Socrates be unai stoa dekenai ena turadia ida ia hedavari, unuseniai idia helai bona idia herevahereva eiava idia raka loaloa. Unai stoa idia hahairaia totona idia karaia hanamoa karadia bona idia henia harihari gaudia momo, hegeregere Atena totona tuari lalonai idia mase taudia edia kesi, be mai edia anina edia inai taudia amo siti idia gimaia bona ena ura kwalimu idia dogoatao karana dekenai.

Panathenaea Dalana

Agora ena kona ta amo ia heau lao kona ta dekenai be nadi dalana badana ta idia gwauraia Panathenaea Dalana. Ena ladana bona ena anina be Atena ena aria badana, Panathenaea, amo idia abia. Unai aria lalonai inai dala dekenai dirava hahinena Athena ena kwarana dabua be Procession House (siti ena geiti badinai) amo idia huaia lao Acropolis dekenai. Parthenon ena guhi dogoatao nadidia dekenai idia hedinarai laulau ese ita idia durua unai aria ena hairai bona ena bada ita diba totona​—⁠ia lalonai tuari taudia, heau helulu kariota, do idia bouboulaia boromakau bona mamoe idia noho, bona tatau bona kekeni matamatadia be boubou dekenai do idia gaukaralaia kohu idia huaia. Unai kara be Atena taudia bona idia boiria taudia ese idia raraia, idia totona ruma haginia taudia be agora idia palanilaia neganai gau ibounai idia karaia namonamo. Hegeregere, guhi mai ena du momo bona vairanai mai ena dehe bona vadavada be mai aonega ida idia karaia, aria lalonai dala dekenai idia vara gaudia idia itaia diba totona. Edia vairana dekenai idia karaia vadavada momo herea dekenai gadara idia itaia taudia momo idia helai diba.

“Kaivakuku ese Inai Hanua Idia Hahonua Momokani”

Gabu tamona dekenai dubu, kaivakuku, bona toa nadidia mai hairai be momo herea momokani dainai, ita hoa lasi aposetolo Paulo be “ia itaia kaivakuku ese inai hanua idia hahonua momokani, bona iena lalona ia hisihisi bada herea.” (Kara 17:16) Paulo be agora dekenai ia vareai neganai, ia itaia gaudia dainai reana ia hoa bada. Dirava Hereme idia laulaulaia usina kaivakuku be momo herea dainai gabu ta, ladana Hereme ena Stoa, idia karaia idia atodia totona. Hereme ena laulau ma haida dekenai ena dabua haida ese Greek taudia edia korosi ia hahedinaraia​—⁠idia ese natuna havaraia siahuna bona mauri idia laulaulaia. Venus Genetrix, mahuta hebou karana ena dirava hahinena ena kaivakuku ia noho bona Dionysus ena kaivakuku ta danu ia noho, ia ese usina korosi momo ia hahedinaraia. Agora ena “helaga” toana hahedinaraia totona gabu idia makaia nadi ta latanai, disi ta mai ena ranu “helagana” ia noho, idia vareai taudia ibounai ese unai ranu amo sibodia do idia hagoevaia.

Unuseniai tomadiho idia laloa bada dainai, ita diba Paulo ese dika ia davaria diba. Idia gwau “ia be idau dirava haida ia gwauraia,” bona unai nega ena taravatu be ‘tau ta be dirava idaudia, o matamatadia do ia abidia lasi; danu bema taunimanima ibounai ese idia abia dae lasi, tau ta ese dirava idaudia do ia tomadiho henidia lasi.’ Unai dainai, ita hoa lasi aposetolo tauna be Areo Ororona dekenai idia abia lao idia nanadaia totona.​—⁠Kara 17:⁠18, 19.

Siti Naria Gabuna Badana

Ruma kuboruna ta ladana Tholos, lalonai Atena gavamani ena hedikwota ia noho. Hanuaboi ai siti ena seamani taudia momo be unai ruma dekenai idia mahuta, unai amo gavamani taudia be hanaihanai idia noho gaukara idia karaia totona. Taravatu hegeregerena gau edia metau bona bada idia hahetohoa gaudia be Tholos dekenai idia noho. Siti naria gaukara ena dipatmen idauidau edia opesi be kahirakahira idia noho. Tholos ena notwest kahana dekenai ororo idia utua bona Kaunsolo Rumana be unuseniai idia karaia. Unuseniai, Kaunsolo ena memba taudia 500 idia hebou komiti gaukara bona Atena ena gavamani totona taravatu hegaegaelaia gaukarana idia karaia totona.

Siti ena mai anina bada rumana ta be Royal Stoa. Unuseniai Atena ena Royal Archon​—⁠siti ena majistret badadia toi amo tamona​—⁠ena gaukara gabuna ia noho. Unuseniai ia ese tomadiho bona taravatu naria gaukara momo ia karaia. Reana iniseniai hemataurai lasi karana dainai Socrates idia samania. Idaunegai Atena taudia edia taravatu be Royal Stoa ia vaira henia rumana ena haba dekenai idia torea. Unai ruma badana vairanai nadi ta ia noho, bona lagani ta ta ai, archon taudia, o majistret badadia, be unai nadi latanai idia gini bona edia gaukara karaia namonamo gwauhamatana idia karaia.

Attalus Ena Stoa

Attalus ena Stoa be agora dekenai ia do gini noho ruma hereadaena. Ia do tau matamata neganai, Attalus, Pergamum ena King (lagani 200 B.C.E. murinai), be Atena edia sikuli dekenai ia lao, Mediterranea tanodia edia lohia besedia edia natudia idia karaia hegeregerena. Ena terona dekenai ia helai neganai, inai hairai bada harihari gauna​—⁠Attalus ena Stoa​—⁠ia henia ia lao sikulina ena siti dekenai.

Attalus ena Stoa be mai ena guhi danu bona ena gaukara badana be taunimanima idia hebamo, idia kiki, bona idia raka loaloa diba gabuna namona. Ena foloa bona dehe be gabu namodia aria lalodiai dala dekenai idia vara gaudia raraia totona, bona ia be raka loaloa gabuna namona dainai ia be gabu namona danu sitoa idia noho totona. Reana Atena ena gavamani ese unai sitoa rumadia be hoihoi taudia dekenai idia rentaia bona unai amo moni idia karaia.

Attalus ena Stoa be idia hanamoa lou, bona ena toana korikorina ai idia karaia, bona ia be geometry ena taravatu hegeregerena idia haginia rumana ena haheitalai namona. Unai ruma ena kahana ta ta, henunai bona ataiai idia noho du edia bada edia idau, edia diari bona dibura ese toana namona idia havaraia, bona idia gaukaralaia gaudia edia hairai dainai unai ruma ena toana be idau momokani. Gau ibounai edia toana be idauidau totona dala idauidau idia gaukaralaia, dala badana be du edia ataiai kahana edia sitailo be toi​—⁠Doria, Ion, bona Aigupito taudia edia sitailo idia badinaia.

Sene Karadia Karaia Gabuna Ta

Atena dekenai nega momo sene karadia karaia totona Concert rumana idia gaukaralaia. Ia be Vipsanius Agrippa, Roma Lohiana Augustus ena ravana tau ena harihari gauna. Ena vairana kahana be kala idauidau marble amo idia karaia. Drama idia itaia taudia idia helai gabuna ai kahirakahira taunimanima 1,000 idia helai diba, ena lata be mita 25 bamona bona idia karaia neganai ruma lalonai guhi be du ese idia dogoatao lasi. Unai guhi be idaunega tanobadana lalonai gari lasi ida idia karaia gauna! To, reana, unuseniai idia karaia moale karadia momo be Keristani taudia mai edia kara goevagoeva ese idia ura henia lasi.​—⁠Efeso 5:​3-5.

Reana, unai negai idia noho taudia, diba idia ura abia taudia unai, be Pantainos ena Laiberi idia vadivadi henia. Ena haba dekenai be keisi momo idia noho bona idia lalonai be imana amo idia torea papyrus bona parchment momo. Laiberi ena daiutu badana be west kahana ia vaira henia, bona laini dekenai idia gini du murinai, ta ese ariara gabuna mai ena guhi du momo latanai ia itaia diba. Unai ariara be loaloa, duahiduahi, o laloa dobu gabuna namona. Laiberi edia taravatu rua toretore gauna ta idia davaria. Idia gwau: “Buka ta do umui abia lao lasi,” bona “[Laiberi] be hora ginigunana dekenai ia kehoa ela bona hora namba 6.”

Agora, Hari Inai Negai

Vanegai lagani lalodiai, American School of Classical Studies ese kahirakahira agora ibounai ia geia vadaeni. Acropolis be ororo ataiai bona ia be henuna kahanai ia noho, bona idaunega Atena ena sivarai sisina idia ura dibaia loaloa taudia idia ura dikadika unuseniai idia lao.

Kahirakahira dekenai ia noho Monastiraki Flea Market​—⁠agora bona Acropolis amo oi raka lao diba​—⁠be hoa bada gabuna idauna ma ta. Ia ese loaloa tauna dekenai Greek ena sene karadia bona Middle East tanodia edia hoihoi dalana ia hahedinaraia. Bona, danu, loaloa tauna ese Iehova ena Witness taudia do ia itaia mai moale ida aposetolo Paulo be lagani 1,900 gunanai ia karaia karana idia karaia noho​—⁠Basileia ena sivarai namona be ‘unuseniai idia davaria taudia dekenai’ idia harorolaia.

[Footnote]

[Box on page 28]

Bisinesi Atena Dekenai

Agora be diba bada taudia bona Atena siti ena gaukara idauidau idia karaia gabuna sibona lasi, to danu ia be siti ena maketi gabuna badana. Atena be bisinesi gabuna ai ia lao, badina ena moni ena siahu be ia goada bona ena majistret badadia be dala goevana idia badinaia, bona idia be mai edia siahu do idia sekea bema bisinesi karadia ibounai be mai momokani bona maoromaoro ida idia heau.

Atena ese uaina, olive ena dehoro, hani, marble, bona kohu haida hegeregere ceramic bona auri be tano ma haida dekenai idia hoihoilaia. Unai kohu edia gabuna ai idia ese uiti be unai tano amo idia hoia. Attica (Atena ena provinsi) be ia hegeregere lasi taunimanima ibounai ubua aniani do ia havaraia totona, unai dainai hoihoi karana ena taravatu be auka. Piraeus (Atena ena sisima vareai gabuna) ena maketi dekenai nega ibounai aniani ia be hegeregere siti taudia bona ami taudia totona. Bona aniani hoihoilaia taudia be aniani do idia haboua lasi gabeai dabu neganai davana badana dekenai do idia hoihoilaia totona.