Mai Momokani ida Dirava Tomadiho Henia

Dirava ese taunimanima edia tomadiho ia abia dae totona, gau badana be mai momokani ida idia karaia. (Ioane 4:23) Baibel ia gwau tomadiho momokani taudia be “mauri Diravana ena ekalesia. Ekalesia be hereva momokani ena du, bona hereva momokani ia gimaia maguna.” (1 Timoteo 3:15) Dirava ena ekalesia taudia ese Dirava ena Hereva lalonai ia noho hereva momokanina idia abia dae sibona lasi, to edia mauri dekenai idia badinaia bona tanobada hegegemadai idia harorolaia.​—Mataio 24:14; Roma 10:​9-15.

TAUNIMANIMA momo herea be Iehova ena Witness taudia edia Baibel hadibaia gaukarana, tano 200 mai kahana dekenai idia karaia gaukarana unai, idia manadalaia vadaeni. Idia be Baibel idia stadilaia bona ia be hereva momokani bamona idia hadibalaia, bona taunimanima edia aonega herevadia ida idia hatamonaia lasi. Baibel amo idia abia hahediba herevadia oi diba vadaeni, a? Taunimanima momo be Iehova ena Witness taudia edia hereva idia kamonaia haraga lasi, badina taunimanima ma haida be hereva dikadia idia dekenai idia halasia. To kudou-maoro taudia ai boiria, idia sibona ese Witness taudia edia haroro herevadia be idia momokani eiava lasi idia abia hidi totona. Unai bamona mai anina bada abia hidi ita karaia totona, namo lasi taunimanima edia hereva ita abia dae kava. Iehova ena Witness taudia edia hahediba herevadia idia tahua taudia momo ese heduru bada herea idia abia.

Hereva Momokani Ita Diba ese Gari Ia Kokia

Hegeregere, Eugenia ena sivarai mani oi laloa. Ia kekeni neganai, ena tama sina ese Katolik dubu ena hadibaia herevadia idia badinaia auka. Lagani 1979 ai, pope be Mexico dekenai ia lao neganai, ena tamana be unai vadivadi idia hegaegaelaia tauna ta. Eugenia ese ena turadia haida ia vadivadi henia neganai, Iehova ena Witness taudia ia davaria. Edia heduru amo, Baibel ena hereva ia tahua namonamo. Ia gwau: “Matamana ai lau gari. Hereva momokani lau davaria vadaeni! To ena anina be guna lau abia dae herevadia momo be idia maoro lasi. Egu ruma bese taudia, egu turadia, lau lalokau henia taudia unai​—idia ibounai edia abia dae herevadia be idia maoro lasi. Lau gari. Sibona lau nanadaia loulou, egu ruma bese taudia be lau davaria gaudia idia diba neganai, dahaka do idia karaia. Nega ia hanaia bona Iehova ena heduru lau abia dainai, lau davaria gaudia idauidau be metairametaira lau manadalaia. Dina ta, aiemai ruma bese ena turana ta, ia be tomadiho hereva edia profesa, lau hereva henia. Ia lau hamaoroa lau ura hereva momokani lau davaria. Bena ia gwau, ‘Bema oi ura hereva momokani oi diba, Iehova ena Witness taudia oi tahua.’ ”

Eugenia ia laloa bamona, ena ruma bese taudia be ia idia lulua edia ruma amo. To, Witness taudia be lauma dalanai ia idia durua noho. Ia gwau: “Goada lau abia, hereva momokani lau abia dae totona. Lau lalo-parara, ia totona lau hekwarahi be namo. Iehova ena Witness taudia ese lau idia abia dae karana be mai anina bada. Keristani kongregesen lalonai mamina lau abia lau idia lalokau henia. Dirava ena orea kahirakahira lau noho dainai, lau ia durua, lau sibona be hereva momokani lalonai lau noho ena gari lau hanaia totona.”

Haheitalai ma ta mani oi laloa. Sabrina be ia tubu daekau neganai, ena ruma bese be nega momo Baibel idia herevalaia. Idia ese ‘ruma bese tomadihona’ ta bamona idia havaraia. Iena kara be tomadiho idauidau taudia ia bamoa edia koikoi herevadia ia hahedinaraia totona. Iehova ena Witness hahinena ta be ia dekenai Baibel stadi ia herevalaia neganai, maoromaoro ia abia dae badina ia ura edia hahediba herevadia ia hakoikoia. Ia gwau: “Lagani ta mai kahana lau stadi vadaeni murinai lau gari, ‘sibona egu hereva momokani’ do lau haboioa garina. Lau bamoa tomadiho oreadia momo edia koikoi herevadia lau hahedinaraia be ia auka lasi, to hari be ia idau.”

Sabrina be ia gari dainai, iena Baibel stadi Iehova ena Witness taudia ida ia hadokoa. To, unai ia karaia neganai, lauma dalanai ia hitolo bamona. Unai dainai, ia laloa do ia stadi lou, bena ia davaria hereva momokanina ia abia dae. Sabrina be ia goada ia lao ela bona ia ura ia dibaia gaudia be ma haida dekenai ia hadibaia. Witness taudia ia nanadaia bema edia ruma-ta-ruma-ta gaukarana dekenai ia bamodia diba. Sabrina ia gwau: “Gwaumaoro idia do henia lasi neganai, Iehova ena Witness taudia ida lau haroro totona, lau idia nanadaia: ‘Momokani oi ura Iehova ena Witness hahinena ai oi lao, a?’ Lau haere, ‘Lasi!’ Lau gari bada lou.” Gabeai, hebou iboudiai dekenai ia lao hanaihanai bona Dirava ena taunimanima ia itaia bona Baibel ena hakaua herevadia idia badinaia karana ia itaia murinai, Sabrina ia diba unai be hereva momokani. Bapatiso ia abia bona hari ia be ful-taim hesiai gaukara ia karaia.

Dahaka Dainai Idia Idau Vaitani?

Haida do idia henanadai, ‘Dahaka dainai Iehova ena Witness taudia edia hahediba herevadia be idia idau vaitani tomadiho oreadia ma haida edia amo?’ Bema nega sisina Witness taudia edia hahediba herevadia oi laloa, do oi itaia idia be Baibel idia stadilaia namonamo lalo-momokani Keristani taudia. Oi ai hagoadaia, sibona emu Baibel dekenai edia hahediba herevadia haida, ataiai ai torea gaudia, oi tahua.

Iehova ena Witness taudia idia abia dae herevadia bona Baibel ena hereva idia badinaia karana oi tahua namonamo dainai, hereva momokani ese oi ia ruhaia diba danu. (Ioane 17:⁠17) Hereva momokani dekenai oi gari ena badina ta be lasi. Iesu ena gwauhamata oi laloatao: “Hereva momokani be do umui diba, bona hereva momokani ese umui do ia ruhaia.”​—Ioane 8:⁠32.

[Box on page 6]

IEHOVA ENA WITNESS TAUDIA EDIA HAHEDIBA HEREVADIA HAIDA

◯  Iehova be siahu ibounai Diravana. Ena ladana be nega 7,000 mai kahana Baibel ena idaunegai revarevadia lalonai ia noho.​—Salamo 83:⁠18.

◯  Iesu Keriso be Dirava ena Natuna, tanobada dekenai ia mai ena mauri ia henia taunimanima totona. (Ioane 3:​16, 17) Iehova ena Witness taudia ese Iesu Keriso ena hahediba herevadia Evanelia Bukadia lalonai idia noho hegeregerena, idia badinaia.

◯  Iehova ena Witness taudia ese Isaia 43:10 amo edia ladana idia abia. Unai siri lalonai Iehova ia gwau: “Umui be lauegu hereva hamomokania taudia.”

◯ Lohiabada ena Guriguri lalonai ita gurigurilaia Basileiana be guba gavamanina. Kahirakahira, ia ese tanobada lalonai idia noho hisihisi bona lalohisihisi ibounai do ia kokia bena Baibel ia gwauhamatalaia Paradaisona do ia havaraia.​—Isaia 9:​6, 7; Daniela 2:44; Mataio 6:​9, 10; Apokalupo 21:​3, 4.

◯ Dirava ena ura idia karaia taudia iboudiai be Basileia ena hahenamo idia moalelaia hanaihanai diba.​—Ioane 17:3; 1 Ioane 2:⁠17.

◯ Keristani taudia be Baibel ena hereva hegeregerena edia kara idia hanamoa be gau badana. Gau badana be do idia hekwarahi idia kara momokani, idia kara goeva, idia kara maoromaoro, bona edia dekena taudia dekenai lalokau idia hahedinaraia.​—Mataio 22:39; Ioane 13:35; 1 Korinto 6:​9, 10.

[Picture on page 5]

Iehova ena Witness taudia ese tano 200 mai kahana dekenai Baibel ena hereva momokani idia halasia