Oiemu Guriguri be “Muramura mai Bonana Namona Bamona,” A?
“Lau ura egu guriguri do oi abia dae, . . . muramura mai bonana namona bamona.”—SALAMO 141:2.
1, 2. Bonana namona muramurana idia gabua ena anina be dahaka?
IEHOVA DIRAVA ese ena peroveta tauna Mose ia hagania muramura mai bonana namona ia hegaegaelaia, Israela ena tomadiho rumana ai idia gaukaralaia totona. Idia karaia totona, Dirava ia gwau mai edia bonana namona gaudia hani idia mikisia. (Esodo 30:34-38) Momokani, ia be mai ena bonana namona.
2 Dirava ese Israela besena ida ia karaia Taravatu gwauhamatana lalonai, dina ta ta ibounai muramura mai ena bonana namona idia gabua. (Esodo 30:7, 8) Bonana namona muramurana idia gaukaralaia be mai ena anina, a? Oibe, badina salamo torea tauna ese inai ane ia abia: “Lau ura egu guriguri do oi [Iehova Dirava] abia dae, bona ena mamina oi dekenai be namo, muramura mai bonana namona bamona. Bona lau ura egu imana lau abia isi kara ena namo, be adorahi boubouna ena namo hegeregerena, oiemu vairana dekenai.” (Salamo 141:2) Apokalupo bukana lalonai, aposetolo Ioane ese ia hahedinaraia Dirava ena guba terona kahirakahira idia noho taudia be mai edia golo urodia bona idia lalonai bonana namo muramurana ia noho. Dirava ena lauma amo ia havaraia herevana ia gwau: “Unai muramura ena bonana namona be Dirava ena taudia edia guriguri ena toana.” (Apokalupo 5:8) Unai dainai, muramura mai bonana namona gabua karana ese dina bona hanuaboi ai Iehova ena hesiai taudia ese idia gwauraia bona Ia ese ia abia dae guriguridia ia laulaulaia.—1 Tesalonika 3:10; Heberu 5:7.
3. Dahaka ese ita ia durua, bena Dirava vairanai iseda guriguri be ‘muramura mai bonana namona bamona’?
3 Dirava ese iseda guriguri ia abia dae totona, Iesu Keriso ena ladana ai ita guriguri be gau badana. (Ioane 16:23, 24) To iseda guriguri be edena bamona ita hanamoa diba? Bema Baibel ese ia hahedinaraia haheitalai haida ita lalohadailaia, ita do idia durua diba iseda guriguri be muramura mai bonana namona bamona Iehova vairanai.—Aonega Herevadia 15:8.
Mai Abidadama ida Oi Guriguri
4. Dirava ese iseda guriguri ia abia dae totona, abidadama ena anina be dahaka?
4 Iseda guriguri be muramura mai bonana namona bamona Dirava dekenai idia daekau totona, mai abidadama ida ita guriguri be gau badana. (Heberu 11:6) Keristani elda taudia ese lauma dalana ai ia gorere bona Baibel amo idia henia heduru ia abia dae tauna idia davaria neganai, edia “guriguri mai abidadama danu ese gorere tauna do ia hanamoa.” (Iamesi 5:15) Iseda guba Tamana ese mai abidadama ida ita henia guriguri ia moalelaidia, bona ita guriguri bena Dirava ena Hereva ita stadilaia karana ia moalelaia danu. Salamo torea tauna ese lalohadai namona ia hahedinaraia, ia gwau: “Oiemu oda hereva be lau ese lau matauraia, bona lau ura henia danu. Oiemu hadibaia hereva be do lau laloa noho. Aonega bona lalona kehoa be lau dekenai do oi hadibaia, badina be oiemu taravatu lau abidadama henia noho.” (Salamo 119:48, 66) Namona be ‘iseda imana ita abia isi’ bona mai manau ida ita guriguri, bona Dirava ena taravatu badinaia karana amo iseda abidadama ita hahedinaraia.
5. Bema iseda aonega ia hegeregere lasi, dahaka ita karaia be namo?
5 Reana iseda aonega ia hegeregere lasi hahetoho ta ita hanaia totona. Reana Baibel ena peroveta herevana ta be hari ia guguru eiava lasi ita daradaralaia. To ita ura lasi unai ese lauma dalana ai ita ia hadikaia, bona unai dainai aonega ita abia totona Iehova ita noia be namo. (Galatia 5:7, 8; Iamesi 1:5-8) To momokani, ita laloa diba lasi Dirava ese hoa dalana ai ita do ia haere henia. Namona be ena ura ena taunimanima ibounai totona ita badinaia, bona unai amo ita hahedinaraia mai momokani ida ita guriguri. Gau badana be “hesiai tauna mai ena kamonai, bona mai ena kara maoromaoro” oreana ese ia halasia bukadia edia heduru amo, iseda abidadama ia hagoadaia dalana ai, Baibel ita stadilaia. (Mataio 24:45-47; Iosua 1:7, 8) Danu, namona be iseda diba ita habadaia totona, Dirava ena taunimanima edia hebou idauidau ita lao henia hanaihanai.—Heberu 10:24, 25.
6. (a) Iseda nega bona Baibel ena peroveta herevadia idia guguru ita laloa neganai, ita ibounai be dahaka ita lalo-pararalaia be gau badana? (b) Iehova ese ena ladana do ia hahelagaia totona ita guriguri neganai, dahaka danu ita karaia be namo?
6 Hari inai negai, Keristani taudia haida ese sibona edia ura gaudia bona dagi bada moni gaukaradia idia tahua noho bona unai amo idia hahedinaraia hari idia laloa lasi “dokona” be kahirakahira. (Daniela 12:4) Abidadama tamona tadikaka be unai bamona taudia totona idia guriguri be maoro. Idia guriguri unai taudia ese Baibel ia hamomokania gauna, Iehova be lagani 1914 ai Keriso dekenai King dagina ia henia neganai iena noho ia matamaia guba dekenai bona hari ena inai taudia bogaraginai ia lohia, idia abidadama henia lou eiava idia abidadama henia goada. (Salamo 110:1, 2; Mataio 24:3) Namona be ita ibounai ita lalo-parara momokani, guna idia perovetalaia gaudia, hegeregere Iehova ese tomadiho koikoi—“Babulonia Badana”—do ia hadikaia, Satani, Magoga tano tauna Goga, be Iehova ena taunimanima do ia dagedage henia, bona Siahu Ibounai Diravana ese Aramagedono tuarina lalonai idia do ia hamauria, be karaharaga do idia vara diba bona nega kwadogina lalonai idia ibounai idia guguru diba. (Apokalupo 16:14, 16; 18:1-5; Esekiela 38:18-23) Unai dainai namona be Dirava ita noia ena heduru ita abia lauma dalana ai ita noga noho totona. Namona be ita ibounai ita guriguri goadagoada Iehova ese ena ladana do ia hahelagaia, ena Basileia do ia mai, bona iena ura be guba dekenai ia vara bamona tanobada dekenai do ia vara. Oibe, namona be abidadama ita hahedinaraia noho bona ita hamomokania ita be mai momokani ida ita guriguri. (Mataio 6:9, 10) Oibe, namona be Iehova idia lalokau henia taudia iboudiai ese Basileia bona ena kara maoromaoro idia tahua guna bona dokona ia do mai lasi neganai, sivarai namona harorolaia gaukarana idia karaia goadagoada.—Mataio 6:33; 24:14.
Iehova Oi Hanamoa Bona Oi Tanikiu Henia
7. Sivarai Ginigunana 29:10-13 ai, Davida ena guriguri ena kahana ia noho, ia lalonai edena hereva oi laloa bada?
7 Iseda guriguri be “muramura mai bonana namona bamona” totona, gau badana be mai iseda kudouna ibounai ida Dirava ita hanamoa bona ita tanikiu henia. King Davida bona Israela taudia ese Iehova ena dubu helaga haginia totona kohu idia henia neganai, Davida be unai bamona guriguri ia gwauraia. Ia gwau: “Lohiabada e, aiemai sene taudia edia Dirava, ai ese oi do ai hanamoa ela bona hanaihanai. Lohiabada e, goada bona siahu bona hairai bona kwalimu, bona King ena toana be oiemu. Guba bona tanobada dekenai idia noho gaudia ibounai be oiemu. Oi be King momokani, basileia ibounai be oi ese oi biagua noho. Kohu momo bona mataurai bada, be oi dekena amo idia mai noho. Gau ibounai oi biagua noho. Oiemu imana dekenai be goada bona siahu idia noho. Unai dainai oi ese taunimanima oi hagoadaia noho, bona idia oi hasiahua diba danu. Aiemai Dirava, harihari ai ese oi dekenai ai tanikiu henia, bona oiemu ladana namo herea momokani ai hanamoa noho.”—1 Sivarai 29:10-13.
8. (a) Edena hanamoa herevadia Salamo 148 ia lao 150 ai ese oiemu kudouna idia hamarerea? (b) Bema Salamo 27:4 ia hahedinaraia lalohadaina be iseda lalohadai bamona, dahaka do ita karaia?
8 Unai be hanamoa bona tanikiu herevadia namodia! Reana iseda guriguri be unai bamona hereva namodia amo ita gwauraia diba lasi, to Davida bamona mai iseda kudouna ibounai ida ita gwauraia diba. Salamo bukana lalonai, hanamoa bona tanikiu guriguridia momo idia noho. Salamo 148 ia lao 150 ai hanamoa herevadia namodia ita davaria diba. Salamo momo lalonai Dirava idia tanikiu henia. Davida ese inai ane ia abia: “Gau tamona sibona Lohiabada dekena amo do lau noinoi, unai gau sibona do lau tahua. Lau ura Lohiabada ena Dubu lalonai do lau noho, egu mauri dinadia ibounai. Vadaeni Lohiabada ena namo do lau laloa, bona iena aonega do lau tahua.” (Salamo 27:4) Unai bamona guriguri ita badinaia totona, namona be Iehova ena bese taudia edia gaukara ibounai ita karaia. (Salamo 26:12) Bema unai ita karaia bona dina ta ta ibounai Dirava ena Hereva ita laloa dobu, badina momo do ita davaria, mai iseda kudouna ibounai ida Iehova ita hanamoa bona ita tanikiu henia totona.
Mai Manau ida Iehova Ena Heduru Oi Tahua
9. King Asa ese dahaka ia gurigurilaia, bona dahaka ia vara?
9 Bema ita be Iehova ena Witness taudia bona ia ita hesiai henia mai iseda kudouna ibounai ida, ita diba momokani heduru totona ia ita noia neganai, iseda guriguri ia kamonai. (Isaia 43:10-12) Iuda ena King Asa mani ita laloa. Ena lohia negana ena lata be lagani 41 (977-937 B.C.E.), bona ena lagani ginigunadia 10 be maino laganidia. Bena Etiopia tauna Sera be mai ena tuari taudia milioni ta ida Iuda dekenai ia vareai. Ena be Asa bona ena tuari taudia be momo lasi, to idia lao idia tuari henidia totona. To, idia do tuari lasi neganai, Asa ia guriguri goadagoada. Ia diba Iehova ena siahu ia hegeregere idia ia hamauria totona. Heduru totona ia noinoi neganai, king ia gwau: “Oi dekenai ai abidadama henia noho inai, bona oiemu ladana dekenai inai tuari orea badana do ai tuari henia. Lohiabada e, oi be aiemai Dirava, inai orea do oi halusia, badina taunimanima be idia gini diba lasi oiemu vairana dekenai.” Iuda taudia idia kwalimu momokani, badina Iehova ese ena ladana namo hereana dainai idia ia hamauria. (2 Sivarai 14:1-15) Herevana Dirava ese hahetoho amo ita ia hamauria eiava ita ia hagoadaia unai hahetoho ita haheaukalaia totona, to ita diba momokani iena heduru ita noia neganai do ia kamonai.
10. Bema hekwakwanai ta hanaia dalana ita daradaralaia, edena dala ai King Iehosapata ena guriguri ese ita ia durua diba?
10 Bema hekwakwanai ta ena hanaia dalana ita daradaralaia, ita diba heduru totona Iehova ita noia neganai do ia kamonai. Iudea ena King Iehosapata ena negai ia vara gauna ese unai ia hahedinaraia, ena lagani 25 lohia negana be lagani 936 B.C.E. ai ia matamaia. Moaba, Amono, bona ororo amo idia mai Seiri tuari taudia idia hebou bona Iuda idia hadikaia gwauraia neganai, Iehosapata ia noinoi, ia gwau: “Oi be aiemai Dirava! Mani edia kerere davana do oi henia. Badina inai tuari orea bada herea, ese ai idia tuari henia noho, bona ai be goada lasi idia do ai koua. Edena bamona do ai karaia be ai diba lasi, to oi dekenai aiemai matana ai negea noho, oi ese ai do oi durua totona.” Iehova ese unai manau gurigurina ia haerelaia, ia ese Iuda totona ia tuari, edia inai taudia huanai heiriheiri ia havaraia bena sibodia idia ala-ala heheni. Unai dainai, Iuda kahirakahira idia noho tanodia idia gari, bona Iuda dekenai maino ia noho. (2 Sivarai 20:1-30) Bema iseda aonega ia hegeregere lasi hekwakwanai ta ita hanaia totona, Iehosapata bamona ita guriguri diba, ia gwau: ‘Iehova e, edena bamona do ai karaia be ai diba lasi, to oi dekenai aiemai matana ai negea noho.’ Reana lauma helaga ese ita ia durua Baibel siri haida ita laloatao unai hekwakwanai ita hanaia diba totona, eiava reana taunimanima edia aonega ia hanaia momokani dalana ta ai Dirava ese ita ia durua.—Roma 8:26, 27.
11. Nehemia ese Ierusalema ena magu ia laloa bena ia karaia karadia amo dahaka ita dibaia guriguri dekenai?
11 Reana Dirava ena heduru do ita abia totona guriguri ita goadalaia noho be namo. Ierusalema ena magu ia dika bona Iuda taudia edia noho ia auka dainai, dina momo lalonai Nehemia ia lalohisihisi, ia tai, ia aniani lasi, bona ia guriguri. (Nehemia 1:1-11) Toana be ena guriguri be muramura mai bonana namona bamona Dirava dekenai idia daekau. Dina ta ai, Parasa ena King Aratasaseta be lalo-metau tauna Nehemia ia nanadaia: “Oiemu noinoi be dahaka?” Vadaeni, Nehemia ‘be Guba ena Dirava dekenai ia guriguri.’ Ena lalona dekenai ia gwauraia guriguri kwadogina be Dirava ese ia haerelaia, badina Nehemia ese gwaumaoro ia abia ena ura badana ia hagugurua totona, Ierusalema dekenai do ia lao bona idia hadikaia maguna do ia haginia lou diba.—Nehemia 2:1-8.
Iesu ese Oi Dekenai Guriguri Dalana Ia Hadibaia be Namo
12. Sibona emu hereva amo mani oi gwauraia Iesu ia hahedinaraia gurigurina ena hereva badadia be dahaka?
12 Baibel lalonai idia noho guriguri iboudiai amo, Iesu Keriso ia gwauraia muramura mai bonana namona bamona gurigurina ese ita ia hadibaia namonamo. Luka ena Evanelia bukana ia gwau: “[Iesu ena] diba tahua tauna ta ese ia noia, ia gwau, ‘Lohiabada e, guriguri oi hadibaia ai dekenai, Ioane ese iena diba tahua taudia ia hadibaia bamona.’ Vadaeni ia ese ia hamaoroa idia dekenai, ia gwau, ‘Umui guriguri neganai be umui gwau, “Aiemai Tamana e, oiemu ladana do ai hahelagaia. Oiemu Basileia do ia mai. Dina ta ta ibounai aiemai aniani do oi henia ai dekenai. Aiemai dika do oi gwauatao, badina be ai danu ese ai dekenai idia hadikaia taudia edia dika ai gwauatao. Bona dibagani dekenai ai do oi hakaua vareai lasi.” ’ ” (Luka 11:1-4; Mataio 6:9-13) Namona be unai guriguri ita laloa, Iesu ese ita gwauraia loulou totona ia hahedinaraia lasi, to ita ia hakaua totona ia hahedinaraia.
13. “Tamana e, oiemu ladana do ai hahelagaia” herevana ena anina be edena bamona do oi gwauraia hedinarai?
13 “Tamana e, oiemu ladana do ai hahelagaia.” Gwauhamata hesiai taudia edia hahenamo be Iehova idia gwauraia Tamana. Natudia ese idia laloa momo gaudia ibounai be edia hebogahisi tamana dekenai idia hahedinaraia hegeregerena, namona be nega ita atoa mai hemataurai ida Dirava ita guriguri henia totona. (Salamo 103:13, 14) Namona be iseda guriguri ese idia hahedinaraia Iehova ena ladana hahelagaia karana ita laloa bada, badina ena ladana idia hadikaia gaudia iboudiai ia kokia negana ita ura ita itaia. Oibe, ita ura gauna be Iehova ena ladana be ataiai ia noho bona ia helaga.—Salamo 5:11; 63:3, 4; 148:12, 13; Esekiela 38:23.
14. “Oiemu Basileia do ia mai” ita gurigurilaia ena anina be dahaka?
14 “Oiemu Basileia do ia mai.” Basileia be Iehova ena Natuna bona Iesu idia bamoa “helaga taudia” idia lohia Mesia gavamanina guba dekenai, Iehova ese unai Basileia amo ena lohia siahuna ia hahedinaraia. (Daniela 7:13, 14, 18, 27; Apokalupo 20:6) Nega daudau lasi murinai, tanobada dekenai Dirava ena lohia siahuna idia dadaraia taudia ibounai ia kokia totona do ia “mai.” (Daniela 2:44) Unai negana ai, Iehova ena ura be tanobada dekenai do ia vara, guba dekenai ia vara hegeregerena. (Mataio 6:10) Unai dainai mai edia abidadama ida Guba bona Tanobada edia Lohia Badana ena hesiai gaukara idia karaia taudia do idia moale bada!
15. Iehova ita noia “dina ta ta ibounai aiemai aniani do oi henia” ese dahaka ia hahedinaraia?
15 “Dina ta ta ibounai aiemai aniani do oi henia ai dekenai.” Iehova ita noia “dina ta ta ibounai” aniani ia henia totona ese ia hahedinaraia ita ura lasi gau momo ita abia to dina ta ta ai do ita gaukaralaia gaudia sibona. Ena be ita abia dae Dirava ese ita ia naria, to danu, ita gaukara bona dala maorodia iboudiai dekenai aniani bona mauri durua gaudia ita tahua. (2 Tesalonika 3:7-10) To momokani, namona be guba dekenai ia noho Henia Tauna ita tanikiu henia, badina ena lalokau, aonega, bona siahu dainai unai gaudia ita abia.—Kara 14:15-17.
16. Edena dala ai Dirava ese iseda kara dika ia gwauatao diba?
16 “Aiemai dika do oi gwauatao, badina be ai danu ese ai dekenai idia hadikaia taudia edia dika ai gwauatao.” Ita be goevadae lasi, kara dika taudia dainai, Iehova ena taravatu goevadaedia ita badinaia maoromaoro diba lasi. Unai dainai, gau badana be Iesu ena mauri davalaia boubouna amo ia ita noia iseda kara dika ia gwauatao totona. To bema ita ura ‘guriguri ia kamonai’ Diravana ese unai boubou ena namo ibounai amo ita do ia durua, namona be ita helalo-kerehai bona ita ia henia matakani ita abia dae. (Salamo 65:2; Roma 5:8; 6:23; Heberu 12:4-11) Danu, ita diba ‘ita idia hadikaia taudia edia dika ita gwauatao’ neganai sibona, Dirava ese iseda kara dika do ia gwauatao.—Mataio 6:12, 14, 15.
17. Inai hereva, “Dibagani dekenai ai do oi hakaua vareai lasi,” ena anina be dahaka?
17 “Dibagani dekenai ai do oi hakaua vareai lasi.” Nega haida Baibel ia gwau Iehova ese kara haida ia karaia, to ena anina be ia ese unai gaudia ia koua lasi. (Ruta 1:20, 21) Dirava ese ita ia dibagania lasi kara dika ita karaia totona. (Iamesi 1:13) Dika karaia hedibaganidia be Diabolo, iseda kara dika tauanina, bona inai tanobada amo idia mai. Dirava vairanai kara dika ita karaia totona ita ia Hedibagania Tauna be Satani. (Mataio 4:3; 1 Tesalonika 3:5) “Dibagani dekenai ai do oi hakaua vareai lasi” noinoi herevana ita gwauraia neganai, Dirava ita noia ia ese ita do ia durua dibagani ita davaria neganai ena ura do ita utua lasi. Ia ese ita ia hakaua diba, Satani, “dika tauna,” ese ita ia halusia diba lasi totona.—Mataio 6:13, NW; 1 Korinto 10:13.
Oiemu Guriguri Hegeregerena Oi Kara
18. Headava bona ruma bese lalonai moale do ita davaria totona ita guriguri neganai, edena dala ai iseda guriguri hegeregerena do ita kara?
18 Iesu ese ia hahedinaraia gurigurina lalonai gau badadia ia gwauraia, to ita ese gau iboudiai ita gurigurilaia diba. Hegeregere, bema ita ura headava lalonai moale do ita davaria, unai ita gurigurilaia diba. Bema ita ura ita goeva noho ela bona ita headava, tauanina ena ura ita koua diba totona ita guriguri diba. To namona be iseda guriguri hegeregerena ita kara bena matabodaga bukadia, magasin, bona moale karadia ita dadaraia. Danu, namona be iseda lalona ita hadaia ‘Keristani tauna sibona do ita adavaia.’ (1 Korinto 7:39; Deuteronomi 7:3, 4) Ita headava murinai, moale ita abia totona ita guriguri neganai, namona be ia hegeregerena ita kara bena Dirava ena sisiba ita badinaia. Bona bema ita be mai eda natudia, idia be Iehova ena abidadama hesiai taudia ai idia lao totona ita guriguri sibona be hegeregere lasi. Gau badana be ita hekwarahi Baibel stadi amo bona idia ida Keristani heboudia lao henia hanaihanai karadia amo Dirava ena hereva momokani be edia lalona ai ita hadibaia goada.—Deuteronomi 6:5-9; 31:12; Aonega Herevadia 22:6.
19. Bema iseda haroro gaukara ita gurigurilaia, dahaka ita karaia be namo?
19 Haroro gaukara lalonai hahenamo ita abia totona ita guriguri, a? Vadaeni, namona be unai guriguri hegeregerena ita kara bena Basileia harorolaia gaukarana ita goadalaia. Bema ita guriguri ma haida do ita durua diba, mauri hanaihanai dalana dekenai idia raka totona, namona be kamonai taudia edia ladadia ita torea namonamo bona mai eda ura ida iseda sediual ita haidaua Baibel stadi ita karaia diba totona. Edena bamona bema ita ura painia tauna ai ita lao bona ful-taim haroro gaukarana ita karaia? Vadaeni, namona be iseda guriguri hegeregerena kara haida ita karaia, iseda haroro gaukara ita habadaia bona painia taudia ida ita haroro. Bema unai bamona ita karaia, unai ese ia hahedinaraia iseda guriguri hegeregerena ita kara.
20. Hereva gabena ese dahaka do ia herevalaia?
20 Mai abidadama ida Iehova ita hesiai henia neganai, ita diba, bema iseda guriguri be ena ura hegeregerena, idia do ia haerelaia. (1 Ioane 5:14, 15) Momokani, Baibel lalonai idia noho guriguri haida tahua karana amo lalohadai namodia ita davaria. Bona idia ura Iehova vairanai edia guriguri be “muramura mai bonana namona bamona” taudia dekenai, hereva gabena ese Baibel ena hakaua herevadia ma haida do ia hahedinaraia.
Edena Bamona Do Oi Haere?
◻ Dahaka dainai mai abidadama ida ita guriguri be namo?
◻ Hanamoa bona tanikiu herevadia edia anina iseda guriguri lalodiai be dahaka?
◻ Dahaka dainai ita diba guriguri amo Iehova ena heduru ita noia diba?
◻ Iesu ese ia hahedinaraia gurigurina ena hereva badadia haida be dahaka?
◻ Edena dala ai iseda guriguri hegeregerena ita kara diba?
[Picture on page 12]
Nega haida, reana King Iehosapata bamona ita guriguri be namo, ia gwau: ‘Iehova e, edena bamona do ai karaia be ai diba lasi, to oi dekenai aiemai matana ai negea noho’
[Picture on page 13]
Oi be Iesu ia hahedinaraia gurigurina hegeregerena oi guriguri, a?