Guriguri Dekenai mai Badinaia Karana ida Emui Imana Umui Abia Isi
“Lau ura tatau ibounai, gabu ibounai dekenai do idia guriguri. Lau ura mai [badinaia karana] danu, edia imana Dirava dekenai idia abia isi. Lau ura inai idia karaia neganai, idia be badu ta lasi, bona hepapahuahu ta lasi.”—1 TIMOTEO 2:8.
1, 2. (a) Iehova ena taunimanima edia guriguri lalodiai, 1 Timoteo 2:8 ena anina be dahaka? (b) Dahaka do ita herevalaia?
IEHOVA ia ura ena taunimanima ese ia bona idia ta ta idia badinaia. Aposetolo Paulo ese badinaia karana bona guriguri karana ia hakapua, ia gwau: “Lau ura tatau ibounai, gabu ibounai dekenai do idia guriguri. Lau ura mai [badinaia karana] danu, edia imana Dirava dekenai idia abia isi. Lau ura inai idia karaia neganai, idia be badu ta lasi, bona hepapahuahu ta lasi.” (1 Timoteo 2:8) Toana be, Paulo ese Keristani taudia idia hebou ‘gabudia ibounai dekenai’ taunimanima vairanai idia karaia guriguridia ia herevalaia. Kongregesen heboudia dekenai, daidia ese Dirava ena taunimanima vairanai guriguri do idia gwauraia? Helaga, kara maoromaoro, hemataurai idia hahedinaraia, bona Dirava ena oda Baibel lalonai idia badinaia taudia sibona ese. (Hadibaia Tauna 12:13, 14) Gau badana be lauma dalanai bona edia mauri lalonai idia goeva bona Iehova Dirava idia badinaia momokani.
2 Kongregesen ena elda taudia ese guriguri dekenai ‘mai badinaia karana ida edia imana idia abia isi’ be gau badana. Mai edia kudouna ibounai ida Iesu Keriso amo idia guriguri ese ia hahedinaraia Dirava idia badinaia bona unai ese idia ia durua hepapahuahu idia dadaraia bona idia badu lasi totona. Momokani, namona be Keristani kongregesen vairanai guriguri gwauraia ena hahenamo idia abia taudia ibounai idia badu lasi, ta ida idia heai lasi, bona Iehova bona ena orea idia badinaia. (Iamesi 1:19, 20) Taunimanima vairanai guriguri gwauraia ena hahenamo idia abia taudia totona, Baibel ese dahaka hakaua herevadia ma haida ia henia? Bona ita sibona ita noho bona ita guriguri neganai bona ruma bese taudia vairanai guriguri ita gwauraia neganai, dahaka hakaua herevadia Baibel dekenai ita badinaia be namo?
Guriguri Oi Laloa Guna
3, 4. (a) Dahaka dainai taunimanima vairanai ita gwauraia gurigurina be ita laloa guna be namo? (b) Baibel ese dahaka ia hahedinaraia guriguri edia lata dekenai?
3 Bema ita idia boiria taunimanima vairanai guriguri ita gwauraia totona, reana iseda guriguri ita laloa guna diba. Bema unai ita karaia, reana gau badadia sibona do ita gwauraia, bona guriguri latana mai ena hereva momo do ita gwauraia lasi. Momokani, ita sibona ita noho bona ita guriguri neganai, mai gado regena ida iseda guriguri ita gwauraia diba danu. Edia lata be sibona eda ura hegeregerena. Iesu ese ena aposetolo taudia 12 ia abia hidi gwauraia neganai, hanuaboi ibounai ia guriguri. To, ena mase ena Memorial ia hamatamaia neganai, paraoa bona uaina ia do henia lasi neganai, guriguri ia henia bona toana be ena guriguri idia kwadogi. (Mareko 14:22-24; Luka 6:12-16) Bona ita diba Iesu ena guriguri kwadogidia danu be Dirava ese ia abia dae.
4 Reana ruma bese be idia aniani gwauraia neganai iseda hahenamo ta be idia totona guriguri ita gwauraia. Reana unai bamona guriguri do ia kwadogi—to herevana dahaka gaudia ma haida ita gwauraia, namona be aniani dainai tanikiu herevana ita gwauraia. Bema Keristani hebou ia matamaia eiava ia ore neganai guriguri ita gwauraia, namo lasi guriguri lata herea mai ena gau momo herea ita gwauraia. Iesu ese taravatu hadibaia taudia ia gwauraia dika, badina “taunimanima koia totona, guriguri lata herea idia gwauraia.” (Luka 20:46, 47) Dirava ia gari henia tauna ia ura lasi unai ia karaia. To nega haida, taunimanima vairanai idia gwauraia gurigurina ia lata sisina be maoro. Hegeregere, hebouhebou dekenai guriguri ginigabena henia totona idia abia hidi elda ta be unai guriguri ia laloa guna be namo, bona reana ia ura gau haida ia gwauraia. To, unai bamona guriguri danu ia lata herea momokani lasi be namo.
Mai Hemataurai ida Dirava Dekenai Oi Hereva
5. (a) Taunimanima vairanai guriguri ita gwauraia neganai, dahaka ita laloa be namo? (b) Dahaka dainai mai hemataurai ida ita guriguri be namo?
5 Taunimanima vairanai guriguri ita gwauraia neganai, namona be ita laloatao ita be taunimanima ita hereva henia lasi. To, ita kara dika taudia ese Siahu Ibounai Lohiabadana Iehova ita noinoi henia. (Salamo 8:3-5, 9; 73:28) Unai dainai namona be iseda hereva bona iseda hereva dalana ese idia hahedinaraia ia ita habadua garina ita gari bona ia ita matauraia. (Aonega Herevadia 1:7) Salamo torea tauna Davida ia gwau: “To oiemu lalokau bada dainai, lau be oiemu Ruma dekenai lau raka vareai diba. Oiemu Dubu Helaga lalonai, oi dekenai lau tomadiho henia diba. Oi dekenai do lau tomadiho mai mataurai danu.” (Salamo 5:7) Bema iseda lalohadai be unai bamona, Iehova ena Witness taudia edia hebou dekenai guriguri gwauraia totona ita idia boiria neganai, edena dalana ai do ita karaia? Vadaeni, bema tanobada ena king ta dekenai ita hereva, ita be mai iseda hemataurai ida do ita karaia. Noho hanaihanai King, Iehova, ita guriguri henia dainai, mai hemataurai bada ida ita karaia be namo, ani? (Apokalupo 15:3, NW) Unai dainai, ita guriguri neganai inai bamona hereva, “Daba namona, Iehova,” “Emai lalokau ai siaia oi dekenai,” eiava, “Bamahuta” ita gwauraia lasi. Baibel ese ia hahedinaraia Dirava sibona ese ia havaraia Natuna tamona, Iesu Keriso, be unai bamona hereva amo ena guba Tamana dekenai ia hereva lasi.
6. “Bogahisihisi ia noho helai gabuna dekenai ita raka kahirakahira lao” neganai, dahaka ita laloa noho be namo?
6 Paulo ia gwau: “Mai gari lasi danu, Dirava ena bogahisihisi ia noho helai gabuna dekenai ita raka kahirakahira lao, be namo.” (Heberu 4:16) Ena be ita be kara dika taudia, to “mai gari lasi danu” Iehova dekenai ita hereva diba, badina Iesu Keriso ena mauri davalaia boubouna ita abidadama henia. (Kara 10:42, 43; 20:20, 21) To, ita gwau lasi unai “gari lasi” ena anina be Dirava ida ita herevahereva kava; bona namona be hemataurai lasi herevadia ita gwauraia lasi. Iehova ese taunimanima vairanai ita gwauraia guriguri ia abia dae totona, namona be mai hemataurai ida bona ia ita laloa bada dalanai ita gwauraidia. Bona ia maoro lasi bema guriguri ita gaukaralaidia hadibaia herevana, tau ta sisiba henia, eiava kamonai taudia sisiba henia totona.
Mai Manau ida Oi Guriguri
7. Solomona ese Iehova ena dubu idia hahelagaia hebouna lalonai ia guriguri neganai, edena dala ai manau karana ia hahedinaraia?
7 Taunimanima vairanai eiava ita sibona ita noho bona ita guriguri neganai, Baibel ena hakaua herevana badana ta ita laloa noho, iseda guriguri lalonai manau karana ita hahedinaraia. (2 Sivarai 7:13, 14) King Solomona ese Iehova ena dubu Ierusalema dekenai idia hahelagaia hebouna lalonai, taunimanima vairanai guriguri ia gwauraia neganai, manau karana ia hahedinaraia. Solomona ese tanobada dekenai idia haginia mai hairai ruma hereadaena ia haginia ore vadaeni. To, mai manau ida ia guriguri: “To Dirava be momokani tanobada dekenai ia noho diba, a? Guba, bona guba ena ataiai momokani be hegeregere lasi oiemu noho gabuna. Unai dainai inai dubu, lau ese lau haginia gauna be maragi, edena bamona do oi noholaia diba?”—1 King Taudia 8:27.
8. Taunimanima vairanai guriguri ita gwauraia neganai, edena dala haida ai manau karana ita hahedinaraia diba?
8 Solomona bamona, ma haida vairanai guriguri ita gwauraia neganai, mai manau ida ita karaia be namo. Ena be ita naria namonamo manau koikoina ita hahedinaraia garina, to iseda gado regena amo manau karana ita hahedinaraia be maoro. Mai manau ida ita gwauraia guriguridia be hekokoroku dalana ai eiava boiboi bada dalanai ita gwauraia lasi. Namona be idia ese guriguri ia gwauraia tauna idia abia isi lasi, to idia guriguri henia Tauna idia abia isi. (Mataio 6:5) Manau karana be iseda guriguri lalonai ita gwauraia gaudia amo ita hahedinaraia danu. Bema mai eda manau ida ita guriguri, ita hahedinaraia Dirava ita doria lasi iseda ura dalana ai gau haida do ia karaia totona. To, Iehova ita noia ena ura helagana hegeregerena do ia kara. Salamo torea tauna ese lalohadai maorona ia haheitalaia, ia noinoi: “Lohiabada e, oi dekenai ai noinoi noho, mani ai do oi hamauria. Lohiabada e, mani emu kara kwalimu ai dekenai do oi henia.”—Salamo 118:25; Luka 18:9-14.
Mai Emu Kudouna Ibounai ida Oi Guriguri
9. Iesu ese Mataio 6:7 ai ia henia sisiba namona be dahaka, bona edena bamona ita badinaia diba?
9 Bema ita ura taunimanima vairanai eiava ita sibona ita noho neganai ita henia guriguridia ese Iehova idia hamoalea, gau badana be mai iseda kudouna ibounai ida ita gwauraia. Unai dainai, ita ese laloa lasi dalana ai guriguri ena hereva do ita gwauraia loulou lasi. Iesu ese ena Hereva Badana Ororo Dekenai ia henia neganai, inai sisiba ia henia: “Umui guriguri neganai, hereva kava momo do umui gwauraia lou, gwauraia lou lasi, Dirava diba lasi taudia bamona, badina be idia laloa [kerere] edia hereva momo dainai, Dirava ese idia do ia kamonai.” Iesu ena hereva hahanaia dalana ma ta be: “Umui hereva kava lasi; anina lasi herevadia umui gwauraia loulou lasi.”—Mataio 6:7, NW; futnout.
10. Dahaka dainai gau tamona ita gurigurilaia loulou be maoro?
10 Momokani, reana nega momo gau tamona ita gurigurilaia loulou be namo. Unai be kerere lasi, badina Iesu ia gwau: “Umui noinoi, vadaeni Dirava ese do ia henia umui dekenai. Umui tahua, vadaeni do umui davaria. Umui pidipidi, vadaeni iduara do ia kehoa umui dekenai.” (Mataio 7:7) Reana Kingdom Hall matamata umui abia be namo, badina Iehova ese emui haroro gaukara ia hanamoa. (Isaia 60:22) Umui sibona umui guriguri neganai bona Iehova ena taunimanima edia hebou vairanai guriguri umui gwauraia neganai, unai umui gwauraia loulou be maoro. Unai be ‘anina lasi herevadia gwauraia loulou’ karana lasi.
Tanikiu Bona Hanamoa Herevadia Oi Laloaboio Lasi
11. Sibona ita noho neganai bona taunimanima vairanai guriguri ita gwauraia neganai, Filipi 4:6, 7 ena hereva be edena bamona ita badinaia diba?
11 Taunimanima momo be gau ta idia ura idia abia neganai sibona idia guriguri, to iseda lalokau Iehova Dirava dekenai ese iseda lalona ia hamarerea sibona ita noho neganai eiava taunimanima vairanai guriguri ita gwauraia neganai, ia ita tanikiu henia bona ita hanamoa. Paulo ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.” (Filipi 4:6, 7) Oibe, Iehova ita noinoi henia diba, to namona be lauma dalana ai bona tauanina dalana ai Iehova ia henia hahenamodia dainai ia ita tanikiu henia danu. (Aonega Herevadia 10:22) Salamo torea tauna be inai ane ia abia: “To lau ura momokani gauna be emui tanikiu, emui boubou gauna korikori be unai. Lau, Siahu Ibounai Dirava dekenai umui karaia vadaeni gwauhamata, edia anina ibounai do umui henia haorea.” (Salamo 50:14) Bona Davida ese ena guriguri anena lalonai inai kudouna hamarerea herevadia ia gwauraia danu: “Lau ese ane dekena amo Dirava do lau hanamoa. Dirava ena ladana do lau habadaia, bona ia do lau tanikiu henia.” (Salamo 69:30) Ita danu be taunimanima vairanai bona ita sibona ita noho neganai ita gwauraia guriguri lalonai unai ita karaia be namo, ani?
12. Salamo 100:4, 5 be edena dala ai ia guguru hari, bona dahaka dainai Dirava ita tanikiu henia bona hanamoa?
12 Salamo torea tauna ese Dirava ia anelaia inai bamona: “Lohiabada ena Dubu Helaga lalonai do ita raka vareai, mai tanikiu danu. Iena Ruma lalonai Lohiabada ena ladana do ita abia isi, Lohiabada do ita tanikiu henia. Iena ladana do ita hanamoa bada, badina be Lohiabada ena kara be namo. Iena lalokau bona bogahisihisi, be do idia noho ela bona hanaihanai. Ia ese iena hereva bona iena kara, be do ia haidaua lasi ela bona hanaihanai.” (Salamo 100:4, 5) Hari inai negai, bese iboudiai taudia be Iehova ena dubu helagana ena ariara gabuna dekenai idia vareai, bona unai dainai ia ita hanamoa bona ita tanikiu henia diba. Emui gabu dekenai Kingdom Hall ia noho dainai Dirava oi tanikiu henia, a? Bona ia idia lalokau henia taudia ida unuseniai oi lao loulou karana amo oi hahedinaraia unai gabu oi laloa bada, a? Unuseniai oi noho neganai, iseda lalokau guba Tamana idia hanamoa bona tanikiu henia anedia oi abia mai goada ida, a?
Hemarai Dainai Guriguri Karana Ita Rakatania Lasi
13. Edena haheitalai Baibel lalonai ia hahedinaraia ena be kara dika dainai ita laloa ita be hegeregere lasi, to Iehova ita guriguri henia be namo?
13 Ena be kerere dainai ita laloa ita be hegeregere lasi, to namona be mai momokani ida Dirava ita guriguri henia. Iuda taudia be idau bese hahinedia idia adavaia karana amo idia kara dika neganai, Esera ia tui diho, mai badinaia karana ida ena imana ia abia isi Dirava dekenai, bona mai manau ida ia guriguri: “Egu Dirava e, lau hemarai noho dainai oi dekenai egu vairana lau abia isi hegeregere lasi. Badina be aiemai kara dika be bada herea dainai, aiemai kwaradia edia ataiai idia noho, bona idia daekau lao guba dekenai. Aiemai sene taudia edia nega dekena amo ia mai bona inai dina, ai be ai kerere bada herea, . . . Inai ai dekenai idia vara dika gaudia be aiemai kara dikadia bona aiemai kerere badadia dainai. To, aiemai Dirava e, ai diba oi ese matakani sisina sibona ai dekenai oi henia, aiemai kara dika ena davana korikori lasi. Bona oi ese, ai do noho taudia, be aiemai noho gabuna oi henia vadaeni. Unai dainai edena bamona oiemu oda do ai utua lou, bona inai kara dika bada taudia danu ma do ai headava henidia lou, a? Bema unai bamona ai karaia neganai, oiemu badu be do ia siahu momokani dainai, oi ese ai do oi hadikaia ore momokani, ai ta do ia mauri lasi. Lohiabada e, Israela ena Dirava, oi be maoromaoro, bona ai do mauri noho taudia be oi ese oi hamauria noho. Ai ese oiemu vairana dekenai aiemai kerere bada ai gwauraia hedinarai inai. Ai be maoro lasi, bona ai ta be oiemu vairana dekenai ai gini diba lasi, aiemai dika dainai.”—Esera 9:1-15; Deuteronomi 7:3, 4.
14. Esera ena negai idia karaia hegeregerena, Dirava ese iseda kara dika ia gwauatao totona dahaka ita karaia be namo?
14 Dirava ese iseda kara dika ia gwauatao totona, namona be iseda kara dika ita lalohisihisilaia bona ‘lalona giroa ena anina korikori do ita hedinaraia.’ (Luka 3:8; Iobu 42:1-6; Isaia 66:2) Esera ena negai, idia helalo-kerehai taudia be edia idau bese hahinedia idia siaia lao, edia kerere idia hamaoromaoroa totona. (Esera 10:44; mani 2 Korinto 7:8-13 itaia.) Bema ita ura Dirava ese iseda kara dika badana ia gwauatao, namona be mai eda manau ida ita guriguri bona iseda kara dika ita gwauraia hedinarai, bona iseda helalo-kerehai idia hahedinaraia karadia ita karaia. Ita helalo-kerehai bona ita ura unai kerere ita hamaoromaoroa dainai, Keristani elda taudia ese lauma dalana ai idia henia heduruna ita tahua danu.—Iamesi 5:13-15.
Guriguri ese Oi Ia Hagoadaia
15. Hana dekenai ia vara gauna be edena bamona ia hahedinaraia guriguri ese ita ia hagoadaia diba?
15 Bema gau ta dainai ita lalohisihisi, guriguri ese ita ia hagoadaia diba. (Salamo 51:17; Aonega Herevadia 15:13) Unai ese Dirava ia badinaia hahinena Hana ia hagoadaia. Ia mauri neganai, Israela taudia edia ruma bese idia bada, to ia be mai ena natuna lasi. Ena tau, Elikana, be ena adavana ma ta, Penina, amo memero bona kekeni ia abia, to Hana be mai ena natuna lasi dainai Penina ese ia kirikirilaia. Hana be mai momokani ida ia guriguri bona ia gwauhamata bema natuna mero ia abia ‘ia ese Iehova dekenai do ia henia iena mauri dinadia ibounai lalonai.’ Ena guriguri bona Hahelaga Tauna Badana Eli ena hereva ese Hana idia hagoadaia, “bona iena lalohisihisi ia ore.” Hana ese natuna mero ia abia bona ena ladana ia hatoa Samuela. Gabeai, Iehova ena dubu dekenai ia henia, ena hesiai gaukara ia karaia totona. (1 Samuela 1:9-28) Ia ese Dirava ena hebogahisi ia laloa bada dainai guriguri amo ia tanikiu henia—unai guriguri ese ia hahedinaraia Iehova be hereadaena. (1 Samuel 2:1-10) Guriguri ese ita ia hagoadaia diba, Hana ia hagoadaia bamona, bona ita diba momokani Dirava ese ena ura hegeregerena ita noinoi neganai, ita ia haere henia. Iseda kudouna lalonai idia noho gaudia ibounai be ia dekenai ita gwauraia murinai, namona be ‘iseda lalohisihisi ia ore,’ badina ia ese ita ia hametaua gauna do ia kokia eiava heduru do ia henia ita haheaukalaia totona.—Salamo 55:22.
16. Iakobo ese ia hahedinaraia bamona, ita gari eiava ita lalo-hekwarahi neganai, dahaka dainai ita guriguri be namo?
16 Bema ita gari, ita lalohisihisi, eiava ita lalo-hekwarahi, namona be guriguri amo Dirava dekenai ita hereva ita ia hagoadaia totona. (Salamo 55:1-4) Iakobo be ena kakana Esau, ia tura henia lasi tauna, ia davaria gwauraia neganai ia gari. To, Iakobo ia guriguri: “Lauegu tubuna Aberahamo ena Dirava e, lauegu tamana Isako ena Dirava e, mani oi kamonai! Guna oi hereva lau dekenai, oi gwau, ‘Oiemu tano bona oiemu varavara taudia dekenai do oi giroa lou, vadaeni do lau hanamoa oi.’ Oiemu bogahisihisi bona oiemu gwauhamata hamomokania kara ibounai, lau oiemu hesiai tauna dekenai oi henia, be lauegu namo ia hegeregere lasi. Lau be Ioridane Sinavai lau hanaia lao neganai, lauegu imana dekenai be itotohi sibona mo. To hari be mai orea rua danu lau giroa mai vadaeni. Oi dekenai lau noinoi inai, mani lauegu kakana Esau ena siahu dekena amo do oi hamauria lau. Badina be lau gari, ia be do ia mai, do ia tuari henia ai dekenai, lauegu natuna bona edia sinadia do ia aladia mase. Oiemu gwauhamata mani oi laloa, oi gwau, ‘Momokani, lau ese do lau hanamoa oi, bona oiemu natuna bona tubuna momo herea oi dekenai do lau henia, kone miri bamona, duahia diba lasi.’ ” (Genese 32:9-12) Esau ese Iakobo bona ia ida idia mai taudia ia hadikaia lasi. Unai dala ai, Iehova ese unai negana ai Iakobo ia “hanamoa.”
17. Salamo 119:52 ena hereva hegeregerena, hahetoho aukana lalonai, edena dala ai guriguri ese ita ia hagoadaia?
17 Dirava ita noia negadiai, reana ena Hereva lalonai idia noho herevadia ita laloatao bona unai ese ita ia hagoadaia. Salamo lata hereana lalonai—miusiki ida idia gwauraia gurigurina lalonai—reana King ena natuna mero Hesekaia be inai ane ia abia: “Lohiabada e, oiemu oda hereva gunadia lau laloatao, bona idia ese lau idia hagoadaia.” (Salamo 119:52) Hahetoho aukana lalonai mai eda manau ida ita guriguri neganai, reana Baibel ena hakaua herevana ta eiava taravatu ta ita laloatao bona unai ese ita ia durua diba, dala maorona do ita badinaia, bona unai ese ita ia hagoadaia badina ita diba iseda guba Tamana ita hamoalea.
Dirava Badinaia Taudia be Guriguri Idia Goadalaia
18. Dahaka dainai ita gwau diba ‘Dirava ena taudia be ia dekenai idia guriguri’ be namo?
18 Iehova Dirava idia badinaia taudia be ‘guriguri idia goadalaia nega ibounai.’ (Roma 12:12) Reana Davida be Bataseba ida kara dika ia karaia murinai Salamo karoa 32 ia torea bona ia lalonai ena lalohisihisi ia gwauraia. Ena lalohisihisi ia bada, badina Dirava ia noia lasi ena kara dika gwauatao totona. Bona badina helalo-kerehai bona Dirava dekenai ena kerere gwauraia hedinarai karana amo ia mai lalo-maino ia tahua lasi. Bena Davida ese inai ane ia abia: “Unai dainai [Iehova ese helalo-kerehai momokani taudia edia dika ia gwauatao dainai] nega dikadia neganai, Dirava ena taudia ese, oi dekenai do idia guriguri be namo.”—Salamo 32:6.
19. Dahaka dainai guriguri dekenai mai badinaia karana ida iseda imana ita abia isi be namo?
19 Bema iseda turana karana Iehova Dirava ida ita laloa bada, Iesu ena mauri davalaia boubouna dainai guriguri dekenai Dirava ita noia ena hebogahisi ita abia totona. Mai abidadama ida, ena hariharibada ia noho terona dekenai ita raka kahirakahira lao diba mai gari lasi ida, iena hebogahisi bona nega korikorina iena heduru ita abia totona. (Heberu 4:16) To ita guriguri ena badina be momo! Unai dainai, namona be ‘nega ibounai do ita guriguri’—nega momo mai iseda kudouna ibounai ida Dirava ita hanamoa bona ita tanikiu henia. (1 Tesalonika 5:17) Dina bona hanuaboi ibounai, guriguri dekenai mai badinaia karana ida iseda imana ita abia isi be namo.
Edena Bamona Do Oi Haere?
◻ Taunimanima vairanai guriguri ita gwauraia neganai, dahaka dainai unai guriguri ita laloa guna be namo?
◻ Dahaka dainai mai hemataurai ida ita guriguri be namo?
◻ Ita guriguri neganai, dahaka kara ita hahedinaraia be namo?
◻ Ita guriguri neganai, dahaka dainai tanikiu bona hanamoa herevadia ita laloatao be namo?
◻ Edena dala ai Baibel ia hahedinaraia guriguri ese ita ia hagoadaia diba?
[Picture on page 17]
King Solomona be Iehova ena dubu idia hahelagaia hebouna lalonai taunimanima vairanai ia guriguri neganai, manau karana ia hahedinaraia
[Pictures on page 18]
Hana bamona, guriguri ese oi ia hagoadaia diba