Ma Haida ese Emu Sisiba Idia Abia Dae, A?

DALA maorona ai sisiba namona ita henia neganai hanaihanai namo ia havaraia. Maoro a? Lasi! Diba momo taudia ese idia henia sisiba hereadia danu be nega momo taunimanima ese idia kamonaia lasi eiava idia dadaraia.​—⁠Aonega Herevadia 29:19.

Kaino be iena tadina Abela ia inai henia dainai Iehova ese ia sisiba henia neganai, unai bamona ia vara. (Genese 4:​3-5) Dirava ia diba Kaino be dika ia davaria diba dainai, ia hereva henia ia gwau: “Badina be dahaka oi badu noho? Badina dahaka oiemu vairana ia metau noho? Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be oiemu iduara dekenai ia naria noho, oi do ia hadikaia totona. Kara dika be ia ura biagua oi, to oi ese do oi halusia be namo.”​—⁠Genese 4:​6, 7.

Iehova ia gwau bema Kaino be ena tadina ia badu henia noho, kara dika be dagedage animal ta bamona ia naria noho Kaino ia koria totona. (Iamesi 1:​14, 15 itaia.) Nega ia noho Kaino ese ena lalona ia haidaua diba, dika bada do ia havaraia dalana ia dadaraia bona ‘kara namo ia karaia’ dalana ia badinaia totona. Madi, Kaino be ia kamonai lasi. Ia ese Iehova ena sisiba ia dadaraia, bona kara dika bada herea ia karaia.

Haida be sisiba ibounai idia ura lasi bona idia dadaraia. (Aonega Herevadia 1:​22-​30) Reana sisiba ia henia tauna ena kerere dainai sisiba idia dadaraia, a? (Iobu 38:2) Oi, sisiba oi henia tauna, be ma haida ese sisiba do idia abia dae dalana oi hadikaia, a? Ita goevadae lasi dainai unai ia vara diba. To Baibel ena hakaua herevadia oi badinaia namonamo neganai, unai oi koua diba. Mani ita ese unai hakaua herevadia haida ita laloa.

“Hakaua Lou, Mai Manau Danu”

“Lauegu varavara taudia e, bema Keristani tauna ta ia kerere neganai, umui Lauma Helaga umui kamonai henia taudia ese unai tau do umui hakaua lou, mai manau danu. To umui naria namonamo, dibagani ese umui danu do ia koia garina.” (Galatia 6:⁠1) Aposetolo Paulo ia hahedinaraia ‘Lauma Helaga idia kamonai henia taudia’ ese “ia kerere” Keristani tauna do idia hakaua lou. To, nega haida toana be idia hegeregere lasi taudia idia ura sisiba idia henia. Unai dainai, ma haida do oi sisiba henia haraga lasi. (Aonega Herevadia 10:19; Iamesi 1:19; 3:⁠1) Unai be lauma dalanai idia goada kongregesen elda taudia edia gaukara. To, bema lo Keristani tauna ta ia itaia ena tadikaka ta be kara dika lalonai ia raka vareai gwauraia, ia sisiba henia be namo.

Bema ta oi sisiba henia eiava ia dekenai heduru herevana oi gwauraia, namona be emu hereva be Dirava ena aonega amo oi abia, taunimanima edia lalohadai amo lasi. (Kolose 2:⁠8) Namona be aniani nadua tauna oi tohotohoa, ia be aniani ia hegaegaelaia neganai, ia ura ena aniani be tauanina do ia durua momokani bona gau dikana ta ia noho lasi. Namona be oiemu sisiba be Dirava ena Hereva amo oi gwauraia bona oi sibona emu lalohadai oi gwauraia lasi. (2 Timoteo 3:​16, 17) Unai oi karaia neganai, do oi diba momokani emu sisiba be ma ta do ia hadikaia lasi.

Sisiba ena badina be ia kerere tauna oi “hakaua lou” totona, oi doria lasi ia ura lasi gauna ia karaia totona. Unai Greek gado herevana “hakaua lou” be hereva ma ta danu ia hegeregere, ena anina be doketa ese ia makohi turia ta be ia dika ia lao lasi totona ia atoa maoromaoro. Diksenari ia torea tauna W. E. Vine ia hereva hegeregerena, ia gwau, “ia hahedinaraia unai ia karaia noho lalonai haheauka bona hekwarahi noho karadia ia badinaia.” Momokani, doketa ese tauanina dekenai hisihisi ia havaraia lasi totona mai manada bona aonega dalana ai ia gaukara be namo. Unai hegeregerena, sisiba ia henia tauna do ia naria namonamo ia sisiba henia tauna ia hahisia lasi totona. Ta be oi dekenai sisiba totona ia noinoi negana ai, unai oi karaia be auka. Idia noinoi lasi neganai, gau badana be lalo-parara bona aonega bada ida sisiba oi henia.

Bema ta oi kara namo henia lasi neganai, do oi “hakaua lou” diba lasi. Unai oi karaia lasi totona, namona be “bogahisihisi, durua, manau, manada bona haheauka” karadia oi hahedinaraia. (Kolose 3:12) Bema doketa ta be ia haheauka lasi bona gorere tauna ia hahisia, gorere tauna ese iena sisiba ia dadaraia diba bona ia dekenai do ia giroa lou lasi.

Unai hereva ia gwau lasi, sisiba aukana do ita henia lasi. Lasi. Iesu Keriso be Asia ena kahana dekenai idia noho kongregesen 7 ia sisiba henia neganai, sisiba aukana ia henidia. (Apokalupo 1:4; 3:​1-22) Ia ese idia kamonai bona do idia badinaia be namo sisiba herevadia ia gwauraia. To Iesu ese ena guba Tamana ena lalokau karana ia hahedinaraia, ena sisiba auka karana be hanaihanai lalokau bona hebogahisi danu ia hegeregere.​—⁠Salamo 23:​1-6; Ioane 10:​7-15.

Mai Lalo-Namo ida Sisiba Oi Henia

“Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kolose 4:⁠6) Damena be aniani ena mamina ia hanamoa diba bona ta ena ura aniani dekenai ia habadaia diba. Unai hegeregerena, bema oi ura ta ese emu sisiba ia abia dae, namona be “laloa namona bona mai gado namo” ida oi gwauraia. Ena be aniani be namo herea, to idia nadua namonamo lasi eiava mereki dekenai idia atoa kava diba. Unai ese ta ena ura aniani totona ia habadaia lasi. Momokani, mamina lasi aniani oi hadonoa be auka.

Sisiba oi henia neganai, mai anina bada gauna be hereva maorodia do oi abia hidi. Aonega tauna Solomona ia gwau: “Nega korikori ai idia gwauraia herevana be golo apolodia siliva herahera gaudia latanai idia noho bamona.” (Aonega Herevadia 25:​11, NW) Unai ia gwauraia neganai, reana ia ese siliva disi hairaina ta mai ena golo apolodia ia laloa. Unai be hairai bada gauna, bona bema ta ese oi dekenai harihari gauna bamona ia henia, do oi moalelaia bada! Unai hegeregerena, oi abia hidi namonamo lalo-namo herevadia be oi ura oi durua tauna do idia hagoadaia diba.​—⁠Hadibaia Tauna 12:​9, 10.

To idau, “hereva auka ese badu ia havaraia.” (Aonega Herevadia 15:⁠1) Hereva kereredia be lalo-namo idia havaraia lasi to lalohisihisi bona badu idia havaraia haraga diba. Oibe, tau ta ese hereva kereredia sibona dainai lasi, to bema ia kamonai sisiba ia henia tauna be mai badu o mai kiri ida ia hereva neganai, sisiba namona do ia dadaraia. Maoro lasi dalana ai bona hemataurai lasi dalana ai sisiba ita henia be hegeregere tau ta be kaia amo ita gwadaia bamona. Aonega Herevadia 12:18 ia gwau: “Ia hereva haraga tauna ena hereva, be tuari kaia ia gwadaia noho bamona.” Ita laloa namonamo lasi to ita hereva kava dainai ma ta ena dala ita ha-aukaia bena sisiba ia kamonai lasi, be edena bamona?​—⁠Aonega Herevadia 12:⁠15.

Solomona ia hereva hegeregerena, sisiba herevana be “nega korikori ai” ita gwauraia be maoro. Bema ta ese iseda sisiba herevana do ia badinaia, nega korikorina ai ita gwauraia be mai anina bada! Ita diba bema tau ta ia ura lasi aniani, ia dekenai ita henia aniani do ia moalelaia lasi. Reana hari sibona aniani bada herea ia ania, eiava ia gorere. Bema ta ia ura lasi aniani to ita doria ia aniani totona, unai be aonega karana lasi bona kara namona lasi.

Mai Lalo-Manau ida Sisiba Oi Henia

“Lauegu moale do umui habadaia momokani inai kara dekena amo: . . . Umui sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ Bona umui ese umui emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia noho.” (Filipi 2:​2-4) Bema oi be sisiba henia tauna namona, oi be “haida edia namo” do oi laloa. Oi ese “manau” karana do oi hahedinaraia emu tadikaka bona taihu oi kara henidia neganai bona danu, do oi laloa taunimanima haida be namo herea to oi be namo lasi. Unai hereva ena anina be dahaka?

Manau karana ese oi do ia durua ma haida oi hereaia lalohadaina be emu kara eiava hereva dalana amo oi hahedinaraia lasi totona. Ita ta ta ese ita laloa ita be iseda tadikaka ita hereaia be badina lasi. Nega ta ta ai ita ibounai ita kerere. Oi be ta ena lalona oi itaia diba lasi dainai, gau badana be oi sisiba henia tauna ena kara ena badina oi gwauraia dika kava lasi. Reana ia be lalohadai dikana ia abia lasi bona ia lalo-parara lasi iena kara be kerere. Bema ia lalo-parara sisina ia be Dirava ena taravatu ta ia makohia vadaeni, bema iena lauma dalana ita laloa bada dainai mai manau ida ita sisiba henia, ita diba ia ese sisiba do ia abia dae.

Mani oi laloa, bema ta ese oi ia boiria ia danu do oi aniani totona, to ia ese oi ia kara namo henia lasi, emu mamina be edena bamona? Momokani, oi ese unai aniani do oi moalelaia lasi. Oibe, “raisi sibona, oiemu lalokau taudia danu do oi ania be namo, to vamu namo herea, badu noho taudia danu do oi ania be dika.” (Aonega Herevadia 15:17) Unai hegeregerena, bema sisiba henia tauna ese sisiba namo herea ia henia to bema ia hahedinaraia ia sisiba henia tauna ia ura henia lasi, eiava ia hahedinaraia ia be anina lasi tauna bona ia hahemaraia, unai tauna ese sisiba do ia abia dae be auka. To, lalokau, ta ta hemataurai henia, bona abidadama ese sisiba henia bona sisiba abia dae karadia do ia hanamoa.​—⁠Kolose 3:⁠14.

Ia Abia Dae Sisibana

Peroveta tauna Natana ese King Davida ia sisiba henia neganai, ia ese manau ia hahedinaraia. Natana ena hereva bona kara amo ia ese Davida totona lalokau bona hemataurai ia hahedinaraia. Natana ese haheitalai ta amo ia matamaia, badina Davida be sisiba ia dadaraia garina. (2 Samuela 12:​1-4) Davida be hahemaoro maoromaoro bona kara maoromaoro ia ura henidia, bona peroveta tauna be unai dala ai ena lalona ia veria, ena be Bataseba ida ia karaia kara dika lalonai unai kara namodia ia hahedinaraia lasi. (2 Samuela 11:​2-27) Unai haheitalai ena anina badana ia hedinarai neganai, Davida ia gwau: “Lohiabada dekenai lau kara dika vadaeni.” (2 Samuela 12:​7-13) Davida be mai manau ida sisiba ia abia dae, to Kaino be idau, ia be Iehova ia kamonai henia lasi.

Ita daradara lasi Iehova ese Natana ia hakaua, bona Davida be ia goevadae lasi bona reana sisiba do ia abia dae lasi ia lalohadailaia. Natana be mai kara namo ida ia kara bona ia hahedinaraia ia laloa Davida ese ia ia hereaia badina Davida be Iehova ese ia horoa king. Bema oi be mai emu dagi badana, oi ese sisiba namona oi henia diba, to oi sisiba henia tauna ese do ia abia dae lasi bema oi be manau oi hahedinaraia lasi.

Natana ese mai manau ida Davida ia hakaua lou. Peroveta tauna be ia hegaegae namonamo bona hereva maorodia ia gaukaralaia, unai dainai Davida be ia sibona ia durua dalana ai ia kara diba. Natana be sibona ena namo ia tahua lasi, bona kara goeva ai eiava lauma dalanai ia be Davida ia hereaia ia hahedinaraia toho lasi. Hereva maorodia be dala maorona ai ia gaukaralaia dainai, haheitalai namona ia hahedinaraia! Bema oi be unai bamona kara oi hahedinaraia, ma haida ese oiemu sisiba do idia abia dae.

[Picture on page 22]

Tauanina durua aniani hegeregerena, emu sisiba ese namo ia havaraia be namo

[Picture on page 23]

Oiemu sisiba be siliva gauna latanai idia noho golo apolo hegeregeredia oi gwauraia, a?

[Picture on page 24]

Davida be hahemaoro maoromaoro bona kara maoromaoro ia ura henia, bona peroveta tauna Natana be mai manau ida unai amo ena lalona ia veria