Hekokoroku ese Ia Havaraia Gaudia​—Edia Dika be Edena Bamona?

NEGA ta, oi ia hahemaraia toho tauna ta ida oi gaukara, a? Reana oiemu biaguna, emu bosi, emu dipatmen ia naria tauna, eiava oiemu varavara ese oi ia laloa maragi bona oi ia kara henia namonamo lasi, a? Dahaka oi laloa ia dekenai? Ena kara oi ura henia, a? Lasi vaitani! Badina be dahaka? Badina be hekokoroku ese hetura karana bona herevahereva dalana ia koua.

Hekokoroku tauna ese ma haida ia atoa diho, ia sibona ia abia isi totona. Unai bamona tauna be nega ta ta sibona ai ma ta do ia hanamoa. Nega ibounai ta ia hadikaia herevana do ia gwauraia danu​—⁠“oibe, reana unai be momokani, to ena kerere be inai, o ena manoka gauna be unai.”

Buka ta ladana, Thoughts of Gold in Words of Silver ia gwau hekokoroku be “ta ia hamanokaia noho kara dikana. Tau ta ia hadikaia ela bona kahirakahira ia oi matauraia diba lasi.” Ita hoa lasi bema taunimanima idia ura lasi hekokoroku taudia idia bamoa, ani? Momokani, nega momo hekokoroku dainai ta be mai ena turana momokanina lasi. Unai buka ia hereva noho ia gwau, “To, taunimanima ese manau taudia idia ura henia​—edia manau idia heagilaia taudia lasi, to idia manau momokani taudia.” Baibel ia hereva maoro, ia gwau: “Tau ta ia hekokoroku neganai sibona do ia hahemaraia, ia manau tauna ese hemataurai do ia davaria.”​—Aonega Herevadia 29:​23, The Jerusalem Bible.

Taunimanima tura henia o hemataurai abia karana ia hadikaia sibona lasi, to gau badana be hekokoroku ese edena bamona ta ena tura karana Dirava dekenai ia haidaua? Sibona idia laloa bada taudia, idia hekokoroku taudia, bona idia heagi taudia dekenai Dirava be dahaka ia laloa? Hekokoroku eiava manau​—edena ita hahedinaraia be gau badana ia dekenai?

Manau Ia Hadibaia Sivaraina

Dirava ena lauma amo Aonega Herevadia ia torea tauna ia gwau: “Hekokoroku be hadikaia gabuna dekenai ia lao noho, bona sibona ia gwauraia bada tauna, be do ia moru momokani. Ogogami taudia danu, mai manau danu do oi noho be namo, to hekokoroku taudia danu, idia dadia kohu do oi haria be dika.” (Aonega Herevadia 16:​18, 19) Unai aonega herevadia edia anina be Suria ena tuari biaguna badana Namana, ia be Israela ena peroveta tauna Elisaia ena nega ai ia noho tauna, ena sivarai dekenai ia hedinarai goevagoeva.

Namana be lepera tauna. Ena gorere hanamoa gauna ia tahua totona, Samaria dekenai ia lao badina ia laloa Elisaia ese do ia itaia. To idau, peroveta tauna ese ena hesiai tauna ia siaia bona Namana ia hadibaia nega 7 Ioridane Sinavaina dekenai do ia digu be namo. Namana be unai kara bona sisiba dainai ia badu. Dahaka dainai peroveta tauna sibona ia mai lasi to ena hesiai tauna ia siaia? Bona reana, Suria ena sinavai iboudiai be Ioridane hegeregerena! Iena kerere be ia hekokoroku. Dahaka ia vara? Ma haida be ia dekenai aonega sisibana idia henia. “Vadaeni Namana ese ia diho lao, bona Ioridane Sinavai lalonai nega 7 iena tauanina ia atoa diho, Elisaia ese ia hamaoroa hegeregerena. Vadaeni iena kopina be ia namo lou, mero maragina ena kopina hegeregere.”​—2 King Taudia 5:⁠14.

Nega haida hahenamo badadia ita abia diba bema manau karana sisina sibona ita hahedinaraia.

Heagi Ena Dika

To reana hekokoroku dainai hahenamo o ma gau namona ta do ita haboioa sibona lasi. Hekokoroku karana ta be Greek herevana hybris ena anina hegeregerena. Greek gado ia diba momo tauna, William Barclay, ese unai bamona hekokoroku ia herevalaia, ia gwau: “Ia be hekokoroku bona dagedage hahedinaraia hebou . . . , idia heagi dainai ma haida idia hahemaraia dikadika.”

Unai bamona hekokoroku ena sivarai ta be Baibel dekenai ia noho. Ia be Hanunu, Amono taudia edia pavapava, ena sivarai. Insight on the Scriptures ia gwau: “Nahasa be Davida ia hebogahisi henia dainai, Davida ese gwaukau taudia haida ia siaia Hanunu ena lalona idia hagoadaia totona, ena tamana ia mase dainai. To Hanunu ena lohia taudia ese ia idia hamaoroa Davida be hehuni dalana ai spai taudia ia siaia edia hanua idia itaia totona. Unai dainai, Davida ena hesiai taudia idia hahemaraia dalana be edia auki huina ena kahana sibona idia kakasia, edia dabua idia darea ela bona edia kununa, bena idia siaidia lao.”a Barclay be unai sivarai ia herevalaia, ia gwau: “Unai kara be hekokoroku mai dagedage ida. Ia ese nega tamona ai unai taudia ia hereva dika henia, ia hahisia, bona ia hahemaraia.”​—2 Samuela 10:​1-5.

Oibe, hekokoroku tauna be ia dagedage diba, ma haida ia hahisia bona ia hahemaraia danu. Unai tauna be mai ena ura ida ta ia hahisia, bena ia hadikaia tauna ia lalohisihisi bona ia hemarai bada neganai, ia moale dikadika. To ia ese ma ta ena lalo-namo karana namona ia hadikaia eiava ia haorea vaitani neganai, hekwakwanai rua ia havaraia. Turana ta ia haboioa, bona inai henia tauna ia havaraia.

Keristani tauna momokanina ena Biaguna be ia gwau, “Oiemu badibadinai tauna dekenai oi lalokau henia, oi sibona oi lalokau henia bamona” dainai, ia hekokoroku mai dagedage ida be maoro lasi, ani? (Mataio 7:12; 22:39) Unai kara be Dirava bona Keriso edia kara iboudiai amo ia idau vaitani. Unai dainai, Barclay be mai anina bada herevana ia gwauraia, ia gwau: “Hekokoroku mai dagedage ida dainai, tau ta ese Dirava do ia dadaraia.” Unai bamona hekokoroku dainai ta do ia gwau: “Dirava be ia noho lasi.” (Salamo 14:⁠1) Eiava Salamo 10:4 ia gwau bamona: “Tau dikana ese Lohiabada ia tahua lasi, bona iena hekokoroku dainai, ia laloa Dirava be lasi.” Unai bamona hekokoroku, eiava heagi, ese ta ia hapararaia ena turadia bona varavara amo sibona lasi, to Dirava amo danu. Unai be dika bada herea!

Hekokoroku ese Oi Ia Hadikaia be Namo Lasi

Hekokoroku ena toana be momo​—bese abia isi dainai, bese idaudia inai henia dainai, dagi eiava iduhu laloa bada dainai, edukeisen, moni, ladana badana, bona siahu dainai hekokoroku ia vara. Dala idauidau ai, hekokoroku ese oiemu kara namodia ia hadikaia diba.

Taunimanima momo be edia biagudia eiava idia bamona taudia idia kara henia neganai edia toana be idia manau. To, unai manau tauna ese siahu ia abia neganai, dahaka ia vara? Karaharaga, ena siahu ia gaukaralaia mai hekokoroku ida bona iena siahu henunai idia gaukara taudia ia hahisia! Nega haida unai ia vara bema ta ese pulisi, ami o unai bamona taudia edia dabua idia hahedokilaia, eiava lapel kadi o I.D. kadi ma ta ese ia hahedinaraia idia be mai edia siahu. Gavamani dipatmen dekenai idia gaukara taudia danu be nega haida taunimanima idia kara henia neganai idia hekokoroku, badina idia laloa taunimanima ese idia idia hesiai henia be namo, to idia ese taunimanima idia hesiai henia lasi. Hekokoroku dainai do oi hereva auka bona oi hebogahisi lasi; manau dainai do oi hebogahisi.

Iesu be ena hahediba taudia huanai ia hekokoroku bona hereva auka diba. Ia be goevadae tauna, Dirava ena Natuna, bona ia be kara dika, kara haraga, bona haheauka lasi taudia danu ia noho. To, dahaka ia gwau ena hereva idia kamonai taudia dekenai? “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”​—Mataio 11:​28-30.

Nega ibounai Iesu ena haheitalai ita tohotohoa toho, a? Eiava ita hereva auka, iseda lalohadai ita dogoatao auka, siahu ita gaukaralaia mai hekokoroku ida, ita hebogahisi lasi, bona ita heagi, a? Iesu hegeregerena, taunimanima oi hanamoa toho, oi hahisia lasi. Hekokoroku oi dadaraia.

(This paragraph absent in Motu)

Sibona Lalo-Namo Karana Bona Hekokoroku

Kara ma ta, to ia be kara namona ta, be mai maoro ida sibona oi lalo-namo henia karana. Sibona oi lalo-namo henia ena anina be sibona oi matauraia. Ena anina be taunimanima edia lalohadai oi dekenai oi laloa bada. Oiemu toana bona emu ladana oi laloa. Spain taudia edia aonega herevana ta be ia momokani, ia gwau: “Lau oi hamaoroa daika danu oi raka, bena oi do lau hamaoroa oi be daika.” Ena anina be edia toana idia laloa lasi, idia lahedo, edia kara idia idau, bona edia hereva idia miro taudia oi bamoa neganai, edia kara do oi tohotohoa matamaia. Edia kara do oi hahedinaraia, bona idia hegeregerena oi sibona do oi lalo-namo henia lasi.

To kara ma ta ia idau​—hekokoroku dainai sibona ita abia isi. Iesu ena nega ai idia noho taravatu hadibaia taudia bona Farisea taudia be edia sene karadia bona edia tomadiho toana idia hekokorokulaia bada. Iesu be edia kara dainai ia gwau: “Edia kara idia karaia, be taunimanima ese do idia itaia totona. Edia kwarana bona imana dekenai idia kwatua taravatu helaga ena guriguri pepadia idia habadaia, edia dabua danu idia halataia. Idia ura aria neganai be gabu namo herea dekenai idia helai, bona dubu dekenai helai gaudia namodia sibona dekenai do idia helai. Idia ura danu hoihoi gabu dekenai taunimanima ese do idia hanamodia, idia be ‘Hadibaia Taudia’ do idia gwauraia.”​—Mataio 23:​5-7.

Unai dainai, namona be ita laloa namonamo. Danu, namona be ita laloatao Iehova ese iseda lalona ia itaia, iseda toana sibona lasi. (1 Samuela 16:7; Ieremia 17:10) Sibona ena kara maoromaoro hekokorokulaia karana bona Dirava ena kara maoromaoro be idia idau. To, hari henanadai ma ta ia noho, Edena bamona manau momokanina ita havaraia diba bona hekokoroku dainai idia vara gaudia edia dika do ita abia lasi?

[Footnote]

[Picture on page 4]

Namana ia manau neganai, hahenamo momo ia abia