Lalokau Ena Dala Ia Doko Lasi
“Namona be umui ese harihari gaudia herea momokani do umui ura henia bada. To dala namo herea momokani be harihari umui dekenai do lau hedinaraia.”—1 KORINTO 12:31.
1-3. (a) Edena dala ai lalokau hahedinaraia karana dibaia be gado matamatana dibaia karana bamona? (b) Edena gaudia dainai lalokau hahedinaraia karana dibaia be auka?
NEGA ta, oi ese gado matamatana oi dibaia toho, a? Unai be hekwarahi bada herea gauna! To beibi ta ese gado ia kamonai sibona bena unai gado do ia dibaia. Iena harana ese gado ena regena bona hereva edia anina ia abia noho, bena karaharaga ia sibona ia hereva namonamo diba, bona reana do ia hereva momo mai doko lasi bamona. To taunimanima badadia be idau. Ita be gado ta ia gwauraia hedinarai dikseneri ta amo hereva ita tahua, bena unai amo unai gado ena hereva haida sibona ita gwauraia diba. Bema nega ita atoa bona unai gado ita kamonai noho, gabeai unai gado matamata hegeregerena do ita laloa matamaia bona metairametaira do ita hereva diba.
2 Lalokau hahedinaraia karana dibaia be gado matamatana dibaia bamona. Momokani, taunimanima ibounai lalonai unai kara, Dirava ena kara ta, ia noho sisina. (Genese 1:27; mani 1 Ioane 4:8 itaia.) To, lalokau hahedinaraia karana dibaia be mai ena hekwarahi—hari inai negai ita hekwarahi bada, badina taunimanima momo be lalokau idia diba lasi. (2 Timoteo 3:1-5) Nega haida famili lalonai unai ia vara. Oibe, momo be idia tubu daekau negana ai, edia ruma bese lalonai lalokau herevadia momo idia kamonai lasi—reana idia kamonai lasi momokani. (Efeso 4:29-31; 6:4) Edena dala amo lalokau hahedinaraia dalana ita dibaia diba—ena be guna ita mamia lasi?
3 Baibel ese ita ia durua diba. Korinto Ginigunana 13:4-8 ai, Paulo ese lalokau ena anina ia henia sibona lasi, to lalokau korikorina ia havaraia karadia ia gwauraia hedinarai goevagoeva. Unai siri haida ita laloa murinai, unai kara, Dirava ena kara ta, do ita lalo-pararalaia namonamo diba bona do ita hahedinaraia diba. Namona be Paulo ia herevalaia lalokau hahedinaraia daladia idauidau do ita laloa. Ai be kahana toi dekenai do ai hapararaia: iseda kara; bena, iseda hetura karana ma haida ida; bona ginigabena be, iseda haheauka.
Lalokau ese Ita Ia Durua Ita Hekokoroku Lasi Totona
4 Paulo ena hamatamaia herevadia lalokau dekenai ia gwauraia murinai, Korinto taudia dekenai ia gwau: “Lalokau be ia mama lasi.” (1 Korinto 13:4, NW) Mama ia vara diba bema ta ese gau namona ta eiava dagi ta ia abia neganai, oi moale lasi, badina oi ura unai gau namona oi abia. Unai bamona mama be tauanina dalanai, hemami dalanai, bona lauma dalanai ita ia hadikaia diba.—Aonega Herevadia 14:30; Roma 13:13; Iamesi 3:14-16.
5. Tiokratik hahenamo o gaukara ta totona ita idia abia hidi lasi neganai, edena dala ai lalokau ese ita ia durua mama ita koua totona?
5 Unai dainai, sibona oi nanadaia: ‘Tiokratik hahenamo o gaukara ta totona lau idia abia hidi lasi, to ma ta idia abia hidi neganai, lau mama, a?’ Bema emu haere be oibe, oi lalo-hisihisi lasi. Baibel buka torea tauna Iamesi ese ita ia hamaoroa lou, ita goevadae lasi taudia iboudiai lalonai “hegahusi” ia noho. (Iamesi 4:5) Emu tadikaka lalokau henia karana ese emu laloa dalana ia hanamoa diba. Ia ese oi ia durua idia moale taudia ida do oi moale bona ma ta be hahenamo o hanamoa herevana ia abia neganai do oi laloa lasi oi ia hamaragia.—1 Samuela 18:7-9 itaia.
6. Aposetolo taudia edia negai, Korinto kongregesen lalonai, dahaka gau dikana ia vara?
6 Paulo ma ia gwau lalokau “ia heagi lasi, bona ia hekokoroku lasi.” (1 Korinto 13:4) Bema diba haida ita abia eiava gau ta ita karaia namonamo diba, namo lasi unai ita heagilaia. Toana be idaunegai Korinto kongregesen lalonai idia vareai tatau haida edia kerere be unai. Reana edia lalohadai idia hahedinaraia namonamo diba, eiava gau haida idia karaia namonamo diba. To reana sibona edia diba heagilaia karana dainai kongregesen ia parara. (1 Korinto 3:3, 4; 2 Korinto 12:20) Idia vara gaudia idia dika idia lao dainai, gabeai Paulo ese unai Korinto taudia ia sisiba henia, badina ‘kavakava taudia edia hereva idia abia dae, mai moale danu,’ bona Paulo ia gwau unai taudia be sibodia idia gwauraia “aposetolo taudia namo herea.”—2 Korinto 11:5, 19, 20.
7 Hari inai negai unai bamona gauna ia vara diba danu. Hegeregere, reana haida be haroro gaukara lalonai, eiava Dirava ena orea lalonai idia karaia diba gaudia idia heagilaia. Ena be ita be mai eda diba eiava kongregesen lalonai ma haida idia karaia diba lasi gauna ita karaia diba, ita be mai eda maoro unai ita heagilaia totona, a? Namona be ita abia goada o diba ita gaukaralaia, lalo-tamona ita habadaia totona—iseda ladana abia isi totona lasi.—Mataio 23:12; 1 Petero 5:6.
8 Paulo ia gwau, ena be kongregesen taudia be momo, to “Dirava ese kahana ibounai ia haboua vadaeni, tauanina tamona idia lao.” (1 Korinto 12:19-26) Greek herevana ta idia hahanaia “haboua” ena anina ma ta be buloa namonamo karana, kala idauidau mikisi karana bamona. Unai dainai, namona be kongregesen lalonai ta be ena diba ia heagilaia lasi bona ma haida ia biagua toho lasi. Hekokoroku bona dagi badana tahua karana be mai edia gabu lasi Dirava ena orea lalonai.—Aonega Herevadia 16:19; 1 Korinto 14:12; 1 Petero 5:2, 3.
9 Lalokau be “sibona ena gau ia tahua lasi.” (1 Korinto 13:5) Lalokau tauna ese ma haida edia lalona ia veria toho lasi, iena ura gaudia do idia karaia totona. Baibel ese unai bamona kara idia karaia taudia edia sivarai ia gwauraia bona sisibalaia. Haheitalai haida be inai: Delila, Iesebele, bona Atalaia edia sivarai ita duahia—unai hahine ese ma haida edia lalona idia veria, sibodia edia ura gaudia abia totona. (Gunalaia Taudia 16:16; 1 King Taudia 21:25; 2 Sivarai 22:10-12) Haheitalai ma ta be King Davida ena natuna Abesaloma. Hahemaoro herevana idia abia totona Ierusalema dekenai idia lao taudia dekenai ia lao bona lalo-ani herevadia ia gwauraia, ia gwau king ena kota ese edia hekwakwanai ia laloa bada momokani lasi. Bena maoromaoro ia gwau namona be kudou-namo tauna, ia bamona tauna, be kota lalonai do ia noho! (2 Samuela 15:2-4) To momokani, Abesaloma be sibona ena namo ia laloa, hekwakwanai idia davaria taudia ia laloa lasi. Ia sibona ia gwauraia ia be king, bona momo edia lalona ia veria. To gabeai, Abesaloma ia lusi momokani. Ia mase neganai, idia laloa ia hegeregere lasi guri namona abia totona.—2 Samuela 18:6-17.
10. Edena dala ai ita hahedinaraia ma haida edia namo ita laloa?
10 Unai ese hari inai negai Keristani taudia ia sisiba henia. Herevana ita be tau o hahine, reana taunimanima edia lalona ita veria diba haraga. Reana taunimanima ese iseda ura gaudia idia karaia badina herevahereva dalana ita biagua eiava lalohadai idauna idia abia taudia ese iseda hereva loulou karana idia hesikulaia dainai ita gwauraia gauna idia abia dae sibona. To bema ita be lalokau momokani hahedinaraia taudia, ma haida edia namo do ita laloa. (Filipi 2:2-4) Iseda tadikaka edia haheauka do ita gaukaralaia toho lasi eiava lalohadai kereredia do ita habadaia lasi badina ita laloa ita be nega daudau Dirava ena orea lalonai ita noho o dagi ita abia dainai iseda lalohadai sibona be maoro. Unai do ita karaia lasi, to Baibel ena parabole ta do ita laloatao: “Hekokoroku be hadikaia gabuna dekenai ia lao noho, bona sibona ia gwauraia bada tauna, be do ia moru momokani.”—Aonega Herevadia 16:18.
Lalokau Dainai Taunimanima Huanai Maino Ia Noho
11 Paulo ma ia torea lalokau be mai ena “bogahisihisi” bona “haida hadikaia ia ura lasi.” (1 Korinto 13:4, 5) Oibe, lalokau dainai hemataurai lasi karadia o badu o dika herevadia do ita gwauraia lasi. Ita ese ma haida edia namo do ita laloa. Hegeregere, lalokau tauna do ia hekwarahi ma ta ena lalona do idia hahisia karadia do ia karaia lasi totona. (1 Korinto 8:13 itaia.) Lalokau be ‘kara gagevagageva ia moalelaia lasi, to hereva momokani ia moalelaia.’ (1 Korinto 13:6) Bema Iehova ena taravatu ita ura henia momokani, matabodaga karadia edia dika do ita gwauraia maragi lasi eiava Dirava ia inai henia gaudia do ita moalelaia lasi. (Salamo 119:97) Lalokau ese ita ia durua hagoadaia gaudia do ita moalelaia, hadikaia gaudia do ita moalelaia lasi.—Roma 15:2; 1 Korinto 10:23, 24; 14:26.
12 Paulo ia torea lalokau “ia badu haraga lasi” (“ia lalo-hisihisi haraga lasi,” Phillips). (1 Korinto 13:5) Momokani, ita goevadae lasi taudia be ta ese ita ia kara dika henia neganai, vaia do ita badu sisina eiava do ita lalohisihisi. To, bema unai badu ita ubua bona nega daudau ita dogoatao noho, unai be maoro lasi. (Salamo 4:4; Efeso 4:26) Ena be unai badu be mai ena badina, to bema ita biagua lasi, mai aonega lasi ida do ita kara, bona reana Iehova ese davana do ia henia ita dekenai.—Genese 34:1-31; 49:5-7; Numera 12:3; 20:10-12; Salamo 106:32, 33.
12, 13. (a) Ta ese ita ia habadua neganai, edena bamona ita kara be namo? (b) Baibel ena haheitalai haida oi gaukaralaia bona idia amo oi hahedinaraia mai ena badina badu karana ese aonega lasi karana ia havaraia diba.
13 Haida be edia tadikaka edia kara kerere dainai idia lao lasi Keristani hebou dekenai eiava idia haroro lasi. Guna, idia momo be lauma dalanai tuari badana idia karaia edia abidadama dainai, reana ruma bese edia dagedage, moni gaukara dekenai idia gaukara hebou taudia ese idia kirikirilaia, bona unai bamona gaudia idia haheaukalaia vadaeni. Unai bamona hekwakwanai idia haheaukalaia badina idia laloa unai be edia kara maoromaoro tohoa gaudia, bona unai lalohadai be maoro. To, dahaka ia vara bema Keristani tauna ma ta be lalokau lasi herevana o karana ta ia karaia? Unai be edia kara maoromaoro ia tohoa karana ta danu, ani? Oibe, badina bema ita badu noho, ‘Satani ena dala ita kehoa.’—Efeso 4:27.
14 Mai ena badina namona ida, Paulo ma ia gwau, ‘lalokau ese dika ia laloatao noho lasi.’ (1 Korinto 13:5) Paulo ia gaukaralaia herevana be bisinesi lalonai idia gaukaralaia. Ena anina be bisinesi tauna ese buka ta lalonai ia abia monina ibounai do ia torea hegeregerena, reana ita be taunimanima edia kara kerere ibounai be lista ta dekenai do ita torea bamona, do ita laloaboio garina. Bema ita ia hahisia herevana o karana ta be iseda lalona dekenai ita atoa momokani, badina ita laloa reana dohore unai do ita gaukaralaia diba, unai be lalokau karana ta, a? Ita moale bada herea Iehova ese unai bamona hebogahisi lasi karana ia gaukaralaia lasi ita dekenai! (Salamo 130:3) Oibe, ita helalo-kerehai neganai, iseda kara kerere ia kokia.—Kara 3:19.
14, 15. (a) Inai hereva “dika ia laloatao noho lasi” ena anina be dahaka? (b) Kara dika gwauatao karana dekenai, edena dala ai Iehova ita tohotohoa diba?
15 Unai dala dekenai Iehova ita tohotohoa diba. Bema ita laloa ta ese ita ia kara henia mai ena hemataurai lasi ida, namo lasi ita lalohisihisilaia haraga. Bema karaharaga ita badu, sibona ita hahisia bada herea, to ita ia habadua tauna be unai bamona hisihisi ia havaraia diba lasi. (Hadibaia Tauna 7:9, 22) Namona be unai ita karaia lasi bona ita laloatao lalokau ena “abidadama ia goada noho.” (1 Korinto 13:7) Momokani, ita ura lasi hereva ibounai ita abia dae kava, to danu, ita ura lasi iseda tadikaka ena kara ena badina ita daradaralaia kava. Dala ia noho neganai, namona be ita laloa unai tadikaka ia ura lasi ita ia hahisia.—Kolose 3:13.
Lalokau ese Ita Ia Durua Ita Haheauka Totona
16 Bena Paulo ese ita ia hamaoroa “lalokau be ia haheauka.” (1 Korinto 13:4, NW) Ita ia durua hahetoho ita davaria neganai, reana nega daudau ita mamia negadiai danu, ita haheauka. Hegeregere, Keristani taudia momo be lagani momo lalodiai tomadiho dainai idia parara ruma besedia dekenai idia noho. Ma haida idia headava lasi, unai idia abia hidi dainai lasi, to adavana namona, “Keristani tauna,” idia davaria diba lasi dainai. (1 Korinto 7:39; 2 Korinto 6:14) Bena ma haida be edia tauanina idia hadikaia goreredia dainai idia hekwarahi bada. (Galatia 4:13, 14; Filipi 2:25-30) Momokani, hari inai nega dikana ai, ita ibounai be gau ta dainai ita haheauka.—Mataio 10:22; Iamesi 1:12.
17 Paulo ese ita ia hamaoroa, “lalokau be taunimanima durua kara dekenai ia hesiku lasi. . . . Nega ibounai Dirava ena nega namona ia naria noho mai moale danu. Bona metau ibounai lalonai ia gini goada noho.” (1 Korinto 13:7) Iehova lalokau henia karana ese ita do ia durua kara maoromaoro badinaia totona, gau ibounai do ita haheaukalaia. (Mataio 16:24; 1 Korinto 10:13) Ita ura lasi dagedage dainai ita mase. Lasi, ita ura mai maino danu ita mauri. (Roma 12:18; 1 Tesalonika 4:11, 12) To, iseda abidadama idia tohoa gaudia idia vara neganai, mai moale danu do ita haheaukalaia, badina ita diba unai be Keristani hahediba taudia idia henia davana. (Luka 14:28-33) Ita haheauka lalonai, ita ura mai lalo-moale ida ita karaia, bona iseda helaro be unai hekwakwanai amo gau namona ta do ia vara.
18. Dahaka dainai hekwakwanai lasi negadia ai danu ita haheauka noho be namo?
18 Dagedage sibona dainai lasi, to gau ma haida dainai do ita haheauka. Nega haida, haheauka ena anina be kara ta oi hadokoa lasi, to oi abia hidi dalana ai do oi raka noho, herevana hekwakwanai idia vara eiava idia vara lasi. Haheauka karana be lauma gaudia tahua karana ena sediual namona ita badinaia. Hegeregere, oi haroro neganai, mai anina gaukara oi karaia, oiemu goada bona noho hegeregerena, a? Dirava ena Hereva oi duahia bona laloa dobu bona emu guba Tamana dekenai oi guriguri, a? Kongregesen heboudia oi lao henia loulou, bona emu orea tamona taudia edia hagoadaia heheni karana amo namo oi davaria, a? Bema unai gaudia oi karaia, herevana hekwakwanai negana eiava hekwakwanai lasi negana ai oi noho, to oi haheauka noho. Oi hesiku lasi, badina “bema ita manoka lasi, nega do ia ginidae huahua do ita abia.”—Galatia 6:9.
Lalokau—“Dala Namo Herea Momokani”
19. Dahaka dainai lalokau be “dala namo herea momokani”?
19 Paulo be lalokau hahedinaraia karana ena anina badana ia hahedinaraia, unai kara, Dirava ia hahedinaraia karana ta, ia gwauraia “dala namo herea momokani.” (1 Korinto 12:31) Edena dala ai ia be “namo herea momokani”? Paulo ese lauma ena harihari gaudia haida ia gwauraia vadaeni, aposetolo taudia edia negai idia noho Keristani taudia momo idia abia gaudia unai. Haida be peroveta siahuna idia abia, ma haida be gorere hanamoa siahuna idia abia, bona idia momo be gado idauidau veria diba siahuna idia abia. Momokani, unai harihari gaudia be hoa gaudia! To Paulo ese Korinto taudia ia hamaoroa: “Bema taunimanima edia gado idauidau lau hereva diba, aneru edia gado danu, to egu lalokau be lasi neganai, egu hereva be auri idia botaia, o gaba idia toua kava bamona. Bema peroveta siahuna lau abia, bona Dirava ena hunia gaudia lau diba, aonega ibounai danu, bona bema egu abidadama dekena amo ororo lau kokia diba, to egu lalokau be lasi neganai, lau be anina lasi gauna bamona.” (1 Korinto 13:1, 2) Oibe, mai anina bada karadia danu be “hegeregere lasi” bema ita karaia lasi Dirava bona iseda dekena taudia ita lalokau henia dainai.—Heberu 6:1.
20 Iesu ese Dirava ia hahedinaraia lalokau karana ita habadaia ena badina ma ta ia gwauraia. Ia gwau: “Unai dekena amo taunimanima ibounai do idia diba umui be lauegu diba tahua taudia, [“bema,” NW] ta ta dekenai do umui lalokau henia.” (Ioane 13:35) Unai hereva “bema” ia hahedinaraia Keristani ta ta do idia abia hidi diba bema lalokau hahedinaraia karana do ia dibaia eiava do ia dibaia lasi. Bema idau tanona dekenai ita noho, unai sibona ese ita do ia doria lasi ena gado ita dibaia totona. Kingdom Hall dekenai idia karaia hebou ita lao henia bona Keristani taudia ita bamoa, to unai sibona amo lalokau hahedinaraia karana do ita dibaia lasi. Unai “gado” dibaia totona, namona be hanaihanai ita hekwarahi.
21, 22. (a) Bema Paulo ia herevalaia lalokau karana ta ita karaia namonamo lasi, dahaka ita karaia be namo? (b) Dahaka dainai ita gwau diba ‘lalokau be do ia doko lasi’?
21 Nega haida, Paulo ia herevalaia lalokau karana ta do oi karaia namonamo lasi. To emu lalona ia manoka lasi be namo. Mai haheauka ida oi gaukara noho. Baibel ena hereva oi tahua noho bona taunimanima ma haida oi kara henia neganai ena hakaua herevadia oi gaukaralaia. Iehova ia henia haheitalai namona oi laloaboio lasi. Paulo ese inai sisiba ia henia Efeso taudia dekenai: “Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.”—Efeso 4:32.
22 Gado matamata oi dibaia bona gwauraia be metairametaira do ia namo ia lao hegeregerena, gabeai do oi davaria, lalokau hahedinaraia karana oi karaia haraga diba. Paulo ese ita ia hagoadaia, ia gwau “lalokau be do ia . . . doko lasi.” (1 Korinto 13:8) Lauma helaga amo idia karaia hoa karadia bamona lasi, lalokau be do ia ore lasi. Unai dainai namona be unai kara, Dirava ena kara ta, ena hahedinaraia dalana ita dibaia noho. Ia be Paulo ese ia gwauraia hegeregerena, “dala namo herea momokani.”
Anina Oi Gwauraia Diba, A?
◻ Edena dala ai lalokau ese ita ia durua hekokoroku ita hanaia totona?
◻ Lalokau ese edena dala idauidau ai ita ia durua kongregesen ena maino ita habadaia totona?
◻ Edena dala ai lalokau ese ita ia durua ita haheauka totona?
◻ Edena dala ai lalokau be “dala namo herea momokani”?
4. Baibel be edena bamona mama ia herevalaia?
7, 8. Baibel amo oi hahedinaraia ita abia goada o diba be edena dala ai ita gaukaralaia diba lalo-tamona habadaia totona?
9. Baibel ese edena sisiba ia henia sibodia edia namo idia tahua taudia edia sivarai amo?
11. (a) Edena dala idauidau ai hebogahisi bona ma haida hadikaia lasi lalokauna ita hahedinaraia diba? (b) Edena dala ai ita hahedinaraia diba kara gagevagageva ita moalelaia lasi?
16. Edena negadia ai lalokau ese ita do ia durua diba ita haheauka totona?
17. Dahaka ese ita do ia durua gau ibounai ita haheaukalaia totona?
20. Dahaka dainai lalokau ita habadaia totona ita hekwarahi hanaihanai be namo?
[Picture on page 19]
Lalokau ese ita do ia durua eda orea tamona taudia edia kerere ita laloa momo lasi totona
[Picture on page 23]
Haheauka ena anina be tiokratik sediual namona ita badinaia