Aonega Bukana ta mai Ena Hereva Hari Inai Nega Totona

IDAUNEGAI iduhu kwarana tauna Iobu, ena nega lalonai ia be taga bada tauna, ia gwau: “[Dava bada] nadi danu be aonega ena davana ia hereaia lasi.” (Iobu 1:3; 28:18; 42:12) Momokani, ta ese ena mauri lalonai namo ia davaria totona, aonega ena namo ese taga ena namo ia hereaia. Aonega King Solomona ia gwau: “Aonega ese oi ia gimaia noho diba, moni ese oi ia gimaia noho diba hegeregerena. To aonega ese moni ia hereaia noho, badina aonega ese aonega tauna ia hamauria noho.”​—Hadibaia Tauna 7:12.

To hari inai negai, unai bamona aonega be edeseniai ita davaria diba? Taunimanima ese heduru herevadia idia torea taudia, taunimanima edia lalona bona kara idia stadilaia doketa, lalona bona hemami edia gorere idia hanamoa doketa dekenai, bona huina idia utua taudia bona taksi idia taria taudia dekenai danu, edia hekwakwanai idia herevalaia. Bona diba bada taudia momo herea ese gau iboudiai dekenai edia heduru idia henia​—mai ena davana danu. To nega momo, unai bamona “aonega” herevadia dainai taunimanima ese lalohisihisi, reana dika danu, idia davaria. Unai dainai, aonega momokanina be edena bamona ita davaria diba?

Iesu Keriso ese taunimanima edia mauri ia diba namonamo bona nega ta ia gwau: ‘Gaukara ese aonega ia hamomokania.’ (Mataio 11:19) Nega momo taunimanima ese edia mauri lalonai idia davaria hekwakwanai haida mani ita laloa bona ita itaia edena bamona aonega herevadia amo heduru korikorina idia abia bona idia be dava bada nadi idia hereaia. Oi danu be unai “aonega” oi davaria diba bena oi do ia durua.

Oi Daradoko, A?

London niuspepa ta ladana International Herald Tribune ia gwau: “Bema lagani 1900 ese Lalo-Hekwarahi Ena Nega ia hamatamaia, lagani 2000 ia kahirakahira neganai, Daradoko Ena Nega do ia matamaia.” Ma ia gwau “daradoko bada karana idia stadilaia negana ginigunana lalonai, idia davaria tanobada hegegemadai ia bada ia lao noho. Tano idauidau, hegeregere Taiwan, Lebanon bona New Zealand ai, uru ta ta ena matamata taudia idia daradoko haraga, uru gunadia bamona lasi.” Idia gwau lagani 1955 murinai idia vara taudia huanai idia daradoko taudia edia namba ese edia tubudia edia nega lalonai idia daradoko taudia edia namba be nega toi amo ia hanaia.

Unai be Tomoe dekenai ia vara, ia daradoko bada bona kahirakahira dina iboudiai be mahuta patana dekenai ia hekure. Ia ese ena lagani rua merona ia naria diba lasi dainai, ena tama sina edia ruma dekenai ia giroa lou. Ena dekena hahine ta, ena natuna kekeni ena mauri lagani be Tomoe ena natuna mero ena mauri lagani hegeregerena, be Tomoe ena turana ai ia lao. Tomoe ese iena dekena hahinena ia hamaoroa ia mamia iena mauri be anina lasi neganai, ia ese buka ta amo hereva ta ia hahedinaraia. Ia gwau: “Matana ese imana do ia hereva henia lasi, do ia gwau lasi, ‘Oi be lau oi durua diba lasi.’ Kwarana ese danu aena do ia hereva henia lasi, do ia gwau lasi, ‘Oi be lau oi durua diba lasi.’ Lasi, ita laloa idia goada lasi kahadia be mai edia gaukara bada herea.”a Mai mata ranuna ida Tomoe ia lalo-parara ita ta ta be mai eda gabu tanobada dekenai bona ita ta ta eda mauri be mai anina bada.

Unai dekena hahinena ia gwau, namona be Tomoe ese unai hereva ia gwauraia bukana do ia duahia. Tomoe ese unai ia abia dae ia hahedinaraia totona ena kwarana ia hamarerea, ena be ema bona unai nega gau ta ia karaia diba lasi, gwauhamata maragina danu ia henia diba lasi. Danu, unai dekena hahinena ese ia durua aniani hoia totona, bona dina iboudiai Tomoe ida aniani ia nadua. Hua ta murinai, Tomoe be daba iboudiai ia toreisi, dabua ia huria, ruma ia hagoevaia, aniani ia hoia, bona ia nadunadu, ruma ai idia gaukara hahine iboudiai bamona. Hekwakwanai be momo ia hanaia totona, to ia gwau: “Lau diba momokani bema lau davaria aonega herevadia lau badinaia, do lau hegeregere.”

Ia davaria aonega ia badinaia dainai, Tomoe ese ia daradoko dinadia edia hisihisi ia hanaia. Hari Tomoe be ena nega ibounai lalonai, ena hekwakwanai hanaia totona ia idia durua herevadia amo ma haida ia durua. Unai aonega herevadia be idaunegai bukana ta lalonai idia noho bona ena hereva be taunimanima iboudiai totona hari.

Ruma Bese Lalonai Hekwakwanai Oi Davaria, A?

Tanobada hegegemadai headava idia hadokoa karana ia bada ia lao noho. Orient tanodia dekenai danu ruma besedia lalonai hekwakwanai idia davaria, ena be guna ruma bese maurina namona idia laloa bada. Headava idia durua aonega herevadia namodia be edeseniai ita davaria diba?

Mani, Shugo bona Mihoko edia mauri oi laloa, edia headava lalonai hekwakwanai idia davaria hanaihanai. Gau maragimaragi iboudiai dainai idia hepapahuahu. Shugo be badu haraga tauna, bona nega ibounai ena adavana ena kerere ia gwauraia neganai, Mihoko be badu herevadia ia gwauraia danu. Mihoko ia laloa, ‘Gau ta dekenai ai lalo-tamona diba lasi.’

Dina ta ai, hahine ta ese Mihoko ia vadivadi henia bona buka ta amo inai hereva ia duahia: “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.”b Ena be Mihoko ese tomadiho ia ura henia lasi, to unai hereva ia gwauraia bukana ia stadilaia matamaia. Unai buka ia ura henia dainai ena ruma bese maurina ia namo ia lao. Unai dainai, buka ta ladana Emu Ruma Bese Hamoalea Dalana idia stadilaia hebouna dekenai ia idia boiria neganai, Mihoko​—bona ena adavana​—be mai edia ura ida idia lao.c

Hebou dekenai, Shugo ia itaia idia noho taudia ese idia dibaia gaudia be edia mauri lalonai idia badinaia bona toana be idia moale bada. Ena lalona ia hadaia, ena adavana ese ia stadilaia bukana do ia itaia. Hereva ta ese ena lalona ia veria, ia gwau: “Iena badu ia hakerua tauna, be mai ena aonega danu, to bema ia badu haraga neganai, tau ta ese iena kavakava do ia habadaia.”d Ena be sisina daudau ia hekwarahi ena mauri lalonai unai hakaua herevana ia badinaia totona, to metairametaira ena mauri ia haidaua be ia kahirakahira idia noho taudia, ena adavana danu, ese idia itaia.

Mihoko ese ia itaia ena adavana ena kara ia idau neganai, ia danu be ia dibaia gaudia ia badinaia matamaia. Heduru bada ia henia hakaua herevana ta be inai: “Umui emui lalona dekenai taunimanima umui gwauraia kerere lasi, vadaeni Dirava ese umui do ia gwauraia kerere lasi. Badina be umui gwauraia kerere karana hegeregerena Dirava ese umui do ia gwauraia kerere.”e Unai dainai Mihoko bona ena adavana ese edia lalona idia hadaia, edia kara namodia do idia herevalaia bona edena bamona edia kara do idia hanamoa idia herevalaia danu, to ta ta edia kerere do idia tahua lasi. Dahaka ia vara? Mihoko ia gwau: “Unai ese lau ia hamoalea momokani. Dina ta ta ena adorahi aniani neganai unai ai karaia. Emai mauri lagani toi merona danu be unai herevahereva lalonai ia vareai. Unai kara ese ai ia hagoadaia bada!”

Unai ruma bese taudia ese idia abia sisiba mai ena anina bada idia badinaia neganai, idia ese guna edia headava idia hadikaia gwauraia hekwakwanai idia hanaidia diba. Idia dekenai unai ena davana ese dava bada nadi edia davana ia hereaia, ani?

Oi Ura Oiemu Mauri Do Ia Namo, A?

Hari inai negai, kohu gogoa karana be taunimanima momo edia tahua gauna badana. To, United States dekenai dola milioni momo be heduru karadia totona ia henia taga bisinesi tauna be nega ta ia gwau: “Taunimanima haida ese moni idia ura henia, to taunimanima ta lasi ese nega tamona tamaka hani ia atoa diba.” Taunimanima haida sibona ese unai lalohadai idia abia dae bona taunimanima ta ta sibona ese kohu tahua karana idia hadokoa.

Hitoshi ia tubu neganai ia ogogami dainai, ia ura bada taga tauna ai do ia lao. Ia itaia heniatorehai taudia ese taunimanima edia mauri idia biagua neganai, ia laloa: “Moni bada taudia idia kwalimu.” Hitoshi ese moni ena siahu ia abidadama henia bada dainai, ia laloa taunimanima edia mauri danu be moni amo ia hoia diba. Kohu gogoa totona, dina ta ta ibounai be sibona ena ranu paipa bisinesi dekenai ia gaukara goadagoada, ia laga-ani lasi. Ena be ia hekwarahi bada, to nega daudau lasi murinai Hitoshi ia itaia, ia, ma haida amo gaukara ia abia tauna, ena siahu ese ia dekenai gaukara idia henia taudia edia siahu do ia hanaia diba lasi. Dina ta ta ibounai ia lalohisihisi bona ia gari ena bisinesi do ia moru.

Bena tau ta be Hitoshi ena iduara dekenai ia mai bona ia nanadaia bema ia diba Iesu Keriso be ia totona ia mase. Hitoshi ia laloa taunimanima ta be ia bamona tauna totona do ia mase lasi, bona unai dainai unai hereva ese ena lalona ia veria bona ia gwau do idia herevahereva lou diba. Pura tamona murinai, ia ese hereva ta kamonai totona ia lao bona ia hoa bada, badina inai hagoadaia herevana, “oiemu matana ia namo” noho, ia kamonai. Hereva henia tauna ia gwau ia “namo” matana ese vaira negana ai do idia vara gaudia ia itaia diba bona lauma gaudia ia itaia namonamo; to, ia “dika,” eiava ia “mama” matana, ese hari tauanina ena ura idia hagugurua gaudia sibona ia itaia namonamo bona daudau dekenai idia noho gaudia ia itaia diba lasi. Inai sisiba, “Umui emui kohu idia noho gabuna dekenai, umui emui kudouna danu unuseni ia noho” ese ena kudouna ia hamarerea bada.f Kohu gogoa karana hereaia gaudia idia noho! Guna unai bamona lalohadai ia kamonai lasi.

Unai ia laloa bada dainai, ia dibaia gaudia ia badinaia matamaia. Moni totona ia hekwarahi lasi, to ena mauri lalonai lauma gaudia ia tahua guna. Danu, nega ia atoa lauma dalanai ena ruma bese taudia ia naria totona. Oibe, unai dainai guna bamona nega bada ia atoa diba lasi ia gaukara totona, to ena bisinesi ia heau namonamo. Dahaka dainai?

Ia abia sisibana ia badinaia dainai, ena badu karana ia haidaua bona lalo-manau bona kara namo ia hahedinaraia. Inai sisiba ia laloa bada: “Harihari inai gaudia umui negea momokani: Badu, dagedage, laloa dika. Hereva dika bona hereva mirodia do umui gwauraia lasi. Umui ta ta dekenai do umui koikoi lasi. Badina be emui mauri gunana mai ena dika be dabua gunana bamona umui kokia vadaeni, bona mauri matamata umui kwatua vadaeni. Inai mauri matamata be Dirava ese ia havaraia. Bona ia ese nega ibounai diba matamata ia henia noho, ia lao bona Dirava ena toana momokani do umui abia.”g Unai sisiba ia badinaia dainai taga tauna ai ia lao lasi, to ena “mauri matamata” dainai edia gaukara ia karaia taudia ese ia idia laloa bada bona idia abidadama henia. Oibe, ia davaria aonega herevadia dainai ena mauri ia namo. Ia dekenai, unai hereva ese dava bada nadi eiava moni idia hereaia momokani.

Unai Aonega Do Oi Tahua, A?

Ataiai sivaraidia lalonai ai herevalaia taudia ese idia davaria mai anina bada aonegana oi diba, a? Ia be Baibel ena aonega, tanobada dekenai idia halasia momo bona ita abia haraga diba bukana. Reana oi be mai emu Baibel eiava ta oi abia diba. To, dava bada nadidia ia abidia to ia gaukaralaidia lasi tauna dekenai namo idia havaraia lasi hegeregerena, ta ese Baibel ia abia sibona ese namo ia havaraia lasi. Namona be Baibel oi tahua bona ena aonega sisibana, mai anina bada sisibana inai nega totona do oi badinaia, bena do oi itaia ia ese oi ia durua mauri lalonai idia vara hekwakwanai oi hanaia diba totona.

Bema ta ese oi dekenai dava bada nadi ia siaia, do oi moale bada bona oi ura unai harihari gauna ia henia tauna oi tahua, ia oi tanikiu henia totona, ani? Oi diba Baibel ia henia tauna be daika, a?

Baibel ese ia lalonai ia noho aonega ia henia tauna ia hahedinaraia, ia gwau: “Buka Helaga ibounai be Dirava ena lauma amo ia vara.” (2 Timoteo 3:16, NW) Danu, ita ia hadibaia “Dirava ena hereva be ia mauri noho, bona ia be mai ena siahu.” (Heberu 4:12) Unai dainai Baibel lalonai ita davaria aonega herevadia be mai anina bada ita totona hari. Iehova ena Witness taudia idia moale bema oi idia durua diba, unai harihari gauna ia Henia Tauna, Iehova Dirava, oi dibaia totona. Unai amo oi ese Baibel lalonai ia noho “aonega” do oi abia diba, badina Baibel be aonega bukana ta mai ena hereva hari inai nega taudia totona.

[Footnotes]

[Box/Picture on page 4]

Aonega Herevadia Oiemu Lalona Ia Maoro Totona

“Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba? To oi ese aiemai dika oi gwauatao noho, unai dainai ai ese oi dekenai ai gari henia be namo.”​—Salamo 130:3, 4.

“Tau ena kudouna ia moale neganai ia kiri noho, to lalohisihisi ese, unai tau ena lauma ia hamanokaia noho.”​—Aonega Herevadia 15:13.

“Unai dainai do oi kara maoromaoro auka herea lasi, bona aonega do oi tahua auka herea lasi, oi sibona do oi alaia garina. Oi sibona do oi alaia ena namo be dahaka?”​—Hadibaia Tauna 7:16.

“Henia kara ena moale be bada, abia kara ena moale be maragi.”​—Kara 20:35.

“Bema umui badu neganai, kara dika do umui karaia lasi. Bona dina do ia diho lasi neganai, emui badu do umui haorea.”​—Efeso 4:26.

[Box/Picture on page 5]

Aonega Herevadia Oiemu Ruma Bese Maurina Ia Namo Totona

“Sisiba momo do oi tahua noho, bona do oi kwalimu, to sisiba do oi abia lasi neganai, do oi moru.”​—Aonega Herevadia 15:22.

“Lalona kehoa tauna ese, nega ibounai diba ia davaria noho. Aonega tauna ese, danu nega ibounai diba ia tahua noho.”​—Aonega Herevadia 18:15.

“Nega korikori ai idia gwauraia herevana be golo apolodia siliva herahera gaudia latanai idia noho bamona.”​—Aonega Herevadia 25:11, NW.

“Umui haheauka heheni bona emui dika umui gwauatao heheni noho mai emui ura ida bema ta be ma ta dekenai mai ena badu herevana ta. Iehova be mai ena ura ida umui emui dika ia gwauatao hegeregerena, umui danu unai bamona umui karaia. To, unai sibona lasi, lalokau be dabua bamona do umui atoa, badina ia be hatamonaia gauna hereadaena.”​—Kolose 3:13, 14, NW.

“Egu lalokau, inai sisiba umui laloaboio lasi. Umui ta ta ibounai ese hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi.”​—Iamesi 1:19.

[Box/Picture on page 6]

Aonega Herevadia Oiemu Mauri Do Ia Namo Totona

“Metau sikele koikoidia idia gaukaralaia noho taudia, be Lohiabada ese ia badu henidia noho, to sikele maoromaorodia dekenai Lohiabada ia moale noho.”​—Aonega Herevadia 11:1.

“Hekokoroku be hadikaia gabuna dekenai ia lao noho, bona sibona ia gwauraia bada tauna, be do ia moru momokani.”​—Aonega Herevadia 16:18.

“Ia badu neganai mai ena haheauka lasi tauna, be hanua ta mai ena magu lasi bamona, idia hadikaia ore vadaeni.”​—Aonega Herevadia 25:28.

“Do oi badu haraga lasi. Bona bema badu be emu lalona dekenai oi dogoatao noho, inai be kavakava taudia edia kara.”​—Hadibaia Tauna 7:9.

“Oiemu aniani be davara ena kopina dekenai do oi negea lao, badina be dina momo murinai do oi davaria lou.”​—Hadibaia Tauna 11:1.

“Hereva mirodia do umui gwauraia lasi, hereva namodia sibona. Vadaeni emui hereva idia kamonai taudia ese durua bona namo do idia davaria, bona emui hereva dekena amo manoka taudia do umui hagoadaia.”​—Efeso 4:29.

[Picture on page 7]

Baibel stadilaia karana be kara ginigunana “aonega” oi abia totona