Daika ese Oiemu Lalohadai Ia Biagua?

“TAU ta ese lau do ia hamaoroa lasi dahaka lau laloa bona dahaka do lau karaia!” Mai goada ida unai oi gwauraia ese ia hahedinaraia oi bona emu lalohadai oi abidadama henia bada. Oiemu mamina be unai bamona, a? Momokani, namo lasi tau ta ese oiemu abia hidi ia karaia. To sisiba namona be karaharaga oi dadaraia be aonega karana, a? Tau ta lasi be abia hidi namona karaia totona oi ia durua diba, a? Danu, momokani oi gwau diba ta ese oiemu lalohadai be, reana hehuni dalanai, ia biagua lasi, a?

Hegeregere, Tanobada Ibounai Tuarina Iharuana ia do vara lasi neganai, Joseph Goebbels, Hitler ena lalohadai abia dae totona taunimanima edia lalona ia veria tauna, ese Germany ena muvini piksa bisinesi ia biagua matamaia. Dahaka dainai? Badina ia lalo-parara unai be mai ena siahu bada dalana ta “taunimanima ese idia abia dae gaudia ia biagua bona unai amo edia kara ia biagua” totona. (Propaganda and the German Cinema 1933-​1945) Reana oi diba vadaeni ia be unai dekenai ia kwalimu bona hisihisi bada ia havaraia. Ia be unai dala bona dala ma haida amo taunimanima​—laloa maoromaoro diba taudia unai​—edia lalona ia biagua bena Nazi lalohadaina idia badinaia kava.

Inai be momokani, nega ibounai oi kamonai henia taudia edia hemami bona edia lalohadai ese oiemu lalohadai bona kara idia veria. Momokani, reana unai be gau dikana lasi. Bema unai taudia ese oiemu namo idia tahua​—hegeregere tisa taudia, turadia, eiava tama sina​—edia sisiba ese oi idia durua bada diba. To bema idia be sibodia edia namo idia tahua taudia bona ta ese ia hakaudia kerere eiava edia lalohadai be miro, bona idia be aposetolo Paulo ese ia gwauraia “hereva kavakava dekena amo haida idia hakaua kerere” taudia, vadaeni, oi naria namonamo!​—Tito 1:​10; Deuteronomi 13:​6-8.

Unai dainai, namo lasi oi laloa oi be hegeregere bona ta ese oiemu lalona do ia veria diba lasi. (1 Korinto 10:12 itaia.) Reana oi itaia diba lasi to ia vara noho​—bona nega momo ia vara noho​—⁠ena be oi ura lasi oi gwauraia. Hegeregere, sitoa dekenai oi lao neganai, dahaka oi abia hidi oi hoia totona, mani oi laloa. Nega ibounai ia be oi sibona oi ura henia gauna, bona oi laloa namonamo murinai oi abia hidi gauna ta, a? Eiava taunimanima ma haida, nega momo oi itaia lasi taudia, ese hehuni dalanai mai edia siahu bada ida emu lalona idia veria bena gau ta do oi abia hidi, a? Gau idauidau ia tahua toretore tauna Eric Clark ia laloa ma haida ese unai idia karaia. Ia gwau: “Hoihoi gaudia hahedinaraia karana ia bada neganai, ena be ita laloa lasi, to momokani, iseda lalona idia veria goadagoada.” Ia be ma ia gwau, hoihoi gaudia hahedinaraia karana ena siahu be taunimanima amo idia nanadaia neganai, “momo idia gwau ia be mai ena siahu, to idia dekenai ia be siahu lasi.” Taunimanima idia laloa gau idauidau ese ma haida edia lalona idia veria haraga diba, to edia lalona idia veria lasi. “Toana be, idia sibona ese unai siahu idia dadaraia diba.”​—The Want Makers.

Satani ese Oiemu Lalohadai Ia Biagua, A?

Hanaihanai idia karaia hoihoi gaudia hahedinaraia karana ese oiemu lalona ia veria eiava lasi be gau badana lasi, reana ia amo dika do oi davaria lasi. To, dika bada ia havaraia diba siahuna ma ta ia noho. Baibel ese ia hahedinaraia goevagoeva Satani be koikoi dalanai lalona veria karana ia diba momo tauna. (Apokalupo 12:⁠9) Ena lalohadai be hoihoi gaudia hahedinaraia tauna ta ena lalohadai hegeregerena, ia gwau hoihoi taudia edia lalona veria daladia be rua​—“koikoi herevadia amo eiava edia lalohadai haidaua karana amo.” Bema ta ena lalohadai abia dae totona taunimanima edia lalona idia veria taudia bona hoihoi gaudia hahedinaraia taudia ese unai bamona hehuni daladia idia gaukaralaia diba oiemu lalohadai idia biagua totona, Satani be unai dala ia gaukaralaia daladia ia diba namonamo momokani!​—Ioane 8:​44.

Aposetolo Paulo be unai ia diba. Ia gari ena Keristani tadikaka haida be do idia naria namonamo lasi, bena Satani ena koikoi herevadia ese edia lalona do idia veria. Ia gwau: “Gaigai ese Heva ia koia hegeregerena, lau gari inai, namo lasi laloa idauidau ese umui do idia hakaua kerere, vadaeni emui lalokau goevagoeva Keriso dekenai do umui rakatania.” (2 Korinto 11:3) Namona be unai sisiba oi laloa bada. Bema oi laloa bada lasi, oi be guna ai gwauraia taudia hegeregerena, idia laloa lalona ania herevadia bona lalohadai haidaua karadia be mai edia siahu​—“to idia dekenai ia be siahu lasi.” Hari inai uru lalonai idia vara dagedage, matabodaga, bona koikoi karadia ese idia hamomokania Satani ena lalo-ani karana ena siahu be bada herea.

Unai dainai, Paulo ese ena Keristani tadikaka ia noia “inai tanobada taudia edia kara bamona do umui karaia lasi.” (Roma 12:2) Baibel hahanaia tauna ta be Paulo ena hereva ia gwauraia inai bamona: “Namo lasi tanobada taudia ese emui lalohadai idia biagua.” (Roma 12:​2, Phillips) Satani ese dala iboudiai ia gaukaralaia ia ese oiemu lalohadai ia biagua totona, ia be idaunegai uro karaia tauna bamona, ia ese raro be gauna ta mai ena revareva idauidau lalonai ia atoa, unai revareva edia toana idauidau do ia hahedinaraia totona. Satani ese tanobada ena politikol, bisinesi, tomadiho, bona moale karadia oreadia ia gaukaralaia unai ia karaia totona. Ena siahu ena bada be edena bamona? Ena siahu ena bada be aposetolo Ioane ena negai hegeregerena. Ioane ia gwau: “Satani ese tanobada taudia ibounai ia gunalaia noho.” (1 Ioane 5:19; mani 2 Korinto 4:⁠4 itaia.) Bema oi daradara Satani ese taunimanima edia lalona ia veria bona edia lalohadai ia hamiroa diba eiava lasi, namona be oi laloatao ia ese Dirava dekenai edia mauri idia gwauhamatalaia besena ibounai, Israela besena unai, ia hakaua kerere. (1 Korinto 10:​6-​12) Unai be oi dekenai ia vara diba danu, a? Ia vara diba bema Satani ena lalona veria siahuna oi koua lasi.

Idia Vara Gaudia Oi Lalo-Pararalaia

Ita gwau diba, unai bamona siahu ese oiemu lalona idia veria diba bema idia oi koua lasi. Ena buka ladana The Hidden Persuaders lalonai, Vance Packard ia gwau: “Ita ese unai bamona [hunia] siahuna ita dadaraia diba: iseda lalona ita hadaia diba ita do idia veria lasi totona. Kahirakahira nega ibounai, iseda dala ita abia hidi diba, bona iseda lalona idia veria kava diba lasi bema idia vara gaudia ita lalo-pararalaia.” Unai be momokani lalona ania herevadia bona koikoi herevadia dekenai danu.

Momokani, “idia vara gaudia oi lalo-pararalaia” totona, namona be oi laloa namonamo bona dala maorona ai emu lalona ia veria siahuna oi abia dae. Lalona namona be tauanina namona bamona, ia gaukara namonamo totona, aniani maorona ia abia be namo. (Aonega Herevadia 5:​1, 2) Diba ita abia lasi karana ena dika be diba kererena ita abia ena dika hegeregerena. Unai dainai, ena be kerere dekenai oi idia hakaua diba lalohadai bona aonega herevadia oi dadaraia be maoro, to oi naria namonamo, namo lasi sisiba bona diba ibounai oi dadaraia kava.​—1 Ioane 4:⁠1.

Dala maorona ai lalona veria karana be idau bona hunia dalana ai lalona ania karana be idau. Momokani, aposetolo Paulo ese tau matamatana, Timoteo, ia sisiba henia, do ia naria namonamo, badina “kara dika taudia bona koikoi taudia ese edia kara dika bona edia koikoi do idia habadaia. Idia ese tau haida do idia koia, bona ma tau haida ese idia danu do idia koia.” To Paulo be ma ia gwau: “To, oi ese oi dibaia bona emu lalona idia veria bona oi abia dae vadaeni gaudia oi badinaia noho, badina oi idia hadibaia taudia oi diba.” (2 Timoteo 3:13; 3:14, NW) Oiemu lalona ai idia vareai gaudia ibounai ese oiemu lalona idia veria dainai, gau badana be “oi idia hadibaia taudia oi diba,” namona be oi diba momokani idia ese oiemu namo idia tahua, bona sibona edia namo idia tahua lasi.

Abia hidi be oiemu. Oi abia hidi diba, inai tanobada ena lalohadai bona ia laloa bada gaudia ese emu lalona idia veria bona unai amo ‘inai tanobada taudia edia kara bamona do oi karaia.’ (Roma 12:⁠2) To inai tanobada ese oiemu namo ia tahua lasi. Unai dainai aposetolo Paulo ese ita ia sisiba henia, ia gwau: “Naria namonamo: sedira ta ia noho, ia ese taunimanima edia sene herevadia hegeregerena lalohadai bona anina lasi koikoi herevadia amo iena vamu bamona umui do ia abia lao, tanobada ena diba matamaia gaudia hegeregerena.” (Kolose 2:8, NW) Unai dala ai Satani ese oiemu lalohadai ia biagua, eiava ‘iena vamu bamona oi do ia abia lao,’ be auka lasi. Ia be kuku ena kwalahu bamona. Hodahoda mirona oi hahodi sibona dainai, dika oi davaria diba.

To dala ma ta be, unai “hodahoda” oi hahodi lasi. (Efeso 2:⁠2, NW) To Paulo ena sisiba oi badinaia, ia gwau: “Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:2) Unai be mai ena hekwarahi. (Aonega Herevadia 2:​1-5) Namona be oi laloatao, Iehova ese taunimanima edia lalona ia biagua lasi. Ia ese mai anina bada diba ibounai ita dekenai ia hadibaia, to namo oi davaria totona, oi kamonai henia bona ia ese oiemu lalona ia veria be namo. (Isaia 30:20, 21; 1 Tesalonika 2:​13) Namona be mai emu ura ida “revareva helagadia,” Dirava ena lauma amo ia vara Herevana, Baibel, lalonai ia noho hereva momokani amo emu lalona oi hahonua.​—2 Timoteo 3:15-17.

Iehova Ena Lalohadai Oi Abia Dae

Iehova ena hadibaia karana amo namo oi davaria totona mai emu ura ida ia oi kamonai henia be gau badana. Unai ia hedinarai namonamo, Iehova ese Ieremia ia noia uro karaia tauna ena gaukara gabuna ia vadivadi henia neganai. Ieremia ia itaia uro karaia tauna ese ena lalohadai ia haidaua, badina ia karaia urona be “uro karaia tauna ena imana dekenai ia dika” ia lao. Bena Iehova ia gwau: “Israela besena e, inai uro karaia tauna ia karaia hegeregerena, be lau ese do lau karaia diba lasi, a? Umui be lauegu imana dekenai umui noho, raro be uro karaia tauna ena imana dekenai ia noho hegeregerena.” (Ieremia 18:⁠1-6) Unai ena anina be Israela besena be Iehova ena imana dekenai ia noho mauri lasi raro bamona, bena ia ese ena ura hegeregerena uro idauidau ai idia ia karaia, a?

Iehova ese ena siahu bada amo taunimanima ia doridia lasi idia ura lasi karadia do idia karaia totona; danu taunimanima edia dika be iena maduna lasi, ena be uro karaia tauna be mai ena maduna bema uro ta ia dika. (Deuteronomi 32:⁠4) Iehova ese ia hadibaia toho taudia be dika idia davaria bema ena hakaua dalana idia dadaraia. Unai dala ai oi bona ia mauri lasi raro umui idau momokani. Oi be mai emu ura kwalimu. Unai ura kwalimu oi gaukaralaia neganai, Iehova ena hahediba oi abia dae eiava mai emu ura ida oi dadaraia.

Unai be kudouna hamarerea herevadia! Iehova ena hereva ita kamonai henia be namo, to madi bema mai hekokoroku ida ita gwau, “Tau ta ese lau do ia hamaoroa lasi dahaka do lau karaia”! Iehova ese ita ia hakaua be mai anina ita ta ta dekenai. (Ioane 17:⁠3) Namona be oi be salamo torea tauna Davida bamona, ia guriguri: “Lohiabada e, oiemu kara lau dekenai do oi hadibaia. Oiemu dala lau dekenai do oi hedinaraia.” (Salamo 25:4) King Solomona ena hereva oi laloatao, ia gwau: “Aonega tauna do ia kamonai bena ena diba do ia habadaia.” (Aonega Herevadia 1:5, NW) Do oi kamonai, a? Bema oibe, vadaeni “oiemu laloa kehoa bona oiemu diba maoro ese, oiemu mauri do idia naria namonamo.”​—Aonega Herevadia 2:11.