Emu Ruma Bese Dekenai Emu Nega Oi Henia, A?

“JAPAN Taudia ese Edia Tamadia be Idia Lalokau Henidia​—Ena be Edia Gaukara ai Idia Bisi Bona Edia Natudia ida Idia Gadara Lasi.” Lagani haida gunanai unai hereva kwarana be Mainichi Shimbun dekenai ia hedinarai. Unai hereva dekenai ia hedinarai gavamani ena tahua gaukara lalonai idia vareai Japan taudia edia natudia 87.8 pesen be idia gwau idia ura vaira negana ai edia tamadia do idia naria. To, English gado ai unai niuspepa idia halasia neganai, unai hereva be hereva kwarana idauna henunai ia hedinarai. Ia gwau: “Tamadia Bona Natudia Memero: Laloa Bada Lasi Karana.” Unai be Japan gado ai idia torea gauna amo ia idau, ena hereva ese unai tahua gaukarana ena kahana ma ta ia hahedinaraia: Gaukara dinadia ta ta ai, Japan tamadia be miniti 36 sibona lalonai edia natudia idia bamoa. To, West Germany lalonai tamadia be gaukara ena dina ta ai miniti 44, bona United States dekenai tamadia be miniti 56 lalonai edia natudia idia bamoa.

Tamana sibodia lasi ese edia nega sisina sibona idia henia edia natudia dekenai. Sinana momo be moni gaukara idia karaia. Hegeregere, adavana lasi sinadia momo be edia ruma bese naria totona moni gaukara idia karaia. Unai dainai, tama sina ese edia natudia idia bamoa negana be ia kwadogi ia lao vadaeni.

Lagani 1997 ai America memero kekeni 12,000 mai kahana edia mauri idia tahua neganai idia davaria, edia tama sina ida hetura karana namona idia abia memero kekeni be nega momo idia lalo-hekwarahi lasi, sibona hamasea lalohadai idia abia lasi, dagedage karadia o drag ania kava karadia dekenai idia vareai lasi. Bona edia stadi karana badana lalonai tahua gaukara ia karaia tauna ta ia gwau: “Oi be emu natudia ida hetura karana namona oi abia lasi bema idia dekenai emu nega oi henia lasi.” Emu natudia dekenai emu nega oi henia bona idia ida oi herevahereva hebou be mai anina bada.

Idia Herevahereva Hebou Lasi

Tama o sina be gabu daudau ai moni gaukarana ta totona ia lao ruma besedia lalonai, herevahereva hebou karana ia dika diba. Momokani, herevahereva hebou namonamo lasi karana be tama ta o sina ta be idau gabu ai ia noho ruma besedia sibona dekenai ia vara lasi. Tama sina haida, ena be edia ruma ai idia noho, to edia natudia idia do noga lasi neganai gaukara dekenai idia lao bona natudia idia mahuta murinai ruma dekenai idia giroa lou. Unai negadia ai idia herevahereva hebou lasi dainai, tama sina haida be Saturday, Sunday, bona holide negadia ai edia ruma bese dekenai edia nega idia henia. Idia gwau edia natudia dekenai nega “namo herea” idia henia.

To, nega namo herea be edia natudia dekenai idia henia ese edia nega sisina sibona idia henia ena dika ia hamaragia, a? Tahua gaukara ia karaia tauna Laurence Steinberg ia haere, ia gwau: “Edia tama sina ese idia dekenai edia nega bada idia henia natudia edia kara ese edia tama sina ese idia dekenai edia nega sisina sibona idia henia natudia edia kara ia hereaia. Toana be tama sina ese edia nega sisina sibona edia natudia dekenai idia henia ena dika be ma kara ta amo idia hamaragia diba lasi. Nega namo herea ena anina idia habadaia kava.” Unai be Burma hahine ta ena lalohadai hegeregerena. Iena adavana​—Japan tauna ta​—be daba iboudiai 1 o 2 okaloka ai gaukara amo ruma dekenai ia giroa lou. Ena be Saturday bona Sunday ai ena ruma bese dekenai ena nega ia henia, iena adavana be ia gwau: “Saturday bona Sunday ai ruma dekenai ia noho ese pura ena dina ma haida ai ia noho lasi ena dika ia hamaragia diba lasi. . . . Oi be Monday ia lao Friday ai do oi aniani lasi, bena pura ena aniani ibounai be Saturday bona Sunday ai do oi ania diba, a?”

Oi Hekwarahi Bada be Namo

Ruma bese lalonai herevahereva namonamo karana ia namo noho be namo ita gwauraia be haraga, to ita karaia be auka. Ruma bese taudia naria bona durua totona idia gaukara tama o sina be idia davaria edia ruma bese dekenai edia nega idia henia be auka. Edia noho dalana dainai moni gaukara be gabu daudau ai idia karaia taudia momo be telefon o revareva amo hanaihanai edia ruma bese ida idia herevahereva. To, herevana ruma bese ida idia noho o lasi, idia hekwarahi be namo, edia ruma bese ida idia herevahereva namonamo noho totona.

Edia natudia ida herevahereva karana idia laloa bada lasi tama sina be davana do idia abia. Ena ruma bese dekenai ena nega ia henia lasi bona idia ida ia aniani hebou lasi tamana ta be ena ruma bese lalonai dika badadia ia davaria. Iena natuna merona ia dagedage, bona ena natuna kekenina be sitoa ai ia henaohenao neganai idia abia. Sunday daba ta ai unai tamana be ia hegaegae golf gadara gabuna ia lao totona neganai, ena mero ia kara mai badu ida. Ia boiboi badabada ia gwau: “Inai ruma ai sinana sibona ia noho, a? Sinagu ese ruma bese ena gau ibounai ia abia hidi. Tamagu, nega ta oi be . . .”

Unai hereva dainai tamana ia laloa matamaia. Dokonai ena lalona ia hadaia, do ia karaia gauna ginigunana be, daba aniani be ena ruma bese danu do ia ania hebou be namo. Matamanai, ia bona ena adavana sibona idia aniani hebou. Metairametaira, natudia idia helai vareai daba aniani totona, bona daba aniani negana be herevahereva hebou negana ai ia lao. Unai dainai ruma bese be adorahi ena aniani danu idia ania hebou. Unai dala ai unai tamana ese ena ruma bese ia durua, ia dika momokani lasi totona.

Dirava Ena Hereva amo Ia Mai Heduruna

Baibel ese tama sina ia hagoadaia nega do idia atoa edia natudia ida do idia herevahereva hebou totona. Peroveta tauna Mose amo Israela taudia ia hadibaia, ia gwau: “Israela taudia e, umui kamonai! Lohiabada be iseda Dirava, Lohiabada sibona mo. Lohiabada oiemu Dirava do oi lalokau henia, mai oiemu kudouna ibounai, mai oiemu lauma ibounai, bona mai oiemu goada ibounai danu. Inai Taravatu, hari dina umui dekenai lau henia gaudia do umui laloaboio lasi. Umui emui natudia dekenai inai Taravatu do umui hadibaia goada, ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai, inai Taravatudia do umui herevalaia.” (Deuteronomi 6:​4-7) Oibe, namona be ita tama sina ese iseda ruma bese dekenai eda nega ita henia, Dirava ena hereva be natudia edia lalona bona kudouna ai ita hadibaia goada totona.

Ai gwauraia guna gauna, 1997 ai America memero kekeni 12,000 mai kahana idia tahua gaukarana ese ia hahedinaraia “idia gwau idia be mai edia tomadiho taudia kahirakahira 88 pesen . . . be idia hahedinaraia idia laloa tomadiho bona guriguri karana ese idia ia naria.” Keristani taudia momokanidia idia lalo-parara ruma ai tomadiho be dala maorona ai idia hadibaia karana ese drag bona muramura inua o ania kava karana, lalo-metau, sibona hamasea karana, dagedage, bona unai bamona gaudia ma haida amo memero kekeni ia naria.

Tama sina haida idia laloa edia ruma bese totona nega idia atoa be ia auka. Unai be momokani adavana lasi sinadia dekenai, idia ura edia natudia dekenai edia nega idia henia, to moni gaukara idia karaia be gau badana. Edena dala ai nega idia abia edia ruma bese idia bamoa totona? Baibel ia gwau: “Aonega namona, bona laloa kehoa do oi dogoatao noho.” (Aonega Herevadia 3:21) Tama sina ese “laloa kehoa” karana idia gaukaralaia dalana ai edia ruma bese totona nega idia abia. Edena dala ai?

Bema oi be moni gaukara ia karaia sinana ta bona dina ena gaukara murinai oi hesiku bada, reana emu natudia oi noia oi ida aniani do umui hegaegaelaia hebou, ani? Unai bamona nega umui gaukaralaia hebou karana ese dala ia kehoa umui ta ta umui tura heheni namonamo totona. Matamanai, natudia be oi ida idia gaukara lalonai nega bada do oi haorea. To, nega sisina murinai do oi davaria ia be moale gauna bona nega umui haorea kava lasi.

Reana oi be tamana ta bona Saturday bona Sunday dekenai oi ura oi karaia gaudia be momo. Namona be emu natudia ida unai gaukara haida umui karaia hebou, ani? Umui gaukara hebou lalonai idia ida oi herevahereva diba bona unai nega ai mai anina bada gaudia be idia oi hadibaia diba. Baibel ena hereva, Dirava ena hereva idauidau be emu natudia oi hadibaia goada herevana, ese oi ia hagoadaia idia do oi hereva henidia ‘ruma ai umui noho, bona dala ai umui raka negadiai’​—momokani, dala ia kehoa negadia ibounai. Emu natudia ida oi gaukara hebou lalonai umui herevahereva hebou be “aonega namona” hahedinaraia karana.

Emu ruma bese dekenai emu nega oi henia neganai, idia noho daudau hahenamo do umui abia. Baibel ena aonega herevana ta ia gwau: “Aonega tauna ese sisiba ia tahua noho.” (Aonega Herevadia 13:10) Bema nega oi atoa emu ruma bese ida oi herevahereva hebou totona, oi be dina ta ta ai edia hekwarahi lalodiai aonega sisiba do oi henidia diba. Hari, unai bamona hakaua karana dainai vaira negana ai nega bada do oi haorea kava lasi bona lalohisihisi oi koua. Ma danu, unai kara ese idia edia bona oiemu moale do ia havaraia. Unai bamona idia oi hadibaia totona, namona be Dirava ena Hereva, Baibel, lalonai ia noho aonega bada hereana amo heduru oi abia. Oi gaukaralaia emu natudia oi hadibaia bona emu ruma bese ena raka dalana oi gimaia totona.​—Salamo 119:105.

[Picture on page 4]

Edia tama sina ida hetura karana namona idia abia memero kekeni be nega momo idia lalo-hekwarahi lasi

[Picture on page 5]

Herevahereva hebou namonamo karana ese ruma bese lalonai idia noho daudau hahenamo momo ia mailaia

[Picture on page 6]

Emu natuna ida oi gaukara hebou lalonai, umui herevahereva diba bona ia dekenai mai anina bada gaudia oi hadibaia diba