Paulo Danu Idia Gaukara Hebou Taudia Idia be Daidia?

BAIBEL ena buka Kara lalonai bona Paulo ese ia torea revarevadia ese Keristani ginigunadia edia kongregesen taudia idauidau 100 bamona idia herevalaia, idia be ‘Iuda lasi taudia totona aposetolo gaukara ia karaia’ tauna, idia bamoa taudia. (Roma 11:13) Idia momo edia kara ita diba namonamo. Reana Apolo, Banaba, bona Sila edia gaukara idauidau oi diba. To, reana Arekipo, Klaudia, Damari, Lino, Peresi, Pude, bona Sopatera edia sivarai oi diba namonamo lasi.

Nega idauidau ai bona dala idauidau ai, taunimanima momo ese Paulo ena hesiai gaukara idia durua bada. Idia haida, hegeregere Arisitako, Luka, bona Timoteo be lagani momo lalodiai Paulo danu idia gaukara hebou. Ia be dibura dekenai ia noho eiava ia loaloa negadiai, haida be ia danu idia noho, reana idia be ia danu idia loaloa hebou taudia o ia idia abia dae taudia. To madi, idia haida, hegeregere Alesana, Dema, Heremogene, bona Fugelo ese Keristani abidadama idia negea.

To Paulo ena turana ma haida, hegeregere Asunukrito, Hereme, Iulia, eiava Pilologo edia sivarai ita diba lasi, to edia ladadia sibona ita diba. Bona idia haida edia ladadia danu ita diba lasi, hegeregere Nerea ena taihuna o Rupo ena sinana o Kiloe ena ruma taudia. (Roma 16:​13-​15; 1 Korinto 1:​11) To, unai taudia 100 mai kahana edia sivarai sisina ita diba ese ita ia durua, Paulo ena gaukara dalana ita diba totona. Unai ese danu ita ia hadibaia abidadama tamona taudia ida ita noho bona gaukara hebou be mai ena namo.

Ia ida Idia Loaloa Taudia Bona Ia Idia Abia Dae Taudia

Aposetolo Paulo ena hesiai gaukara lalonai ia loaloa momo. Toretore tauna ta ese Kara bukana sibona lalonai ia hedinarai Paulo ena laolao tano ai bona davara ai edia daudau ia duahia neganai, idia be kahirakahira kilomita 16,000 bamona. Unai nega ai loaloa be mai ena hekwarahi sibona lasi, to ta ese dika ia davaria diba danu. Ia davaria dika haida be inai, lagatoi ia mutu, sinavai ia dika bona henaohenao taudia dainai kahirakahira ia mase, tano gagaena dekenai dika ia davaria, bona davara ia dika dainai kahirakahira ia mase danu. (2 Korinto 11:​25, 26) Unai dainai, Paulo be gabu ta amo ma gabu ta dekenai ia lao neganai ma haida ida ia loaloa.

Paulo ida idia loaloa taudia ese ena hesiai gaukara lalonai ia idia bamoa, hagoadaia, bona durua. Nega ta, Paulo ese ia rakatanidia, lauma dalanai abidadama matamata taudia idia durua totona. (Kara 17:14; Tito 1:5) To ia ida idia loaloa taudia idia noho ena namo be dika koua totona bona hekwakwanai idia vara neganai ia idia durua totona. Unai dainai Sopatera, Sekundo, Gaio, bona Tropimo bamona taudia, ita diba idia be Paulo idia bamoa taudia haida, ese Paulo ena hesiai gaukara lalonai gaukara badana idia karaia.​—⁠Kara 20:4.

Ia idia abia dae taudia edia heduru danu be namo herea. Paulo be hanua ta dekenai haroro eiava mahuta sibona totona ia ginidae neganai, gau ginigunana be noho gabuna ta ia tahua. Loaloa momo tauna, Paulo bamona, be bedi idauidau momo ai ia mahuta. Ia be loaloa taudia edia ruma dekenai ia noho diba, to unai gabudia be histori torea taudia ese idia gwauraia “mai garidia gabudia bona idia namo lasi,” unai dainai, bema mai dalana, Paulo be tadikaka edia ruma dekenai ia noho.

Paulo idia abia dae taudia haida edia ladadia ita diba​—⁠ Akwila bona Prisikila, Gaio, Iasoni, Lidia, Nasona, Filemona, bona Filipo. (Kara 16:14, 15; 17:7; 18:2, 3; 21:8, 16; Roma 16:23; Filemona 1, 22) Filipi, Tesalonika, bona Korinto ai, unai bamona noho gabuna idia henia dainai, Paulo ese ena misinari gaukara ia karaia namonamo diba. Korinto ai, Titio Iusto danu ese ena ruma dekenai Paulo ia abia dae, Paulo ese ena haroro gaukara be unuseni amo ia karaia totona.​—⁠Kara 18:7.

Turana Momo

Ita laloa diba hegeregerena, Paulo ia diba taudia be dala idauidau ai ia laloatao, badina nega idauidau ai ia hedavari henidia. Hegeregere, Maria, Peresi, Fibi, Trupena, bona Truposa be abidadama hahinedia bona ia ese edia kara bona gaukara goada dainai ia hanamodia. (Roma 16:1, 2, 6, 12) Paulo ese Kirisipo, Gaio, bona Stepana ena ruma taudia ia bapatisoa. Atena dekenai Dionusio bona Damari ese hereva momokani ena sivarai be Paulo amo idia abia dae. (Kara 17:34; 1 Korinto 1:14, 16) Anedroniko bona Iunia be nega daudau lalonai mai abidadama ida idia raka bona “edia sivarai be ia bada aposetolo taudia edia huanai.” Paulo be gabeai abidadama tauna ai ia lao to idia ruaosi ia gwauraia, “lau danu nega tamona dibura ruma dekenai ai noho.” Reana ia danu nega ta idia hadiburadia. Unai taudia rua, Herodiona, Iasoni, Lukio, bona Sosipatro hegeregerena, Paulo ese ia gwauraidia “lauegu varavara.” (Roma 16:​7, 11, 21) Unuseniai idia gaukaralaia Greek herevana ena anina nega haida be “tano tamona taudia,” to ena anina badana be “varavara korikori uru tamona ai.”

Paulo ena turadia momo be hereva momokani dainai idia loaloa. Ena turadia, ita diba namonamo taudia, sibona lasi to, Akaiko, Forotunato, bona Stepana idia noho danu, idia be Korinto amo idia lao Efeso dekenai, Paulo danu edia kongregesen ena noho lauma dalanai idia kikilaia totona. Aretama bona Tukiko be Tito hedavari henia totona Kerete motumotu dekenai idia lao, Tito be unuseniai hesiai gaukara ia karaia, bona Sena be Apolo danu do idia lao hebou.​—⁠1 Korinto 16:17; Tito 3:12, 13.

Paulo ese idia haida edia sivarai kwadogina bona idauna ia gwauraia. Hegeregere ita ia hadibaia, Epaineto be “tau ginigunana Keriso ia abidadama henia Asia kahana dekenai,” Erasito be “hanua badana ena moni ia naria tauna” Korinto dekenai, Luka be doketa tauna, Lidia be dabua kakakaka hoihoilaia hahinena, bona Teretio be Paulo ese ia gaukaralaia Roma taudia edia revareva ia torea totona. (Roma 16:5, 22, 23; Kara 16:14; Kolose 4:14) Unai sivarai kwadogidia ese unai taudia edia sivarai ia ura diba namonamo tauna ena ura idia habadaia momokani.

Paulo ese ma haida dekenai hereva kwadogidia ia siaia bona unai be hari Baibel lalonai idia noho. Hegeregere, Kolose dekenai revareva ia torea neganai, ia ese Arekipo ia hagoadaia: “Lohiabada ese ia dekenai ia henia gaukarana be do ia karaia haorea momokani.” (Kolose 4:17) Toana be Euodia bona Sunutuke huanai hepapahuahuna ia vara bona idia hamaoromaoroa be namo. Unai dainai, Paulo ese Filipi dekenai ia noho “durua tauna namona” ta amo ia hagoadadia ‘do idia laloa tamona be namo.’ (Filipi 4:2, 3) Momokani, unai be sisiba namona ita ibounai totona.

Dibura ai Ia Noho Neganai Idia Durua Namo Herea

Paulo be nega momo dibura ai ia noho. (2 Korinto 11:23) Unai nega lalodiai, bema unai gabu ai Keristani taudia idia noho, idia hekwarahi bada ia davaria hekwakwanai ia haheaukalaia totona. Nega ginigunana Roma dekenai Paulo idia hadiburaia neganai, gwaumaoro idia henia lagani rua lalonai ruma ta ia rentaia bona ena turadia ese ia idia vadivadi henia diba. (Kara 28:30) Unai nega lalonai, ia ese Efeso, Filipi, bona Kolose edia kongregesen dekenai revareva ia torea, bona Filemona dekenai danu. Unai revareva ese ita idia hadibaia, Paulo idia dogoatao neganai daidia be Paulo idia laloa bada.

Hegeregere, ita diba Onesimo, Filemona ena heau boio hesiai tauna, be Roma dekenai Paulo danu ia hedavari, Tukiko danu ese Roma dekenai Paulo ia hedavari henia, bona ia ese Onesimo ia bamoa ena biaguna dekenai ia giroa lou neganai. (Kolose 4:7-9) Bona Epafrodito ia noho, ia be Filipi amo laolao daudauna ia karaia ena kongregesen ena harihari gauna Paulo dekenai ia henia totona bena ia gorere. (Filipi 2:25; 4:18) Roma ai Paulo danu idia gaukara hebou taudia be Arisitako, Mareko, bona Iesu, ena ladana ta be Iusto. Paulo ese idia ia herevalaia neganai, ia gwau: “Inai tau toiosi sibona ese lau danu ai gaukara Dirava ena Basileia totona. Idia ese lau idia durua bada herea.” (Kolose 4:10, 11) Unai abidadama taudia huanai, momo idia diba namonamo taudia Timoteo bona Luka, bona Dema danu ia noho, to gabeai Dema ese tanobada ia lalokau henia bada dainai, Paulo ia rakatania.​—⁠Kolose 1:1; 4:14; 2 Timoteo 4:10; Filemona 24.

Ena be idia ta be Roma amo lasi, to idia be unuseniai Paulo ida idia noho. Reana idia haida idia lao ena badina korikori be dibura dekenai ia noho neganai ia idia ura idia durua. Unai dainai ita laloa diba idia haida be ia totona gaukara haida idia karaia, haida be gabu daudau dekenai ia siaia, bona haida be Paulo ena revareva idia torea. Unai sivarai ese ia hahedinaraia idia ese Paulo bona Dirava ena gaukara idia ura henia bada bona idia badinaia namonamo!

Paulo ena revareva haida edia dokona ese idia hahedinaraia, ia be Keristani tadikaka bona taihu hutuma edia huanai ia noho, idia haida sibona edia ladana ita diba. Nega idauidau ai, ia torea ia gwau: “Dirava ena taudia ibounai ese edia hanamoa idia siaia inai” bona “Iniseni lau danu idia noho taudia ibounai ese edia hanamoa idia siaia inai.”​—⁠2 Korinto 13:13; Tito 3:​15; Filipi 4:​22.

Roma dekenai nega iharuana Paulo idia hadiburaia be nega dikana, ia diba ena abidadama dainai do ia mase negana lalonai, Paulo ese ia danu idia gaukara hebou taudia ia do laloa bada noho. Ia ese idia haida edia gaukara ia do naria bona hakaua noho. Tito bona Tukiko be gaukara totona ia siaidia, Kresike ia lao Galatia dekenai, Erasito be Korinto ai ia noho, Tropimo be Melita dekenai idia rakatania ia gorere dainai, to Mareko bona Timoteo be ia dekenai do idia mai. To, Luka be Paulo ida ia noho, bona aposetolo tauna ese revareva iharuana Timoteo dekenai ia torea neganai, abidadama taudia ma haida, hegeregere Eubulo, Pude, Lino, bona Klaudia be unuseni idia noho bona edia hahenamo hereva idia siaia. Ita daradara lasi edia diba hegeregerena ai Paulo idia durua. Unai neganai danu, Paulo ese ena hahenamo herevadia ia siaia Prisikila bona Akwila bona Onesiporo ena ruma bese dekenai. To madi, unai nega dikana lalonai, Dema ese ia rakatania, bona Alesana ena kara haida ese ia idia hahisia bada.​—⁠2 Timoteo 4:9-​21.

‘Ita be Dirava Ena Gaukara Ita Karaia Hebou Noho’

Nega ta ta ai ena haroro gaukara lalonai Paulo be sibona ia noho. Toretore tauna E. Earle Ellis ia gwau: “Unai amo ita diba ia be mai ena turadia momo misinari tauna. Momokani, kahirakahira nega ibounai Paulo be mai ena bamoa tauna.” Dirava ena lauma helaga ese ia hakaua neganai, Paulo ese taunimanima momo ia gaukaralaidia bona misinari gaukara lalonai taunimanima durua momokani karadia ia hegaegaelaia. Ia be mai ena turana namodia, nega kwadogi lalonai ia idia durua taudia, lalo-goada taudia, bona mai edia manau hesiai taudia momo. To, idia be ia danu idia gaukara hebou taudia sibona lasi. Herevana Paulo ida idia gaukara o ia idia bamoa negana be lata o kwadogi, to idia ia hatamonaia Keristani lalokauna bona hetura karana namona be ia hedinarai goevagoeva.

Aposetolo Paulo ena kara ta be “taunimanima ia tura henia haraga tauna.” Ia ese sivarai namona be bese idauidau dekenai ia abia lao, to ia ura lasi ia sibona ese ia karaia. Ia be Keristani kongregesen danu ia gaukara hebou namonamo bona Keristani kongregesen ena gaukara daladia ia gaukaralaia. Unai gaukara amo ia vara gaudia dainai ia hekokoroku lasi, to mai manau ida ia hahedinaraia ia be hesiai tauna bona hanamoa ibounai be Dirava dekenai idia lao be namo, badina ia dainai kongregesen ia bada ia lao.​—⁠1 Korinto 3:5-7; 9:16; Filipi 1:1.

Paulo ena nega be iseda nega amo ia idau, to, namona be hari inai negai, Keristani kongregesen lalonai ia noho tauna ta ia laloa lasi ia sibona ia gaukara diba eiava ia gaukara be namo. To, Dirava ena orea, iseda kongregesen, bona abidadama tamona taudia danu ita gaukara hebou be namo. Nega namodia bona nega dikadia ai idia amo heduru, goada, bona hahegoada ita abia be namo. Ita be hahenamo namona ita abia, badina ita be ‘tanobada ena kahana ibounai dekenai idia noho Keristani’ oreana lalonai ita noho. (1 Petero 5:9) Bema mai eda abidadama bona lalokau danu tadikaka ida ita gaukara hebou, Paulo bamona, ita danu do ita gwau diba ‘ita be Dirava ena gaukara ita karaia hebou noho.’​—⁠1 Korinto 3:9.

[Pictures on page 31]

APOLO

ARISITAKO

BANABA

LIDIA

ONESIPORO

TERETIO

TUKIKO