Helaro ese Ita Ia Hagoadaia, Lalokau ese Ita Ia Hasiahua

“To vadaeni, abidadama, helaro, bona lalokau idia do noho, idia toi; idia amo hereadaena be lalokau.”​—1 KORINTO 13:13, NW.

APOSETOLO Paulo ese ita ia sisiba henia, bouti bamona, iseda abidadama ia dika diba. Ia gwau namona be “abidadama bona laloa maoromaoro do [ita] dogoatao auka. Haida be laloa maoromaoro dekena amo idia raka siri vadaeni. Unai dainai edia abidadama ia dika, vanagi be davara nadi dekenai ia kamokau, bona ia dika bamona.” (1 Timoteo 1:19) Aposetolo taudia edia negai, davara dekenai idia heau bouti be au amo idia karaia. Unai bouti be davara dekenai do idia goada, bema au namodia amo bona mai aonega ida idia karaia namonamo.

2. Dahaka dainai iseda abidadama ita haginia namonamo be namo, bona dahaka ita karaia be namo?

² Davara ena hurehure badadia huanai ia hure noho bouti bamona, iseda abidadama be dagedage tanobadana huanai ia goada noho be namo. (Isaia 57:20; Apokalupo 17:15) Unai dainai iseda abidadama ita haginia namonamo be gau badana, bona unai be ita sibona ese do ita karaia. Iuda bona Roma taudia edia “davara” dekenai idia noho Keristani taudia ginigunadia idia davaria hurehure be idia bada idia lao neganai, Iuda ia gwau: “Lauegu lalokau taudia e, emui abidadama helagana ena latanai emui mauri do umui haginia goada. Lauma Helaga ena siahu dekena amo do umui guriguri noho. Dirava ena lalokau lalonai do umui noho. Nega ibounai iseda Lohiabada Iesu Keriso do umui naria noho, mai abidadama danu. Badina be umui diba, ia ese iena bogahisihisi dainai, mauri hanaihanai umui dekenai do ia henia.” (Iuda 20, 21) Iuda ese ‘helaga taudia dekenai ia henia abidadama’ ia herevalaia dainai, reana unai hereva “abidadama helagana” ena anina be Keristani hahediba herevadia ibounai, hahemauri ena sivarai namona danu. (Iuda 3, NW ) Keriso be unai abidadama ena badina. Keristani abidadama momokanina ita dogoatao noho totona iseda abidadama ia goada be gau badana.

Lai Badana Bamona “Tomadiho Orea Idaudia Gari Henia” Karana Lalonai Ita Haheauka

3. Haida ese “tomadiho orea idaudia gari henia” karana be edena bamona idia gaukaralaia?

³ Vanegai idia hanaia lagani lalodiai, tomadiho orea hehunidia taudia be sibona idia hamasea, ma haida idia hamasea, bona dagedage karadia idia karaia. Unai dainai, ita hoa lasi, taunimanima momo, lalo-momokani politikol taudia danu, idia ura unai bamona dika idia havaraia tomadiho orea idaudia amo kerere lasi taudia idia gimaia, bona idia ura bada unai dika amo natudia idia gimaia. Ita daradara lasi “inai tanobada ena dirava” ese unai kara dika badadia ia havaraia noho, bona unai amo haida idia gwauraia tomadiho orea idaudia gari henia karana ia havaraia, bena ia gaukaralaia Iehova ena taunimanima hadikaia totona. (2 Korinto 4:⁠4; Apokalupo 12:12) Haida ese ia vara gauna idia gaukaralaia iseda gaukara dagedage henia totona. Tano haida ai, taunimanima ese kara haida idia karaia, “dika idia havaraia tomadiho orea idaudia” amo taunimanima idia gimaia totona, to mai kerere ida idia gwau Iehova ena Witness taudia be unai bamona orea ta bona hehuni dalana ai ita idia gwauraia dika. Unai dainai Europe ena tano haida ai ruma-ta-ruma-ta haroro gaukarana ia auka bona guna Baibel idia stadilaia taudia haida be edia stadi idia hadokoa. Bona unai dainai, iseda tadikaka haida idia lalo-manoka.

4. Dahaka dainai dagedage karana ese ita ia hamanokaia lasi be namo?

⁴ To namo lasi unai kara ese ita ia hamanokaia, namona be unai dagedage dainai ita abia dae momokani ita be Keristani dala momokanina ita badinaia. (Mataio 5:​11, 12) Keristani taudia ginigunadia idia samania idia be heai ia havaraia orea taudia, bona gabu ibounai dekenai edia orea idia gwauraia “dika.” (Kara 24:5; 28:22) To aposetolo Petero ese abidadama tamona taudia ia hagoadaia, ia gwau: “Lauegu lalokau taudia e, inai hisihisi bada, umui ia hisihisi henia noho gauna, be umui tohoa totona ia vara noho. Unai dainai do umui hoa lasi, do umui laloa lasi idau gauna ta be umui dekenai ia ginidae vadaeni. Lasi, to Keriso danu umui hisihisi hebou dainai do umui moale. Badina be gabeai, Keriso ena hairai ia hedinaraia neganai, do umui moale bada herea.” (1 Petero 4:​12, 13) Unai hegeregerena, aposetolo taudia edia negai ia noho hakaua orea tauna ta ia gwau: “Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona. Badina be umui diba, dibagani o hisihisi ese emui abidadama idia tohoa neganai, goada bona haheauka idia havaraia noho. Vadaeni nega ibounai metau bona hisihisi lalonai do umui haheauka noho, ela bona inai haheauka emui lalona dekenai ia goada momokani. Unai neganai emui kara be namo, bona Dirava ena dala hegeregerena do umui raka, kerere ta lasi.” (Iamesi 1:​2-4) Lai badadia ese bouti ena goada idia tohoa hegeregerena, dagedage ena lai badadia ese iseda bouti bamona abidadama dekenai idia noho manoka gaudia do idia hahedinaraia.

Dagedage ese Haheauka Ia Havaraia

5. Edena dala ai ita diba momokani dagedage lalonai iseda abidadama be ia goada noho?

⁵ Keristani taudia ese dagedage ena lai badadia lalonai idia haheauka sibona murinai, edia haheauka bona abidadama edia goada idia diba momokani. Bema iseda “kara be namo, bona Dirava ena dala hegeregerena,” bona bema iseda abidadama danu ia goada, iseda ‘haheauka iseda lalona dekenai ia goada momokani.’ Paulo ia gwau: “Aiemai kara ibounai dekena amo ai hedinaraia ai be Dirava ena hesiai taudia. Inai bamona kara ai karaia: Metau ibounai neganai ai haheauka, hisihisi neganai ai gini goada, hekwarahi bada neganai ai gaukara noho.”​—⁠2 Korinto 6:⁠4.

⁶ Namona be ita laloa nega haida ita davaria dagedage ena lai badadia be dala namodia, iseda abidadama ena namo bona goada ita hahedinaraia totona. Paulo ese Roma Keristani taudia ia tore henia, ia gwau: “Nega dikadia ita abia neganai danu ita be moale, badina ita diba hisihisi bona nega dika ese iseda haheauka idia hagoadaia diba. Bema ita haheauka noho neganai, ita ese dibagani ita negea diba. Bona bema dibagani ita negea, ita ese Dirava ita abidadama henia diba, bona Dirava ena gwauhamata gaudia dekenai ita naria noho diba. Inai bamona Dirava ia naria noho neganai, ita naria kava lasi.” (Roma 5:​3-5) Dagedage lalodiai ita gini goada dainai Iehova ese ita ia lalo-namo henia. Bena unai ese iseda helaro ia hagoadaia.

Haida be Dika Idia Davaria Ena Badina

7. (a) Paulo ena hereva ese idia hahedinaraia hegeregerena, edena dala ai haida ese lauma dalanai dika idia davaria? (b) Hari inai negai haida ese edena dala ai hereva momokani idia rakatania?

⁷ Paulo ese ‘vanagi be dika ia davaria’ ia herevalaia neganai, ia ese edia lalona ena mamina goevana bona edia abidadama amo idia “raka siri” taudia ia laloa. (1 Timoteo 1:​19) Unai bamona taudia rua be Humenaio bona Alesana, idia ese hereva momokani idia negea, oibe, hereva momokani idia rakatania bona idia gwauraia dika. (1 Timoteo 1:​20; 2 Timoteo 2:​17, 18) Hari inai negai, hereva momokani idia negea o rakatania taudia be edia hereva amo “hesiai tauna mai ena kamonai, bona mai ena kara maoromaoro” oreana idia dadabaia, guna lauma dalanai idia ia ubua imana idia koria bamona. Idia haida be “hesiai tauna dikana” bamona, idia gwau, “Lauegu biaguna be do ia giroa mai haraga lasi.” (Mataio 24:​44-​49; 2 Timoteo 4:​14, 15) Idia gwau inai tanobada dikana ena oromana ena dokona be ia kahirakahira lasi bona lauma dalanai ia noga noho hesiai tauna oreana idia gwauraia dika, badina ia ese Iehova ena taunimanima huanai karaharaga lalohadaina ia hagoadaia noho. (Isaia 1:⁠3) Unai bamona hereva momokani idia negea taudia ese ‘haida edia abidadama idia hamanokaia’ diba, bona unai dainai lauma dalanai dika idia davaria.​—⁠2 Timoteo 2:⁠18.

⁸ Gwauhamata Keristani taudia ma haida edia abidadama ia dika bouti ia dika bamona, badina edia lalona ena mamina idia dadaraia bona inai tanobada ena moale karadia bona matabodaga karadia idia karaia badabada. (2 Petero 2:​20-​22) Bona ma haida be edia abidadama idia hadikaia, badina idia laloa tanobada matamatana be kahirakahira do ia mai lasi. Peroveta herevadia haida edia guguru negana idia duahia diba lasi, bona idia laloa ‘Iehova ena dina’ be daudau dainai, tomadiho momokanina idia rakatania. (2 Petero 3:​10-​13; 1 Petero 1:⁠9) Daudau lasi murinai, idia davaria idia be inai tanobada ena davara mirona mai ena hurehure badadia lalonai idia vareai lou. (Isaia 17:​12, 13; 57:20) Keristani kongregesen idia rakatania taudia haida idia do abia dae noho kongregesen be tomadiho dala momokanina ia badinaia. To, Iehova Dirava ia gwauhamatalaia tanobada matamatana idia naria totona idia haheauka diba lasi. Toana be idia laloa Paradaiso maurina be ia mai haraga lasi, idia ura bamona.

9. Gwauhamata Keristani taudia haida be dahaka idia karaia noho, bona unai gaudia idia vara dainai, dahaka ita laloa be namo?

⁹ Toana be tanobada ena kahana haida ai, gwauhamata Keristani taudia haida ese edia bouti bamona abidadama ena palai idia hamaragia. Bouti ia do hure noho, to hari idia be metairametaira idia lao, abidadama goadana ida idia heau haraga lasi. “Karaharaga ia vara Paradaisona” ena helaro ese haida ia veria dainai, unai idia abia totona mai edia ura ibounai ida idia hekwarahi​—⁠haroro gaukara idia karaia goadagoada bona hebou bona hebouhebou ibounai dekenai idia lao hanaihanai. Hari idia laloa edia helaro ena guguru negana be ia daudau, guna idia laloa bamona lasi dainai, edia lalona ibounai ida idia hekwarahi lasi. Unai ia hedinarai, badina hari idia haroro momo lasi, hebou haida sibona dekenai idia lao, bona mai edia ura ida hebouhebou edia kahana haida idia reaia. Ma haida ese nega bada idia atoa moale karadia totona bona kohu gogoa totona. Unai gaudia idia vara dainai, Iehova dekenai iseda mauri ita gwauhamatalaia dainai dahaka ese iseda mauri lalonai ita ia hasiahua ita laloa be namo. Iehova ena hesiai gaukara be mai lalo-goada ida ita karaia, badina “karaharaga ia vara Paradaisona” ena helaro ita abia dae, a?

Helaro be Dogo ta ida Ia Hahegeregerea

10, 11. Paulo ese iseda helaro be dahaka ida ia hahegeregerea, bona dahaka dainai unai be maoro?

¹⁰ Paulo ese ia hahedinaraia Iehova be gwauhamata ia karaia hahenamo idauidau be Aberahamo amo do idia mai. Bena aposetolo tauna ia gwau: “Dirava ena hereva gaudia rua idia noho, gwauhamata bona hereva helagana, bona idia senisi diba lasi. Ita diba unai hereva ruaosi idia noho, bona ita diba Dirava ia koikoi diba lasi. . . . Unai dainai, iseda abidadama do ita dogoatao noho, badina be ita diba ita naria noho davana namona, mauri hanaihanai, be do ita abia momokani. . . . [Unai helaro] be iseda mauri ena dogo gauna, ia be goada bona momokani.” (Heberu 6:​18, 19; Genese 22:​16-​18) Horoa Keristani taudia edia helaro be doko diba lasi maurina guba dekenai do idia abia. Hari inai negai, Iehova ena hesiai taudia momo herea edia helaro be paradaiso lalonai mauri hanaihanai do idia abia. (Luka 23:43) Bema ta be unai bamona helaro ia abia lasi, abidadama ia abia diba lasi.

¹¹ Dogo be namo havaraia gauna badana ta, ia ese bouti be ena gabuna dekenai ia dogoatao bena ia hure kava lasi. Bema dogo ia noho lasi, bouti taria tauna ta be tano ia rakatania lasi. Paulo be nega momo davara dekenai dika ia davaria dainai, ia diba nega momo bouti ena dogo ese bouti taudia ia hamauria diba. (Kara 27:​29, 39, 40; 2 Korinto 11:25) Aposetolo taudia edia negai, bouti be mai ena ensini lasi kapena ese ena ura hegeregerena ia taria diba totona. Bara amo idia heau tuari bouti sibona idia idau, to ma bouti idauidau be lai ia toa hegeregerena ai idia heau diba. Bema lai badana ese nadi dekenai ena bouti ia doria gwauraia, kapena ia karaia diba karana tamona be dogo ia negea bona ia naria ela bona lai badana ia ore, bona ia ura bada dogo be davara henunai ena tano do ia dogoatao auka. Unai dainai, Paulo ia gwau Keristani tauna ena helaro be ‘ena mauri ena dogo gauna, goada bona momokani.’ (Heberu 6:19) Dagedage ena lai badadia eiava hahetoho ma haida ita davaria neganai, iseda helaro namona be dogo bamona bona ia dainai ita goada diba, bena nadi ese bouti ia hadikaia diba bamona, daradara eiava hereva momokani negea karana ese iseda abidadama idia hadikaia lasi.​—⁠Heberu 2:1; Iuda 8-​13.

¹² Paulo ese Heberu Keristani taudia ia sisiba henia, ia gwau: “Tadikaka e, umui naria namonamo, umui ta be mauri Diravana amo ia raka siri dainai ia lalonai kudouna dikana mai ena abidadama lasi be metairametaira do ia vara garina.” (Heberu 3:​12, NW ) Greek toretoredia lalonai, “raka siri” ena anina ma ta be “gini siri,” hereva momokani negea karana unai. To unai bamona dika badana ita koua diba. Abidadama bona helaro ese ita idia durua dainai, ena be hahetoho ena lai badadia idia vara, to Iehova dekenai do ita tabekau diba. (Deuteronomi 4:4; 30:​19, 20) Hereva momokani idia negea taudia edia hereva ese iseda abidadama idia doria lao doria mai lasi, hurehure ese bouti idia doria lao doria mai bamona. (Efeso 4:​13, 14) Bona helaro be iseda dogo bamona dainai, ita be mauri ena lai badadia lalonai ita haheauka diba bona Iehova ena hesiai gaukara ita karaia noho.

Lalokau Bona Lauma Helaga ese Ita Idia Hasiahua

13, 14. (a) Dahaka dainai dogo bamona helarona sibona be hegeregere lasi? (b) Namona be dahaka ese ita ia hasiahua Iehova ena hesiai gaukara helagana ita karaia totona, bona dahaka dainai?

¹³ Keristani tauna be do ia hegeregere lasi tanobada matamatana dekenai ia noho, bema Iehova ia hesiai henia ena badina tamona be ia ura paradaiso tanobadana ai mauri hanaihanai ia abia. Ena be ena mauri lalonai dogo bamona helarona dainai ia goada, to namona be ena helaro bona abidadama dekenai lalokau ena siahu ia atoa kau. Paulo ese unai gauna ia habadaia, ia gwau: “Abidadama, helaro, bona lalokau idia do noho, idia toi; idia amo hereadaena be lalokau.”​—⁠1 Korinto 13:⁠13, NW.

¹⁴ Namona be Iehova ese ita ia lalokau henia bada dainai, mai iseda kudouna ibounai ida ia ita lalokau henia karana ese ita ia hasiahua, iena hesiai gaukara helagana ita karaia totona. Aposetolo Ioane ia gwau: “Mai ena lalokau lasi tauna ese Dirava ia diba lasi, badina Dirava be lalokau. Dirava ese iena lalokau ita dekenai, be inai bamona ia hedinaraia: Ia ese iena Natuna tamona tanobada dekenai ia siaia, ia dekena amo mauri do ita abia totona. Ita be mai iseda lalokau, bona ena badina korikori be inai: Dirava ese ita ia lalokau henia guna.” (1 Ioane 4:​8, 9, 19) Iehova ena kara ita laloa bada dainai, ita ura bada gauna be, sibona eda hahemauri lasi, to ena ladana helagana ia hahelagaia bona ena kara maoromaoro lohia siahuna ia hamomokania karana ita laloa bada.

15. Iseda lalokau ena anina Iehova ena lohia siahuna dekenai be dahaka?

¹⁵ Iehova ia ura ia ita hesiai henia, Paradaiso dekenai ita do noho dainai lasi, to badina ia ita lalokau henia. Baibel ena ensaiklopidia ladana Insight on the Scripturesa ia gwau: “Iehova ese hairai ia abia, badina ena lohia siahuna bona ia havaraia taudia ese unai lohia siahuna idia abia isi karana ena badina be lalokau. Iena kara namodia bona ena lohia siahuna be maoromaoro dainai ena lohia siahuna idia ura henia taudia sibona ia ura henia, idia ese lohia iboudiai amo Iena lohia siahuna sibona idia ura henia. (1Kor 2:⁠9) Idia ura ena lohia siahuna henunai hesiai gaukara idia karaia bona sibona edia mauri biagua karana idia dadaraia​—⁠unai idia karaia badina ia bona iena lalokau, hahemaoro, bona aonega idia diba bona idia diba unai kara ese idia sibona edia kara idia hereaia momokani. (Sal 84:​10, 11)”​—⁠Volium 2, rau 275.

16. Edena dala ai Iesu ita lalokau henia karana ese iseda mauri lalonai ita ia hasiahua?

¹⁶ Ita be Keristani taudia dainai, ita ese Iesu ita lalokau henia danu, badina ia ese ita ia lalokau henia dainai. Paulo ia gwau: “Keriso ena lalokau ese ai ia biagua noho, badina be hari ai diba momokani Tau tamona ese taunimanima ibounai dainai ia mase. Inai anina be ita ibounai Keriso danu ita mase hebou vadaeni. Oibe, Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna, ena mauri bona iena ura gaudia do ita laloa bona karaia.” (2 Korinto 5:​14, 15) Keriso be badina korikorina, ita ese ia latanai iseda mauri lauma dalanai, iseda abidadama, bona iseda helaro ita haginia. Iseda lalokau Keriso Iesu dekenai ese iseda helaro ia habadaia bona iseda abidadama ia hagoadaia, bona hahetoho aukadia ita davaria neganai, unai ia vara momokani.​—⁠1 Korinto 3:⁠11; Kolose 1:​23; 2:​6, 7.

17. Iehova ese edena siahu goadana ita ia henia, bona Kara 1:8 bona Efeso 3:16 ese edena dala ai ena anina bada idia hahedinaraia?

¹⁷ Ena be iseda Keristani maurina lalonai Dirava bona ena Natuna lalokau henia karana ese ita ia hasiahua bada, to Iehova ese ma gau ta ia henia, iena hesiai gaukara lalonai ita ia hasiahua, ha-uraia, bona hagoadaia totona. Unai be iena gaukara siahuna, eiava lauma helaga. Heberu bona Greek herevadia idia hahanaia “lauma” ena anina korikorina ese hodahoda ena marere bada goadana, lai bamona gauna, ia hahedinaraia. Bouti mai edia palai, Paulo ese ia guia gaudia bamona, be matana amo ita itaia diba lasi lai ena siahu dainai idia lao henia gabuna dekenai idia ginidae diba. Unai hegeregerena, lalokau bona Dirava ena gaukara siahuna, matana amo ita itaia diba lasi siahuna, ita abia be gau badana, bouti ia heau lao bamona, Iehova ena hesiai gaukara lalonai ita gaukara noho totona.​—⁠Kara 1:8; Efeso 3:⁠16.

Ita Lao Henia Gabuna Dekenai Ita Lao Noho!

18. Dahaka ese ita do ia durua, iseda abidadama do idia tohoa gaudia ita haheaukalaia totona?

¹⁸ Tanobada matamatana dekenai ita do ginidae lasi negana lalonai, reana hahetoho aukadia ese iseda abidadama bona lalokau do idia tohoa. To Iehova ese dogo mai ena “goada bona momokani” ita dekenai ia henia​—⁠iseda helaro namona unai. (Heberu 6:​19; Roma 15:​4, 13, NW ) Dagedage eiava ma hahetoho haida ese ita idia hahisia neganai, ita haheauka diba bema iseda helaro ese ita ia hagoadaia. Lai badana ta ia ore bona ma ta ia do matamaia lasi lalonai, namona be iseda lalona ita hadaia iseda helaro bona iseda abidadama ita hagoadaia totona.

19. Dahaka ese ita do ia durua, bouti bamona iseda abidadama ia heau lao noho ela bona Dirava ia gwauhamatalaia tanobada matamatana ena noho namo do ita davaria?

¹⁹ Paulo be “iseda mauri dogoatao gauna, dogo” ia do herevalaia lasi neganai, ia gwau: “Ai ura bada umui ta ta ese unai bamona do umui karaia goadagoada noho, ela bona emui mauri dokona. Badina be unai neganai, umui naria noho davana namona, mauri hanaihanai, do umui abia momokani. Umui lahedo lasi. To abidadama bona haheauka taudia edia kara bamona do umui karaia. Vadaeni Dirava ia gwauhamatalaia davana namona, iena natuna taudia do idia abia gauna, be umui ese do umui abia.” (Heberu 6:​11, 12) Iehova bona ena Natuna ita lalokau henia karana ese ita ia hasiahua bona lauma helaga ese ita ia hagoadaia dainai, namona be bouti bamona iseda abidadama ia heau lao ela bona Dirava ia gwauhamatalaia tanobada matamatana ena noho namo do ita davaria.

[Footnotes]

Riviu

◻ Iseda abidadama ia herevalaia neganai, Paulo ese dahaka sisiba ita ia henia?

◻ Edena dala ai haida ese lauma dalanai dika idia davaria, bona ma haida be edena bamona hari idia heau haraga lasi?

◻ Iseda abidadama ida dahaka kara haida ita hahedinaraia be namo?

◻ Dahaka ese ita do ia durua, Dirava ia gwauhamatalaia tanobada matamatana ena noho namo ita davaria totona?

1. Aposetolo Paulo ese ita dekenai edena sisiba ia henia?

6. Dahaka dainai ‘nega dikadia lalonai ita moale’ be namo, bona unai ese edena dala ai iseda helaro ia hagoadaia?

8. Edena dala idauidau ai haida edia abidadama ia dika bouti ia dika bamona?

12. Edena dala ai Iehova amo raka siri karana ita koua diba?

[Picture on page 16]

Bouti bamona iseda abidadama do ia goada be namo, mauri lalonai ita davaria lai badadia ita haheaukalaia totona

[Picture on page 17]

Bouti bamona iseda abidadama ia dika diba

[Picture on page 18]

Iseda Keristani maurina lalonai helaro be iseda dogo