Filipo—Evanelia Gaukara Ia Goadalaia Tauna

BAIBEL lalonai abidadama tatau bona hahine edia sivarai be momo, bona idia ita tohotohoa diba. Aposetolo taudia edia nega ai ia noho Keristani misinari tauna, Filipo, mani oi laloa. Ia be aposetolo tauna lasi, to Basileia sivaraina harorolaia gaukarana dekenai idia gaukaralaia badabada. Unai dainai, Filipo idia gwauraia “Sivarai Namona ia harorolaia tauna.” (Kara 21:8) Dahaka dainai Filipo be unai bamona idia gwauraia? Bona iena amo dahaka ita dibaia?

Baibel lalonai, Filipo ena sivarai be Pentecost 33 C.E. murinai ia hedinarai matamaia. Unai nega lalonai Helene gado ai idia hereva Iuda taudia ese Heberu gado ai idia hereva Iuda taudia idia maumauraia matamaia, idia gwau dina ibounai aniani idia haria neganai, edia vabu dekenai idia henia lasi. Unai kara hamaoromaoroa totona, aposetolo taudia ese ‘tatau 7, ladana namo taudia’ idia abia hidi. Filipo danu be idia abia hidi tauna ta.​—Kara 6:​1-6.

Unai tatau 7 be “ladana namo” taudia. Oibe, unai tatau idia do abia hidi lasi neganai, idia be lauma dalanai idia goada vadaeni bona laloa namonamo taudia. Hari inai negai idia noho Keristani elda taudia be unai bamona. Unai bamona taudia be idia abia hidi haraga lasi. (1 Timoteo 5:​22) Namona be edia “ladana be do ia namo, ekalesia lasi taudia edia vairana dekenai” bona Keristani tadikaka idia diba ia be kara manada tauna bona laloa namonamo tauna.​—1 Timoteo 3:​2, 3, 7; Filipi 4:5.

Toana be, Ierusalema dekenai Filipo ese ena maduna ia huaia namonamo. To, daudau lasi bena dagedage badana ta ia vara bona Keriso ena hahediba taudia be gabu idauidau dekenai idia heau lao. Ma haida bamona, Filipo ese unai hanua ia rakatania danu, to ena haroro gaukara ia do karaia noho. Nega daudau lasi, bena gabu matamatana​—Samaria—dekenai haroro gaukarana ia karaia goadagoada.​—Kara 8:​1-5.

Teritori Matamatadia Ia Hamatamaia

Iesu ia gwau, ena hahediba taudia be “Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai” dekenai do idia haroro. (Kara 1:8) Filipo be Samaria dekenai haroro gaukara ia karaia neganai, ia ese unai hereva ia hamomokania. Iuda taudia ese Samaria taudia idia matauraia lasi. To Filipo ese unai taudia edia kara dainai ia hahemaoro henidia lasi, bona edia toana ia laloa lasi dainai hahenamo idia davaria. Unai kara dainai, Samaria taudia momo idia bapatiso bona guna meamea ia karaia tauna Simona danu.​—Kara 8:​6-​13.

Gabeai, Iehova ena aneru ta ese Filipo ia hamaoroa Ierusalema ia lao Gasa ena dala dekenai do ia lao. Unuseniai Filipo ese kariota ta ia itaia, ia lalonai Etiopia tauna ta mai ena dagi bada tauna be peroveta tauna Isaia ena buka ia duahia. Vadaeni Filipo ia heau lao kariota badinai bena idia herevahereva. Herevana unai Etiopia tauna be Iuda tomadiho ia abia dae bona ia be mai ena diba Dirava bona Baibel dekenai, to mai ena manau ida ia hahedinaraia ia ura heduru ia abia, ia duahia gauna ia lalo-pararalaia totona. Unai dainai, Filipo ia boiria kariota dekenai ia guia bona ia danu ia helai. Ia haroro henia murinai, ranu gabuna ta dekenai idia ginidae. Etiopia tauna ia henanadai, ia gwau, “Dahaka ese egu bapatiso ia koua?” Filipo ese maoromaoro ia bapatisoa, bena Ethiopia tauna ia lao mai ena moale danu. Reana, unai hesiai tauna matamatana ese ena hanua dekenai sivarai namona ia harorolaia.​—Kara 8:​26-​39.

Filipo ese Samaria taudia bona Etiopia tauna ia haroro henidia karana amo dahaka ita dibaia? Namo lasi ita laloa idau tano, idau bese, eiava mai ena dagi tauna ta be sivarai namona do ia kamonaia lasi. To, namona be Basileia sivaraina ita harorolaia “taunimanima idauidau” dekenai. (1 Korinto 9:​19-​23) Bema dala ita karaia bona taunimanima ibounai ita haroro henidia, inai nega dikana ena dokona ia do ginidae lasi neganai Iehova ese ita do ia gaukaralaia ‘bese ibounai be diba tahua taudia ai do ita halaoa’ gaukarana lalonai.​—Mataio 28:19, 20.

Filipo ese Ia Davaria Hahenamo Ma Haida

Etiopia tauna ia haroro henia murinai, Filipo be ma ia lao Asadodoa dekenai, “bona ena laolao lalonai ia vareai hanua ibounai dekenai Sivarai Namona ia harorolaia, ia lao bona Kaisarea dekenai ia ginidae.” (Kara 8:​40) Aposetolo taudia edia negai, unai hanua rua dekenai idau bese taudia momo idia noho. Kaisarea ena not kahana dekenai, Filipo be Iuda hanuadia, hegeregere Luda bona Iopa dekenai ia haroro. Reana, gabeai hahediba taudia momo unuseniai idia davaria ena badina be unai.​—Kara 9:​32-​43.

Nega ginigabena Filipo idia herevalaia be lagani 20 idia ore murinai. Paulo ena misinari loaloa ihatoina ena dokonai, ia be Tolemaia dekenai ia ginidae. Paulo ia bamoa tauna, Luka, ia gwau: “Kerukeru idia ai rakatania, ai lao Kaisarea hanua. Unuseni Sivarai Namona ia harorolaia tauna ladana Filipo ena ruma dekenai ai daekau.” Unai neganai, Filipo “be mai ena natuna 4, headava lasi kekeni, idia ese peroveta hereva idia gwauraia.”​—Kara 21:​8, 9.

Toana be, Filipo be Kaisarea dekenai ia noho. To ena misinari gaukara urana ia laloaboio lasi, badina Luka ese ia gwauraia “Sivarai Namona ia harorolaia tauna.” Nega momo unai hereva be ena hanua ia rakatania bona idau gabu dekenai ma haida ia haroro henia tauna ia herevalaia. Filipo ena natuna kekeni haniosi be peroveta hereva idia gwauraia karana ese ia hahedinaraia, edia tamana goadana ena aena gabudia ai idia raka.

Hari inai negai, namona be Keristani tama sina idia laloatao, idia dekenai natuna be anina bada hahediba taudia. Herevana tama sina be tiokratik hahenamo haida idia rakatania ruma bese maduna dainai, to Filipo bamona, mai edia lalona ibounai ida Dirava ena hesiai gaukara idia karaia noho diba bona idia be haheitalai namodia.​—Efeso 6:4.

Paulo bona ena bamona idia vadivadi neganai, unai be nega namona, Filipo ena bese taudia ese heabidae karana idia hahedinaraia totona. Mani unai hagoadaia heheni negana oi laloa. Reana unai nega ai, Luka ese Filipo ena gaukara sivaraidia ibounai ia haboua, gabeai Kara karoa 6 bona 8 lalonai ia torea vareai.

Iehova Dirava ese Filipo ia gaukaralaia Basileia sivaraina ia habadaia totona. Filipo ena ura goadana dainai sivarai namona be gabu matamatadia dekenai ia harorolaia bona ena ruma bese lalonai lauma gaudia laloa bada karana ia habadaia. Oi ura unai bamona hahenamo idauidau oi moalelaia, a? Bema Filipo, sivarai namona ia harorolaia tauna, ena kara oi tohotohoa, namo bada do oi davaria.