Iehova ese Dala Ia Kehoa

“Basileia ena Sivarai Namona . . . do idia harorolaia.”​—MATAIO 24:14.

1. Aposetolo edia negai bona hari inai negai haroro gaukara ese dahaka ia havaraia?

IEHOVA be lalokau Diravana dainai, iena ura be “taunimanima ibounai ese mauri do idia davaria, bona hereva momokani do idia diba.” (1 Timoteo 2:4) Unai dainai tanobada hegegemadai haroro bona hadibaia gaukarana badana ia vara noho. Aposetolo edia negai, unai haroro gaukara dainai Keristani kongregesen be “hereva momokani ena du, bona hereva momokani ia gimaia maguna.” (1 Timoteo 3:​15) Gabeai, hereva momokani idia negea negana daudauna ia vara bona hereva momokani ena diari ia maragi ia lao. Vanegai laganidia lalonai, “dokona negana” ai, “aonega” momokanina be ia bada momokani lou, bona taunimanima milioni momo dekenai Baibel ena hahemauri helarona ia mailaia.​—Daniela 12:⁠4.

2. Iehova ese haroro gaukara totona dahaka ia karaia?

² Ena be Satani ia hekwarahi noho Dirava ena ura ia koua totona, to aposetolo edia negai bona hari iseda negai haroro gaukara ese anina bada ia havaraia. Unai dainai peroveta tauna Isaia ena hereva ita laloa. Isaia ese Iuda taudia be lagani 600 B.C.E. murinai Iuda dekenai idia giroa karana ia herevalaia neganai, ia gwau: “Koura gabudia ibounai do umui hahonua. Ororo ibounai do umui hapalakaia. Ororo maragidia be tano palaka do idia lao, bona gudu gabudia ibounai, be manada gabudia do idia lao.” (Isaia 40:⁠4) Iehova ese aposetolo edia negai bona hari inai negai haroro gaukara badana totona dala ia kehoa danu.

³ Ita gwau lasi unai ena anina be Iehova ese tanobada dekenai idia vara gaudia ibounai ia havaraia noho, sivarai namona harorolaia gaukarana ia haharagaia totona; bona ita gwau lasi Iehova ese do idia vara gaudia iboudiai ia ura ia itaia guna. Momokani, ia ese do idia vara gaudia ia itaia diba bona ia havaraia diba. (Isaia 46:​9-​11) To danu, idia vara gaudia dainai kara haida ia karaia diba. Mamoe naria tauna namona ia diba edena dala ai ena mamoe ia hakaua bona ia naria bamona, Iehova ese ena taunimanima ia hakaua. Ia ese hahemauri dekenai idia ia hakaua lao, lauma dalanai idia ia gimaia bona idia ia veria, idia vara gaudia be tanobada hegegemadai sivarai namona harorolaia gaukarana durua totona do idia gaukaralaia.​—Salamo 23:​1-4.

Gaukara Aukana

4, 5. Dahaka dainai sivarai namona harorolaia gaukarana be mai ena hekwarahi?

⁴ Noa ena negai lagatoi haginia gaukarana hegeregerena, Basileia harorolaia gaukarana be gaukara badana​—⁠aposetolo edia negai bona hari inai negai. Taunimanima ibounai dekenai sivarai ta ita abia lao be auka, to inai gaukara be auka momokani. Aposetolo edia negai, hahediba taudia be momo lasi. Edia Gunalaia Tauna, Iesu, be gavamani inai henia tauna bamona idia hamasea. Iuda tomadihona ia goada. Dubu namo hereana be Ierusalema dekenai ia gini. Mediterranean kahanai Iuda lasi taudia edia tomadiho mai edia dubu bona hahelaga taudia idia goada danu. Unai hegeregerena, lagani 1914 ai “dokona negana” ia matamaia neganai, horoa Keristani taudia be momo lasi, bona sibona idia gwauraia Dirava ena hesiai taudia edia tomadiho be momo.​—Daniela 12:9.

⁵ Iesu ese ena murinai idia raka taudia ia hadibaia dagedage do idia davaria. Ia gwau: “Unai neganai umui emui mase totona hereva do idia atoa, do idia hadikaia umui, do idia alaia mase umui. Lauegu ladana dainai bese ibounai ese umui do idia badu henia.” (Mataio 24:​9) Unai hekwakwanai sibona lasi, to “nega ena dokona” lalonai, Keristani taudia be “metau dikadia momo” bogaraginai idia noho. (2 Timoteo 3:​1) Unai gaukara ena bada, idia davaria dagedage, bona idia vara metau gaudia dainai, haroro gaukara be auka bona mai ena hekwakwanai. Abidadama ia goada be gau badana.

6. Edena hereva amo Iehova ese ena taunimanima dekenai ia hamomokania unai gaukara be do ia guguru?

⁶ Iehova ia diba hekwakwanai do idia vara, to danu, ia diba gau ta lasi ese unai gaukara do ia koua diba. Taunimanima momo idia diba peroveta herevana ta, aposetolo edia negai bona hari inai negai ena anina ia vara herevana, ese ia hamomokania unai gaukara be do ia guguru, ia gwau: “Basileia ena Sivarai Namona be tanobada ibounai dekenai do idia harorolaia.”​—Mataio 24:⁠14.

7. Aposetolo edia negai haroro gaukara ena bada be edena bamona?

⁷ Aposetolo edia negai Dirava ena hesiai taudia be abidadama bada bona lauma helaga ena heduru dainai, edia gaukara idia karaia. Iehova be idia ida ia noho dainai, guna idia laloa diba lasi dalanai edia gaukara amo anina bada idia havaraia. Paulo ese Kolose taudia ia tore henia neganai, Iesu ia mase bena lagani 27 murinai, ia gwau diba sivarai namona be “tanobada ibounai dekenai ai harorolaia vadaeni.” (Kolose 1:23) Unai hegeregerena, lagani 2000 ia kahirakahira neganai, sivarai namona be tano 233 ai idia harorolaia.

8. Edena bamona negadiai momo ese sivarai namona idia abia dae? Haheitalai oi gwauraia.

⁸ Vanegai laganidia lalonai, taunimanima milioni momo ese sivarai namona idia abia dae. Idia momo be unai idia karaia herevana edia mauri ia auka​—⁠tuari ia vara, gavamani ese unai gaukara ia taravatua, bona dagedage bada ia vara negadia lalonai. Unai be aposetolo edia negai ia vara danu. Nega ta, Paulo bona Sila be au amo idia dadabaia dikadika bona dibura dekenai idia negea. Toana be unai negana ai taunimanima be hahediba taudia ai idia halaoa diba lasi! To, Iehova be unai ia karaia totona, ia vara gauna ia gaukaralaia. Paulo bona Sila ia ruhaia, bona dibura gimaia tauna bona ena ruma bese be abidadama taudia ai idia lao. (Kara 16:​19-​33) Unai bamona haheitalai ese idia hahedinaraia sivarai namona idia ura henia lasi taudia be unai gaukara idia haorea diba lasi. (Isaia 54:17) To, Keristani tomadihona ena sivarai be hisihisi bona dagedage gaudia amo ia honu lasi. Aposetolo edia negai bona hari inai negai sivarai namona harorolaia gaukarana idia durua gaudia namodia haida mani ita itaia.

Tomadiho Lalohadai

9, 10. Aposetolo edia negai bona hari inai negai Iehova ese edena dala ai taunimanima edia lalona ia hegaegaelaia sivarai namona harorolaia gaukarana idia kamonai totona?

⁹ Tanobada hegegemadai haroro gaukarana idia karaia negadia mani oi laloa. Aposetolo edia negai idia itaia, Daniela 9:​24-​27 ai pura 70 peroveta herevana ese Mesia do ia hedinarai laganina​—⁠lagani 29 C.E.​—⁠ia hahedinaraia. Ena be Iesu ia vara neganai idia noho Iuda taudia ese idia vara gaudia edia nega korikorina idia lalo-pararalaia namonamo lasi, idia ese Mesia idia naria noho. (Luka 3:​15) France gado bukana Manuel Biblique ia gwau: “Taunimanima idia diba Daniela ese ia gwauraia pura 70 be idia ore gwauraia; Ioane Bapatiso ese Dirava ena basileia ia kahirakahira herevana ia gwauraia neganai, idia kamonai taudia ta ia hoa lasi.”

¹⁰ Iseda nega be edena bamona? Ia vara gauna badana be Iesu be guba dekenai terona latanai ia helai, bona unai ese ia hahedinaraia ia be Basileia siahuna ai ia noho matamaia. Baibel ena peroveta herevana ese ia hahedinaraia unai be lagani 1914 ai ia vara. (Daniela 4:​13-​17) Hari inai negai tomadiho idia laloa bada taudia haida be unai idia naria noho. Bible Student taudia namodia be unai idia naria noho danu, lagani 1879 ai idia ese inai magasin idia halasia matamaia, ena ladana be Siona Ena Gima Kohorona Bona Keriso Ena Noho Negana Ia Halasia Gauna. Unai dala ai, aposetolo edia negai bona hari inai negai, tomadiho lalohadai idauidau dainai taunimanima momo idia ura sivarai namona idia kamonai.a

11. Edena tomadiho karadia be sivarai namona harorolaia dalana idia durua?

¹¹ Aposetolo edia negai bona hari inai negai Keristani taudia edia gaukara ia durua gauna ma ta be taunimanima momo be Peroveta Helagadia idia manadalaia. Aposetolo edia negai, Iuda taudia be gabu idauidau dekenai Idau Bese lalodiai idia noho. Unai gabu idauidau dekenai idia be mai edia dubu bona taunimanima be unuseniai idia hebou hanaihanai, Baibel idia duahia bona herevalaia neganai idia kamonai totona. Unai dainai, Keristani taudia ese taunimanima idia diba vadaeni gaudia idia habadaia diba. (Kara 8:​28-​36; 17:​1, 2) Hari iseda nega ia matamaia neganai, Iehova ena taunimanima be tano momo lalonai unai bamona gauna idia moalelaia. Kerisendom tanodia momo lalodiai taunimanima be mai edia Baibel, bona Protestan tanodia dekenai taunimanima momo herea be unai bamona. Dubu momo dekenai idia duahia; taunimanima milioni momo be mai edia Baibel. Taunimanima ese Baibel idia abia vadaeni, to heduru idia abia be namo idia abia gauna idia lalo-pararalaia totona.

Gavamani Edia Taravatu Ena Heduru

12. Edena dala ai Roma ena taravatu ese aposetolo edia negai taunimanima ia gimaia?

¹² Nega momo gavamani edia taravatu ese Keristani haroro gaukara idia durua. Roma Basileiana ese aposetolo edia negai tanobada ia biagua, bona dina ta ta maurina dekenai ena taravatu be mai ena siahu. Unai taravatu ese taunimanima idia gimaia, bona Keristani taudia ginigunadia be unai taravatu amo namo idia abia. Hegeregere, Paulo ese Roma ena taravatu hegeregerena ia noinoi neganai, dibura ruma amo idia ruhaia bona idia dadabaia lasi. (Kara 16:​37-​39; 22:​25, 29) Hanua naria tauna ese Roma ena kota karana ia gwauraia dainai, Efeso dekenai heai taudia ese edia badu idia hadokoa. (Kara 19:​35-​41) Nega ta, Paulo be Ierusalema dekenai idia hamauria bena dagedage ia davaria lasi badina ia be Roma tauna. (Kara 23:27) Gabeai, Roma ena taravatu hegeregerena Kaisara vairanai ena abidadama ena maoro ia hamomokania toho diba. (Kara 25:⁠11) Ena be Kaisara momo be lohia taudia dikadia, to aposetolo edia negai taravatu ese dala ia kehoa ‘sivarai namona ena momokani idia gwauraia’ diba totona.​—⁠Filipi 1:⁠7.

13. Edena dala ai gavamani ena taravatu ese hari inai negai nega momo haroro gaukara ia durua?

¹³ Hari inai negai tano momo dekenai unai ia vara danu. Ena be taunimanima haida ese ‘taravatu idia atoa, dika idia karaia’ totona, to tano momo edia taravatu hegeregerena taunimanima be mai edia maoro idia abia hidi tomadihona idia badinaia totona. (Salamo 94:20) Gavamani momo idia diba Iehova ena Witness taudia ese taunimanima edia noho dalana idia hadikaia lasi dainai, idia ese iseda orea idia abia dae. Witness taudia edia printa gaukarana badana idia karaia tanona, United States, ena taravatu dainai, lagani 120 lalonai Gima Kohorona magasin idia halasia bona tanobada hegegemadai idia duahia diba.

Maino Bona Tomadiho Idauidau Haheaukalaia Negadia

14, 15. Edena dala ai noho namona ese aposetolo edia negai haroro gaukara ia durua?

¹⁴ Maino negadia danu ese haroro gaukara idia durua. Ena be Iesu ese ia hahedinaraia goevagoeva aposetolo edia negai bona hari inai negai, ‘bese do idia tuari heheni,’ to noho namo negadia idia vara danu, unai dainai Basileia idia harorolaia goadagoada diba. (Mataio 24:⁠7) Keristani taudia ginigunadia be Pax Romana, eiava Roma Mainona, henunai idia noho. Taunimanima edia sivarai ia torea tauna ta ia gwau: “Roma ese Mediterranea tanodia momo herea ia abia dainai, hanaihanai idia tuari negana ia ore.” Unai noho namona dainai, Keristani taudia ginigunadia be maino ai Roma tanodia ibounai lalonai idia loaloa diba.

¹⁵ Roma Basileiana ese ena siahu goadana henunai taunimanima ia hatamonaia toho. Unai kara ese loaloa, tomadiho idauidau haheaukalaia, bona lalohadai idauidau abia dae karadia ia havaraia sibona lasi, to tano idauidau taudia be tadikaka bamona idia noho lalohadaina ia havaraia danu. Buka ladana On the Road to Civilization ia gwau: “[Roma] Basileiana lalonai ia noho lalo-tamona lalohadaina dainai, uma [Keristani haroro gaukarana karaia totona] be namo herea. Tano idauidau edia hetoana idia hamorua. Roma tauna be tanobada ibounai tauna. . . . Danu, tano iboudiai taudia be tano tamona taudia bamona lalohadaina ia havaraia gavamani ese taunimanina iboudiai be tadikaka lalohadaina ia hadibaia tomadihona ia abia dae diba.”​—⁠Mani Kara 10:​34, 35; 1 Petero 2:​17 itaia.

16, 17. Hari inai negai dahaka dainai taunimanima ese maino idia tahua, bona taunimanima momo ese dahaka lalohadai idia abia dae?

¹⁶ Iseda nega be edena bamona? Taunimanima edia sivarai ibounai lalonai, tuari badadia be hari inai negai idia vara, bona tano haida ai bese haida idia do tuari heheni noho. (Apokalupo 6:⁠4) To, maino negadia idia vara danu. Idia hanaia lagani 50 lalodiai, tanobada ena bese badadia be idia tuari heheni lasi. Unai ese sivarai namona harorolaia gaukarana unai tano lalodiai ia durua bada.

¹⁷ Hari inai negai idia karaia tuari edia dika dainai, taunimanima momo idia laloa gavamani tamona ese tanobada ia lohiaia be namo. Tanobada ibounai tuarina dekenai idia gari dainai League of Nations bona United Nations idia haginia. (Apokalupo 13:14) Unai orea ruaosi idia gwau edia tahua gauna be tano iboudiai idia gaukara hebou karana bona maino. Unai idia laloa bada taudia momo ese do ia noho daudau maino korikorina ia mailaia gavamanina, tanobada ibounai gavamanina​—⁠Dirava ena Basileia​—⁠ena sivarai namona idia abia dae.

18. Edena bamona lalohadai tomadiho dekenai ese haroro gaukara ia durua?

¹⁸ Ena be nega haida dala dikana ai Keristani taudia idia dagedage henia, to aposetolo edia negai bona hari inai negai tomadiho idauidau idia haheaukalaia danu. (Ioane 15:20; Kara 9:​31) Roma taudia ese idia abia tanodia edia dirava bona dirava hahinedia idia abia dae bona idia badinaia danu. Profesa Rodney Stark ia gwau: “Dala momo ai Roma ese tomadiho totona ia henia ura kwalimu be bada herea, gabeai American Revolution sibona murinai unai bamona ia vara lou.” Hari inai negai tano momo dekenai taunimanima ese lalohadai idauidau idia ura idia diba, unai dainai idia ura Iehova ena Witness taudia ese idia mailaia Baibel sivaraina idia kamonai.

Taunimanima ese Idia Karaia Gaudia

19. Edena dala ai Keristani taudia ginigunadia ese buka mai edia rau idia gaukaralaia?

¹⁹ Dokonai, Iehova ese ena orea taudia ia durua bena taunimanima ese idia karaia gaudia matamatadia amo namo idia davaria dalana mani oi laloa. Ena be Keristani taudia ginigunadia edia nega lalonai taunimanima ese gau matamatadia idia karaia momo lasi, to idia gaukaralaia gauna matamatana ta be codex, buka mai edia rau. Unai buka mai edia rau ese lokua bukadia mai edia hekwarahi edia gabu idia abia. Buka ladana The Birth of the Codex ia gwau: “Tanobada ena toretore taudia ese buka mai edia rau idia gaukaralaia matamaia metairametaira, to Keristani taudia ese gabu ibounai dekenai maoromaoro idia gaukaralaia matamaia.” Unai buka be ma ia gwau: “Lagani 100 C.E. murinai, Keristani taudia ese gabu iboudiai dekenai buka mai edia rau idia gaukaralaia badabada dainai, toana be idaunegai lagani 100 C.E. be do lasi neganai idia gaukaralaia matamaia.” Buka mai ena rau idia gaukaralaia be haraga, lokua bukana idia gaukaralaia be auka. Siri idauidau idia davaria haraga diba. Unai ese Keristani taudia ginigunadia, hegeregere Paulo idia durua bada Baibel ena hereva idia gwauraia hedinarai sibona lasi, to idia hadibaia gaudia be ma siri haida amo idia hamomokania.​—⁠Kara 17:⁠2, 3, NW.

20. Edena dala ai Dirava ena orea ese taunimanima idia karaia gaudia matamatadia idia gaukaralaia tanobada hegegemadai haroro gaukarana durua totona, bona dahaka dainai?

²⁰ Hari iseda negai, taunimanima ese gau matamatadia momo idia karaia. Idia gaukara haraga printa masini ese nega tamona gado idauidau momo dekenai Baibel idia herevalaia buka bona magasin halasia gaukarana idia durua. Idia karaia gaudia matamatadia dainai, Baibel hahanaia negana ia kwadogi. Taraka, trein, bouti, bona peleini dainai, tanobada hegegemadai Baibel idia herevalaia buka bona magasin idia abia lao haraga diba. Telefon bona fax masinidia amo hereva be gabu idauidau dekenai idia siaia haraga diba. Iena lauma amo, Iehova ese ena hesiai taudia ia veria, unai bamona gaudia idia gaukaralaia karana amo tanobada hegegemadai sivarai namona harorolaia gaukarana idia durua. Idia ese unai gaudia idia gaukaralaia lasi, inai tanobada ese ia havaraia gaudia matamatadia idia dibaia bona moalelaia totona. To, idia ura bada edia haroro gaukarana idia durua gaudia idia gaukaralaia.

21. Dahaka ita diba momokani?

²¹ Iesu be guna ia gwau: “Basileia ena Sivarai Namona be tanobada ibounai dekenai do idia harorolaia.” (Mataio 24:14) Keristani taudia ginigunadia ese unai peroveta herevana ia guguru idia itaia hegeregerena, hari inai negai dala badana ai unai ita itaia. Ena be unai gaukara be bada bona mai ena hekwarahi, nega namodia bona nega aukadia lalonai, gavamani edia taravatu bona taunimanima edia lalohadai idia idau idia lao neganai, tuari bona maino ai, bona taunimanima ese gau matamatadia idauidau idia karaia negana lalonai, to sivarai namona idia harorolaia vadaeni bona do idia harorolaia noho. Unai dainai oi ese Iehova ena aonega bona do idia vara gaudia ia itaia diba dalana oi hoalaia, ani? Ita diba momokani haroro gaukara be Iehova ese ia atoa negana ai do ita hagugurua bona kara maoromaoro taudia ese hahenamo idia abia totona ia karaia lalokau palanina be do ia guguru. Idia ese tanobada do idia abia bona ia dekenai do idia mauri noho ela bona hanaihanai. (Salamo 37:29; Habakuku 2:⁠3) Bema ita ese iseda mauri ita haidaua Iehova ena ura ita badinaia totona, ita danu be unai taudia huanai do ita noho.​—⁠1 Timoteo 4:​16.

[Footnotes]

Hereva Badadia Riviulaia

◻ Dahaka dainai sivarai namona harorolaia gaukarana be mai ena hekwarahi?

◻ Gavamani edia gaukara bona noho namona ese edena dala ai Keristani taudia edia gaukara idia durua?

◻ Iehova ese haroro gaukara ia hanamoa dainai ita diba momokani vairai be dahaka do ia vara?

3. Edena dala ai Iehova ese ena palani ia hagugurua diba?