Oiemu Mauri Lalonai Anina Do Oi Havaraia!
“Inai bamona taudia be idia moale momokani: Idia ese kara dika taudia edia sisiba, bona edia laloa idia abia dae lasi. . . . Edia gaukara ibounai be ena anina ia vara.”—SALAMO 1:1, 3.
1. (a) Tanobada dekenai matamata taudia momo ese anina havaraia karana be edena bamona idia laloa? (b) Baibel ese edena dala ai anina idia havaraia taudia ia herevalaia?
ANINA havaraia—unai hereva be edena bamona oi laloa? Tau matamata ta ia gwau: “Egu tahua gauna badana be bisinesi lalonai anina lau havaraia.” Hahine matamata ta ia gwau: “Egu ura gauna badana be moale ruma besena.” To, hahine matamata ma ta ia gwau: “Egu ura gauna be noho gabuna namona, motuka namona . . . lau ura sibona egu ura lau hagugurua.” To hekwakwanai be inai, moni, ruma bese, eiava gaukara namona danu be anina korikorina ena toana lasi. Salamo 1:1-3 ia gwau: “Inai bamona taudia be idia moale momokani: Idia ese kara dika taudia edia sisiba, bona edia laloa idia abia dae lasi. . . . Lohiabada ena Taravatu [idia duahia badabada] . . . Edia gaukara ibounai be ena anina ia vara.”
2. Edeseniai anina korikorina havaraia dalana ita davaria, bona ita abia dalana tamona be dahaka?
2 Unuseniai Baibel be taunimanima ta ese ia henia diba lasi gauna—anina korikorina havaraia dalana—ia herevalaia! To ia ese moni bada abia dalana ia herevalaia lasi. Baibel ese inai sisiba ia henia, ia gwau: “Moni ura henia kara ese dika idauidau ibounai ia havaraia noho.” (1 Timoteo 6:10) Unai anina korikorina be Dirava ita hamoalea neganai—bona Iehova ena taravatu ita badinaia neganai—ita havaraia. Unai sibona ese noho namo bona moale korikorina ia havaraia diba! Reana Iehova ena taravatu henunai oi noho bona dahaka oi karaia diba be oi dekenai ia hadibaia karana oi ura henia lasi. To, Iesu ia gwau: “Idia diba lauma gaudia idia tahua be namo taudia idia moale.” (Mataio 5:3, NW ) Herevana oi diba eiava lasi, to oi vara negana amo oiemu lalona ai lauma gaudia tahua urana ia noho—Dirava oi diba bona ena palani oi lalo-pararalaia ena ura goadana danu. Unai dainai, oi ese moale korikorina oi abia dalana tamona be unai ura gaudia oi hagugurua bona “Lohiabada ena Taravatu” oi badinaia.
Dirava Ena Taravatu Ita Badinaia Ena Namo
3. Dahaka dainai ita ura Iehova ese iseda “mauri ia biagua”?
3 Peroveta tauna Ieremia ia gwau: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ieremia 10:23) Taunimanima iboudiai, matamata taudia bona buruka taudia, be unai bamona. Iseda aonega bona diba be hegeregere lasi iseda mauri ita biagua totona, to unai sibona lasi; ita be mai eda maoro lasi unai ita karaia totona. Apokalupo 4:11 ai, Baibel ia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” Iehova be iseda Havaraia Tauna dainai, ia be “mauri ibounai ena badina.” (Salamo 36:9) Unai dainai, iseda mauri ita gaukaralaia dalana namona ia diba namonamo. Unai dainai ia ese taravatu ia atodia, iseda moale koua totona lasi, to heduru ia henia ita sibona ita hanamoa totona. (Isaia 48:17) Bema Dirava ena taravatu oi dadaraia, vadaeni dika do oi davaria.
4. Dahaka dainai matamata taudia momo herea ese edia mauri idia hadikaia?
4 Hegeregere, matamata taudia momo herea ese drag, matabodaga, bona kara dika ma haida amo sibona edia mauri idia hadikaia ena badina be nega ta oi laloa, a? Salamo 36:1, 2 ia gwau: “Kerere ese kara dika tauna dekenai ia hereva henia noho. Iena kudouna lalonai dika ese, unai tau dekenai ia hereva henia noho. Unai tau ese Dirava dekenai ia gari henia lasi momokani. Badina unai tau be sibona ia laloa ia be tau namona.” Idia ese dala maorona ai ‘Dirava idia gari henia lasi’ dainai, matamata taudia momo ese sibona idia koia bena idia laloa, dika idia havaraia diba karadia ese dika do idia havaraia lasi. To dokonai, do idia davaria inai hakaua herevana be ia idau lasi: “Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai, ia ese mase do ia abia. Bema Lauma ena gau ia hadoa neganai, ia ese mauri hanaihanai do ia abia.”—Galatia 6:7, 8.
‘Emu Mauri Dinadia Oi Duahia’
5, 6. (a) Dahaka dainai matamata taudia ese ‘edia mauri dinadia idia duahia’ be namo, bona unai idia karaia ena anina be dahaka? (b) ‘Ita ia karaia Diravana ita laloa’ ena anina be dahaka?
5 Edena dala ai oiemu mauri lalonai anina oi havaraia diba bona “mauri hanaihanai” do oi abia? Mose ia gwau: “Aiemai mauri lagani be 70 sibona. Bema ai be goada neganai sedira lagani 80 do ai abia . . . Aiemai mauri be idia ore haraga, vadaeni ai boio.” (Salamo 90:10) Reana oi be mase oi laloa momo lasi. Oibe, matamata taudia momo edia kara ese ia hahedinaraia idia laloa gau ta ese idia ia hadikaia diba lasi. To madi, Mose ese ita ia hadibaia namonamo mauri be ia kwadogi. Ita diba momokani lasi bema ita mauri noho ela bona lagani 70 o 80 ita abia. “Nega dika” ese idia matamata bona goada taudia ia hamorua diba danu. (Hadibaia Tauna 9:11) Unai dainai, hari oi moalelaia mauri namona be edena bamona do oi gaukaralaia? Mose ia guriguri, ia gwau: “Aiemai mauri [dinadia duahia dalana] mani ai dekenai do oi hadibaia, bona unai dekena amo aonega do ai davaria.”—Salamo 90:12.
6 Oiemu mauri dinadia oi duahia ena anina be dahaka? Ita gwau lasi ena anina be emu mauri ena daudau do oi lalo-hekwarahilaia momo. Mose ese Iehova ia noia, iena taunimanima ia hadibadia Ia idia hanamoa dalana ai edia mauri idia gaukaralaia diba totona. Oiemu mauri dinadia oi duahia—oi laloa dina ta ta be Dirava hanamoa totona oi gaukaralaia diba gauna namona, a? Baibel ese matamata taudia ia hagoadaia, ia gwau: “Laloa hekwarahi oiemu kudouna dekena amo do oi atoa siri, bona hisihisi be oiemu tauanina dekena amo do oi abia siri danu, badina be uhau bona eregabe negadia be idia daudau lasi. Oi be eregabe neganai, ia ese oi ia karaia Dirava do oi laloa.” (Hadibaia Tauna 11:10–12:1) Ita laloatao Iseda Havaraia Tauna ia noho be Ia ita laloa ena anina korikorina lasi. Kara dika tauna ese inai hereva, “oiemu Basileia do oi abia neganai, do oi laloa lau,” be Iesu dekenai ia gwauraia neganai, ia ura lasi Iesu ese ena ladana sibona do ia laloa. Ia ura Iesu ese kara ta do ia karaia, ia ura do ia hatoreaisi lou! (Luka 23:42; mani Genese 40:14, 23; Iobu 14:13 itaia.) Unai dala hegeregerena, Iehova ita laloa ena anina be kara ta ita karaia, oibe ia hamoalea karadia do ita karaia. Oi gwau diba oi ese Iehova oi laloa noho, a?
Kara Dika Taudia Oi Mama Henia Lasi
7. Dahaka dainai matamata taudia momo idia ura edia Havaraia Tauna idia laloaboio? Mani haheitalai oi henia.
7 Matamata taudia momo idia ura Iehova idia laloaboio, badina idia laloa Witness taudia edia mauri be taravatu momo maurina. Spain dekenai tadikaka ta ia laloatao ia matamata neganai ena lalohadai be inai bamona, ia gwau: “Lau ese tanobada lau ura henia badina toana be hereva momokani be auka bona mai ena taravatu momo. Ena anina be oi helai, oi stadi, hebou dekenai oi lao, neketai oi atoa, bona lau be unai gaudia lau moalelaia lasi.” Nega haida oi laloa Dirava oi hesiai henia dainai gau namodia oi reaia, a? Reana do oi hoa bema oi diba Baibel toretore tauna ta ena hemami be unai bamona. Mani oiemu Baibel oi kehoa bona Salamo 73 oi duahia.
8. Dahaka dainai Asapa ese ‘hekokoroku taudia ia mama henidia’?
8 Namona be unai salamo ita tahua namonamo. Sa 73 Siri 2 bona 3 idia gwau: “To egu aena be kahirakahira ia dedi. Lauegu kamonai be ia manoka lao, bona egu abidadama be kahirakahira ia ore. Badina be lau itaia, tau dikadia ese moni bona kohu momo idia abia, bona hekokoroku taudia idia kwalimu, vadaeni lau mama henidia.” Heberu gado ai unai karoa ena atai herevana lalonai idia hahedinaraia unai salamo be Asapa ese ia torea. Ia be miusiki ia karaia Levi tauna King Davida ena negai. (1 Sivarai 25:1, 2; 2 Sivarai 29:30) Ena be Dirava ena dubu dekenai gaukara ia karaia ena hahenamo badana ia abia, to edia dika idia hekokorokulaia taudia ia “mama henidia.” Toana be edia mauri be namo; toana be idia ese maino bona noho namona idia moalelaia. Momokani, guna idia laloa lasi dalanai anina idia havaraia. (Sa 73 Siri 5, 7, NW ) Idia ese idia karaia gaudia dainai idia “hekokoroku,” anina be hekokoroku dalanai idia herevalaia. (Sa 73 Siri 8) “Idia ese guba dekenai ia noho Dirava idia hereva dika henia. Mai hekokoroku danu, idia ese taunimanima idia oda henidia,” idia be ta idia matauraia lasi—guba dekenai eiava tanobada dekenai.—Sa 73 Siri 9.
9. Dahaka dainai hari inai negai Keristani matamata taudia haida be reana Asapa bamona idia laloa?
9 Reana emu bamodia sikuli dekenai be unai bamona oi gwauraia diba. Reana oi kamonai idia ese hemarai lasi dalanai edia mahuta hebou karadia, edia pati dikadia, bona kekero muramura bona drag idia gaukaralaia momo karadia idia hekokorokulaia. Idia gwauraia moale maurina bona oi be Keristani tauna dainai oi rakalaia dala maragina oi hahegeregerea neganai, reana nega haida ‘hekokoroku taudia oi mama henia.’ (Mataio 7:13, 14) Asapa ia lalo-manoka bena ia gwau: “Lau ese lau kara kava, a? Nega ibounai lauegu lalona lau hagoevaia, bona kara dika ta lau karaia lasi. Inai kara dekena amo namo ta lau davaria, a? Badina be dina ibounai lau hisihisi noho.” (Sa 73 Siri 13, 14) Oibe, ia ese Dirava hesiai henia bona kara maoromaoro badinaia maurina ena namo ia henanadailaia matamaia.
10 To, Asapa be ia lalo-manoka daudau lasi. Karaharaga ia itaia ena be toana be kara dika taudia be mai edia maino to ia be toana koikoi sibona—bona ia be nega daudau do ia noho gauna lasi! Ia gwau: “Momokani oi ese dedidedi gabudia dekenai idia do oi atoa, bona mase gabuna dekenai idia do oi hamorua. Oi ese do oi hamasedia haraga, bona inai mase be do ia dika momokani.” (Sa 73 Siri 18, 19) Oiemu bamodia momo be unai bamona “dedidedi gabudia dekenai” idia raka. Gabeai edia kara dika ena davana do idia abia, reana do idia rogorogo kava, pokese gorere idia abia, dibura dekenai do idia lao, eiava do idia mase! To idia davaria dika badana be, idia be Dirava amo daudau idia noho.—Iamesi 4:4.
10, 11. (a) Dahaka ese Asapa ia durua ena lalohadai ia haidaua totona? (b) Edena dala ai kara dika taudia be “dedidedi gabudia dekenai” idia raka? Mani haheitalai oi henia.
11 Spain dekenai Witness kekeni ta be unai ia diba namonamo. Ia matamata neganai, dala rua ia badinaia, Dirava idia dadaraia matamata taudia ia bamoa momo. Gabeai, idia ta ia lalokau henia—ia be drag ania kava tauna ta. Ena be unai taihu ese drag ia ania kava lasi, to ia be unai tau totona drag ia hoia. Ia gwau: “Ia lau durua danu, nila amo unai drag ia abia totona.” To unai taihu ese heduru ia abia bena ia laloa namonamo bona lauma dalanai ia goada lou. To madi, gabeai ia kamonai ena turana gunana, unai drag ia gaukaralaia tauna, be AIDS dainai ia mase. Oibe, salamo torea tauna ia gwau bamona, Dirava idia dadaraia taudia be “dedidedi gabudia dekenai” idia raka. Edia matabodaga maurina dainai, reana idia haida do idia mase haraga. Idia mauri noho taudia, bema edia kara idia haidaua lasi, kahirakahira do idia itaia “Lohiabada Iesu bona iena aneru mai siahu bada danu guba dekena amo do idia mai neganai. Mai lahi siahu bada danu, Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.”—2 Tesalonika 1:7, 8.
12. Edena dala ai Japan dekenai matamata tadikaka ta ia itaia kara dika taudia mama henia karana be kavakava karana?
12 Unai dainai, Dirava “idia ura lasi taudia” ita mama henia be kavakava karana! Momokani, Iehova idia diba bona mauri hanaihanai helarona idia abia taudia ita mama henia be namo. Japan dekenai matamata tadikaka ta be unai ia lalo-pararalaia. Ia matamata neganai, ia danu ia ura “ena ura kwalimu ia habadaia.” Ia gwau: “Lau laloa gau namona ta lau reaia. Bena lau lalo-parara egu mauri be edena bamona bema hereva momokani lau abia lasi. Lau laloa, reana lagani 70 o 80 do lau mauri bena do lau mase. To Iehova ese mauri hanaihanai helarona ia henia! Unai lau lalo-pararalaia neganai, lau ia durua, lau dogoatao gauna lau laloa bada totona.” To, Dirava ena taravatu idia badinaia lasi taudia huanai ita abidadama noho be auka. Dahaka gaudia haida oi karaia diba edia lalo-ani karana oi dadaraia totona?
Emu Bamodia Oi Abia Hidi Namonamo!
13, 14. Dahaka dainai iseda turadia ita abia hidi namonamo be mai anina bada?
13 Salamo 1:1-3 ai, anina idia havaraia taudia ia herevalaia herevana mani ita itaia lou, ia gwau: “Inai bamona taudia be idia moale momokani: Idia ese kara dika taudia edia sisiba, bona edia laloa idia abia dae lasi. Idia ese kerere taudia edia kara bamona idia karaia lasi, Bona Dirava idia ura lasi taudia danu, idia noho hebou lasi. Ma inai taudia ese, Lohiabada ena Taravatu dekenai idia moale, bona Lohiabada ena Taravatu [idia duahia badabada], dina bona hanuaboi ibounai lalonai. Ma inai taudia be, sinavai badinai idia hadoa audia bamona, edia huahua atoa neganai, idia ese anina idia atoa bada herea. Edia raurau danu do idia kakoro lasi. Edia gaukara ibounai be ena anina ia vara, bona mai edia kwalimu danu.”
14 Mani oi itaia guna, oiemu turadia be mai anina bada. Aonega Herevadia 13:20 ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” Ita gwau lasi Iehova ena Witness lasi matamata taudia do oi dadaraia eiava oi kara dika henia be maoro. Baibel ese ita ia hagoadaia iseda dekena taudia ita lalokau henia bona ‘taunimanima ibounai danu mai maino danu do ita noho.’ (Roma 12:18; Mataio 22:39) To, reana Baibel ena hakaua herevadia idia badinaia lasi taudia ‘edia laloa oi abia dae,’ bema idia oi bamoa momo.
Baibel Duahiduahi Karana Ena Namo
15. Edena dala ai matamata taudia ese Baibel duahiduahi karana do idia ura henia matamaia diba?
15 Salamo torea tauna ia itaia danu, anina idia havaraia taudia be mai edia moale ida Dirava ena taravatu idia “[duahia badabada], dina bona hanuaboi ibounai lalonai.” (Salamo 1:1, 2) To momokani, Baibel ita duahia be mai ena hekwarahi danu, bona ena “hereva haida edia anina davaria be auka.” (2 Petero 3:16) To namo lasi ita laloa Baibel duahiduahi karana be lalo-metau gauna. Dala ia noho Dirava ena Hereva ena ‘rata goevagoeva ita ura henia’ totona. (1 Petero 2:2) Dina ta ta ai kahana maragina sibona oi duahia toho. Bema hereva haida oi lalo-pararalaia lasi, edia anina oi tahua. Gabeai, oi duahia gauna oi lalohadailaia. (Salamo 77:11, 12) Bema oi duahia neganai emu lalona oi biagua be auka, namona be oi “duahia badabada” toho. Nega ia hanaia lalonai, oiemu ura Baibel duahiduahi dekenai do ia bada ia lao. Brazil dekenai matamata taihu ta ia gwau: “Hanaihanai egu mamina be lau be Iehova kahirakahira lasi. To hua haida lalonai, lau ese sibona egu stadi bona Baibel duahiduahi karana lau hanamoa. Hari lau mamia egu hetura karana Iehova ida be goada. Lau mamia ia noho momokani.”
16. Edena dala ai kongregesen hebou idauidau amo heduru bada ita abia diba?
16 Lauma dalanai oi goada oi lao totona kongregesen hebou idauidau dekenai oi lao be gau badana. Bema ‘emu kamonai karana oi naria namonamo,’ oi kamonai gaudia ese oi idia hagoadaia bada. (Luka 8:18) Nega haida oi laloa hebou ese oiemu lalona idia veria lasi, a? Namona be oi sibona oi nanadaia, ‘Dahaka lau karaia, hebou ese egu lalona idia veria totona? Lau kamonai namonamo, a? Lau hegaegae, a? Haere lau henia, a?’ Momokani, Baibel ese ita ia hagoadaia “umui ta ta dekenai durua henia daladia do umui laloa noho . . . lalokau dekena amo kara namodia do umui karaia. . . . Umui ta ta emui Keristani varavara taudia edia lalona do umui hagoadaia.” (Heberu 10:24, 25) Unai oi karaia totona haere oi henia be gau badana! To momokani, haere oi henia diba totona gau badana be oi stadi guna. Matamata taihu ta ia gwau: “Momokani hebou dekenai oi haere be auka lasi bema oi hegaegae guna.”
Dirava Ena Dala Oi Badinaia Neganai Anina Do Oi Havaraia
17. Edena dala ai Baibel duahiduahi ia ura henia bada tauna be “sinavai badinai idia hadoa audia bamona”?
17 Salamo torea tauna ia gwauraia danu, anina idia havaraia taudia be “sinavai badinai idia hadoa audia bamona.” Reana unai sinavai ena anina be huahua audia edia uma gabu dekenai idia karaia ranu idia heau gabudia momo. (Isaia 44:4) Dina ta ta Baibel oi duahia karana be hanaihanai aniani bona ranu ia henia gabuna dekenai oi noho bamona. (Ieremia 17:8) Dina ta ta ai goada oi abia, hahetoho bona hekwakwanai lalonai oi gini goada totona. Iehova ena lalohadai oi dibaia neganai, aonega oi abia, aonega dalana oi abia hidi totona.
18. Dahaka dainai Iehova ia hesiai henia lalonai matamata tauna ta ese anina ia havaraia diba?
18 Nega haida, reana toana be Iehova oi hesiai henia be auka. To namo lasi oi laloa ia auka momokani dainai oi karaia diba lasi. (Deuteronomi 30:11) Baibel ena gwauhamata oi dekenai be, ‘emu gaukara ibounai lalonai anina do oi havaraia,’ bema oiemu mauri ibounai lalonai Iehova hanamoa bona ena kudouna hamoalea totona emu gaukara oi karaia! (Aonega Herevadia 27:11) Bona oi laloaboio lasi, oi sibona do oi hekwarahi lasi, to Iehova bona Iesu Keriso ese oi do idia durua. (Mataio 28:20; Heberu 13:5) Idia be oi davaria hekwakwanai idia diba, bona idia ese oi do idia rakatania lasi. (Salamo 55:22) Danu, “Keristani taudia ibounai” ese oi do idia durua bona bema emu tama sina be Dirava gari henia taudia idia danu ese oi do idia durua. (1 Petero 2:17) Unai bamona heduru dainai, bona oiemu lalona oi hadaia bona oi hekwarahi dainai, oiemu mauri lalonai anina do oi havaraia hari sibona lasi to ela bona hanaihanai!
Riviu Henanadai
◻ Anina korikorina be dahaka?
◻ Dahaka dainai Iehova ese iseda mauri ia biagua be gau badana?
◻ Edena dala ai matamata taudia ese ‘edia mauri dinadia idia duahia’ diba?
◻ Dahaka dainai kara dika taudia mama henia karana be kavakava karana?
◻ Edena dala ai dina ta ta Baibel duahiduahi karana bona hebou lao henidia hanaihanai karana ese matamata taudia ia durua edia mauri lalonai anina idia havaraia totona?
[Picture on page 20]
‘Dirava idia gari henia lasi’ dainai, matamata taudia momo ese idia sibona idia hadikaia karadia idia karaia
[Picture on page 22]
Nega momo matamata taudia idia laloaboio edia kara be mai edia davana
[Picture on page 23]
Baibel duahiduahi urana oi habadaia
[Picture on page 23]
Haere oi henia neganai, hebou do oi moalelaidia bada