Ta ese Taunimanima Ia Laloa Bada

TAUNIMANIMA tausen momo idia hahedinaraia idia be ma haida idia laloa bada. Edia lalona idia ha-aukaia lasi, bona idia laloa lasi ma haida edia hekwakwanai do idia lalo-hekwarahilaia lasi. Lasi, to idia karaia diba gaudia ibounai idia karaia​—⁠nega haida kahirakahira sibodia edia mauri idia haboioa​—⁠hisihisi idia kokia totona. Ia be gaukara bada hereana, bona idia biagua diba lasi siahu gaudia ese idia ha-aukaia.

Heduru ia henia gaukara tauna ta ia gwau, mataganigani, politikol koikoi karadia, tuari, bona idia vara kava dika badadia ese “hitolo haorea totona mai aonega bona ura bada ida idia karaia karadia” idia hadikaia. Hitolo haorea karana be ma haida idia laloa taudia edia hekwakwanai ta sibona. Idia be gorere, ogogami, maka tamona ai haida kara henidia lasi karana, bona tuari ese idia havaraia hisihisi koua totona idia hekwarahi bada danu. To idia kwalimu noho, a?

Heduru oreana ta ena tau badana ta ia gwau hitolo bona hisihisi koua totona “mai aonega bona ura bada ida idia karaia karadia” ia goadalaia tauna be Iesu Keriso ena parabole lalonai ia gwauraia hebogahisi Samaria tauna bamona. (Luka 10:​29-37) Ia gwau, herevana dahaka idia karaia, hisihisi idia davaria taudia edia namba be ia bada daekau noho. Unai dainai ia henanadai: “Samaria tauna namona be dahaka do ia karaia, bema lagani haida lalonai dina ta ta ai unai dala tamona dekenai ia raka bona pura ta ta ai henaoa taudia ese idia kara dika henia tauna ta be dala badinai ia davaria?”

Ia ese ‘durua henia taudia edia hesiku gorere dikana’ do ia davaria haraga bona mai lalohisihisi ida ena gaukara do ia hadokoa. To, haida idia laloa bada taudia be unai bamona idia karaia lasi. (Galatia 6:​9, 10) Hegeregere, Britain ena Jewish Telegraph ia tore henia tauna ta ese Iehova ena Witness taudia ia hanamodia, badina Nazi gavamani be Germany ia lohiaia neganai, idia ese “Jew taudia momo idia durua Auschwitz ena hisihisi amo idia roho mauri totona.” Ia gwau: “Aniani be hegeregere lasi neganai, idia ese iseda [Jew] tadikaka bona taihu ida edia paraoa idia haria!” Witness taudia ese idia dekenai idia noho gaudia amo ma haida idia durua noho.

To, momokani, herevana paraoa hida ita haria, unai ese taunimanima edia hisihisi do ia haorea lasi. Unai hereva ai gwauraia lasi, hebogahisi taudia idia karaia gaukarana ena anina hamaragia totona. Dala maorona ai hisihisi idia hamaragia karadia ibounai be mai anina bada. Unai Witness taudia be idia ida dibura ai idia noho taudia edia hisihisi idia hamaragia sisina, bona gabeai Nazi gavamani ena lohia negana ia doko danu. To, hisihisi ia havaraia tanobada oromana ia do noho, bona ma haida laloa lasi taudia momo idia do noho. Oibe, “ma haida edia isedia be tuari kaia, edia aukidia dekenai be kaia idia noho. Idia ese ogogami taudia, be tanobada dekena amo idia ania ore noho, bona gau lasi taudia be, taunimanima edia huanai dekena amo idia anidia ore danu.” (Aonega Herevadia 30:14) Reana, oi laloa dahaka dainai unai bamona idia karaia.

Dahaka Dainai Ogogami Bona Haida Hahisia Karadia Idia Vara?

Nega ta Iesu Keriso ia gwau: “Ogogami taudia be nega ibounai idia noho umui dekenai, bona umui ura neganai, kara namo umui karaia diba idia dekenai.” (Mareko 14:⁠7) Iesu ena hereva anina be ogogami bona haida hahisia karana be do idia noho hanaihanai, a? Taunimanima haida hegeregeredia, ia abia dae unai bamona hisihisi be Dirava ena palani hegeregerena hebogahisi taudia edia dala ia kehoa ma haida idia laloa bada karana idia hahedinaraia totona, a? Lasi! Iesu be unai ia abia dae lasi. Ena hereva ena anina be inai tanobada oromana ia do noho lalonai, ogogami be do ia noho. To Iesu be inai ia diba danu: Ena guba Tamana ena palani ginigunana lalonai, tanobada dekenai unai bamona noho dalana ena palani ia karaia lasi.

Iehova Dirava ese tanobada ia karaia paradaiso ai do ia lao totona, ia be ogogami, kara gageva, bona haida hahisia karadia ese do idia hadikaia gabuna lasi. Ia ese mauri moalelaia gaudia ia havaraia karana amo ia hahedinaraia ia be taunimanima ia lalodia bada. Oibe, iseda tama sina ginigunadia, Adamu bona Heva, ese idia noholaia umana ena ladana mani oi laloa! Idia gwauraia Eden, anina be “Moale Bada.” (Genese 2:​8, 9) Iehova ese lalohisihisi bona dagedage bada gabuna ai ia atodia lasi bona mauri durua gaudia haida sibona ia henidia lasi. Iehova ese ena havaraia gaukara ia karaia ore murinai, ia karaia gaudia ia itaia bona ia gwau “idia be namo herea.”​—⁠Genese 1:⁠31.

Vadaeni, dahaka dainai, hari ogogami, haida hahisia karana, bona hisihisi idia havaraia karadia ma haida be bada herea tanobada hegegemadai? Hari inai nega ena oromana dikana ia noho badina iseda tama sina ginigunadia ese Dirava idia gwau-edeede henia. (Genese 3:​1-5) Unai kara dainai Dirava be mai ena maoro ia havaraia gaudia ia hamaorodia ia idia kamonai henia eiava lasi ena henanadai ia vara. Unai dainai Iehova ese Adamu ena natudia dekenai sibodia do idia biagua negana sisina ia henia. Dirava be taunimanima dekenai idia vara gaudia ia do laloa bada. Dala ia karaia hegaegae ia idia gwau-edeede henia karana amo idia vara kara dika ibounai do ia haorea totona. Bona kahirakahira, Iehova ese ogogami bona haida hahisia karana​—⁠oibe, hisihisi ibounai do ia haorea.​—⁠Efeso 1:​8-10.

Taunimanima ese Idia Hanamoa Diba Lasi Hekwakwanaina

Dirava ese taunimanima ia havaraia negana amo ema bona hari, taunimanima be Iehova ena taravatu amo idia daudau momokani. (Deuteronomi 32:​4, 5) Dirava ena taravatu bona iena hakaua herevadia idia dadaraia noho dainai, taunimanima idia tuari heheni, bona “taunimanima haida ese ma haida idia biagua noho, bona idia hisihisi henidia noho.” (Hadibaia Tauna 8:⁠9) Haida idia hekwarahi taunimanima kara henidia maoromaoro, taunimanima idia hahisia karadia be lasi gabuna idia havaraia totona, to edia hekwarahi ibounai be mataganigani taudia, Dirava ena lohia dalana idia abia dae lasi to sibodia edia ura idia badinaia taudia, ese idia hadikaia.

Hekwakwanai ma ta ia noho​—⁠reana momo do idia gwau ia be gari ia havaraia kava herevana ta. Dirava gwau-edeede henia karana ia havaraia tauna be taunimanima ia veria noho do idia kara dika bona sibona edia ura idia laloa bada totona. Ia be Satani Diabolo, bona Iesu Keriso ese ia gwauraia “tanobada ena lohia.” (Ioane 12:31; 14:30; 2 Korinto 4:4; 1 Ioane 5:19) Aposetolo Ioane ese ia itaia matahanai lalonai, ia hedinarai hekwakwanai ibounai edia badina badana be Satani​—⁠ia ese “tanobada taudia ibounai ia koia noho.”​—⁠Apokalupo 12:​9-12.

Herevana, taunimanima haida ese ma haida idia laloa bada, idia ese Satani Diabolo do idia kokia diba lasi eiava hisihisi idia davaria taudia edia namba ia habadaia noho tanobada oromana do idia haidaua diba lasi. Vadaeni, dahaka ese taunimanima edia hekwakwanai do ia haorea? Hanamoa gauna be taunimanima ia laloa tauna sibona lasi. Ita ura gauna be mai ena ura ida Satani bona iena tanobada oromana dikana do ia haorea diba tauna mai siahuna.

“Oiemu Ura Gauna Tanobada Dekenai Do” Ia Vara

Dirava ia gwauhamata inai tanobada oromana dikana do ia hadikaia ore. Unai be iena ura bona ia be mai ena siahu unai ia karaia totona. (Salamo 147:​5, 6; Isaia 40:​25-31) Baibel ena peroveta bukana Daniela lalonai, ia gwau: “Unai basileia namba 4 ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.” (Daniela 2:44) Iesu Keriso ese ena hahediba taudia dekenai Dirava do idia guriguri henia dalana ia hadibaia neganai, unai noho hanaihanai bona namo do ia havaraia guba gavamanina ia laloa: “Oiemu Basileia do ia mai, oiemu ura gauna tanobada dekenai do [ia vara], guba dekenai idia karaia bamona.”​—⁠Mataio 6:​9, 10.

Iehova ese unai bamona guriguri do ia haerelaidia badina ia be taunimanima ia laloa bada. Salamo 72 ena peroveta herevadia hegeregerena, Dirava ese iena Natuna, Iesu Keriso, dekenai siahu do ia henia ogogami taudia, hisihisi idia davaria taudia, bona haida ese idia dagedage henia taudia, ena lohia siahuna idia ura henia taudia unai, edia hekwakwanai do ia haorea totona. Dirava ena lauma ese ia hasiahua salamo torea tauna be inai ane ia abia: “King [Dirava ena Mesia Basileiana ena King] do oi durua, ia ese, ogogami taudia maka tamona dekenai do ia kota henidia, bona ia ese gau lasi taudia edia natudia do ia durua. Ma haida idia dagedage henidia taudia, be king ese idia do ia atoa diho. Ogogami taudia be ia dekenai idia boiboi neganai, ia ese do ia durua. Edia gau be lasi, bona edia durua be lasi taudia, be king ese do ia hamauria. Ia ese manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria. Bema unai ogogami taudia, be haida ese idia dagedage henia neganai, king ese unai ogogami taudia do ia hamauria. Ia ese edia mauri do ia naria namonamo noho, badina edia mauri be gau namo herea ia dekenai.”​—⁠Salamo 72:​4, 12-14.

Iseda nega ia hahedinaraia matahanaina lalonai, aposetolo Ioane ese “guba matamatana bona tanobada matamatana” ia itaia, Dirava ese ia haginia tanobada oromana matamatana unai. Hisihisi idia davaria taudia dekenai unai be hahenamo badana! Iehova ese do ia karaia gaudia ia perovetalaia neganai, Ioane ese inai ia torea: “Gado ta lau kamonai, helai gabuna badana dekena amo ia mai, ia hereva badabada, ia gwau, ‘Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.’ Vadaeni helai gabuna badana latanai ia helai Diravana ia hereva, ia gwau, ‘Harihari be gau ibounai lau karaia matamata inai.’ Ma lau dekenai ia hereva, ia gwau, ‘Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.’ ”​—⁠Apokalupo 21:​1-5.

Oibe, unai hereva ita abia dae diba, badina idia be maoromaoro bona momokani. Kahirakahira Iehova ese kara ta do ia karaia tanobada amo ogogami, hitolo, ma haida dagedage henia karana, gorere, bona kara gageva ibounai do ia haorea totona. Inai magasin ese Baibel siridia amo ia hahedinaraia hegeregerena, idia vara gaudia momo herea ese idia hamomokania ita be unai gwauhamata do idia guguru negana ai ita noho. Dirava ese ia gwauhamatalaia tanobada matamatana be kahirakahira do ia mai! (2 Petero 3:13) Kahirakahira, Iehova ese “mase do ia haorea momokani ela bona hanaihanai” bona “tai ena ranu be taunimanima ibounai edia matadia dekena amo do ia dahua ore.”​—⁠Isaia 25:⁠8.

To unai ita naria noho lalonai, ita moale diba badina hari inai negai taunimanima idia laloa bada taudia haida idia noho danu. Ita moale ena badina badana be Iehova Dirava ese taunimanima ia lalodia bada. Kahirakahira ia ese ma haida dagedage henia karana bona hisihisi karadia ibounai do ia kokia.

Oi ese Iehova ena gwauhamata oi abia dae momokani diba. Ena hesiai tauna Iosua ese ia abia dae momokani. Mai ena abidadama ida, Dirava ena idaunegai besena dekenai ia gwau: “Umui ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.” (Iosua 23:14) Unai dainai, inai tanobada oromana dikana ia do noho lalonai, oi davaria hahetoho oi haheaukalaidia be namo. Emu lalo-hekwarahi ibounai be Iehova ena imana dekenai do oi atoa, badina ia ese taunimanima ia lalodia bada.​—⁠1 Petero 5:⁠7.

[Pictures on page 7]

Dirava ese ia gwauhamatalaia tanobada matamatana lalonai, ogogami, haida dagedage henia karana, gorere, bona kara gageva do idia noho lasi