Dahaka Dainai Oiemu Gwauhamata Oi Hagugurudia?

BERNARD BARUCH, presiden ena sisiba henia tauna gunana, ia gwau: “Gau momo ia gwauhamatalaia lasi tauna umui abia hidi; ia ese emui lalona do ia hahisia bada lasi.” Hari inai negai, toana be gwauhamata idia karaia bena idia hamakohia. Reana unai be headava gwauhamatana, bisinesi gwauhamatana, eiava natu dekenai nega gwauhamatalaia karadia. Taunimanima momo ese inai hereva badana ena anina idia dadaraia: “Tau ta ena namo be ena hereva ia badinaia karana ese ia hahedinaraia.”

Oibe, taunimanima momo be edia gwauhamata hagugurua karana idia laloa lasi. Ma haida be idia hagugurua diba lasi gwauhamatadia idia gwauraia eiava idia badinaia lasi badina unai be dala haragana.

Momokani, hekwakwanai ia vara neganai, reana gwauhamata ta hagugurua karana be auka. To, gwauhamata badinaia lasi karana ese dika bada ia havaraia, a? Emu gwauhamata oi laloa bada be namo, a? Iehova Dirava ena haheitalai ita tahua karana ese ita ia durua, dahaka dainai unai kara ita laloa bada totona.

Iehova ese Ena Gwauhamata Ia Hagugurudia

Ita tomadiho henia Diravana ena ladana be mai anina bada gwauhamata hagugurua karana dekenai. Baibel ia sivarailaia negadia ai, ladana ta ese tau ta ia kikilaia. Unai be momokani Iehova ena ladana dekenai danu, badina iena ladana ena anina be “Ia ese Ia Halaoa.” Unai amo ita lalo-parara Dirava ena ladana ese ia hahedinaraia Dirava ese ena gwauhamata bona palani do ia hagugurudia.

Iena ladana ena anina hegeregerena, Iehova ese Israela besena dekenai ia gwauhamatalaia gaudia ibounai be ia hamomokania. Unai gwauhamata dainai, King Solomona ia gwau: “Lohiabada do ita hanamoa, badina be ia ese iena bese Israela dekenai maino ia henia, iena gwauhamata ibounai hegeregere. Iena gwauhamata namodia ibounai, iena hesiai tauna Mose ena uduna dekenai ia gwauraia gaudia, be Lohiabada ese ia badinaia vadaeni.”—1 King Taudia 8:​56.

Iehova ita abidadama henia momokani diba dainai aposetolo Paulo ia gwau: “Dirava ese Aberahamo dekenai ia gwauhamata neganai, ta ese Dirava ia hereaia lasi dainai, unai gwauhamata ia henia sibona ena ladana dekenai.” (Heberu 6:​13) Oibe, Iehova ena ladana bona ia sibona ese ia hamomokania, ia ese ena gwauhamata be do ia hagugurua momokani, herevana ena lalona do idia hahisia diba. (Roma 8:​32) Iehova ese ena gwauhamata ia hagugurudia dainai helaro namona ia havaraia, bona unai be dogo ta bamona iseda souli, eiava mauri dekenai.​—Heberu 6:​19.

Iehova Ena Gwauhamata Bona Iseda Vaira Negana

Iehova ena gwauhamata hagugurua karana be mai anina bada iseda helaro, iseda abidadama, bona iseda mauri ibounai dekenai. Iseda helaro be dahaka? “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:​13) Baibel ese ita abidadama ena badina ia gwauraia danu, unai dainai ita abia dae diba “mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Bona ita diba momokani inai nega ena mauri sibona ia noho lasi. Oibe, aposetolo Ioane ia gwau, unai “gwauhamata gauna” be “mauri hanaihanai.” (1 Ioane 2:​25) Iehova ena Hereva lalonai ia gwauhamatalaia herevadia be nega vaira totona sibona lasi. Iseda dina ta ta maurina dekenai, idia be mai anina bada momokani.

Salamo torea tauna be ane ia abia, ia gwau: “Lohiabada be ia dekenai idia boiboi taudia dekenai ia noho . . . [bona] edia taitai ia kamonai.” (Salamo 145:18, 19) Danu, Dirava ese ita ia hamaoroa, “manoka bona hesiku taudia be [ia] ese ia hagoadaia noho, bona goada lasi taudia edia goada ia habadaia noho.” (Isaia 40:29) Bona eda lalona ia hagoadaia bada gauna ta be ‘Dirava ese ita do ia naria, iseda goada ia hanaia dibagani ese ita do ia pidia garina. Bona dibagani ia mai neganai, iseda dala ta do ia kehoa’! (1 Korinto 10:13) Bema ita dekenai unai gwauhamata herevana ta ia guguru vadaeni, ita diba momokani Iehova ita abidadama henia momokani diba. Dirava ese gwauhamata momo ia karaia bona ia hagugurudia karana amo hahenamo momo ita abia dainai, iseda gwauhamata ia dekenai be edena bamona ita laloa?

Dirava Dekenai Iseda Gwauhamata Ita Hagugurua

Dirava dekenai ita karaia gwauhamatana be mai anina bada gwauhamatana. Unai dala ita abia hidi neganai, ita hahedinaraia ita ura Iehova do ita badinaia ela bona hanaihanai. Dirava ena taravatu be idia metau lasi, to reana inai tanobada dikana ai iena ura ita karaia bona ita noho be mai ena hekwarahi. (2 Timoteo 3:​12; 1 Ioane 5:3) To, bema ita ese ‘tano makohia gauna be iseda imana dekenai ita dogoatao’ bona Iehova ena gwauhamata hesiai taudia ai ita lao bona iena natuna Iesu Keriso ena murinai ita raka vadaeni, gau badana be iseda murina dekenai ita rakatania tanobada gaudia ita itaia lasi.​—⁠Luka 9:​62.

Dirava ita guriguri henia neganai, reana ia ita gwauhamata henia hekwakwanai ta do ita hanaia toho, Keristani kara ta ita habadaia, eiava iseda tiokratik gaukaradia haida ita habadaia totona. Dahaka ese ita do ia durua unai gwauhamata ita karaia totona?​—⁠Hadibaia Tauna 5:​2-5 itaia.

Gwauhamata momokanidia be kudouna bona lalona dekena amo idia mai. Unai dainai, Iehova dekenai iseda gwauhamata ita gurigurilaia neganai, namona be iseda kudou ita kehoa, iseda gari, ura gaudia, bona manoka, ita hahedinaraia mai eda momokani ida. Gwauhamata herevana ta ita gurigurilaia neganai, unai ese iseda lalona do ia hagoadaia ita badinaia totona. Ita laloa diba iseda gwauhamata be iseda abitorehai bamona Dirava dekenai. Abitorehai idia bada neganai, namona be ena davana sisina do ita karaia be namo. Unai hegeregerena, nega ia hanaia lalonai Iehova dekenai ita karaia gwauhamatadia do ita hagugurua. To, hanaihanai iseda goada hegeregerena ita henia neganai, ita hahedinaraia iseda hereva ita badinaia momokani, bona ia ese ita do ia hanamoa.

Iseda gwauhamata laloa bada karana do ita hahedinaraia diba, dina ta ta ita gurigurilaidia loulou karana amo. Unai amo iseda guba Tamana do ita hadibaia, ita be unai ita laloa momokani. Danu, unai ese ita do ia hadibaia loulou. Davida be haheitalai namona ia karaia ita dekenai. Ane amo Iehova ia noia, ia gwau: “Dirava e, egu taitai do oi kamonai. Egu guriguri mani do oi abia dae. . . . Lau ese ane dekenai, oiemu ladana do lau hanamoa, bona dina ta ta ibounai, egu gwauhamata gaudia oi dekenai, be do lau karaia momokani.”​—⁠Salamo 61:​1, 8.

Iseda Gwauhamata Ita Hagugurua Karana ese Abidadama Ia Habadaia

Bema Iehova dekenai ita karaia gwauhamata ita badinaia diba, namona be iseda tadikaka dekenai unai ita karaia danu. Namo lasi Iehova ita kara henia idau bona iseda tadikaka ita kara henidia idau. (1 Ioane 4:​20 itaia.) Ororo dekenai, Iesu ena Hereva Badana lalonai, ia gwau: “Oiemu hereva do oi gwauraia, ‘Oibe’ sibona, o ‘Lasi’ sibona.” (Mataio 5:​37) Namona be ita hamomokania iseda hereva idia abidadama henia diba, unai be ‘abidadama taudia ita durua bada herea’ dalana ta. (Galatia 6:​10) Ita hagugurua gwauhamatadia ta ta ibounai ese edia abidadama iseda hereva dekenai ia habadaia.

Nega momo gwauhamata hamomokania ena dika ia bada, bema ia be moni gwauhamatana. Herevana unai be abitorehai ena davana henia karana, gaukara ta ia karaia, eiava bisinesi gwauhamatana, gau badana be Keristani tauna ese ena hereva do ia badinaia. Unai ese Dirava ia hamoalea bona tadikaka idia abidadama heheni karana ia hagoadaia, bona unai be mai anina tadikaka “idia noho hebou mai edia laloa tamona” totona.​—Salamo 133:⁠1.

To, gwauhamata herevadia badinaia lasi karana ese kongregesen bona unai gwauhamata dekenai idia vareai taudia do ia hahisia bada. Sekit naria tauna ta, ia gwau: “Bisinesi hepapahuahudia​—⁠kahana ta ese ena gwauhamata ia badinaia lasi dainai idia vara gaudia​—⁠be nega momo taunimanima ese idia dibaia. Unai kara dainai, tadikaka be idia parara kahana ta ta dekenai, bona Kingdom Hall lalonai hemami dikana ia noho.” Unai dainai, gwauhamata ta ita karaia neganai, gau badana be ita laloa namonamo bona pepa dekenai ita torea!a

Danu, bema dava bada kohudia ita hoihoilaia eiava bisinesi ta dekenai moni atoa vareai karana ita herevalaia, bona bema unai gaudia amo moni haida do ita abia danu, namona be ita naria namonamo. Unai hegeregerena, namona be ita naria namonamo kohu ta eiava tauanina durua gaudia edia namo eiava bisinesi ta dekenai moni atoa vareai karadia amo moni bada do idia abia herevadia ita habadaia kava garina. Namona be lalokau ese Keristani taudia ia veria, unai gaudia amo idia vara diba hekwakwanai idia herevalaia namonamo. (Roma 12:10) Tadikaka momo be bisinesi haheaua dalana idia diba momo lasi, unai dainai reana iseda sisiba idia badinaia, badina idia bona ita be abidadama tamona taudia. Bema unai abidadama heheni karana ita hadikaia, dika bada herea do ia vara!

Ita be Keristani taudia dainai, koikoi dalana amo bisinesi haheaua eiava ma haida edia namo korikori laloa lasi karadia do ita badinaia lasi. (Efeso 2:​2, 3; Heberu 13:18) Bema ita ura Iehova ena lalo-namo ita abia bona ‘ena Dubu Helaga dekenai do ita noho,’ namona be ma haida ese eda hereva idia abidadama henia diba. ‘Sedira do ita davaria, iseda gwauhamata hereva do ita badinaia be auka herea, to ia be idau lasi, do ita badinaia noho.’​—⁠Salamo 15:​1, 4.

Israela edia hahemaoro tauna Iefeta be Dirava dekenai ia gwauhamata bema ia durua tuari dekenai Amona taudia ia halusia, do ia hedavari henia tauna ginigunana be boubou gauna ta bamona, Iehova dekenai do ia henia. Bona Iefeta ia hedavari henia tauna ginigunana be ena natuna kekeni tamona, to iena hereva ia haidaua lasi. Ena natuna kekeni be ena kudouna ibounai ida ia haere dainai, ia henia Iehova ena kalaga helaga dekenai hesiai gaukara do ia karaia hanaihanai totona​—unai boubou gauna ia henia be mai ena hisihisi bona davana bada ia haboioa bamona.​—Gunalaia Taudia 11:​30-​40.

Kongregesen naria taudia be mai edia maduna idia abia dae herevadia idia badinaia totona. Timoteo Ginigunana 3:2 ena hereva bamona, kongregesen naria tauna be “kerere lasi.” Greek gado ai, unai hereva ena anina be “idia dogoatao be hegeregere lasi, idia samania be hegeregere lasi, idia samania diba lasi.” Unai “ena anina be unai tau ena ladana ia namo sibona lasi, to unai bamona idia gwauraia be maoro.” (A Linguistic Key to the Greek New Testament) Kongregesen naria tauna be kerere lasi tauna dainai, nega ibounai ena gwauhamata ia badinaia be maoro.

Iseda Gwauhamata Ita Hagugurua Daladia Ma Haida

Keristani lasi taudia dekenai ita karaia gwauhamatadia be edena bamona ita laloa be namo? Iesu ia gwau: “Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” (Mataio 5:​16) Iseda hereva ita hamomokania karana amo, ma haida edia lalona ita veria diba iseda Keristani sivarai idia kamonaia totona. Inai tanobada dekenai kara bona hereva momokani ia maragi ia lao, to taunimanima momo ese kara maoromaoro idia do laloa bada. Iseda gwauhamata ita hagugurua karana be dala ta Dirava bona dekena taudia dekenai iseda lalokau ita hahedinaraia totona bona kara maoromaoro idia ura henia taudia ita veria.​—Mataio 22:​36-​39; Roma 15:⁠2.

Iehova ena Witness taudia edia hesiai laganina 1998 lalonai, idia ese hora bilioni ta mai kahana idia gaukaralaia Dirava ena Basileia ena sivarai namona idia harorolaia totona. (Mataio 24:14) Bema bisinesi eiava ma gau haida dekenai iseda gwauhamata ita badinaia lasi, reana idia ese unai haroro herevadia haida idia kamonaia lasi. Ita be hereva momokani Diravana ena ladana ai ita gaukara dainai, taunimanima be iseda kara momokani sibona idia tahua. Iseda hereva idia abidadama henia bona iseda kara momokani amo ‘hairai bona mataurai be Sivarai Namona dekenai ita havaraia, unai Sivarai Namona be iseda Hamauria Tauna Dirava ena.’​—⁠Tito 2:​10.

Iseda haroro gaukara lalonai, Basileia ena sivarai ia kamonai tauna ita lou henia neganai, ita ese iseda hereva ita hagugurua diba. Bema ita gwau do ita giroa lou, vadaeni unai bamona ita karaia. Iseda gwauhamata bamona ita giroa lou neganai, ita ese taunimanima namodia dekenai ‘iseda durua ita koua lasi.’ (Aonega Herevadia 3:​27) Taihu ta ese unai kara ia herevalaia neganai, ia gwau: “Nega haida, kamonai taudia haida lau davaria neganai, idia gwau, Witness tauna ta ese ia gwauhamata henidia do idia giroa lou, to idia giroa lou lasi. Oibe, lau diba reana unai negai, reana ruma tauna be ia noho lasi eiava gau ta ia vara dainai idia giroa lou lasi. To, lau ura lasi ta ese lau dekenai unai bamona do ia gwauraia, unai dainai lau hekwarahi ruma tauna do lau lou henia momokani totona. Lau diba bema ta lau laloa bada lasi neganai, unai ese Iehova bona tadikaka ibounai edia ladana do ia hadikaia.”

Ma nega haida, reana do ita ura lasi unai tauna ita lou henia, badina ita laloa ia be ia ura momokani lasi. Unai taihu tamona be ia gwau: “Lau be ta ena kamonai karana ena bada lau tahua toho lasi. Lau davaria ekspiriens ese lau idia hadibaia nega momo toa ginigunana dainai oi laloa gauna ia kerere. Unai dainai, lalohadai maorona lau abia toho, lau laloa idia ta ta be tadikaka bona taihu namodia ai do idia lao.”

Namona be Keristani haroro gaukara bona ma gaukara haida dekenai, ita hahedinaraia iseda hereva idia abia dae diba. Momokani, gau haida ita gwauraia be haraga, to ita badinaia be auka. Aonega tauna ia gwau: “Taunimanima momo ese, sibodia edia kara momokani bona lalokau idia gwauraia noho, to kara momokani bona lalokau momokani tauna, be daika ese do ia davaria diba?” (Aonega Herevadia 20:⁠6) Mai iseda lalo-goada ida, iseda hereva ia maoromaoro bona momokani diba.

Hahenamo Momo Dirava Amo

Mai ena ura bada ida anina lasi gwauhamata ia karaia tauna be koikoi tauna bona ia be banika dekenai moni lasi to seke ia torea kava tauna bamona. To, iseda gwauhamata ita hagugurua karana dainai, hahenamo bada ita abia! Sibona ena hereva ia badinaia tauna ena hahenamo ta be iena lalona ena hemami ia namo. (Kara 24:16 itaia.) Unai amo lalohisihisi ena mamina do ita abia lasi, to namo bona maino mamina do ita abia. Unai sibona lasi, iseda hereva hagugurua karana amo, kongregesen ena lalo-tamona ita habadaia unai lalo-tamona dekenai abidadama heheni be mai anina bada. Danu, iseda “hereva momokani” ese ia hamomokania ita be Dirava ena hesiai taudia momokanidia.​—⁠2 Korinto 6:​3, 4, 7.

Iehova ese ena hereva ia hamomokania, bona “uduna mai ena koikoi” ia ura henia lasi. (Aonega Herevadia 6:​16, 17) Iseda guba Tamana ita tohotohoa neganai, ia kahirakahira dekenai ita lao noho. Momokani, iseda gwauhamata ita hagugurudia be namo.

[Footnote]

[Pictures on page 10]

Iefeta ese ena gwauhamata ia hagugurua, ena be unai ia karaia be mai ena hisihisi

[Pictures on page 11]

Bema oi gwauhamata do oi giroa lou, namona be oi hegaegae unai bamona oi karaia totona