Lalokau Ena Dala Hereadaena Do Ita Dibaia Noho

Kosovo, Lebanon, bona Ireland. Unai tano ladadia be vanegai lagani lalodiai niusi dekenai idia hedinarai momo. Taunimanima ese idia kamonai neganai, rara bubua karadia, bomu negea karadia, bona ala-ala karadia idia laloa. Oibe, tomadiho, bese, iduhu, eiava idia idau gaudia ma haida dainai idia vara dagedage karadia be kara matamatadia lasi. Taunimanima edia sivarai be unai kara ese idia hahonua, bona taunimanima dekenai hisihisi bada herea idia havaraia.

HISTORI ibounai lalonai tuari momo idia vara dainai, momo idia laloa tuari be hanaihanai idia vara gaudia bona ta ta inai henia karana be vaia taunimanima edia kara. To, unai bamona lalohadai, be Dirava ena Hereva, Baibel, ena hahediba herevadia amo idia idau. Baibel ia hahedinaraia goevagoeva, ia gwau: “Mai ena lalokau lasi tauna ese Dirava ia diba lasi, badina Dirava be lalokau.” (1 Ioane 4:⁠8) Ia hedinarai goevagoeva Havaraia Tauna ia ura taunimanima do idia lalokau heheni.

Baibel ia hahedinaraia danu, taunimanima be Dirava ena toana hegeregerena ai ia karaia. (Genese 1:​26, 27) Unai ese ia hahedinaraia Dirava ese taunimanima edia lalonai iena kara idia hahedinaraia diba dalana ia atoa, ena kara badana be lalokau. Unai dainai, badina be dahaka histori lalonai taunimanima be ta ta dekenai lalokau idia hahedinaraia lasi? Baibel ese unai kara ena badina ia hahedinaraia danu. Badina be tau bona hahine ginigunadia, Adamu bona Heva, be Dirava idia gwau-edeede henia bona idia kara dika. Unai kara dainai, edia natudia ibounai dekenai kara dika ia hanaia bona idia goevadae lasi. Roma 3:23 ia gwau: “Badina be ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” Ita be mai iseda kara dika bona ita goevadae lasi dainai Dirava ese ita ia henia lalokau hahedinaraia dalana ita badinaia be auka. Unai ena anina taunimanima ta ta idia lalokau heheni diba lasi, a? Ma haida ida maino bona lalokau ai do ita turana karaia diba helarona ta ia noho, a?

Dirava Lalokau Henia Karana Do Ita Dibaia

Iehova Dirava ia diba, ena be taunimanima idia goevadae lasi, idia ese lalokau idia hahedinaraia diba. Unai dainai ena ura be ia idia ura hamoalea taudia iboudiai do idia hekwarahi lalokau idia hahedinaraia totona. Dirava ena Natuna, Iesu Keriso, ese unai ia hahedinaraia goevagoeva, Israela besena ese ia abia Taravatuna ena hahegani badana idia nanadaia neganai. Ia gwau: “ ‘Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.’ Inai be taravatu bada herea momokani. Ia be ginigunana. Iharuana be inai, ginigunana hegeregerena, ‘Oiemu badibadinai tauna dekenai oi lalokau henia, oi sibona oi lalokau henia bamona.’ Inai hereva ruaosi be taravatu bona peroveta taudia edia hereva ibounai edia anina idia haboua.”​—⁠Mataio 22:​37-40.

To, taunimanima momo idia laloa idia itaia diba lasi tauna idia lalokau henia be auka, bona ita taunimanima be Iehova Dirava ita itaia diba lasi badina ia be Lauma ta. (Ioane 4:24) To, dina ta ta ibounai Dirava ese ia karaia gaudia be mai anina iseda mauri lalonai, badina iseda namo totona ia havaraia gaudia namodia momo dainai ita noho. Aposetolo Paulo ese unai ia hahedinaraia, inai ia gwauraia neganai: “To [Dirava] ese taunimanima dekena amo ia hunia lasi. Lasi, ia ese iena noho ia hamomokania noho, iena kara namodia dekena amo, gaudia inai: Medu ia siaia diho guba dekena amo, bona aniani haboua nega namodia ia henia umui dekenai. Boga kunu ia henia umui dekenai, bona emui kudouna dekenai moale ia havaraia.”​—⁠Kara 14:⁠17.

Ena be taunimanima iboudiai be Havaraia Tauna ese ia henia gaudia amo namo idia davaria, haida sibona ese ia idia laloa eiava ia idia tanikiu henia. Unai dainai, Dirava ese ita totona ia karaia gaudia namodia ibounai do ita laloa bona ena gaukara lalonai ia hahedinaraia kara hereadaedia do ita laloa dobu. Unai ita karaia neganai ita do ia durua iseda Havaraia Tauna Badana ena aonega bada bona siahu ita lalo-pararalaia totona. (Isaia 45:18) Gau badana be, ita ia durua do ita itaia ia be lalokau Diravana, badina ita dekenai mauri sibona ia henia lasi, to dala ia karaia iseda mauri lalonai gau momo ita moalelaia totona.

Hegeregere, Dirava ese tanobada dekenai ia karaia palaoapalaoa idauidau momo herea mani oi laloa. Ita moale bada diba, badina ita dekenai matana ia henia danu bona unai herahera gaudia edia hairai ita itaia bona ita moalelaia diba! Unai hegeregerena, Dirava ese aniani namodia idauidau ia henia ita mauri noho totona. Bona ia hedinarai ita ia laloa bada, badina ita ia karaia neganai aniani ita mamia diba dalana ia henia danu, unai amo aniani ita moalelaia diba! Unai gaudia ese idia hamomokania Dirava be ita ia lalokau henia momokani bona iseda namo ia laloa bada, ani?​—⁠Salamo 145:​16, 17; Isaia 42:​5, 8.

Havaraia Tauna be “guba bona tanobada ai ita itaia gaudia” amo sibona lasi, to iena Hereva, Baibel, amo danu ia hahedinaraia ia be edena bamona Diravana. Unai be momokani badina Baibel lalonai Iehova Dirava ese guna mai lalokau ida ia karaia gaudia edia sivarai bona kahirakahira taunimanima totona do ia hagugurua hahenamo momo edia gwauhamata idauidau idia noho. (Genese 22:​17, 18; Esodo 3:17; Salamo 72:​6-16; Apokalupo 21:​4, 5) Mai anina bada gauna be, Baibel ese ita dekenai Dirava ena lalokau bada karana taunimanima totona ia hahedinaraia​—⁠ia havaraia Natuna Tamona ia henia iseda Mauri Hoia Lou Tauna ai ia lao totona, unai amo ita be kara dika bona mase ena igui amo ia ruhaia. (Roma 5:⁠8) Oibe, iseda lalokau Havaraia Tauna ita dibaia namonamo neganai, unai ese ita ia veria iseda kudouna amo ia ita lalokau henia totona.

Ma Haida Lalokau Henidia Karana Dibaia

Iesu ese ia hahedinaraia bamona, iseda kudouna, souli, bona lalona ibounai ida Dirava ita lalokau henia sibona lasi, to namona be iseda dekena tauna do ita lalokau henia ita sibona ita lalokau henia hegeregerena. Oibe, Dirava ese ita ia lalokau henia karana ena maduna ena anina be taunimanima ma haida do ita lalokau henia. Aposetolo Ioane ia gwau: “Lauegu lalokau taudia e, Dirava ese unai bamona ita ia lalokau henia dainai, namona be ita ta ta dekenai do ita lalokau henia.” Ma ia hereva lou, ia gwau: “Tau ta bema ia gwau, ‘Lau ese Dirava lau lalokau henia,’ to ia ese iena tadikakana ia badu henia, unai tau be koikoi tauna. Badina be iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba? Keriso ese ita dekenai ia henia taravatu be inai: Dirava ia lalokau henia tauna ese iena tadikakana danu do ia lalokau henia.”​—⁠1 Ioane 4:​11, 20, 21.

Hari ita noholaia tanobadana lalonai, taunimanima momo be sibodia edia ura tahua guna lalohadaina idia hahedinaraia, Baibel ena peroveta herevana hegeregerena, “taunimanima ese idia edia ura sibona do idia tahua.” (2 Timoteo 3:⁠2) Unai dainai, bema ita ura lalokau ena dala hereadaena ita dibaia, namona be iseda laloa dalana do ita haidaua goadagoada bona iseda lalokau Havaraia Tauna do ita tohotohoa, namona be hari idia noho taudia ese idia badinaia sibodia edia ura tahua guna dalana ita tohotohoa lasi. (Roma 12:2; Efeso 5:⁠1) “Dirava ese ia dekenai idia tanikiu henia lasi taudia bona kerere taudia danu ia bogahisihisi henidia” bona “kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” Iseda guba Tamana ese ita dekenai unai haheitalai hereadaena ia hahedinaraia dainai, namona be ita hekwarahi taunimanima ibounai do ita hebogahisi henidia bona ita durudia. Unai ita karaia neganai, do ita hamomokania ita be ‘iseda lalokau guba Diravana ena natudia.’​—⁠Luka 6:35; Mataio 5:⁠45.

Nega haida unai bamona lalokau karadia dainai taunimanima be Dirava momokanina tomadiho henia taudia ai idia lao. Lagani haida gunanai Iehova ena Witness hahinena ta, ruma dekenai ia gaukara hahinena, be ena dekena hahine dekenai Baibel ena sivarai ia harorolaia toho, to unai hahine be ia ura lasi momokani. To, ena kara ese Witness hahinena ia koua lasi. Ia hekwarahi noho ena dekena hahine dekenai hebogahisi ia hahedinaraia bona ia durua toho totona. Nega ta ena dekena hahinena ia durua ena kohu be ruma ma ta dekenai ia abia lao. Nega ma ta ai, dala ia karaia hahine ma ta ese unai dekena hahine be peleini diho gabuna dekenai ia abia lao ena varavara ta ia hedavari henia totona. Gabeai, unai dekena hahine ese Baibel stadi ia abia dae bona murinai Keristani hahine goadana ai ia lao, ena be ena tau ese ia dagedage henia bada. Oibe, unai lalokau karadia ese noho hanaihanai hahenamodia abia dalana idia lailaia.

Momokani, ita gwau diba lasi, ita be mai eda kara namodia momo dainai Dirava ese ita ia lalokau henia. Lasi, ena be ita be mai eda kara dika bona mai eda kerere momo, to ia ese ita ia lalokau henia. Unai dainai, ena be ma haida be mai edia kerere momo, namona be idia lalokau henia dalana ita dibaia. Bema ita sibona ita hadibaia ma haida edia kara namodia ita itaia bona ita laloa bada totona, bona edia kerere ita tahua lasi, do ita davaria idia ita lalokau henia be auka lasi. Idia dekenai lalohadai maorona dainai ia vara lalokauna sibona ita hahedinaraia lasi, to turana korikoridia huanai ia noho ura heheni karana danu ita hahedinaraia.

Emu Lalokau Oi Habadaia

Lalokau bona hetura karana ita naria bona habadaia be gau badana, bona kara momokani bona maoromaoro be mai anina bada unai karaia totona. Haida be edia kerere idia hunia toho badina idia ura idia tura henia taudia ese edia kara namona sibona do idia itaia. To, nega momo unai bamona kara ese dika ia havaraia, badina gabeai edia turadia ese hereva momokani idia kamonai bona edia koikoi karana dainai idia ura henidia lasi. Unai dainai, namona be ita gari lasi haida ese iseda kara momokani idia diba totona​—⁠ena be ita be mai eda kara dika bona ita hekwarahi noho ita hadokoa totona. Unai ese dala do ia kehoa diba idia ida ita turana karaia totona.

Hegeregere, Asia kahana ai kongregesen ta dekenai Witness taihu burukana ta be edukeisen sisina sibona ia abia. To, ma haida amo unai ia hunia lasi. Hegeregere, ia hahedinaraia goevagoeva ia ese Baibel peroveta herevadia bona histori amo ma haida dekenai Idau Bese Edia Nega be lagani 1914 ai ia doko ia hahedinaraia diba lasi.a To, haroro gaukara lalonai ia gaukara goadagoada bona tadikaka bona taihu dekenai lalokau bona hariharibada ia hahedinaraia dainai idia gwau ia be kongregesen ena herahera nadina.

Tano haida dekenai, taunimanima vairadiai ta dekenai lalokau hahedinaraia karana idia abia dae lasi; taunimanima idia hadibadia haida idia kara henia neganai, namona be hemataurai karana idia hahedinaraia. Nega ibounai haida ita matauraia bona ita laloa be namo, to namo lasi iseda hemataurai bada karana ese idia dekenai iseda hemami hahedinaraia karana ia koua eiava ia hunia. Iehova be iena abia hidi taudia, idaunegai Israela besena, dekenai ena hemami ia hahedinaraia totona ia hemarai lasi, idia dekenai ia gwau: “Nega ibounai lau ese umui lau ura henia vadaeni, bona inai noho hanaihanai lalokau be umui dekenai do lau henia noho.” (Ieremia 31:⁠3) Unai hegeregerena, aposetolo Paulo ese Tesalonika tadikaka ia hamaorodia, ia gwau: “Umui ai lalokau henia bada dainai, ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada noho.” (1 Tesalonika 2:⁠8) Unai dainai ma haida dekenai lalokau korikorina ita hahedinarai totona ita hekwarahi neganai, ita be Baibel ena hahediba herevana hegeregerena ita kara, bema unai bamona hemami ita koudia lasi to ita hahedinaraia.

Do Ita Hekwarahi Noho

Ma haida ita lalokau henia bona idia dekenai unai lalokau ita hahedinaraia karana be do ita dibaia noho gauna. Unai ita karaia totona do ita gaukara goadagoada badina ita hekwarahi iseda kara dika ita koua bona inai lalokau lasi tanobadana ena lalona veria siahuna ita dadaraia totona. To, unai kara ese ia havaraia hahenamo namodia dainai iseda hekwarahi be mai anina bada.​—⁠Mataio 24:⁠12.

Inai goevadae lasi tanobadana lalonai danu, ita be ma haida ida turana karana namona ita moalelaia diba, unai amo ita bona ma haida ese moale, maino, bona noho namo do ita davaria. Unai bamona ita hekwarahi neganai, ita hamomokania ita be hegeregere Dirava ena tanobada matamatana hereadaena lalonai do ita mauri hanaihanai totona. Mai anina bada gauna be, lalokau ena dala hereadaena ita dibaia neganai, iseda lalokau Havaraia Tauna ese ita ia lalo-namo henia bona ita ia hanamoa, hari inai negai ela bona hanaihanai!

[Footnote]

[Pictures on page 10]

Keristani lalokau be hebogahisi karadia amo ita hahedinaraia diba

[Picture Credit Line on page 8]

UN PHOTO 186226/M. Grafman