Dirava Ena Hereva Ita Ura Henia Dainai Ita Abia Namo
“Aonega do oi ura henia, bona ia ese oi do ia gimaia. . . . Aonega do oi dogoatao auka, bona ia ese oiemu ladana do ia habadaia.”—AONEGA HEREVADIA 4:6, 8.
1. Dirava ena Hereva ura henia momokani ena anina be dahaka?
KERISTANI tauna ese Baibel ia duahia be gau badana. To, ia duahia karana sibona amo ia hahedinaraia diba lasi Dirava ena Hereva ia ura henia. Bema ta ese Baibel ia duahia to Baibel ese ia taravatua karadia ia karaia be edena bamona? Ia hedinarai goevagoeva, ia ese Dirava ena Hereva ia ura henia lasi, Salamo 119 ia torea tauna ese ia ura henia bamona. Ia ese Dirava ena Hereva ia ura henia dainai, ena taravatu ia badinaia.—Salamo 119:97, 101, 105.
2. Dirava ena Hereva amo ita abia aonega dainai dahaka namo do ita abia?
2 Ta ese Dirava ena Hereva ia badinaia noho totona ena laloa dalana bona ena mauri dalana ia haidaua hanaihanai be gau badana. Unai bamona kara ese Dirava ena aonega ia hahedinaraia, anina be Baibel stadilaia karana amo ia abia diba bona lalo-parara be ena mauri lalonai ia gaukaralaia. “Aonega do oi ura henia, bona ia ese oi do ia gimaia. Aonega do oi ura henia, bona ia ese oi do ia hanamoa bada. Aonega do oi dogoatao auka, bona ia ese oiemu ladana do ia habadaia. Ia ese oi dekenai hairai, bona matauraia do ia henia.” (Aonega Herevadia 4:6, 8, 9) Unai ese ita ia hagoadaia Dirava ena Hereva ita ura henia bona ena hakaua henunai ita noho totona! Ita ta ta ibounai ita ura gau ta ese ita ia gimaia, ia hanamoa bada, bona eda ladana ia habadaia, ani?
Noho Hanaihanai Dika amo Ita Ia Gimaia
3. Dahaka dainai gau badana be aonega ese hari inai negai Keristani taudia ia gimaia, bona daika amo?
3 Tau ta ese Dirava ena Hereva ia stadilaia bona badinaia karana amo ia abia aonega ese unai tau be edena bamona ia gimaia? Gau ta be, ia ese Satani Diabolo amo ia gimaia. Iesu ese ia murinai idia raka taudia ia hadibaia do idia guriguri, Dirava ese Satani ena imana amo idia do ia hamauria totona. (Mataio 6:13) Hari inai negai, iseda guriguri lalonai unai noinoi herevana ita gwauraia be mai anina bada. Lagani 1914 murinai, Satani bona ena demoni be guba amo idia negea diho, bona unai dainai Satani “ia badu, badina ia diba iena nega be ia kwadogi sibona.” (Apokalupo 12:9, 10, 12) Hari, dokona be kahirakahira negana lalonai, ena badu be ia bada herea, badina “Dirava ena taravatu idia badinaia momokani. Bona Iesu ena hereva momokani idia gwauraia hedinarai” taudia ia tuari henia noho, to ia kwalimu lasi.—Apokalupo 12:17.
4. Edena dala ai aonega ese Satani ia havaraia hekwakwanai bona tarapu amo Keristani taudia ia gimaia?
4 Mai ena badu ida Satani ese unai Keristani hesiai taudia dekenai hekwakwanai bona dagedage bada ia havaraia eiava edia gaukara be ma dala idauidau amo ia koua toho. Danu, ia ura Basileia harorolaia taudia ia koia, bena tanobada dekenai dagi bada, auka lasi maurina, kohu momo, bona moale karadia idia tahua, to Basileia harorolaia gaukarana do idia karaia lasi. Dahaka ese Dirava ena kamonai hesiai taudia ia gimaia, Satani ese edia lalona ia veria lasi bona iena tarapu lalodiai idia moru lasi totona? Momokani, gau badana be ita guriguri, hetura karana namona Iehova ida ita karaia, bona ita abia dae momokani ena gwauhamata be do idia guguru vaitani. To unai kara iboudiai lalonai Dirava ena Hereva ita diba bona iseda lalona ita hadaia Dirava ena Hereva ena hahegani do ita badinaia be gau badadia. Baibel bona Baibel stadi idia durua gaudia ita duahia, Keristani hebou ita lao henidia, iseda tadikaka ese Baibel amo idia henia sisiba ita badinaia, bona Dirava ena lauma ena heduru dainai ita laloa lou Baibel ena hakaua herevadia be mai guriguri ida ita lalohadailaia karadia amo unai hahegani ita abidia.—Isaia 30:21; Ioane 14:26; 1 Ioane 2:15-17.
5. Edena dala ma haida ai Dirava ena Hereva amo ita abia aonega ese ita ia gimaia?
5 Dirava ena Hereva idia ura henia taudia be dala ma haida ai ia gimaia danu. Hegeregere, idia ese kuku idia ania, drag ania kava, bona matabodaga karadia amo idia vara lalohisihisi bona gorere idia abia lasi. (1 Korinto 5:11; 2 Korinto 7:1) Idia ese udu mauri eiava hereva dikadia amo edia hetura karadia idia hadikaia lasi. (Efeso 4:31) Danu, idia ese tanobada taudia edia aonega herevadia idia tahua lasi dainai, idia daradara lasi. (1 Korinto 3:19) Dirava ena Hereva idia ura henia dainai, edia hetura karana Dirava ida bona mauri hanaihanai ena helaro idia hadikaia gaudia amo idia ia gimaia. Idia bisi bada edia dekena taudia idia durua Baibel lalonai idia noho gwauhamata namodia idia abidadama henia totona, badina idia diba unai amo ‘idia sibona ese mauri do idia davaria, bona idia dekenai idia kamonai taudia danu ese mauri do idia davaria.’—1 Timoteo 4:16.
6. Edena dala ai Dirava ena Hereva amo ita abia aonega ese hekwakwanai badadia lalonai ita ia gimaia diba?
6 Momokani, taunimanima iboudiai—Dirava ena Hereva idia ura henia taudia danu—ese “nega dika idia davaria noho, bona inai dika ia vara kava noho.” (Hadibaia Tauna 9:11) Iseda orea lalonai danu, haida ese idia vara kava dikadia, gorere dikadia, bona aksiden do idia davaria, bona haida be idia do matamata neganai idia mase. To, ita do ia gimaia. Dirava ena Hereva ia ura henia tauna ta ese ia noho hanaihanai dika do ia davaria lasi. Unai dainai, vaira negana lalonai dahaka do idia vara ita lalo-hekwarahilaia lasi be namo. Mai eda laloa maoromaoro ida gau idauidau ita karaia murinai, namona be Iehova ena imana dekenai ita rakatanidia bona hari inai negai idia vara bona iseda maino idia hadikaia diba gaudia ita laloa momo lasi. (Mataio 6:33, 34; Filipi 4:6, 7) Namona be ita laloatao noho, toreisi lou be do ia vara momokani bona Dirava ese ‘gau ibounai ia hamatamataia’ negana lalonai mauri namona do ita abia momokani.—Apokalupo 21:5; Ioane 11:25.
Oi Hamomokania Oi be “Tano Namona”
7. Iesu ese ena hereva idia kamonai totona idia mai taunimanima hutuma dekenai ia gwauraia parabolena be dahaka?
7 Dirava ena Hereva be dala maorona ai ita laloa be gau badana be Iesu ena parabole ta ese ia hahedinaraia goevagoeva. Iesu be Palestine ibounai lalonai sivarai namona ia harorolaia neganai, taunimanima hutuma idia mai ia idia kamonai totona. (Luka 8:1, 4) To, idia ibounai ese Dirava ena Hereva idia ura henia momokani lasi. Ita daradara lasi, momo idia mai badina idia ura hoa karadia idia itaia eiava ena hadibaia dalana namona idia moalelaia. Unai dainai, Iesu ese unai taunimanima dekenai parabole ta ia gwauraia: “Uhe hadoa tauna ta ese uma dekenai ia lao, uiti negea lao, negea mai totona. Vadaeni ia negea lao negea mai neganai, uhe haida be dala dekenai idia moru, vadaeni taunimanima ese idia moia aena dekenai, bona manu ese idia ania ore. Uhe haida be tano mai nadi momo danu dekenai idia moru, idia tubu, to idia kakoro, badina tano be ia paripari lasi. Ma uhe haida be ava ginigini dekenai idia moru, vadaeni ginigini danu idia tubu nega tamona, bona ginigini ese uiti idia koua. To uhe haida be tano namona dekenai idia moru, vadaeni idia tubu namonamo, edia anina idia atoa, ta ta edia anina be 100.”—Luka 8:5-8.
8 Iesu ena parabole ese ia hahedinaraia sivarai namona ita harorolaia neganai, taunimanima edia kara be idauidau, edia kudouna hegeregerena. Ita hadoa uhena be “Dirava ena hereva.” (Luka 8:11) Eiava, unai parabole ia torea tauna ma ta ia gwau bamona, unai uhe be “Basileia ena sivarai.” (Mataio 13:19) Iesu ese unai hereva ruaosi ia gaukaralaia diba, badina Dirava ena Hereva ena sinado badana be Iesu Keriso ese ia lohiaia guba Basileiana, bona Iehova ese unai Basileia amo ena lohia siahuna ena maoro do ia hamomokania bona ena ladana do ia hahelagaia. (Mataio 6:9, 10) Unai dainai, ita gwau diba unai uhe be sivarai namona, Dirava ena Hereva, Baibel, lalonai ia noho gauna. Iehova ena Witness taudia ese Hadoa Tauna Badana, Iesu Keriso, ena kara idia tohotohoa bona uhe idia hadoa neganai, Basileia ena sivarai idia gwauraia hedinarai. Unai sivarai idia harorolaia neganai, taunimanima edia kara be edena bamona?
9 Iesu ia gwau uhe haida be dala dekenai idia moru bona taunimanima ese idia moidia. Unai ese ia laulaulaia taudia be idia bisi bada herea taudia, unai dainai, Basileia ena uhe ena ramuna be edia kudouna dekenai idia vareai lasi. Edia ura Dirava ena Hereva dekenai ia do bada lasi lalonai, “Satani be ia mai, edia [kudouna] dekena amo hereva be ia abia siri, do idia abia dae bona do idia mauri garina.” (Luka 8:12) Uhe haida be nadi gabuna ai idia moru. Unai ese ia laulaulaia taudia be Baibel ena sivarai idia moalelaia to edia kudouna amo idia abia dae lasi. Dagedage idia davaria neganai, eiava idia davaria Baibel ena sisiba idia badinaia be auka neganai, “kerere ia vara idia dekenai” badina idia be ramuna lasi. (Luka 8:13) Bena taunimanima haida ese hereva idia kamonai to inai “tanobada ena laloa, bona ena gau momo, bona ena moale” ese edia kudouna idia veria. Gabeai, ava ginigini ese idia koua tubutubu gaudia bamona, “idia be mai edia huahua lasi.”—Luka 8:14.
10 Vadaeni, uhe haida be tano namona dekenai idia moru gaudia. Unai ese “mai edia lalona maoromaoro bona goevagoeva danu” hereva idia kamonai taudia ia laulaulaia. Momokani, ita ta ta ita ura ita be unai bamona taudia ta. To, dokonai, Dirava sibona ena lalohadai be mai anina bada. (Aonega Herevadia 17:3; 1 Korinto 4:4, 5) Iena Hereva ia gwau hari amo ela bona ita mase eiava ela bona Dirava ese inai tanobada dikana do ia hadikaia ore negana lalonai ita karaia kara amo, ita hamomokania iseda kudouna be “maoromaoro bona goevagoeva” eiava lasi. Bema Basileia ena sivarai ita kamonai bona ita abia dae be namo herea. To, edia kudouna be maoromaoro bona goevagoeva taudia ese Dirava ena Hereva idia abia dae bona “idia dogoatao auka momokani, idia hesiku lasi, ela bona edia huahuana idia havaraia.”—Luka 8:15.
10, 11. (a) Tano namona ese daidia ia laulaulaia? (b) Dahaka ita karaia be namo, Dirava ena Hereva be iseda kudouna dekenai ita “dogoatao” totona?
11 Dirava ena Hereva be iseda kudouna dekenai ita dogoatao dalana tamona be do ita duahia bona ita stadilaia ita sibona ita noho neganai bona abidadama taudia ma haida ida ita hebou neganai. Unai ena anina ta be, Iesu murinai idia raka taudia momokanidia dekenai lauma aniani henia totona ia abia hidi oreana amo unai aniani ita moalelaia. (Mataio 24:45-47) Unai gaudia dainai, Dirava ena Hereva be edia kudouna dekenai idia dogoatao taudia be lalokau ese ia veria dainai “idia hesiku lasi, ela bona edia huahuana idia havaraia.”
12. Mai haheauka ida ita havaraia huahua be dahaka?
12 Tano namona ese edena huahua ia havaraia? Uma lalonai, uhe idia tubu bona tubutubu gaudia badadia ai idia lao, huahua idia havaraia bona unai huahua lalonai uhe ma haida idia noho, ta ese ia hadoa diba bona ma huahua do ia havaraia. Unai hegeregerena, mai edia kudouna maoromaoro bona goevagoeva taudia lalonai hereva ena uhe ia tubu, bona unai dainai lauma dalanai idia goada idia lao ela bona idia danu ese ma haida edia kudouna dekenai unai uhe idia hadoa diba. (Mataio 28:19, 20) Bona edia hadoa gaukarana lalonai hesiku lasi karana idia hahedinaraia. Iesu ese ia hahedinaraia hadoa gaukara lalonai haheauka be mai anina bada, ia gwau: “Iena lalona do ia goada noho ela bona dokona, unai tauna be do ia mauri. Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”—Mataio 24:13, 14.
‘Kara Namodia Edia Anina Do Oi Havaraia’
13. Paulo ese dahaka guriguri ia gwauraia bona anina havaraia karana be Dirava ena Hereva dibaia karana ida ia hakapua?
13 Aposetolo Paulo danu ia gwau anina do ita havaraia be gau badana, bona ia ese anina havaraia karana be Dirava ena Hereva ida ia hakapua. Ena tadikaka taudia totona ‘Dirava ia noia, ia ese iena ura dalana idia dekenai do ia hadibaia, bona Lauma Helaga ena diba bona diari idia dekenai do ia henia. Vadaeni Lohiabada ena ura hegeregerena do idia noho, bona nega ibounai idia ese ia do idia hamoalea. Edia mauri ese kara namodia edia anina do idia havaraia totona.’—Kolose 1:9, 10; Filipi 1:9-11.
14 Unai amo Paulo ia hahedinaraia Baibel ena diba ita abia be ita tahua gauna badana lasi. To, Dirava ena Hereva ita ura henia dainai, unai ese ita ia doria ‘kara namodia edia anina do ita havaraia’ bona ‘Iehova ena ura hegeregerena do ita noho.’ Unai kara namodia be dahaka? Hari inai dokona negana lalonai, Basileia ena sivarai namona harorolaia gaukarana be Keristani taudia ese idia karaia gaukara badana. (Mareko 13:10) Ma danu, Dirava ena Hereva idia ura henia taudia be kontribusen moni idia henia hanaihanai unai gaukara idia durua totona. Unai idia karaia diba dainai idia moale, badina idia diba “mai moale danu ia henia tauna be Dirava ese ia lalokau henia noho.” (2 Korinto 9:7) Edia kontribusen monina be Betele ruma handred ma haida edia heau dalana ena davana karaia totona idia gaukaralaia, unai Betele rumadia amo Basileia haroro gaukarana idia hakaua bona idia haida dekenai Baibel bona Baibel bukadia idia printaia. Danu, edia kontribusen monina amo Keristani hebouhebou badadia edia davana idia karaia diba bona loaloa naria taudia, misinari taudia, bona ful-taim haroro gaukara idia karaia taudia ma haida idia siaia loaloa diba.
14-16. Paulo ena guriguri hegeregerena, Dirava ena Hereva idia ura henia taudia ese dahaka anina idia havaraia?
15 Kara namodia ma haida be tomadiho momokani gabudia haginia bona naria gaukarana. Dirava ena Hereva idia ura henia dainai ia idia tomadiho henia taudia ese Assembly Hall bona Kingdom Hall idauidau idia naria namonamo. (Nehemia 10:39 itaia.) Dirava ena ladana be unai bamona ruma edia haba dekenai ia hedinarai dainai, gau badana be edia lalona bona murimurina idia goeva bona edia toana be namo bona unai gabudia dekenai idia tomadiho taudia edia kara be ta ese ia gwauraia dika diba lasi. (2 Korinto 6:3) Keristani taudia haida ese kara badadia idia karaia diba. Dirava ena Hereva idia ura henia dainai unai ese idia ia doria, tanobada ena daudau gabudia haida dekenai idia lao tomadiho gabudia matamatadia idia haginia totona, badina unai gabudia dekenai ogogami be bada eiava gaukara idia karaia diba taudia be lasi.—2 Korinto 8:14.
16 Danu, ‘kara namodia edia anina do ita havaraia’ totona, namona be iseda ruma bese maduna idauidau ita huaia bona iseda Keristani tadikaka ita laloa bada danu. Dirava ena Hereva ita ura henia dainai “Keriso ena abidadama henia taudia” edia dabu gaudia ita laloa bona Dirava ita badinaia dainai “iseda ruma taudia do ita laloa bona durua.” (Galatia 6:10; 1 Timoteo 5:4, 8) Unai bamona kara namodia haida be gorere taudia ita vadivadi henia bona lalohisihisi taudia ita hagoadaia. Bona kongregesen elda taudia bona Hospital Liaison Committee taudia ese medikol dalanai hekwakwanai badadia idia davaria taudia idia durua neganai, idia ese gaukara namo herea momokani idia karaia! (Kara 15:29, NW ) Bona dika badadia idia vara danu—idia haida idia vara kava bona haida be taunimanima edia kavakava karadia dainai idia vara. Dirava ena lauma ena heduru amo, Iehova ena Witness taudia be tanobada ena kahana momo dekenai edia tadikaka bona ma haida be dika idauidau bona aksiden idia davaria neganai, karaharaga idia durudia. Unai ibounai be Dirava ena Hereva idia ura henia taudia ese idia havaraia huahua namodia.
Vaira Negana Lalonai Do Ita Abia Namo
17, 18. (a) Basileia ena uhe hadoa gaukarana ese dahaka ia havaraia? (b) Dahaka gau badadia be nega sisina murinai Dirava ena Hereva idia ura henia taudia ese do idia itaia?
17 Basileia ena uhe hadoa gaukarana ese taunimanima dekenai hahenamo badadia ia havaraia noho. Vanegai laganidia lalonai, Baibel ena sivarai ese edia kudouna dekenai ramuna ia atoa dainai edia mauri be Iehova dekenai idia gwauhamatalaia bona ranu bapatiso amo unai idia hahedinaraia taudia edia averes lagani ta ta ai be 300,000. Vaira negana namo hereana do idia abia!
18 Dirava ena Hereva idia ura henia taudia idia diba, nega sisina murinai, Iehova Dirava ese ena ladana do ia abia isi. “Babulonia Badana,” tanobada ena tomadiho koikoi ibounai, be do ia hadikaia ore. (Apokalupo 18:2, 8) Bena, Dirava ena Hereva idia ura lasi idia badinaia taudia be King, Iesu Keriso, ese do ia hamasea. (Salamo 2:9-11; Daniela 2:44) Unai murinai, Dirava ena Basileia ese taravatu utua karana, tuari, bona dika iboudiai do ia hadikaia ore momokani. Taunimanima be hisihisi, gorere, bona mase dainai idia ita hagoadaia karana be do ia ore.—Apokalupo 21:3, 4.
19, 20. Dirava ena Hereva idia ura henia momokani taudia ese edena bamona vaira negana namona do idia abia?
19 Unai nega lalonai, Dirava ena Hereva idia ura henia taudia ese kara namodia do idia karaia! Aramagedono amo idia roho mauri taudia edia gaukara ginigunana be mai moale bada ida tanobada be paradaiso ai do idia halaoa. Do idia moale bada badina hari guri lalonai idia mahuta noho bona Dirava ese ia laloatao bona toreisi lou do idia abia taudia totona gau idauidau do idia hegaegaelaia. (Ioane 5:28, 29) Unai nega lalonai, Siahu Ibounai Lohiabadana, Iehova, ese ladana badana ia henia Natuna, Iesu Keriso, amo hakaua herevadia goevadia do ia henia. ‘Buka haida do ia kehoa,’ bona idia ese Iehova ena hadibaia herevadia idia halasia tanobada matamatana maurina totona.—Apokalupo 20:12.
20 Iehova ese ia abia hidi negana ai, mai edia kamonai horoa Keristani taudia iboudiai be guba dekenai hairai do idia abia bona Keriso ida do idia lohia. (Roma 8:17, NW ) Keriso ena Lagani 1,000 Lohia Negana lalonai, tanobada dekenai idia noho Dirava ena Hereva idia ura henia taudia ibounai edia lalona bona tauanina be do ia goevadae. Hahetoho ginigabena lalonai idia gini goada murinai mauri hanaihanai ena ahuna do idia abia bona “Dirava ena natudia edia ura kwalimu hereadaena do idia abia.” (Roma 8:21, NW; Apokalupo 20:1-3, 7-10) Unai be nega namo hereana! Momokani, herevana Iehova ese guba helarona eiava tanobada helarona ia henia ita dekenai, to iena Hereva ita ura henia noho bona iseda lalona ita hadaia iena aonega hegeregerena ita noho dainai, unai aonega ese hari ita ia gimaia. Bona vaira neganai ia ese ‘iseda ladana do ia habadaia.’—Aonega Herevadia 4:6, 8.
Anina Oi Gwauraia Diba, A?
◻ Dirava ena Hereva ita ura henia karana ese edena dala ai ita do ia gimaia?
◻ Iesu ena parabole lalonai ia gwauraia uhena be dahaka, bona edena dala ai ita hadoa?
◻ Edena dala ai ita hamomokania diba ita be “tano namona”?
◻ Dirava ena Hereva idia ura henia taudia ese do idia abia namo be dahaka dahaka?
8. Iesu ena parabole lalonai uhe be dahaka ia laulaulaia?
9. Inai gabu dekenai ia moru uhe ese dahaka ia laulaulaia (a) dala dekenai? (b) nadi gabuna dekenai? (c) ava ginigini dekenai?
[Picture on page 16]
Iesu ena parabole lalonai ia gwauraia uhena ese Dirava ena Hereva lalonai ia noho sivarai namona ia laulaulaia
[Credit Line]
Garo Nalbandian
[Picture on page 17]
Iehova ena Witness taudia ese Hadoa Tauna Badana idia tohotohoa
[Pictures on page 18]
Aramagedono amo idia roho mauri taudia ese tanobada ena huahua do idia moalelaia